പുൽപ്പള്ളി: കേന്ദ്ര സർക്കാർ കേരളത്തോടുള്ള അവഗണനയും സാന്പത്തിക വിവേചനവും അവസാനിപ്പിക്കണമെന്ന് കേരള കോണ്ഗ്രസ്-ബി വയനാട് ജില്ലാ പ്രസിഡന്റ് കെ.ആർ. ജയരാജ്. സംസ്ഥാനത്തോടുള്ള കേന്ദ്ര അവഗണനയ്ക്കെതിരേ കേരള കോണ്ഗ്രസ്-ബി ബത്തേരി നിയോജകമണ്ഡലം കമ്മിറ്റി ടൗണിൽ സംഘടിപ്പിച്ച പ്രതിഷേധ സദസ് ഉദ്ഘാടനം ചെയ്യുകയായിരുന്നു അദ്ദേഹം. ബജറ്റിന് മുന്നോടിയായി കേരളം ആവശ്യപ്പെട്ട 27 കാര്യങ്ങളിൽ ഒന്നുപോലും പരിഗണിക്കാൻ കേന്ദ്രം തയാറായില്ല.
ഇത്രയും അവഗണന ആദ്യമാണ്. കേന്ദ്ര അവഗണനയ്ക്കെതിരേ സത്യസന്ധമായി പ്രതികരിക്കാൻ യുഡിഎഫും ബിജെപി സംസ്ഥാന നേതൃത്വവും തയാറാകുന്നില്ല.
ഇടതുമുന്നണി ഉയർത്തിപ്പിടിക്കുന്ന വികസനനയത്തിന് വലിയ ജനപിന്തുണയാണ് ലഭിക്കുന്നത്. ഇത് വരാനിരിക്കുന്ന നിയമസഭാ തെരഞ്ഞെടുപ്പിൽ പ്രതിഫലിക്കുമെന്നും ജയരാജ് പറഞ്ഞു. നിയോജകമണ്ഡലം പ്രസിഡന്റ് പി.പി. ദാമോദരൻ അധ്യക്ഷത വഹിച്ചു. കേരള കോണ്ഗ്രസ്-ബി സംസ്ഥാന കമ്മിറ്റി അംഗം കെ.പി. ശശികുമാർ, സിപിഎം ലോക്കൽ സെക്രട്ടറി ശരത്കുമാർ, മഹിളാ കോണ്ഗ്രസ്-ബി ജില്ലാ പ്രസിഡന്റും പഞ്ചായത്ത് വിദ്യാഭ്യാസ-ആരോഗ്യ സ്റ്റാൻഡിംഗ് കമ്മിറ്റി ചെയർപേഴ്സണുമായ ഷൈജ മഗേഷ്, പാർട്ടി ജില്ലാ ഭാരവാഹികളായ എം.എൻ. രാമചന്ദ്രൻ, ടി.കെ. വിശ്വംഭരൻ, കെ.ജി. അരുണ്, സി.ആർ. പ്രദീപ്, ഷിബി തന്പാൻ, സൗമ്യ ജോണ്സണ്, ജോസഫ്, സി.കെ. അനുമോൻ എന്നിവർ പ്രസംഗിച്ചു.