കോതമംഗലം : ഇടുക്കി ലോക്സഭാ മണ്ഡലം എൽഡിഎഫ് സ്ഥാനാർഥി ജോയ്സ് ജോർജിന്റെ കോതമംഗലം മണ്ഡല പര്യടനത്തിന് ആവോലിച്ചാലിൽ തുടക്കം. സിപിഐ സംസ്ഥാന എക്സികുട്ടീവ് അംഗം ഇ.കെ. ശിവൻ ഉദ്ഘാടനം ചെയ്തു. രാജ്യത്തെ കർഷകരെ വഞ്ചിക്കുന്ന സമീപനമാണ് മോദി സർക്കാർ സ്വീകരിച്ചതെന്ന് അദ്ദേഹം പറഞ്ഞു.
എൽഡിഎഫ് നേതാക്കളായ ആർ. അനിൽകുമാർ, പി.ടി. ബെന്നി, കെ.എ. ജോയി, പോൾ മുണ്ടക്കൽ, മനോജ് ഗോപി, ഷാജി പീച്ചിക്കര എന്നിവർ പ്രസംഗിച്ചു. വെള്ളരിയും കുന്പളവും നൽകിയാണ് സ്ഥാനാർഥിയെ ജനങ്ങൾ സ്വീകരിച്ചത്.
ആന്റണി ജോണ് എംഎൽഎ പര്യടന വാഹനത്തിൽ സ്ഥാനാർഥിക്കൊപ്പം ഉണ്ടായിരുന്നു. നേര്യമംഗലം, കോളനി, ചെന്പൻകുഴി, ചെന്പൻകുഴി, നീണ്ടപ്പാറ, തലക്കോട് കവല, പുത്തൻ കുരിശ്, ഊന്നുകൽ, കവളങ്ങാട്, നെല്ലിമറ്റം, വാളാച്ചിറ എന്നിവിടങ്ങളിൽ പര്യടനം നടത്തി.
ജോയ്സിന്റെ ഇന്നത്തെ പര്യടനം
മൂവാറ്റുപുഴ: ഇടുക്കിയിലെ എൽഡിഎഫ് സ്ഥാനാർഥി ജോയ്സ് ജോർജിന്റെ മൂവാറ്റുപുഴ മണ്ഡലത്തിലെ രണ്ടാം ഘട്ട പര്യടനം ഇന്ന് നടക്കും. രാവിലെ 7.30 ന് പൈങ്ങോട്ടൂർ പഞ്ചായത്തിലെ ഞാറക്കാട് നിന്ന് തുടങ്ങും. സിപിഎം സംസ്ഥാന കമ്മിറ്റിയംഗം എസ്. സതീഷ് ഉദ്ഘാടനം ചെയ്യും.
വിവിധ സ്ഥലങ്ങളിൽ പര്യടനശേഷം ഒന്പതിന് കുളപ്പുറത്ത് സമാപിയ്ക്കും. 9.15 ന് ആയവന പഞ്ചായത്തിലെ സിദ്ധൻപടിയിൽ നിന്ന് പര്യടനം തുടങ്ങി 12 ന് കാവക്കാട് സമാപിക്കും.
മാറാടി പഞ്ചായത്തിലെ പെരിങ്ങഴ കവലയിൽ നിന്ന് 2.30 ന് തുടങ്ങുന്ന പര്യടനം 3.55ന് കായനാട് റേഷൻകടപ്പടിയിൽ സമാപിക്കും. വൈകുന്നേരം 4.15 ന് വാളകം പഞ്ചായത്തിലെ നാന്തോട് കവലയിൽ നിന്ന് പര്യടനം തുടങ്ങി 5.30 ന് കടാതി പള്ളിത്താഴത്ത് സമാപിക്കും.
വൈകുന്നേരം 6.30 ന് പായിപ്ര പഞ്ചായത്തിലെ മുടവൂർ ജയ്ഹിന്ദ് കവലയിൽ നിന്ന് തുടങ്ങി 8.40 ന് പള്ളിച്ചിറങ്ങരയിൽ സമാപിക്കും. സമാപന സമ്മേളനത്തിൽ എൽഡിഎഫ് സംസ്ഥാന നേതാക്കൾ പ്രസംഗിക്കും. മൂവാറ്റുപുഴ നഗരസഭയിൽ 22 ന് മൂന്നാംഘട്ട പൊതുപര്യടനം നടക്കും.