ഇരിങ്ങാലക്കുട: വീട്ടിലെ ലൈബ്രറി 2026 ല് ഏര്പ്പെടുത്തിയ ഓര്മക്കുറിപ്പുകള്ക്കുള്ള സാഹിത്യ പുരസ്കാരത്തിന് സജ്ന ഷാജഹാന് തെരഞ്ഞെടുക്കപ്പെട്ടു.
ഞാവല്പ്പഴ മധുരങ്ങള്, മഴ എന്നീ കൃതികള്ക്കാണ് പുരസ്കാരം. സ്പെഷ്യല് ജൂറി പുരസ്കാരത്തിന് ആതിര അംഗിരസ്, ഡോ. കെ.എം. മഞ്ജുള എന്നിവര് തെരഞ്ഞെടുക്കപ്പെട്ടു. കടലാസ് തോണികള്, സൗഹൃദപ്പടര്പ്പിലൂടെ ഒരു വാക്സഞ്ചാരം എന്നീ കൃതിക്കാണ് ജൂറി പുരസ്കാരം ലഭിച്ചത്. കൂടാതെ വീട്ടിലെ ലൈബ്രറിയുടെ മാനദണ്ഡ നിര്ദ്ദേശപ്രകാരം ഓരോ വീടുകളിലും ലൈബ്രറി സജ്ജീകരിച്ചിട്ടുള്ളവരില്നിന്നും പതിനാറു പേരെ തെരഞ്ഞെടുത്തു.
മലയാളം, തമിഴ്, കന്നഡ തുടങ്ങിയ സാഹിത്യ സാംസ്കാരിക രംഗത്തെ പ്രഗത്ഭരായവര് പങ്കെടുക്കുന്ന വേദിയില്വെച്ച് ഇവരെയും പ്രത്യേകം ആദരിക്കും.
2026 ഏപ്രില് മാസത്തില്തന്നെ സാഹിത്യ പുരസ്കാരം വീട്ടിലെ ലൈബ്രറി അങ്കണത്തില് സജ്ജീകരിക്കുന്ന പ്രൗഢമായ സാഹിത്യ വേദിയില് പുരസ്കാര സമര്പ്പണം നടത്തുമെന്ന് വീട്ടിലെ ലൈബ്രറി കോ-ഓര്ഡിനേറ്റര് റഷീദ് കാറളം പറഞ്ഞു.