ADVERTISEMENT

ADVERTISEMENT

ബൈക്ക് മോഷ്ടാവ് അറസ്റ്റില്‍

കൊച്ചി: ബൈക്ക് മോഷക്കേസിലെ പ്രതി അറസ്റ്റില്‍. ഇടപ്പള്ളി മൈ ജി ജീവനക്കാരന്‍റെ ബൈക്ക് മോഷ്ടിച്ച കേസില്‍ ബി. ലിബിന്‍(22) എന്നയാളെ കളമശേരി പോലീസ് കൊല്ലത്തു നിന്നാണ് പിടികൂടിയത്.

മേയ് മൂന്നിനാണ് ഇടപ്പള്ളി മൈ ജിയുടെ മുമ്പില്‍ നിന്നും ഡ്യൂക്ക് കമ്പനിയുടെ ബൈക്ക് ലിബിന്‍ മോഷ്ടിച്ചത്.

കേസിലെ മറ്റൊരു പ്രതിയായ മുഹമ്മദ് ബിലാല്‍(25) മറ്റൊരു മോഷണക്കേസില്‍ കുന്നംകുളം പോലീസ് കസ്റ്റഡിയില്‍ ആണ്.

ADVERTISEMENT

ബസിൽ നിന്നു തെറിച്ചുവീണ് പതിനാറുകാരൻ മരിച്ചു

പള്ളുരുത്തി: ചെല്ലാനത്ത് ഓടിക്കൊണ്ടിരുന്ന ബസിൽനിന്ന് തെറിച്ചുവീണ് പതിനാറുകാരന് ദാരുണാന്ത്യം. ചെല്ലാനം മാലാഖപ്പടിയിൽ പുത്തൻതറ മാർട്ടിൻ സുമോദിന്‍റെ മകൻ പവനാണ് മരിച്ചത്. ആലുവ -ചെല്ലാനം റൂട്ടിൽ സർവീസ് നടത്തുന്ന ഫോർസ്റ്റാർ ബസിൽ ശനിയാഴ്ച രാത്രി ഏഴോടെയായിരുന്നു അപകടം. മാലാഖപ്പടിക്ക് മുന്പുള്ള സ്റ്റോപ്പിൽനിന്ന് ബസിൽ കയറിയ പവൻ പുറകിലെ വാതിൽപ്പടിയിൽ നിന്നാണ് പുറത്തേക്ക് തെറിച്ചുവീണത്. ഈ സമയം ബസിന്‍റെ വാതിലടച്ചിരുന്നില്ലെന്ന് പോലീസ് പറഞ്ഞു. ഗുരുതരമായി പരിക്കേറ്റ പവനെ ആശുപത്രിയിൽ പ്രവേശിപ്പിച്ചെങ്കിലും ഇന്നലെ പുലർച്ചെ മരിച്ചു. അപകടത്തിന്‍റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. അലക്ഷ്യമായി വാഹനം ഓടിച്ചതിന് ബസ് ഡ്രൈവർക്കെതിരെ കണ്ണമാലി പോലീസ് കേസെടുത്തു. അതേസമയം സംഭവത്തിൽ ബന്ധുക്കളുടെ കൂടി മൊഴിയെടുക്കുമെന്നും പോലീസ് വ്യക്തമാക്കി. സംസ്കാരം നടത്തി. മാതാവ്: ഷാലു. സഹോദരി: അസ്ന.

ആശങ്ക ബാക്കി; സ്വകാര്യ ബസുകള്‍ക്ക് വാതില്‍ അടയ്ക്കാന്‍ മടി

കൊച്ചി: ചെല്ലാനത്ത് വാതില്‍ തുറന്നിട്ട് ഓടിയ സ്വകാര്യ ബസിനുള്ളില്‍ നിന്നും പുറത്തേക്ക് വീണ് 16-കാരന്‍ മരിക്കാനിടയായ സംഭവത്തിന് ശേഷവും ആശങ്ക ഇരട്ടിയാക്കി കൊച്ചിയില്‍ വാതില്‍ അടച്ച് സര്‍വീസ് നടത്താന്‍ കൂട്ടാക്കാതെ ഒരുവിഭാഗം സ്വക്യാര്യ ബസുകള്‍. എയര്‍ ഡോര്‍ സംവിധാനം ഉണ്ടായിട്ടും പല ബസുകളും ഇവ ഉപയോഗിക്കുന്നില്ല. സ്‌കൂളുകളുകള്‍ തുറന്ന സാഹചര്യത്തില്‍ സുരക്ഷിത യാത്ര ബസുകള്‍ ഉറപ്പുവരുത്തണമെന്ന ആവശ്യം ശക്തമായിട്ടും ഇവ കേള്‍ക്കാന്‍ പല ബസ് അധികൃതരും കൂട്ടാക്കുന്നില്ലെന്നാണ് ആക്ഷേപം സ്വകാര്യ ബസുകളില്‍ ഡ്രൈവര്‍ക്ക് ഓപ്പറേറ്റ് ചെയ്യാന്‍ കഴിയുംവിധം എയര്‍ഡോര്‍ സംവിധാനം ഏര്‍പ്പെടുത്തിയിട്ടും നഗരത്തില്‍ ഒടുന്ന ചുരുക്കം ചില ബസുകളാണ് ഇത്തരത്തില്‍ വാതില്‍ അടച്ച് സര്‍വീസ് നടത്തുന്നത്. യാത്രക്കാര്‍ക്ക് തുറക്കാനാകും വധമുള്ള പഴയ ഡോര്‍ ഘടിപ്പിച്ച ബസുകളുമുണ്ട് സര്‍വീസ് നടത്തുന്നവയില്‍. ഇവ ഒഴിവാക്കിയിട്ടും ഇത്തരം വാഹനങ്ങള്‍ക്കെതിരെ നടപടി സ്വീകരിക്കാന്‍ മോട്ടോര്‍ വാഹനവകുപ്പും തയാറാകുന്നില്ല. എയര്‍ഡോര്‍ ഘടിപ്പിച്ച ബസുകളില്‍ ചിലതില്‍ ഇവ വേണ്ടവിധം പ്രവര്‍ത്തിക്കുന്നുമില്ല. എയര്‍ഡോറുകള്‍ അടയ്ക്കുന്ന വാഹനങ്ങളിലാകട്ടെ തിരക്കിട്ട് വാതില്‍ അടയ്ക്കുമ്പോള്‍ യാത്രക്കാര്‍ ഇതിൽ കുടുങ്ങുന്നതും പതിവുകാഴ്ചയാണ്. യാത്രക്കാര്‍ കയറുമ്പോള്‍ തന്നേ ഡബിള്‍ ബെല്ലടിച്ച് വാഹനം മുന്നോട്ട് എടുക്കുന്നതു മൂലമാണ് ഇങ്ങനെ സംഭവിക്കുന്നത്. സ്‌കൂള്‍ തുറന്ന സാഹചര്യത്തില്‍ ഇത്തരം അപകടങ്ങള്‍ മുന്നില്‍ക്കണ്ട് വേണ്ട നടപടി സ്വീകരിക്കണമെന്ന ആവശ്യം ശക്തമാണ്.

ജില്ലാ നീന്തല്‍ മത്സരം: മികച്ച നേട്ടവുമായി വിശ്വജ്യോതി

അങ്കമാലി: കോതമംഗലം എംഎ കോളജില്‍ നടന്ന ജില്ലാ നീന്തല്‍ മത്സരത്തില്‍ അങ്കമാലി വിശ്വജ്യോതി സ്‌കൂള്‍ ടീമിന് മികച്ച നേട്ടം. സബ് ജൂണിയര്‍ വിഭാഗത്തില്‍ ഓവറോള്‍ ചാമ്പ്യന്‍ഷിപ്പും ജൂണിയര്‍ വിഭാഗത്തില്‍ ഓവറോള്‍ റണ്ണേഴ്‌സ് അപ്പും സ്‌കൂള്‍ നേടി. 46 സ്വര്‍ണം, 29 വെള്ളി, 26 വെങ്കല മെഡലുകളാണ് സ്‌കൂളിനായി താരങ്ങള്‍ വാരിക്കൂട്ടിയത്. ഗൗരി ജയേന്ദ്രന്‍, ജെറെമിയാസ് സോബിന്‍ എന്നിവര്‍ പങ്കെടുത്ത അഞ്ച് ഇനങ്ങളിലും സ്വര്‍ണവും, ജൊനാര്‍ത് സോബിന്‍ നാല് സ്വര്‍ണവും ഒരു വെള്ളിയും നേടി വ്യക്തിഗത ചാമ്പ്യന്മാരായി. 20 കുട്ടികള്‍ തിരുവനന്തപുരത്ത് നടക്കുന്ന സംസ്ഥാന നീന്തല്‍ മത്സരത്തില്‍ പങ്കെടുക്കുന്നതിനായി തെരഞ്ഞെടുക്കപ്പെട്ടു. തിളക്കമാര്‍ന്ന പ്രകടനം കാഴ്ച്ചവച്ച ടീമിനെയും പരിശീലകന്‍ അനില്‍കുമാറിനെയും മാനേജര്‍ ഫാ. അഗസ്റ്റിന്‍ മാമ്പിള്ളി, അസോസിയേറ്റ് ഡയറക്ടര്‍ ഫാ. ആഞ്ചലോ ചക്കനാട്ട്, പ്രിന്‍സിപ്പല്‍ റീന രാജേഷ്, വൈസ് പ്രിന്‍സിപ്പല്‍ ഷാലി ജോസ് എന്നിവര്‍ അനുമോദിച്ചു.

