22

കൊച്ചി: കാലടി പാലത്തില്‍ വേറിട്ട പ്രതിഷേധവുമായി മൂവാറ്റുപുഴ സ്വദേശി എം.ജെ. ഷാജി. റോഡിലെ അപകടകരമായ കുഴികള്‍ അടച്ച് പാലത്തിലെ രൂക്ഷമായ ഗതാഗത കുരുക്ക് പരിഹരിക്കണമെന്ന് ആവശ്യപ്പെട്ടാണ് സ്വന്തം കൈകാലുകള്‍ ബന്ധിച്ച് ഷാജി പ്രതിഷേധിക്കുന്നത്.

പാലത്തിന്‍റെ ദയനീയ സ്ഥിതിയെ തുടര്‍ന്ന് ബസ് തൊഴിലാളികള്‍, കച്ചവടക്കാര്‍ അങ്ങനെ ജനങ്ങള്‍ക്ക് ആര്‍ക്കും പണിയെടുത്ത് ജീവിക്കാന്‍ പറ്റാത്ത സ്ഥിതിയാണ്. മുഴുവന്‍ ജനങ്ങളും കഷ്ടത്തിലാണ്. അധികാരികള്‍ കണ്ണു തുറന്നേ മതിയാവൂ. പാലം റീ ടാര്‍ ചെയ്ത് ഗതാഗത കുരുക്ക് ഒഴിവാക്കണം എന്നാണ് ഓട്ടോറിക്ഷ തൊഴിലാളിയായ ഷാജിയുടെ ആവശ്യം.

അതേസമയം, കാലടി പാലത്തിലെ ഗതാഗതക്കുരുക്കില്‍ പെരുമ്പാവൂര്‍ എംല്‍എ മനോജ് മൂത്തേടന്‍ അടിയന്തര ഇടപെടല്‍ നടത്തി. പിഡബ്ല്യുഡി ഉദ്യോഗസ്ഥര്‍ക്കു നിര്‍ദേശം നല്‍കിയതിന്‍റെ അടിസ്ഥാനത്തില്‍ അറ്റകുറ്റപ്പണികള്‍ നടത്താന്‍ തീരുമാനമായി.

വ്യാഴം, വെള്ളി ദിവസങ്ങളിലായി അറ്റകുറ്റപ്പണികള്‍ നടത്തുമെന്ന് എംഎല്‍എ ഓഫീസ് അറിയിച്ചു. അടിയന്തര അറ്റകുറ്റപ്പണികള്‍ക്കായി കാലടി പാലം മൂന്നു ദിവസം രാത്രി അടച്ചിടും. ജൂലൈ 23, 24, 25 തീയതികളില്‍ രാത്രി 10 മുതല്‍ രാവിലെ ആറുവരെ പാലം അടച്ചിടുമെന്ന് പിഡബ്ല്യുഡി അസിസ്റ്റന്‍റ് എന്‍ജിനീയര്‍ അറിയിച്ചു.

Tags : KaladyBridge TrafficJam Autorikshaw Driver Protest PWD MLA