പാലാ: റോഡരികില്നിന്ന ഉണങ്ങിയ തെങ്ങ് ഒടിഞ്ഞുവീണ് ബൈക്കില് യാത്ര ചെയ്തിരുന്ന രണ്ടു വിദ്യാര്ഥികള്ക്ക് പരിക്കേറ്റു. കഴിഞ്ഞ ദിവസം വൈകുന്നേരം മീനച്ചില് പഞ്ചായത്തിലെ വള്ളോംകുളം-കിഴപറയാര് റോഡില് തറപ്പേല് ഭാഗത്താണ് സംഭവം. കിഴപറയാര് കണ്ടത്തില് ബെന് ബാസ്റ്റിന് (21), പന്തലാനിക്കല് പ്രവീണ് ജോണി (18) എന്നിവര്ക്കാണ് പരിക്കേറ്റത്.
ഗുരുതരമായി പരിക്കേറ്റ ബെന് ബാസ്റ്റിന് തെള്ളകത്തെ സ്വകാര്യ ആശുപത്രിയില് ചികിത്സയിലാണ്. ഉണങ്ങിയ തെങ്ങ് വൈദ്യുതിലൈനിലേക്കും തുടര്ന്ന് ഇവരുടെ ദേഹത്തേക്കും വീണതോടെ ബൈക്ക് നിയന്ത്രണംവിട്ട് മറിയുകയായിരുന്നു.
റോഡരികിലെ ഉണങ്ങിയ തെങ്ങ് വെട്ടിമാറ്റണമെന്ന് ഒട്ടേറെത്തവണ ആവശ്യപ്പെട്ടെങ്കിലും അധികൃതര് യാതൊരു നടപടിയും സ്വീകരിച്ചില്ലെന്ന് നാട്ടുകാര് പറയുന്നു. വള്ളോംകുളം-ചിലമ്പില് റോഡില് പാലാക്കാട് മുണ്ടമറ്റം ഭാഗത്തും അപകടഭീഷണി ഉയര്ത്തി ഉണങ്ങിയ തെങ്ങ് നില്ക്കുന്നുണ്ട്. ഒട്ടേറെ വാഹനങ്ങളും സ്കൂള് ബസുകളും വിദ്യാര്ഥികളുള്പ്പെടെ നൂറുകണക്കിനാളുകളും കടന്നുപോകുന്ന റോഡാണിത്. റോഡ് വശങ്ങളില് അപകടഭീഷണി ഉയര്ത്തി നില്ക്കുന്ന ഉണങ്ങിയ മരങ്ങള് വെട്ടിമാറ്റാന് അധികൃതര് അടിയന്തര നടപടി സ്വീകരിക്കണമെന്ന് നാട്ടുകാര് ആവശ്യപ്പെട്ടു.