38 കിലോ കഞ്ചാവുമായി യുവതികള്‍ പിടിയില്‍

കൊച്ചി: എറണാകുളം നോര്‍ത്ത് റെയില്‍വേ സ്റ്റേഷനില്‍ 37.498 കിലോ കഞ്ചാവുമായി ഇതര സംസ്ഥാനക്കാരായ യുവതികള്‍ പിടിയില്‍. പശ്ചിമബംഗാൾ മൂര്‍ഷിദാബാദ് സ്വദേശികളായ സോണിയ സുല്‍ത്താന, അനിത കാത്തൂന്‍ എന്നിവരെയാണ് എറണാകുളം റെയില്‍വേ പോലീസ്, ആര്‍പിഎഫ്, റെയില്‍വേ പോലീസ് ഡാന്‍സാഫ് സംഘം എന്നിന സംയുക്തമായി നടത്തിയ പരിശോധനയിൽ പിടികൂടിയത്. റെയില്‍വേ പ്ലാറ്റ്‌ഫോമുകളിലും ട്രെയിനുകളിലുമുള്ള പതിവ് പരിശോധനയുടെ നടപടി തുടരുന്നതിനിടെയാണ് ഇന്നലെ രാവിലെ 10.30 ഓടെ പ്ലാറ്റ്‌ഫോമില്‍ നിന്നും യുവതികളെ പിടികൂടിയത്. രണ്ടാം നമ്പര്‍ പ്ലാറ്റ്‌ഫോമില്‍ ഇരിക്കുകയായിരുന്ന ഇവര്‍ പോലീസിനെ കണ്ടതോടെ എഴുന്നേറ്റ് പോകാന്‍ ശ്രമിച്ചതോടെ സംശയം തോന്നിയ വനിതാ ഉദ്യോഗസ്ഥര്‍ ഇവരെ തടഞ്ഞു. തുടര്‍ന്ന് ഇവരുടെ ട്രോളി ബാഗുകള്‍ പരിശോധിച്ചതോടെ വിവിധ പൊതികളിലായി സൂക്ഷിച്ചിരിക്കുന്ന കഞ്ചാവ് കണ്ടെത്തുകയായിരുന്നു.

വെര്‍ച്വല്‍ അറസ്റ്റ് തട്ടിപ്പ് : എറണാകുളം സ്വദേശിയുടെ ഒരു കോടി തട്ടിയെടുത്തു

കളമശേരി: വെര്‍ച്വല്‍ അറസ്റ്റിലൂടെ എറണാകുളം സ്വദേശിയുടെ ഒരു കോടിയിലേറെ രൂപ തട്ടിയെടുത്തതായി പരാതി. രാജ്യസുരക്ഷയ്ക്ക് ഭീഷണിയാകും വിധം രേഖകള്‍ ശത്രുരാജ്യത്തിന് ചോര്‍ത്തി കൊടുക്കാന്‍ സഹായിച്ചെന്ന കുറ്റം ആരോപിച്ചാണ് പണം തട്ടിയത്. സംഭവത്തില്‍ കളമശേരി പോലീസില്‍ പരാതി നല്‍കി. കഴിഞ്ഞ വെള്ളിയാഴ്ചയായിരുന്നു സംഭവം. രഞ്ജിത്കുമാര്‍ എന്ന പേരിലാണ് പരാതിക്കാരന്‍റെ ഫോണിലേക്ക് വാട്‌സ്ആപ്പ് കോള്‍ വന്നത്. ലക്‌നൗ ഇന്‍സ്‌പെക്ടര്‍ ഓഫ് പോലീസാണെന്ന് പരിചയപ്പെടുത്തിയ ശേഷം ഇന്ത്യന്‍ ആര്‍മിയുടെ ഔദ്യോഗിക വിവരങ്ങള്‍ പാകിസ്ഥാന് ചോര്‍ത്തി കൊടുക്കാന്‍ സഹായിച്ചവരുടെ ലിസ്റ്റില്‍ പേരുണ്ടെന്നു പറഞ്ഞു. രേഖകള്‍ ചോര്‍ത്തി നല്‍കിയതുവഴി ആസിഫ് ഫൗമി എന്ന ആളില്‍ നിന്ന് 55 ലക്ഷം കൈക്കൂലി വാങ്ങിയതായി കണ്ടെത്തിയെന്നും ഇയാള്‍ പറഞ്ഞു. കേസ് ഒത്തു തീര്‍പ്പാക്കാന്‍ പണം നല്‍കണമെന്നും അല്ലെങ്കില്‍ ജീവന് ഭീഷണിയുണ്ടാകുമെന്ന് ഭീഷണിപ്പെടുത്തി. തുടര്‍ന്ന് 1,05,06,184 രൂപ അവര്‍ ആവശ്യപ്പെട്ട പ്രകാരം നല്‍കുകയായിരുന്നുവെന്നാണ് പരാതിക്കാരന്‍ മൊഴി നല്‍കിയത്. കളമശേരി സബ്ഇന്‍സ്‌പെക്ടര്‍ സനീഷിന്‍റെ നേതൃത്വത്തില്‍ പരാതിക്കാരന്‍റെ മൊഴി രേഖപ്പെടുത്തി. അന്വേഷണം ആരംഭിച്ചു കഴിഞ്ഞതായി കളമശേരി പോലീസ് അറിയിച്ചു.

കാറിടിച്ച് എസ്ഐയെ അപായപ്പെടുത്താൻ ശ്രമം; രണ്ടുപേർ കസ്റ്റഡിയിൽ

വാഴക്കുളം: വാഹന പരിശോധനയ്ക്കിടെ എസ്ഐയെ കാർ കയറ്റി കൊലപ്പെടുത്താൻ ശ്രമിച്ച കേസിൽ രണ്ടുപേർ പോലീസ് കസ്റ്റഡിയിൽ. കാറിലുണ്ടായിരുന്നവരുടെ സുഹൃത്തുക്കളായ ഈരാറ്റുപേട്ട സ്വദേശികളായ ഷാഹിദ്, റഫ്സൽ എന്നിവരാണ് പോലീസ് കസ്റ്റഡിയിലുള്ളത്. കാറിലുണ്ടായിരുന്ന തൊടുപുഴ സ്വദേശികളായ ഷെറീഫ് (ചാർ സൗബീസ്), ആസിഫ് എന്നിവരെ മറ്റു വാഹനത്തിൽ കയറ്റി സംഭവസ്ഥലത്തു നിന്നു മാറുന്നതിന് സഹായം നല്കിയവരാണ് കസ്റ്റിഡിയിലുള്ളതെന്ന് കല്ലൂർക്കാട് പോലീസ് അറിയിച്ചു. ഇതിനിടെ ഉപേക്ഷിക്കപ്പെട്ട നിലയിൽ കണ്ടെത്തിയ കാർ പോലീസ് കസ്റ്റഡിയിലെടുത്തു. കെഎൽ 63 ഡി 7933 നമ്പറിലുള്ള സാൻട്രോ കാർ വെങ്ങല്ലൂർ ഭാഗത്താണ് ഉപേക്ഷിക്കപ്പെട്ട നിലയിൽ കണ്ടത്. പിടിച്ചെടുത്ത കാറിൽ ഫോറൻസിക് വിഭാഗം ഉദ്യോഗസ്ഥർ പരിശോധന നടത്തി. കല്ലൂർക്കാട് പോലീസ് സ്റ്റേഷനിലെ ഗ്രേഡ് എസ്ഐ ഇ.എം. മുഹമ്മദിനെയാണ് ശനിയാഴ്ച വൈകുന്നേരം നാലോടെ കല്ലൂർക്കാട് വഴിയാഞ്ചിറ ഭാഗത്തു വച്ച് വാഹനം കയറ്റി കൊലപ്പെടുത്താൻ ശ്രമിച്ചത്. ഗുരുതര പരിക്കേറ്റ എസ്ഐക്ക് തൊടുപുഴ സെന്‍റ് മേരീസ് ആശുപത്രിയിൽ ശസ്ത്രക്രിയ നടത്തി. പതിവു വാഹന പരിശോധനയ്ക്കായി പോകുമ്പോഴാണ് വഴിയാഞ്ചിറ ഭാഗത്ത് വഴിയരികിൽ സംശയാസ്പദമായ സാഹചര്യത്തിൽ കാർ നിർത്തിയിട്ടിരിക്കുന്നത് എസ്ഐയുടെ ശ്രദ്ധയിൽപ്പെട്ടത്. കാറിനടുത്തെത്തി ചോദ്യം ചെയ്തതോടെ ഡ്രൈവർ കാറെടുത്ത് എസ്ഐയെ അപായപ്പെടുത്താൻ ശ്രമിച്ച ശേഷം രക്ഷപ്പെടുകയായിരുന്നു.

