ഈരാറ്റുപേട്ട: കഴിഞ്ഞ ജനുവരി 29നു മുന് മന്ത്രി കെ.എന്. ബാലഗോപാല് അവതരിപ്പിച്ച ബജറ്റില് മുന് എംഎല്എ നിര്ദേശിച്ച പദ്ധതികള്ക്കു മാത്രമാണ് മുഖ്യമന്ത്രി വി.ഡി. സതീശന് അവതരിപ്പിച്ച ബജറ്റില് ഭരണാനുമതിയോടുകൂടി തുക വകയിരുത്തിയിട്ടുള്ളതെന്നും പുതിയ പദ്ധതികള് ഒന്നുംതന്നെ പൂഞ്ഞാറിനു ബജറ്റില് വന്നിട്ടില്ലെന്നും സെബാസ്റ്റ്യന് കുളത്തുങ്കല്.
പഴയ ബജറ്റ് നിര്ദേശങ്ങളിലെ വാഗമണ്-ഇളങ്കാട് കേന്ദ്രീകരിച്ച് ടൂറിസം സര്ക്യൂട്ട്, കോരുത്തോട് പഞ്ചായത്തിന് പുതിയ ആസ്ഥാനമന്ദിരം, എരുമേലി മാസ്റ്റര്പ്ലാന് രണ്ടാംഘട്ടം, പുഞ്ചവയലില് പട്ടികജാതി-പട്ടികവര്ഗ വിഭാഗങ്ങള്ക്ക് സ്കില് ഡെവലപ്മെന്റ് ട്രെയിനിംഗ് സെന്റര്, മുക്കൂട്ടുതറ പഞ്ചായത്ത് രൂപീകരണം, പൂഞ്ഞാറില് കാര്ഷിക മൂല്യവര്ധിത ഉത്പന്ന നിര്മാണകേന്ദ്രം തുടങ്ങിയവ ഒഴിവാക്കിയതായും സെബാസ്റ്റ്യന് കുളത്തുങ്കല് ചൂണ്ടിക്കാട്ടി.
ശബരിമല ഗ്രീന്ഫീല്ഡ് ഇന്റര്നാഷണല് എയര്പോര്ട്ട് സ്ഥാപിക്കുന്നതിന് ഹൈക്കോടതി വിധിമൂലം ഉണ്ടായിട്ടുള്ള തടസങ്ങള് പരിഹരിക്കുന്നതിനുള്ള നിര്ദേശങ്ങള് മുന്നോട്ടുവച്ചിട്ടില്ല. പൂഞ്ഞാറിനെ എഡ്യൂക്കേഷണല് ഹബ്ബാക്കി മാറ്റുക, റൈസിംഗ് പൂഞ്ഞാര് നിക്ഷേപകസംഗമത്തില് ഉയര്ന്നുവന്ന നിര്ദേശങ്ങള് യാഥാര്ഥ്യമാക്കി പുതിയ സംരംഭങ്ങളും തൊഴിലവസരങ്ങളും സൃഷ്ടിക്കല് തുടങ്ങിയവയൊന്നും ബജറ്റില് ഇടംപിടിച്ചില്ല.
പുതിയ താലൂക്ക് രൂപീകരണം, ഈരാറ്റുപേട്ട ട്രാഫിക് പോലീസ് യൂണിറ്റ് സ്ഥാപിക്കല്, ഈരാറ്റുപേട്ട കുടുംബാരോഗ്യകേന്ദ്രം താലൂക്ക് ആശുപത്രിയായി ഉയര്ത്തല് തുടങ്ങിയവ ഭരണാനുമതിയുള്ള പദ്ധതികളില് ഉള്പ്പെടുത്താതെ ടോക്കണ് പ്രൊവിഷനോടുകൂടിയുള്ള ബജറ്റ് നിര്ദേശങ്ങളായി മാത്രം ഉള്ക്കൊള്ളിച്ചിരിക്കുന്നതു നിരാശാജനകമാണ്.
റബറിന്റെ അടിസ്ഥാനവില 250 രൂപയാക്കി ഉയര്ത്തിയ പ്രഖ്യാപനം സ്വാഗതാര്ഹമാണെന്നും സെബാസ്റ്റ്യന് കുളത്തുങ്കല് പറഞ്ഞു.
Tags : budget Nattuvishesham Distric News