13

​പേ​രൂ​ര്‍​ക്ക​ട: തെരുവുനാ​യകളുടെ ക്രൂ​ര​മാ​യ ആ​ക്ര​മ​ണ​ത്തി​ല്‍ ക​ണ്ണി​നു ഗു​രു​ത​ര​മാ​യി പ​രി​ക്കേ​റ്റ വ​യോ​ധി​ക​ന്‍ ആ​ശു​പ​ത്രി​വാ​സ​ത്തി​നു​ശേ​ഷം വീ​ട്ടി​ല്‍ മ​ട​ങ്ങി​യെ​ത്തി. വ​ട്ടി​യൂ​ര്‍​ക്കാ​വ് വേ​ട്ട​മു​ക്ക് ക​ട്ട​ച്ച​ല്‍ റോ​ഡ് കെ.​ആ​ര്‍.​ഡ​ബ്ല്യു.​എ 192 സാ​യി​പ്ര​ഭ​യി​ല്‍ വാ​ട​ക​യ്ക്കു താ​മ​സി​ച്ചു​വ​രു​ന്ന ച​ന്ദ്ര​നാ​ണ് (69) തി​രു​വ​ന​ന്ത​പു​രം മെ​ഡി​ക്ക​ല്‍​കോ​ള​ജ് ആ​ശു​പ​ത്രി​യി​ലെ ചി​കി​ത്സ​യ്ക്കും ക​ണ്ണാ​ശു​പ​ത്രി​യി​ലെ പ​രി​ശോ​ധ​ന​ക​ള്‍​ക്കും ശേ​ഷം വ്യാ​ഴാ​ഴ്ച വൈ​കു​ന്നേ​രം ബ​ന്ധു​ക്ക​ളു​ടെ​യും വീ​ട്ടു​കാ​രു​ടെ​യും സ​ഹാ​യ​ത്തോ​ടെ വീ​ട്ടി​ല്‍ മ​ട​ങ്ങി​യെ​ത്തി​യ​ത്.

ഒ​രാ​ഴ്ച മു​മ്പാ​ണ് വീ​ടി​ന്‍റെ ഗേ​റ്റ് ക​ട​ന്ന് ക​ട​യി​ലേ​ക്കു പോ​കു​ക​യാ​യി​രു​ന്ന ച​ന്ദ്ര​നെ നായകൾ കൂട്ടമായി ആ​ക്ര​മി​ച്ച​ത്. റോ​ഡി​ല്‍ വീ​ണ ഇ​ദ്ദേ​ഹ​ത്തി​ന്‍റെ വ​ല​തു​ക​ണ്ണിന് ഗുരുതര പരിക്കേറ്റു. മു​ഖ​ത്താ​കെ മുറിവേറ്റ ച​ന്ദ്ര​നെ വീ​ട്ടു​കാ​ര്‍ ഉ​ട​ന്‍​ത​ന്നെ ആ​ശു​പ​ത്രി​യി​ല്‍ പ്ര​വേ​ശി​പ്പി​ക്കു​ക​യാ​യി​രു​ന്നു.

ആ​ക്ര​മ​ണ​ത്തി​ല്‍ ഒരു ക​ൺപോ​ള ന​ഷ്ട​പ്പെ​ട്ടതിനെ തുടർന്ന് മെ​ഡി​ക്ക​ല്‍​കോ​ള​ജ് ആ​ശു​പ​ത്രി​യി​ല്‍ ശ​സ്ത്ര​ക്രി​യ നടത്തി. കൺപോ​ള​യ്ക്കാ​യി പ്ലാ​സ്റ്റി​ക് സ​ര്‍​ജ​റി​യും പൂ​ര്‍​ത്തീ​ക​രി​ക്കു​ക​യു​ണ്ടാ​യി. കൃ​ഷ്ണ​മ​ണി​യി​ല്‍ ക​ടി​യേ​ല്‍​ക്കാ​ത്ത​തി​നാ​ല്‍ ചി​കി​ത്സ​യി​ലൂ​ടെ കാ​ഴ്ച തി​രി​കെ ല​ഭി​ക്കു​ക​യാ​യി​രു​ന്നു.

പ​രി​ശോ​ധ​ന​യി​ല്‍ കാ​ഴ്ച​യ്ക്കു വേ​റെ പ്ര​ശ്‌​ന​ങ്ങ​ളി​ല്ലെ​ന്നു ആ​ശു​പ​ത്രി അ​ധി​കൃ​ത​ര്‍ അ​റി​യി​ച്ചു. എ​ന്നാ​ല്‍ കൃ​ഷ്ണ​മ​ണി​യു​ടെ ഭാ​ഗ​ത്ത് ചെ​റി​യ​രീ​തി​യി​ലു​ള്ള അ​ട​യാ​ള​ങ്ങ​ള്‍ ഉ​ള്ള​തി​നാ​ല്‍ ലെ​ന്‍​സ് വ​യ്‌​ക്കേ​ണ്ട​താ​യി വ​രും.​ഒ​രാ​ഴ്ച​ത്തെ പൂ​ര്‍​വി​ശ്ര​മം ച​ന്ദ്ര​ന് നി​ര്‍​ദ്ദേ​ശി​ച്ചി​രി​ക്കു​ക​യാ​ണ് ഡോ​ക്ട​ര്‍​മാ​ര്‍.

Tags : Local News Nattuvishesham Thiruvananthapuram