ഭൂതത്താന്‍കെട്ട് ഡാമിന്‍റെ 11 ഷട്ടറുകൾ 21.30 മീറ്റര്‍ ഉയര്‍ത്തി

കോതമംഗലം: തീവ്ര മഴയെതുടര്‍ന്ന് ഭൂതത്താന്‍കെട്ട് ഡാമിന്‍റെ 11 ഷട്ടറുകളും കൂടുതല്‍ അളവില്‍ ഉയര്‍ത്തി. ഇന്നലെ ഉച്ചയോടെ 21.30 മീറ്ററായാണ് ഷട്ടറുകള്‍ ഉയര്‍ത്തിത്. ശനിയാഴ്ച 13.3 മീറ്ററായിരുന്നു. ഡാമിലെ ജലനിരപ്പ് 30.8 മീറ്ററാണ്. കുട്ടമ്പുഴ പഞ്ചായത്തിലെ പൂയംകുട്ടി മേഖലയില്‍ പുഴ കരകവിഞ്ഞതോടെ വിവിധ പ്രദേശത്തെ ജനജീവിതത്തെ സാരമായി ബാധിച്ചു. പൂയംകുട്ടി പുഴയില്‍ ജലനിരപ്പ് ക്രമാതീതമായി ഉയര്‍ന്നതോടെ ഇന്നലെ രാവിലെ മുതല്‍ മണികണ്ഠന്‍ചാല്‍ ചപ്പാത്ത് വെള്ളത്തിനടിയിലായി. പുഴയ്‌ക്ക് അക്കരെ ഇക്കരെ വാഹന ഗതാഗതം തടസപ്പെട്ടിരിക്കുകയാണ്. ബ്ലാവനയിലെ കടത്ത് സര്‍വീസും രാവിലെ മുതല്‍ നിലച്ചിരിക്കുകയാണ്. അഞ്ച് ആദിവാസി ഉന്നതികളും രണ്ട് ഗ്രാമങ്ങളും ബാഹ്യലോകവുമായി ബന്ധപ്പെടാനാവാതെ ഒറ്റപ്പെട്ട അവസ്ഥയിലാണ്. പുഴയിലെ ജലനിരപ്പ് താഴ്ന്നാലേ ജനജീവിതം സാധാരണ നിലയിലാകൂ. പെരിയാര്‍, പൂയംകുട്ടിപുഴ, ഉരുളന്‍തണ്ണി തോട്, ഇടമലയാര്‍, കുട്ടമ്പുഴയാര്‍, കോതമംഗലം പുഴ എന്നിവിടങ്ങളില്‍ വൈകിട്ടോടെ ജലനിരപ്പ് വലിയതോതില്‍ ഉയര്‍ന്നതോടെ താഴ്ന്ന പ്രദേശങ്ങള്‍ വെള്ളപ്പൊക്ക ഭീഷണിയിലായി.

മലയാറ്റൂർ മുളംകുഴിയിൽ വീണ്ടും കാട്ടാനക്കൂട്ടമിറങ്ങി

കാലടി: ഇല്ലിത്തോട് നാലാം ബ്ലോക്കിലെ മുളംകുഴി പ്രദേശത്ത് കാട്ടാനകൾ കൂട്ടത്തോടെയിറങ്ങി. ബ്ലോക്കിലെ ആദ്യ വീടായ തോപ്പിൽ എസ്‌റ്റേറ്റിന്‍റെ ഗേറ്റ് തുറന്ന് പുരയിടത്തിലേക്ക് ആനക്കൂട്ടം കടന്നെങ്കിലും കാര്യമായ നാശനഷ്ടങ്ങളൊന്നും ഉണ്ടായില്ല. രണ്ട് കുട്ടിയാന ഉൾപ്പെടെ ആറ് ആനകളാണ് കൂട്ടത്തിലുണ്ടായിരുന്നത്. ആൾ താമസമുള്ള വീട്ടുപരിസരത്ത് തീറ്റ തേടിയെത്തിയ ഇവ ചക്കയടക്കമുള്ള പഴവർഗങ്ങൾ കഴിച്ച് മടങ്ങിയെന്നാണ് വിവരം. തോപ്പിൽ എസ്റ്റേറ്റിൽ നിന്നും മറ്റ് പ്രദേശങ്ങളിലേക്ക് കടക്കാതെ ആനകൾ മടങ്ങിയെങ്കിലും പ്രദേശവാസികൾ ആശങ്കയിലാണ്. അക്കരെയുള്ള പാണൻകുഴി ഫോറസ്റ്റ് പ്രദേശത്ത് നിന്നും പുഴ നീന്തിക്കടന്നാണ് ആനകൾ എത്തുന്നത്. ചക്കയും മറ്റ് പഴവർഗങ്ങളും തേടിയാണ് ഇവ എത്തുന്നതെന്നാണ് പ്രദേശവാസികൾ പറ‍യുന്നത്. പ്രദേശത്തുനിന്ന് ഏകദേശം 50 മീറ്റർ നീങ്ങിയാൽ നിരവധി കുടുംബങ്ങൾ തിങ്ങി പാർക്കുന്ന ജനവാസ മേഖലയാണ്. തൊട്ടടുത്ത പ്രദേശമായ ചൂടൻ കവലയിൽ നൂറോളം കുടുംബങ്ങൾ താമസിക്കുന്നുണ്ട്. കനാലും ഫെൻസിങ്ങും ഉള്ളതിനാൽ ഈ പ്രദേശത്തേക്ക് ആനകളുടെ വരവ് കുറവായിരുന്നു.

കടല്‍ ഭിത്തി വേണം; ജനകീയ ഹര്‍ത്താലിനൊരുങ്ങി ജനകീയ വേദി

കൊച്ചി: ചെല്ലാനം പുത്തന്‍തോടിന് വടക്കോട്ട് കടല്‍ ഭീത്തി നിര്‍മാണം വൈകുന്നതില്‍ പ്രതിഷേധിച്ച് 30ന് ജനകീയ ഹര്‍ത്താലിന് ആഹ്വാനം ചെയ്ത് ചെല്ലാനം-കൊച്ചി ജനകീയ വേദി. ഈ വര്‍ഷത്തെ ഏറ്റവും ശക്തമായ കടലേറ്റമാണ് ചെല്ലാനത്തും സമീപ മേഖലകളിലും ഈ ദിവസങ്ങളില്‍ ഉണ്ടായതെന്ന് ജനറല്‍ കണ്‍വീനര്‍ വി.ടി. സെബാസ്റ്റ്യന്‍ പറഞ്ഞു. നാലു വര്‍ഷമായി പുത്തന്‍ തോടിന് വടക്കോട്ട് കടല്‍ഭിത്തി നിര്‍മിക്കണമെന്ന് ജനങ്ങള്‍ ആവശ്യപ്പെടുന്നുണ്ട്. എന്നാല്‍ കടുത്ത അവഗണനയാണ് സര്‍ക്കാര്‍ ഈ കാര്യത്തില്‍ തുടരുന്നത്. പുത്തന്‍തോടിന് വടക്കോട്ട് ടെട്രാപ്പോഡ് കടല്‍ ഭിത്തിയുടെയും പുലി മുട്ടുകളുടേയും നിര്‍മാണം ഉടന്‍ ആരംഭിക്കണമെന്ന് ആവശ്യപ്പെട്ടാണ് 30 ന് വിവിധ ബഹുജന സാമൂഹ്യ സംഘടനകളുടെ പിന്തുണയോടെ കടല്‍തീരത്ത് ജനകീയ ഹര്‍ത്താലിന് ആഹ്വാനം ചെയ്തിരിക്കുന്നതെന്ന് അദ്ദേഹം പറഞ്ഞു.

10 വീടുകൾ ഭാഗികമായി തകർന്നു

ഫോർട്ടുകൊച്ചി: ശക്തമായ കടലേറ്റത്തിൽ ചെറിയകടവ് ഡിവൈൻസ് ചാപ്പലിനു സമീപത്തെ വീടുകൾക്കും നാശനഷ്ടം. ബേബി അഗസ്റ്റിൻ താന്നിക്കൽ, ആന്‍റണി കാളിപറമ്പിൽ, ആന്‍റണി കുരിശുങ്കൽ, സോണി അത്തിപൊഴി, ബിജോയ്, പീറ്റർ പുളിയനത്ത്, ജോസഫ് വാഴയ്ക്കൽ, പ്രസ്തീന കടവി പറമ്പിൽ, ഓമന കിഴക്കേടത്ത്, ജൂഡ് മാളിയേക്കൽ എന്നിവരുടെ വീടുകൾക്കാണ് ശക്തമായ കാറ്റിലും കടലേറ്റത്തിലും നാശമുണ്ടായത്.. കടൽഭിത്തി ഇല്ലാത്ത ഈ മേഖലയിൽ വെള്ളം നിരവധി വീടുകളുടെ ഉള്ളിലൂടെയാണ് ഒഴുകി പോകുന്നത്. ചെളിയും മാലിന്യവും കലർന്ന വെള്ളം വീടുകളുടെ അടുക്കളവരെ തളം കെട്ടി കിടക്കുന്നതിനാൽ ഭക്ഷണം പാകം ചെയ്യാൻ പോലും പറ്റാത്ത അവസ്ഥയാണെന്ന് പരിസരവാസികൾ പറഞ്ഞു.

