ആളൂര്: സ്കൂള് കുട്ടികളെയും യുവാക്കളെയും ലക്ഷ്യമിട്ട് വില്പനയ്ക്കായി സൂക്ഷിച്ച നിരോധിത പുകയില ഉത്പന്ന ശേഖരവുമായി മധ്യവയസ്കന് പിടിയിലായി. കല്ലേറ്റുംകര വല്ലക്കുന്ന് സ്വദേശി പായമ്മല് വീട്ടില് ജോബി (55) എന്നയാളെയാണ് ആളൂര് പോലീസ് അറസ്റ്റ് ചെയ്തത്. കല്ലേറ്റുംകരയില് വച്ചാണ് പ്രതിയെ പോലീസ് സംഘം പിടികൂടുന്നത്.
പ്രദേശത്ത് കുട്ടികള്ക്കും മറ്റും വ്യാപകമായി ലഹരി ഉത്പന്നങ്ങള് വില്പന നടത്തുന്നുണ്ടെന്ന രഹസ്യ വിവരത്തിന്റെ അടിസ്ഥാനത്തില് പോലീസ് നടത്തിയ പരിശോധനയിലാണ് ഇയാള് വലയിലായത്. ഇയാളില് നിന്നും വില്പനയ്ക്കായി സൂക്ഷിച്ചിരുന്ന നിരോധിത പുകയില ഉത്പന്നങ്ങളായ ഹാന്സ്, കൂള്ലിപ്പ്, മറ്റ് നിരോധിത പുകയില ഉത്പന്നങ്ങള്, നിയമപ്രകാരമുള്ള മുന്നറിയിപ്പില്ലാത്ത സിഗററ്റ് പാക്കറ്റുകള് എന്നിവ പിടിച്ചെടുത്തു.
പ്രതിക്കെതിരെ എന്ഡിപിഎസ് (നാര്കോട്ടിക് ഡ്രഗ്സ് ആന്ഡ് സൈക്കോട്രോപിക് സബ്സ്റ്റന്സസ് ആക്ട്) നിയമത്തിന് പുറമെ ബാലനീതി നിയമത്തിലെ ജാമ്യമില്ലാ വകുപ്പും കൂടി ചുമത്തി കേസ് രജിസ്റ്റര് ചെയ്തു. ആളൂര് പോലീസ് സ്റ്റേഷന് എസ്ഐ മനു പി. ചെറിയാന്, സിപിഒമാരായ വിശാഖ്, ആദര്ശ്, ആകാഷ് എന്നിവര് ചേര്ന്നാണ് പ്രതിയെ പിടികൂടിയത്.