സേനാപതി വേണു എംഎൽഎ കെ.വി. പരമേശ്വരനെ ആദരിക്കുന്നു.
നെടുങ്കണ്ടം: നിസ്വാർഥസേവനത്തിന്റെ പ്രതീകമായ കരമങ്ങാട്ട് കെ.വി. പരമേശ്വരന് നാടിന്റെ ആദരം. കരുണാപുരം, പാമ്പാടുംപാറ നെടുങ്കണ്ടം മേഖലകളില് എവിടെ മരണം നടന്നാലും ഈ 76കാരന് അവിടെ ഓടിയെത്തും. മരണവിവരം ബന്ധുക്കളെയും നാട്ടുകാരെയും അറിയിക്കും. മാധ്യമങ്ങളിലേക്കും വിവരം എത്തിക്കും. ഒരു വര്ഷം അഞ്ഞൂറിലേറെ മരണങ്ങളുടെ വിവരങ്ങള് ഇദ്ദേഹം മറ്റുള്ളവരിലേക്ക് എത്തിക്കാറുണ്ട്.
തൂക്കുപാലം ചോറ്റുപാറ സ്വദേശിയായ ഇദ്ദേഹം1978ലാണ് സേവനരംഗത്തേക്കു കടന്നുവന്നത്. പിന്നീട് സര്ക്കാര് സര്വീസില് പാര്ട്ട് ടൈം ജീവനക്കാരനായി. വിരമിച്ചശേഷവും പൊതുരംഗത്തു തുടർന്നു. ആദ്യകാലത്ത് കാല്നടയായും ടാക്സി ജീപ്പിലുമായിരുന്നു മരണവീടുകളിലേക്കുള്ള യാത്ര.
ഇപ്പോള് സ്വന്തം ബൈക്കിലാണ് പരമേശ്വരന്റെ യാത്ര. നവമാധ്യമങ്ങളും വിവരങ്ങൾ പങ്കുവയ്ക്കാൻ ഉപയോഗിക്കുന്നുണ്ട്. കരുണാപുരം, പാമ്പാടുംപാറ നെടുങ്കണ്ടം മേഖലകളില് കാല്നൂറ്റാണ്ടിലേറെയായി തുടരുന്ന പ്രതിഫലേച്ഛയില്ലാത്ത സേവനം പരമേശ്വരന്റെ ജീവിതത്തിന്റെ ഭാഗമായിക്കഴിഞ്ഞു. സേവനം മുൻനിർത്തി വിവിധ സംഘടനകള് ഇദ്ദേഹത്തെ ആദരിച്ചു.
Tags : Nattuvishesham DistrictNews DeepikaNews