കണ്ണമാലിയിൽ കലിയടങ്ങാതെ കടൽ

തോപ്പുംപടി: സമീപകാലത്തെ ഏറ്റവും വലിയ കടലേറ്റം മൂലം ചെല്ലാനം പഞ്ചായത്തിലെ കണ്ണമാലി പ്രദേശത്ത് ജനജീവിതം ദുരിതമായി. ഇന്നലെ കാലവർഷത്തോടൊപ്പം ശക്തമായ കടൽ കയറ്റം കൂടി ആയതോടെ പ്രദേശങ്ങളിൽ ജനം എന്തു ചെയ്യണമെന്നറിയാതെ വലയുകയാണ്. വെള്ളം കയറിയതോടെ വീടുകളിൽ കിടന്നുറങ്ങാൻ പോലും പറ്റാത്ത അവസ്ഥയിലാണിപ്പോൾ. ടെട്രാപോഡ് ഇല്ലാത്ത കണ്ണമാലി, ചെറിയകടവ്, കാട്ടിപ്പറമ്പ്, കൈതവേലി വരെയാണ് രൂക്ഷത കൂടുതൽ. പ്രദേശത്തെ നാലു മുതൽ എട്ട് വരെയുള്ള വാർഡുകൾ പൂർണമായും വെള്ളത്തിലാണ്. ഇവിടെ കടൽ വെള്ളം റോഡും കവിഞ്ഞൊഴുകുകയാണ്. തുടർച്ചയായി മഴയും കടലേറ്റവും ഈ രീതിയിൽ അടുത്ത കാലത്തൊന്നുമുണ്ടായിട്ടില്ലെന്ന് നാട്ടുകാർ പറയുന്നു. കഴിഞ്ഞയാഴ്ച രൂക്ഷമായ കടലേറ്റത്തെ തുടർന്ന് താത്കാലികമായി ബന്ധുവീടുകളിലേക്ക് താമസം മാറിയവർ മടങ്ങിയെത്തിയവർ കടൽ കയറിയതോടെ വീണ്ടും ദുരിതത്തിലായി. ഞായറാഴ്ച്ച രാവിലെയോടെ ശക്തമായ രീതിയിൽ കരയിലേക്ക് കടൽ കയറി. കണ്ണമാലി മുതൽ ചെറിയ കടവ് വരെ റോഡിലൂടെ വാഹനം ഓടിച്ചു പോകാനാകാത്ത സ്ഥിതിയാണ്. നിരവധി വാഹനങ്ങൾ റോഡിന് ഇരുവശവും വെള്ളം കയറി കേടായ അവസ്ഥയിൽ കിടക്കുന്നു. അതേ സമയം കടലിനെ പ്രതിരോധിക്കാൻ എട്ടാം വാർഡിൽ 60 മീറ്ററോളം മണൽ വാട ഒരുക്കിയെങ്കിലും അവയെല്ലാം ഒലിച്ചുപോയി. കടൽ കയറ്റത്തെ കുറച്ചെങ്കിലും പ്രതിരോധിക്കാൻ ഒരു വാർഡിൽ കുറഞ്ഞത് 250 മീറ്റർ നീളത്തിലെങ്കിലും മണൽ വാട തീർക്കണമെന്നാണ് നാട്ടുകാർ പറയുന്നത്. ആദ്യ പ്രതിരോധ പ്രവർത്തനം കടലിൽ ഒലിച്ചു പോയി കടൽ കയറ്റത്തിന് താത്കാലിക പ്രതിരോധം ഒരുക്കാൻ ജില്ലാ കളക്ടർ അനുവദിച്ച ഒന്നേകാൽ കോടി രൂപയുടെ പ്രവൃത്തി ആരംഭിച്ചെങ്കിലും നിർമിച്ച മണൽ വാട അദ്യ കടലേറ്റത്തിൽ തന്നെഒലിച്ചു പോയി. ചെല്ലാനം പഞ്ചായത്തിലെ കണ്ണമാലി, ചെറിയകടവ്, കാട്ടിപ്പറമ്പ് പ്രദേശങ്ങളിൽ കടൽകയറ്റം തടയുന്നതിന് ജിയോ ബാഗ് നിരത്തി താത്കാലിക സംരക്ഷണമൊരുക്കാനാണ് സംസ്ഥാന ദുരന്ത നിവാരണ ഫണ്ടിൽ നിന്ന് കളക്ടർ 1.25 കോടി രൂപ അനുവദിച്ചത്. ശക്തമായ കടൽകയറ്റമുളള ഏഴ് സ്ഥലങ്ങളിൽ മണൽനിറച്ച ജിയോ ബാഗുകൾ സ്ഥാപിച്ച് താത്കാലിക സുരക്ഷ ഒരുക്കാനായിരുന്നു പദ്ധതിയെങ്കിലും ആദ്യ പ്രതിരോധ പ്രവർത്തനം തന്നെ പാളിയ അവസ്ഥയിലാണ്. എന്നാൽ താത്കാലിക പ്രതിരോധ പ്രവർത്തനമല്ല ശാശ്വതമായ സുരക്ഷയാണ് വേണ്ടതെന്നും കണ്ണമാലി പുത്തൻതോട് ഗ്യാപ്പിന് സമീപം നിർത്തി വച്ചിരിക്കുന്ന ടെട്രാ പോഡ് കടൽഭിത്തിയുടെ നിർമാണം വേഗത്തിൽ പൂർത്തിയാക്കണമെന്ന് കെഎൽസിഎ സ്റ്റേറ്റ് പൊളിറ്റിക്കൽ ഫോറം കൺവീനർ ടി.എ. ഡാൽഫിൻ പറഞ്ഞു. സർക്കാരിന്‍റെ അനാസ്ഥയാണ് പദ്ധതി വൈകാൻ കാരണം. പദ്ധതിക്കായി പണം വകയിരുത്തി പദ്ധതി പൂർത്തീകരിക്കണമെന്നും അദ്ദേഹം ആവശ്യപ്പെട്ടു.

സിഗ്നൽ മറികടന്നു വന്ന ആംബുലൻസ് ഇടിച്ച് കാർ ഡ്രൈവർക്ക് പരിക്ക്

ആലുവ: ദേശീയപാതയിൽ ട്രാഫിക് സിഗ്നൽ തെറ്റിച്ചുവന്ന ആംബുലൻസ് ഇടിച്ച് കാർ ഡ്രൈവർക്ക് പരിക്കേറ്റു. പരിക്കേറ്റ ചൊവ്വര സ്വദേശി നിഹാദിനെ (40) ആലുവ നജാത്ത് ആശുപത്രിയിൽ പ്രവേശിപ്പിച്ചു. ഇന്നലെ ഉച്ചക്ക് രണ്ടോയോടെ തോട്ടക്കാട്ടുകര ട്രാഫിക് സിഗ്നൽ ജംഗ്ഷനിലാണ് അപകടം നടന്നത്. കടുങ്ങല്ലൂർ റോഡിൽനിന്ന് ആലുവ ഭാഗത്തേക്ക് പോകാനായി ദേശീയപാതയിലേക്ക് കുറുകെ കടന്നപ്പോഴാണ് കാറിൽ ആംബുലൻസ് വന്നിടിച്ചത്. ഡ്രൈവറുടെ ഭാഗത്ത് വന്നിടിച്ച ആഘാതത്തിൽ കാർ കറങ്ങിയാണ് നിന്നത്. ശക്തമായ മഴയായതിനാൽ ചുവന്ന സിഗ്നൽ കണ്ടില്ലെന്ന് ആംബുലൻസ് ഡ്രൈവർ മലപ്പുറം സ്വദേശി അനന്തു മൊഴി നൽകിയിട്ടുണ്ട്. കാറിൽ നിഹാദിനൊപ്പം മറ്റൊരാൾ കൂടി ഉണ്ടായിരുന്നെങ്കിലും പരിക്കില്ല. ആലുവ പോലീസ് കേസെടുത്തു. തൃശൂർ സിറ്റി സർവീസിന്‍റേതാണ് ആംബുലൻസ്.

മാർ ബസേലിയോസ് ഡെന്‍റൽ കോളജിൽ ശ്രേഷ്ഠ ബാവയ്‌ക്ക് സ്വീകരണം നാളെ

കോതമംഗലം: മാർ ബസേലിയോസ് മെഡിക്കൽ മിഷൻ അസോസിയേഷന്‍റെ ആഭിമുഖ്യത്തിൽ കോതമംഗലം മാർ ബസേലിയോസ് ഡെന്‍റൽ കോളജിൽ പരിശുദ്ധ യാക്കോബായ സുറിയാനി സഭയുടെ നവാഭിഷിക്തനായ ശ്രേഷ്ഠ കാതോലിക്ക ബസേലിയോസ് ജോസഫ് ബാവയ്ക്ക് നാളെ സ്വീകരണം നൽകും. 12.30 നു കോളജിലെ മാർ ബസേലിയോസ് തോമസ് പ്രഥമൻ സ്മാരക ഓഡിറ്റോറിയത്തിലാണ് സ്വീകരണം ഒരുക്കിയിരിക്കുന്നത്. ഏലിയാസ് മാർ യൂലിയോസ് മെത്രാപ്പോലീത്ത അധ്യക്ഷത വഹിക്കും. സമ്മേളനം മാധ്യമപ്രവർത്തകൻ ആർ. ശ്രീകണ്ഠൻ നായർ ഉദ്ഘാടനം ചെയ്യും. കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ, ഡീൻ കുര്യാക്കോസ് എംപി, ആന്‍റണി ജോൺ എംഎൽഎ, മുനിസിപ്പൽ ചെയർമാൻ കെ.കെ. ടോമി, നെല്ലിക്കുഴി പഞ്ചായത്ത് പ്രസിഡന്‍റ് പി.എം. മജീദ്, മാർത്തോമാ ചെറിയപള്ളി വികാരി ഫാ. ജോസ് തച്ചേത്തുകൂടി എന്നിവർ പങ്കെടുക്കും.

