മഞ്ചേരി: സിപിഎം നടത്തുന്ന അക്രമരാഷ്ട്രീയത്തിന് അറുതി വരുത്തണമെന്നു കോണ്‍ഗ്രസ് പ്രവര്‍ത്തക സമിതി അംഗം രമേശ് ചെന്നിത്തല. സിദ്ധാര്‍ഥന്‍റെ കൊലപാതകവും പാനൂര്‍ ബോംബ് നിര്‍മാണവും സിപിഎമ്മിന്‍റെ അക്രമരാഷ്ട്രീയത്തിനുള്ള സമീപകാല ഉദാഹരണങ്ങളാണ്.
മാര്‍ക്സിസ്റ്റ് പാര്‍ട്ടി അക്രമത്തിന് കൂട്ടുനില്‍ക്കുകയും ഭരിച്ചു മുടിക്കുകയും കമ്മീഷന്‍ ഗവണ്‍മെന്‍റായി മാറിയിരിക്കുകയുമാണെന്നും അദ്ദേഹം പറഞ്ഞു. മഞ്ചേരി അരുകിഴായയില്‍ സംഘടിപ്പിച്ച യുഡിഎഫ് കുടുംബ സംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു രമേശ് ചെന്നിത്തല.
മൂന്നു തവണ പാര്‍ലിമെന്‍റംഗമായ സീനിയര്‍ നേതാവാണ് യുഡിഎഫ് മലപ്പുറം മണ്ഡലം സ്ഥാനാര്‍ഥി ഇ.ടി. മുഹമ്മദ് ബഷീര്‍. അതുകൊണ്ടു തന്നെ ഏറ്റവും കഴിവുള്ള അദ്ദേഹത്തെയാണ് പാര്‍ലമെന്‍റിലേക്ക് അയക്കേണ്ടത്. മാവേലി സ്റ്റോറില്‍ നിത്യോപയോഗ സാധനങ്ങളില്ല. വെള്ളക്കരവും വൈദ്യുതി ചാര്‍ജും വര്‍ധിപ്പിച്ച് പാവപ്പെട്ട സാധാരണക്കാരന്‍റെ ജീവിതം ദുസഹമാക്കി.
മോദി സര്‍ക്കാര്‍ ഇന്ത്യാമുന്നണിയെ ഭയപ്പെടുന്നത് കൊണ്ടാണ് നാനൂറ് സീറ്റ് ലഭിക്കുമെന്നു പറയുന്നതെന്നും രാജ്യത്തെ രക്ഷിക്കാനും ഇന്ത്യന്‍ ഭരണഘടന സംരക്ഷിക്കാനും യുഡിഎഫിനെ വിജയിപ്പിക്കണമെന്നും രമേശ് ചെന്നിത്തല ആഹ്വാനം ചെയ്തു.
നേതാക്കളായ വി.എസ്. ജോയ് പി.ടി. അജയ് മോഹന്‍, റഷീദ് പറമ്പന്‍, വല്ലാഞ്ചിറ ഹുസൈന്‍, വി.പി. ഫിറോസ്, അഡ്വ. ബീന ജോസഫ്, അഡ്വ. യു.എ. ലത്തീഫ് എംഎല്‍എ, രോഹില്‍നാഥ്, പി. ഷംസുദീന്‍, ടി.എം. നാസര്‍, അന്‍വര്‍ മുള്ളമ്പാറ, എം.പി. ബിന്ദു, എ.പി. മജീദ് എന്നിവര്‍ പ്രസംഗിച്ചു.
ഹമീദ് മഠത്തില്‍, വി.സി. മോഹനന്‍, മുഹമ്മദലി എന്ന നാണിപ്പ, സിതാര ഉള്ളത്ത്്, പി. അബ്ദുറഹിമാന്‍, കെ. അസീസ് എന്നിവര്‍ നേതൃത്വം നല്‍കി.