‘ദി ലോറൽ ഫെസ്റ്റ് 25’ സംഘടിപ്പിച്ചു

കൂത്താട്ടുകുളം: മേരിഗിരി സിഎംഐ പബ്ലിക് സ്കൂളിന്‍റെ മെരിറ്റ് ഡേ ‘ദി ലോറൽ ഫെസ്റ്റ് 2025’ നടന്നു. ആഘോഷ പരിപാടിയിൽ എംജി യൂണിവേഴ്സിറ്റി മുൻ വൈസ് ചാൻസലർ ബാബു സെബാസ്റ്റ്യൻ മുഖ്യാതിഥിയായിരുന്നു. പരിപാടിയിൽ സിബിഎസ്ഇ പത്ത്, 12 ക്ലാസുകളിൽ ഉന്നത വിജയം കരസ്ഥമാക്കിയ വിദ്യാർഥികളെയും ജെഇഇ മെയ്ൻ, ജെഇഇ അഡ്വാൻസ്ഡ് പരീക്ഷകളിൽ ഉയർന്ന റാങ്കുകൾ കരസ്ഥമാക്കിയ വിദ്യാർഥികളെ ആദരിക്കുകയും പുരസ്കാരങ്ങൾ നൽകുകയും ചെയ്തു. സ്കൂളിൽനിന്നു ജെഇഇ അഡ്വാൻസ്ഡ് പരീക്ഷയിൽ ഉയർന്ന റാങ്കുകൾ കരസ്ഥമാക്കിയ ജോഷ്വാ സ്കറിയ, ആൽബർട്ട് ഓസ്റ്റിൻ, സുസൈൻ ജസീന്ത്, പ്രണവ് സാബു, ഐറിൻ സാബു, രഘുറാം എന്നിവരെയും പത്ത്, 12 ക്ലാസുകളിൽ സ്കൂൾ ടോപ്പേഴ്സായവരെയും പ്രത്യേകം ആദരിച്ചു. കാന്പസ് മാനേജർ ഫാ. ജോസ് പാറേക്കാട്ട് അധ്യക്ഷത വഹിച്ചു. സ്കൂൾ പ്രിൻസിപ്പൽ ഫാ. മാത്യു കരീത്തറ, വൈസ് പ്രിൻസിപ്പൽ ഫാ. ജിബിൻ കൂറ്റനാൽ, പ്രധാനാധ്യാപിക ബി. രാജിമോൾ, ബ്രില്യന്‍റ് സ്റ്റഡി സെന്‍റർ ഡെപ്യൂട്ടി ഡയറക്ടർ ജൂണി സെബാസ്റ്റ്യൻ, പിടിഎ വൈസ് പ്രസിഡന്‍റ് നീതു എം. ബാബു തുടങ്ങിയവർ പ്രസംഗിച്ചു.

കീച്ചേരിപ്പടിയിൽ ഓട ശുചീകരണം പൂർത്തിയായി

മൂവാറ്റുപുഴ: കീച്ചേരിപ്പടി പ്രദേശത്തെ ഓട ശുചീകരണം പൂർത്തിയായി. ഓടയിലെ മാലിന്യവും, വെള്ളക്കെട്ടും പ്രദേശവാസികളെ ദുരിത്തിലാക്കിയിരുന്നു. തുടർന്നാണ് ഈ വർഷത്തെ മഴക്കാലപൂർവ ശുചീക്കരണ പ്രവർത്തിയിൽ ഉൾപ്പെടുത്തി കീച്ചേരിപ്പടി-നിരപ്പ് റോഡ്, ഇഇസി മാർക്കറ്റ് റോഡ് എന്നിവിടങ്ങിലെ ഓടകളിലെ മാലിന്യം നഗരസഭഗം ഫൗസിയ അലിയുടെ നേതൃത്വത്തിൽ നീക്കം ചെയ്തത്. കെഎസ്ഇബി സെക്ഷൻ രണ്ട് ഓഫീസിനു മുന്നിൽ ഉണ്ടാവാറുള്ള വെള്ളക്കെട്ടും സമീപത്തെ ഓടയിൽ കാലങ്ങളായി കെട്ടിക്കിടക്കുന്ന മാലിന്യവും പ്രദേശവാസികളെ ഏറെ ബുദ്ധിമുട്ടിലാക്കിയിരുന്നു. ഇഇസി മാർക്കറ്റ് റോഡിൽ പകുതി സ്ഥലങ്ങളിൽ ഓടകൾ തുറന്നിരുന്നതും ശേഷിക്കുന്ന ഭാഗത്തെ ഓടയും പൈപും കാണാൻ സാധിക്കാത്തതും വെല്ലുവിളിയായെങ്കിലും രണ്ട് ആഴ്ചത്തെ പരിശ്രമത്തിനോടുവിലാണ് ഓട ശുചീകരണം പൂർത്തിയായത്. കീച്ചേരിപ്പടി പ്രദേശത്തെ ജനങ്ങളുടെ വർഷങ്ങളായുള്ള ദുരിത ത്തിനാണ് ഇതോടെ പരിഹാരമായത്. നഗരസഭഗം പി.എം സലീം, നഗരസഭ എഞ്ചിനീയർ ദിലീപ്, അസിസ്റ്റന്‍റ് എൻജിനീയർ ഹരിപ്രിയ, പ്രദേശവാസിയായ വെളിയത്തുകൂടി മാഹിൻ, സി.പി. സിറാജ്, അലി സെയ്ദ് എന്നിവരും ശുചീകാരണ പ്രവർത്തഞങ്ങൾക്ക് നേതൃത്വം നൽകി.

വിദ്യാർഥികളുടെ കപ്പക്കൃഷി വിളവെടുത്തു

കറുകുറ്റി: സ്റ്റാർ ജീസസ് ഹൈസ്കൂളിലെ കുട്ടികൾ നട്ടുവളർത്തിയ കപ്പച്ചെടികളുടെ വിളവെടുപ്പ് സ്കൂൾ ഹെഡ്മാസ്റ്റർ ഫാ. ജോണി ചിറയ്ക്കൽ നിർവഹിച്ചു. സ്കൂളിലെ ഉച്ചഭക്ഷണ ഓഫീസർ ജിഫി സി. ഏല്യാസ് ആശംസകൾ നേർന്നു. ഇവിടെ നിന്നും വിളവെടുക്കുന്ന കപ്പ ഉപയോഗിച്ച് കുട്ടികൾക്ക് ആഴ്ചയിൽ ഒരു ദിവസം കപ്പയും ഇറച്ചിയും നല്കുന്നുണ്ട്. മുൻ വർഷങ്ങളിലേതു പോലെ ഈ വർഷവും കരയാംപറമ്പിലുള്ള അഗതിമന്ദിരത്തിൽ അധ്യാപകരും കുട്ടികളും ചേർന്ന് കപ്പ എത്തിച്ചു നല്കി. സ്കൂൾ പരിസരത്തെ മാവിലെ മാങ്ങാ പറിച്ച് അച്ചാറുണ്ടാക്കി കുട്ടികൾക്ക് നൽകാറുണ്ട്. സ്കൂൾ ഉച്ചഭക്ഷണത്തിനുള്ള കറി ഉണ്ടാക്കാനും ഈ മാങ്ങാ ഉപയോഗിക്കുന്നു.

പെരിയാറിൽ സാഹസിക നീന്തൽ പ്രകടനവുമായി പെൺപട

ആലുവ: കൈകാലുകൾ കെട്ടി പെരിയാറിൽ 23 നീന്തൽ വിദ്യാർഥിനികളുടെ സാഹസിക നീന്തൽ പ്രകടനം. നീന്തൽ പരിശീലകൻ സജി വാളശേരിയുടെ നേതൃത്വത്തിലാണ് എട്ടു വയസു മുതൽ 17 വരെയുള്ള 21 പെൺകുട്ടികളും രണ്ട് വനിതകളും പെരിയാർ നീന്തികറിയത്. ആലുവ മണപ്പുറം മണ്ഡപം കടവിൽ നിന്നും പാറക്കടവ് ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് ഫ്ലാഗ് ഓഫ് ചെയ്തു. ഒരു കിലോമീറ്ററോളം ദൂരം നീന്തിയവരെ നിരവധി ത്രിതല പഞ്ചായത്ത് പ്രതിനിധികൾ സ്വീകരിച്ചു. ടി.എൻ. ഫാത്തിമ സുമയ്യ (8), ആരാധ്യ സൗരഭ് (9) , ഇന്ദ്രനീല സുരേഷ്(9), തരുണി എം. ബലിഗ(10), ലയ ഫാത്തിമ(10), ആൻ ക്രിസ്റ്റ ടൈറ്റസ് (11), കെ.എ. അമേയ( 11 ) , വരദ രതീഷ്(12), ഫിദ ഫാത്തിമ(12), ടി.ജെ. ഫാത്തിമ ഷിറിൽ (12), പി.കെ. ഹിബ ഫാത്തിമ (13), അക്ഷര സൗരഭ് (13), ആമിന വഫ (13), നെഹാൻ സി.എസ് (14), ആഗ്നൽ മേരി ഡാനി (14), സാൻവിക നിതിൻ(15) , അൽമ മേരി ടൈറ്റസ് (15), ദിൽന ഫാത്തിമ (15), പി.എം. കൃഷ്ണേന്ദു (16), പി.ബി. നിവേദിത (17), ഭാവ്ന പ്രവീൺ (17), ഫിദ ഫർഹത് (19), ശാമിലി സജു (36) എന്നിവരാണ് പെരിയാർ നീന്തിക്കടന്നത്.

നാട്ടുരുചിപ്പെരുമയില്‍ ഹിറ്റായി പെണ്‍കരുത്തിലെ പുതുമുന്നേറ്റം

കൊച്ചി: ചെറുകിട സംരംഭക ലോകത്തു പുതിയ വഴികള്‍ വെട്ടിയൊരുക്കി, അതിലൂടെ അഭിമാനപൂര്‍വം നടന്നുകയറുകയാണ് ജോളി ജോസും സംഘവും. ഗുണമേന്മയുള്ള പാലുല്‍പന്നങ്ങളും നിത്യോപയോഗ ഭക്ഷ്യവസ്തുക്കളും സ്വന്തമായി തയാറാക്കി ആവശ്യക്കാരിലേക്കെത്തിക്കുന്ന നവസംരംഭം ഔപചാരിക ഉദ്ഘാടനത്തിനു മുമ്പേ നാട്ടിലാകെ ഹിറ്റായിക്കഴിഞ്ഞു. എറണാകുളം കാഞ്ഞൂര്‍ ആറങ്കാവിലെ പെണ്‍കൂട്ടായ്മയില്‍ പിറവിയെടുത്ത എക്കോ നാച്വറല്‍ മില്‍ക്ക് പ്രൊഡക്ട്‌സ് യൂണിറ്റാണു കേരളത്തിലെ സ്ത്രീമുന്നേറ്റരംഗത്തെ പുതിയ മാതൃകാപാഠമാകുന്നത്. കൃഷിയും കന്നുകാലി വളര്‍ത്തലും ഗൃഹജോലികളും മാത്രമായൊതുങ്ങിയ ഏഴു സ്ത്രീകളാണ് സംഘടിതമായ ഡയറി പ്രൊഡക്ട്‌സ് യൂണിറ്റ് സംരംഭത്തിനു പിന്നില്‍. നാട്ടിലെ ക്ഷീരകര്‍ഷകരില്‍ നിന്നു സംഭരിക്കുന്ന പാലില്‍ നിന്നു, തൈര്, പനീര്‍, നെയ്യ്, യോഗര്‍ട്ട്, സിപ്പ് അപ് എന്നിവ ഇവിടെ ഉല്പാദിപ്പിക്കുന്നുണ്ട്. ഉല്പാദനം, പാക്കിംഗ്, വിപണനം എന്നിവയെല്ലാം നടത്തുന്നത് ഈ സ്ത്രീസംഘം തന്നെ. മികച്ച കര്‍ഷകയ്ക്കുള്ള കൃഷിവകുപ്പിന്‍റെ പുരസ്‌കാരം നേടിയ ജോളി ജോസിന്‍റെ വീടിനോടു ചേര്‍ന്നുള്ള കെട്ടിടത്തിലാണു ഡയറി പ്രൊഡക്ട്‌സ് യൂണിറ്റിന്‍റെ പ്രവര്‍ത്തനം. ജോളിക്കൊപ്പം, കിഴക്കുംഭാഗം വില്ലേജ് ക്ഷീരകര്‍ഷക ഗ്രൂപ്പിലെ മറ്റ് അംഗങ്ങളായ വല്‍സ സേവ്യര്‍, ലിസി സെബാസ്റ്റ്യന്‍, മിനി ജോണ്‍സണ്‍, ലീലാമ്മ ജോസ്, ലിസി പോള്‍, രീഷ്മ സൈജന്‍ എന്നിവരാണു സംരംഭത്തിനു ചുക്കാന്‍ പിടിക്കുന്നത്. അങ്കമാലി ബ്ലോക്ക് പഞ്ചായത്ത് മുന്‍ വൈസ് പ്രസിഡന്‍റുകൂടിയാണ് വല്‍സ സേവ്യര്‍. എം.എസ്. സ്വാമിനാഥന്‍ ഫൗണ്ടേഷനാണ്, എച്ച്ഡിഎഫ്‌സി ബാങ്കിന്‍റെ സമഗ്ര ഗ്രാമവികസന പദ്ധതിയുടെ സഹകരണത്തോടെ യൂണിറ്റിനാവശ്യമായ മെഷിനറികളും അനുബന്ധ സൗകര്യങ്ങളും സജ്ജമാക്കിയത്. ഓരോ ഘട്ടത്തിലും ശുചിത്വവും ഗുണമേന്മയും ഉറപ്പാക്കിയാണു യൂണിറ്റിന്‍റെ പ്രവര്‍ത്തനം. ഡയറി ഉല്പന്നങ്ങള്‍ക്കു പുറമേ, ഗുണമേന്മയുള്ള ദോശ-ഇഡ്‌ലി മാവ്, നാടന്‍ രുചിക്കൂട്ടിലുള്ള വിവിധ അച്ചാറുകള്‍, ചിപ്‌സുകള്‍ എന്നിവയും ഇവര്‍ തയാറാക്കുന്നുണ്ട്. സംരംഭം പൂര്‍ണതോതില്‍ പ്രവര്‍ത്തനക്ഷമമാകും മുമ്പേ ഇവരുടെ ഉല്പന്നങ്ങള്‍ക്ക് ആവശ്യക്കാര്‍ ഏറെയാണ്. 'വിജയിച്ച സംരംഭകരെല്ലാം നമുക്കു പ്രചോദനമാണ്. അവര്‍ വിജയിച്ചതുപോലെ നാട്ടിന്‍പുറങ്ങളിലെ സ്ത്രീകള്‍ക്കും സാധ്യമാകുമെന്നു തെളിയിക്കാനുള്ള ശ്രമം കൂടിയാണിത്. ഗുണമേന്മയുള്ള ഭക്ഷ്യവസ്തുക്കള്‍ ഇടനിലക്കാരില്ലാതെ വിശ്വസ്തതയോടെ ആവശ്യക്കാരിലേക്കെത്തിക്കാനാവുന്നതില്‍ നിറഞ്ഞ സംതൃപ്തിയാണ്.'- ജോളി ജോസ് പറഞ്ഞു. നാടിനും മറുനാടിനും വൈവിധ്യമാര്‍ന്ന നാട്ടുരുചിക്കൂട്ടു പകരാനുള്ള പെണ്‍കൂട്ടിനു പ്രോത്സാഹനമായി നാടാകെ കൂടെയുണ്ട്.

കുന്നുകരയിൽ കനത്ത മഴയിൽ വീട് തകർന്നു

നെടുമ്പാശേരി: കനത്ത മഴയിൽ വീടിന്‍റെ ഒരു ഭാഗം തകർന്നു വീണു. കുന്നുകര പഞ്ചായത്തിൽ അഞ്ചാം വാർഡിൽ മലായികുന്ന് വാട്ടർ ടാങ്കിന് സമീപം പുത്തൻപുരയിൽ ജ്യോതിഷിന്‍റെ വീടാണ് ഒരു ഭാഗം തകർന്നു വീണത്. ശനിയാഴ്ച്ച വൈകീട്ട് ആറോടെയാണ് അപകടം നടന്നത്. ഈ സമയത്ത് വീട്ടിൽ ജ്യോതീഷിന്‍റെ മകൾ മാത്രമാണ് ഉണ്ടായിരുന്നത്. ശബ്ദം കേട്ട മകൾ വീടിന്‍റെ ഒരു ഭാഗത്തേക്ക് മാറിയതിനാൽ വലിയൊരു ദുരന്തം ഒഴിവായി. നടന്ന സംഭവങ്ങളെ സംബന്ധിച്ച് വില്ലേജ് ഓഫീസ്, താലൂക്ക് ഓഫീസുകളിൽ വിവരങ്ങൾ അറിയിച്ചു. പ്രായമായ അമ്മയും ഭാര്യയും രണ്ട് കുട്ടികളും അടങ്ങുന്നതാണ് ജ്യോതിഷിൻ്റെ കുടുംബം.മന്ത്രി പി. രാജീവ് സ്ഥലം സന്ദർശിച്ചു. വീട്ടുകാരിൽ നിന്ന് വിവരങ്ങൾ ചോദിച്ചറിഞ്ഞു. കുടുംബത്തിന് അടിയന്തിര സഹായം നൽകാൻ നടപടി സ്വീകരിക്കണമെന്ന് റവന്യൂ അധികൃതർക്ക് മന്ത്രി നിർദേശം നൽകി.

നായരമ്പലത്തും ഞാറക്കലും കടൽക്ഷോഭം

വൈപ്പിൻ : കാലവർഷം കനത്ത തോടെ നായരമ്പലം, ഞാറക്കൽ തീരങ്ങളിൽ കടൽക്ഷോഭം രൂക്ഷമായി. നായരമ്പലം പുത്തൻ കടപ്പുറത്താണ് കടൽ കയറ്റം രൂക്ഷമായി തുടരുന്നത്. ഇവിടെ സെന്‍റ് ആന്‍റണീസ് പള്ളിയുടെ പിൻഭാഗത്തും വടക്കോട്ടു മാറി ബാലമുരുക ക്ഷേത്രത്തിന്‍റെ പിൻഭാഗത്തുമെല്ലാം കടൽ ക്ഷോഭിച്ച് വെള്ളം കരയിലേക്ക് കയറുന്നുണ്ട്. ഈ അടുത്ത് നിർമിച്ച തീരദേശ റോഡും പലയിടത്തും തകർന്നു. ക്ഷേത്രത്തിനു പിന്നിൽ കാലവർഷത്തിൽ തുടക്കത്തിലെ ഉണ്ടായ കടൽ ക്ഷോഭത്തിൽ തകർന്ന ജിയോ ഭിത്തികൾക്കു പകരമായി പുതിയ ജിയോ ഭിത്തികൾ നിർമിച്ചുകൊണ്ടിരിക്കുന്നതിനിടയിലാണ് വീണ്ടും കടൽ കയറ്റം രൂക്ഷമായിരിക്കുന്നത്. പള്ളിയുടെ ഭാഗത്ത് കടൽ ഭിത്തി തകർന്നിട്ട് വർഷങ്ങളായെന്ന് പഞ്ചായത്തംഗം സി.സി. സിജി പറയുന്നു. എന്നാൽ ഇവിടെ ഭിത്തി നിർമിക്കാൻ കൂട്ടാക്കാതെ എല്ലാ വർഷവും ലക്ഷക്കണക്കിനു രൂപയുടെ ജിയോ ബാഗ് സ്ഥാപിച്ച് പണം കടലിൽ ഒഴുക്കി കളയുകയാണ് ഇറിഗേഷന്‍റെ പതിവെന്നും പഞ്ചായത്തംഗം ആരോപിക്കുന്നു. ഞാറക്കൽ ഒന്നാം വാർഡ് തീരദേശത്താണ് കടൽ കയറുന്നത്. വീടുകളിൽ വെള്ളം കയറുന്നുണ്ട്. ഇവിടെയും കടൽ ഭിത്തിയുടെ അറ്റകുറ്റപ്പണികൾ നടന്നിട്ട് വർഷങ്ങളായെന്ന് പഞ്ചായത്ത് പ്രതിപക്ഷ നേതാവ് എ.പി.ലാലു ചൂണ്ടിക്കാട്ടി. കടൽക്ഷോഭം തടയാൻ അടിയന്തിരമായി താൽകാലിക തടയണകൾ ഞാറക്കൽ തീരദേശത്തും സ്ഥാപിക്കണമെന്ന് അദ്ദേഹം ആവശ്യപ്പെട്ടു.

മയക്കുമരുന്നുമായി യുവാവ് പിടിയിൽ

പറവൂർ: മയക്കുമരുന്ന് വിഭാഗത്തിൽപ്പെട്ട 11 നൈട്രോസെപ്പം ഗുളികകളും മൂന്ന് കഞ്ചാവ് ബീഡികളുമായി മന്നം പാറപ്പുറം പനച്ചിക്കൽ വീട്ടിൽ നൗഷാദ്(ഇട്ടി നൗഷാദ് 39)നെ പറവൂർ എക്സൈസ് സർക്കിൾ ഇൻസ്പെക്ടർ എം ഒ വിനോദും സംഘവും ചേർന്ന് പിടികൂടി. നിരവധി എൻഡിപിഎസ് കേസുകളിൽ പ്രതിയാണിയാൾ.

രക്തദാന ക്യാമ്പ് നടത്തി

കൊച്ചി: കെസിവൈഎം കാഞ്ഞൂര്‍ യൂണിറ്റിന്‍റെ നേതൃത്വത്തില്‍ കാഞ്ഞൂര്‍ വിമല ആശുപത്രിയില്‍ നടത്തിയ രക്തദാന ക്യാമ്പ് കാഞ്ഞൂര്‍ സെന്‍റ് മേരീസ് ഫൊറോന പള്ളി വികാരി ഫാ. ജോയ് കണ്ണമ്പുഴ ഉദ്ഘാടനം ചെയ്തു. കെസിവൈഎം കാഞ്ഞൂര്‍ യൂണിറ്റ് പ്രസിഡന്‍റ് ഫെനിക്‌സ് പോള്‍ അധ്യക്ഷത വഹിച്ചു. ബ്രാഞ്ച് പ്രസിഡന്‍റുമായ ഡോ. ശോഭന ലഹരിക്കെതിരെ ബോധവത്കരണ ക്ലാസ് നയിച്ചു. കെസിവൈഎം കാഞ്ഞൂര്‍ യൂണിറ്റ് സെക്രട്ടറി സ്‌നേഹ സെബി, വൈസ് പ്രസിഡന്‍റ് സെബാസ്റ്റ്യന്‍ ജോര്‍ജ്, ജോസ് പാറയ്ക്ക, ഡേവിസ് വരേകുളം, സിന്ധു ജോസ് എന്നിവര്‍ പ്രസംഗിച്ചു. കെസിവൈഎം ഭാരവാഹികളായ എല്‍സ ബിജു, ആല്‍ബിന്‍ ഷാജി, ജാക്‌സണ്‍ സാബു, ആല്‍ബിന്‍ ജോസ്, ജോസ് ജോണി, എയ്ഞ്ചല്‍ മരിയ, ബിബിന്‍ പോള്‍ എന്നിവര്‍ നേതൃത്വം നല്‍കി. ഐഎംഎ മധ്യകേരള ബ്രാഞ്ചിന്‍റെ സഹകരണത്തോടെയാണ് ക്യാമ്പ് സംഘടിപ്പിച്ചത്.

പഠനോപകരണങ്ങൾ വിതരണം ചെയ്തു

ഫോർട്ടുകൊച്ചി: നവജീവൻ പ്രേക്ഷിത സംഘത്തിന്‍റെ നേതൃത്വത്തിൽ കുട്ടികൾക്ക് പഠനോപകരണങ്ങൾ വിതരണം ചെയ്തു. നൂറിലേറെ കുട്ടികൾക്കാണ് പഠനോപകരണങ്ങൾ വിതരണം ചെയ്തത്. വീൽചെയറിൽ ജീവിതം തള്ളിനീക്കുന്ന ഡിഗ്രി വിദ്യാർഥിക്ക് ടിവിയും സമ്മാനിച്ചു. സിപിഎം കൊച്ചി ഏരിയ സെക്രട്ടറി പി.എസ്. രാജം ചടങ്ങ് ഉദ്ഘാടനം ചെയ്തു. നവജീവൻ പ്രേക്ഷിത സംഘം പ്രസിഡന്‍റ് മേരി റെയ്യ്ച്ചൽ അധ്യക്ഷത വഹിച്ചു. രാമേശ്വരം കുടുംബശ്രീ ഹാളിൽ നടന്ന ചടങ്ങിൽ കൗൺസിലർ ഷീബലാൽ മുഖ്യാതിഥിയായി പങ്കെടുത്തു. കൊച്ചിയിലും ആലപ്പുഴയിലും നവജീവൻ പ്രേക്ഷിത സംഘം നടത്തി കൊണ്ടിരിക്കുന്ന കാരുണ്യ പ്രവർത്തികൾവിലമതിക്കാനാവാത്തതാണെന്ന് പി.എസ്. രാജം പറഞ്ഞു ഏരിയ കമ്മിറ്റി അംഗം പി.ജെ. ദാസൻ , ജോൺസൺ വള്ളനാട്ട്, ജെസി ജോസഫ് ഫ്ലോറി കുഞ്ഞപ്പൻ, ചിന്ന സൈമൺ എന്നിവർ പ്രസംഗിച്ചു.

പൗരാണിക കെട്ടിടത്തിന്‍റെ മേൽക്കൂര തകർന്നു; ഓടു വീണ് രണ്ട് കാറിന് നാശം

ഫോർട്ടുകൊച്ചി: പൗരാണിക കെട്ടിടമായ ബർഗൻ സ്ട്രീറ്റിലെ കൂറ്റൻ കെട്ടിടത്തിന്‍റെ മേൽക്കൂരയുടെ പട്ടിക ഒടിഞ്ഞ് നൂറു കണക്കിന് ഓടുകൾ താഴേക്ക് വീണ് നിറുത്തിയിട്ടിരുന്ന രണ്ടു കാറുകൾക്ക് കേടുപാടുകൾ സംഭവിച്ചു. ഇന്നലെപുലർച്ചെയാണ് സംഭവം നടന്നത്. ഈ സമയം റോഡിൽ ആരും ഇല്ലാതിരുന്നതിനാൽ അപകടം ഒഴിവായി. താഴെ പാർക്ക് ചെയ്തിരുന്ന കാറുകൾക്ക് മുകളിലേക്കാണ് ഓടുകളും പട്ടികകളും പതിച്ചത്. പൈതൃക സംരക്ഷണ മേഖലയായതിനാൽ പുരാവസ്തു വകുപ്പിന്‍റെ അനുമതിയില്ലാതെ കെട്ടിടങ്ങളുടെ നവീകരണമോ അറ്റകുറ്റപണികൾ നടത്തുവാനോ കഴിയില്ല. ഇത് കെട്ടിട ഉടമകൾക്ക് ഏറെ പ്രതിസന്ധി സൃഷ്ടിക്കുന്നുണ്ട്. തകർന്ന കെട്ടിടത്തിന്‍റെ അപകടാവസ്ഥ ചൂണ്ടിക്കാണിച്ചുകൊണ്ട് 10 കൊല്ലം മുൻപ് കൊച്ചി നഗരസഭയിലും താലൂക്കിലും ഹെറിറ്റേജ് കമ്മിറ്റിയിലും പരാതി നൽകിയിട്ടും നാളിതുവരെ യാതൊരു നടപടിയും സ്വീകരിച്ചിട്ടില്ലെന്ന് പ്രദേശവാസികൾ ആരോപിച്ചു. ഫോർട്ടുകൊച്ചിയിലെ പൈതൃക കെട്ടിടങ്ങൾ സംരക്ഷിക്കുന്നതിനും കെട്ടിടങ്ങളുടെ പ്രൗഢി നിലനിർത്തുന്നതിനും ആർക്കിയോളജി ഡിപ്പാർട്ട്മെന്‍റും ഹെറിറ്റേജ് കമ്മിറ്റികളും ഇത്തരം കെട്ടിടങ്ങൾക്ക് ഗ്രാന്‍റുകൾ നൽകണമെന്ന് കൊച്ചി നഗരസഭ പ്രതിപക്ഷ നേതാവ് അഡ്വ. ആൻണി കുരീത്തറ ആവശ്യപ്പെട്ടു. പൈതൃക കെട്ടിടങ്ങളുടെ മെയിന്‍റനൻസ് ജോലികൾ സുതാര്യമാക്കിയാൽ പൈതൃക നഗരിയിലെ ചരിത്ര സ്മാരകങ്ങൾ സംരക്ഷിക്കുവാൻ സാധിക്കുമെന്നും കൊച്ചി നഗരസഭ പ്രതിപക്ഷ നേതാവ് അഡ്വ. ആന്‍റണി കുരീത്തറ പറഞ്ഞു.

മഞ്ഞപ്ര സെന്‍റ് മേരീസ് എൽപി സ്കൂളിൽ ദീപിക നമ്മുടെ ഭാഷാ പദ്ധതി

മഞ്ഞപ്ര: മഞ്ഞപ്ര സെന്‍റ് മേരീസ്‌ എൽപി സ്കൂളിൽ ദീപിക നമ്മുടെ ഭാഷാ പദ്ധതി ആരംഭിച്ചു. പദ്ധതിയുടെ ഉദ്ഘാടനം ദീപിക ഫ്രണ്ട്‌സ് ക്ലബിന്‍റെ അതിരൂപത പ്രസിഡന്‍റും പൂർവ വിദ്യാർഥിയുമായ അഡ്വ. ജേക്കബ് മഞ്ഞളി ദീപിക പത്രം സ്കൂൾ വിദ്യാർഥികളായ ദേവാംഗന ശ്രീജിത്ത്‌, ജൊഹാൻ സിബിൻ, കെ.എസ്. ആൻഡ്രിയ എന്നിവർക്ക് നൽകിക്കൊണ്ട് നിർവഹിച്ചു. ചടങ്ങിൽ ദീപിക ഫ്രണ്ട്‌സ് ക്ലബ്‌ ഫൊറോനാ പ്രസിഡന്‍റ് കെ.പി. പോൾ, പ്രധാനാധ്യാപിക സിസ്റ്റർ ഹിത, സിസ്റ്റർ അന്ന മരിയ, സിസ്റ്റർ ജൂഡിറ്റ്, ഡെൽന ജോസ്, വൃന്ദ, ജിൻസി, ഏരിയ മാനേജർ ടി.എ. നിബിൻ, പിടിഎ പ്രസിഡന്‍റ് മെൽജോ ദേവസിക്കുട്ടി എന്നിവർ സംസാരിച്ചു. സ്കൂളിൽ പത്രം സ്പോൺസർ ചെയ്തിരിക്കുന്നത് പൂർവവിദ്യാർഥി സംഘടനയാണ്.

വൃക്ഷത്തൈ, പച്ചക്കറി നടീല്‍ യജ്ഞം നടത്തി

കൊച്ചി: ലോകപരിസ്ഥിതി ദിനവുമായി ബന്ധപ്പെട്ട് ട്രീ ഫോര്‍ ലൈഫ് ഓര്‍ഗനൈസേഷനുമായി ചേര്‍ന്ന് റോട്ടറി ക്ലബ് ഓഫ് കൊച്ചിന്‍ മിഡ്ടൗണ്‍ വൃക്ഷത്തൈ- പച്ചക്കറി നടീല്‍ യജ്ഞം നടത്തി. തേവര ഗവ. റീജണൽ ഫിഷറീസ് ടെക്നിക്കൽ വൊക്കേഷണൽ ഹയർ സെക്കൻഡറി സ്കൂളിൽ നടന്ന പരിപാടിയിൽ റോട്ടറി ക്ലബ് ഓഫ് കൊച്ചിന്‍ മിഡ്ടൗണ്‍ പ്രസിഡന്‍റ് അഡ്വ. മരിയന്‍ പോള്‍, ട്രീ ഫോര്‍ ലൈഫ് ഓര്‍ഗനൈസേഷന്‍ പ്രസിഡന്‍റ് മഞ്ജു മാത്യു എന്നിവര്‍ പങ്കെടുത്തു. കുട്ടികളും അധ്യാപകരും സ്‌കൂള്‍ പരിസരത്ത് തൈകള്‍ നട്ടുപിടിപ്പിക്കുകയും അവയെ പരിപാലിക്കുമെന്ന് പ്രതിജ്ഞയെടുക്കുകയും ചെയ്തു.

കെഎൽസിഡബ്ല്യുഎ സ്ഥാപനദിനാഘോഷം

ഫോർട്ടുകൊച്ചി: ആനിമസ്ക്രീൻ അനുസ്മരണവും കെഎൽസിഡബ്ല്യുഎ സ്ഥാപനദിനാഘോഷവും നടത്തി. കുമ്പളങ്ങി സെന്‍റ് ജോസഫ് പാരീഷ് ഹാളിൽ നടന്ന ചടങ്ങ് ഫാ. ഷെൽസൻ ജോസഫ് താണിക്കൽ ഉദ്ഘാടനം ചെയ്തു. കൊച്ചി രൂപത പ്രസിഡന്‍റ് കർമ്മിലി ആന്‍റണി അധ്യക്ഷത വഹിച്ചു. ഫെറോന വികാരി ഫാ. സെബാസ്റ്റ്യൻ പുത്തം പുരയ്ക്കൽ, വികാരി ഫാ. ആന്‍റണി നെടുംപറമ്പിൽ, അരൂർ പഞ്ചായത്ത് പ്രസിഡന്‍റ് അഡ്വ. രാഖി ആന്‍റണി, കുമ്പളങ്ങി പഞ്ചായത്ത് പ്രസിഡന്‍റ് സൂസൻ ജോസഫ്, കൗൺസിലർ ഷീബ ഡ്യൂറോം, മെറ്റിൽഡാ മൈക്കിൾ, സിസ്റ്റർ നിരഞ്ജന, മേയ്മി ജോസഫ് ചാലാവീട്ടിൽ എന്നിവർ പ്രസംഗിച്ചു.

ലയണ്‍സ് ക്ലബ് നൂറ് വീട് നിര്‍മിച്ചു നല്‍കും

കൊച്ചി: ലയണ്‍സ് ഇന്‍റര്‍നാഷണല്‍ ഡിസ്ട്രിക്ട് 318 സിയുടെ നേതൃത്വത്തില്‍ ബജറ്റ് അവതരണം ലയണ്‍സ് മള്‍ട്ടിപ്പിള്‍ കൗണ്‍സില്‍ ചെയര്‍മാന്‍ രാജന്‍ എന്‍. നമ്പൂതിരി കൊച്ചി ഗോകുലം കണ്‍വന്‍ഷന്‍ സെന്‍ററില്‍ ഉദ്ഘാടനം ചെയ്തു. നിയുക്ത ഗവര്‍ണര്‍ കെ.ബി. ഷൈന്‍ കുമാര്‍ അധ്യക്ഷത വഹിച്ചു. സാമ്പത്തികമായി പിന്നാക്കം നില്‍ക്കുന്നവര്‍ക്ക് നൂറു വീടുകള്‍ നിര്‍മിച്ചു നല്‍കുന്നത് ഉള്‍പ്പടെ ഒട്ടേറെ സേവന പ്രവര്‍ത്തനങ്ങളാണ് ബജറ്റില്‍ പ്രഖ്യാപിച്ചിട്ടുള്ളത്. ലയണ്‍സ് ഇന്‍റര്‍നാഷണല്‍ മുന്‍ ഡയറക്ടര്‍ വി. മുരുകന്‍, ഏരിയാ ലീഡര്‍ അഡ്വ. വി. അമര്‍നാഥ്, മുന്‍ ഗവണര്‍മാരായ ആര്‍.ജി. ബാലസുബ്രഹ്മണ്യം, ഡോ. ബീന രവികുമാര്‍, വൈസ് ഗവര്‍ണര്‍മാരായ വി.എസ്. ജയേഷ്, കെ.പി. പീറ്റര്‍, സെക്രട്ടറി സജി ചമേലി, ട്രഷറര്‍ വര്‍ഗീസ് ജോസഫ് തുടങ്ങിയവര്‍ പ്രസംഗിച്ചു.

ആതിര ഗോൾഡ് ആൻഡ് സില്‍ക്‌സിലെ മോഷണം; പ്രതി പിടിയിൽ

കൊച്ചി: ഹൈക്കോടതി ജംഗ്ഷനിലെ അടച്ചുപൂട്ടി കിടക്കുന്ന ആതിര ഗോള്‍ഡ് ആന്‍ഡ് സില്‍ക്‌സ് സ്ഥാപനത്തില്‍ മോഷണം നടത്തിയ ആളെ പിടികൂടി. കടവന്ത്ര കെ.പി. വള്ളോന്‍ റോഡില്‍ കാഞ്ഞിക്കല്‍ വീട്ടില്‍ ജസ്റ്റിന്‍ ജേക്കബിനെയാണ് സെന്‍ട്രല്‍ സ്റ്റേഷന്‍ എസ്ഐ സുധീറിന്‍റെ നേതൃത്വത്തില്‍ അറസ്റ്റ് ചെയ്തത്. രാത്രികാല പട്രോളിംഗ് നടക്കുന്നതിനിടെ സൗത്ത് റെയില്‍വേ സ്‌റ്റേഷന് സമീപത്തു നിന്നാണ് ഇയാള്‍ പിടിയിലായത്. ഒട്ടേറെ അടിപിടി, മോഷണക്കേസുകളില്‍ പ്രതിയാണ് ജസ്റ്റിന്‍. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ചെട്ടിക്കാട് പള്ളിയിൽ വിശുദ്ധ അന്തോണീസിന്‍റെ മരണത്തിരുനാൾ നാളെ

പറവൂർ: ചെട്ടിക്കാട് വിശുദ്ധ അന്തോണീസിന്‍റെ തീർഥാടന കേന്ദ്രത്തിൽ അത്ഭുത പ്രവർത്തകനായ വിശുദ്ധന്‍റെ മരണ തിരുനാൾ നാളെ. രാവിലെ 6.15 മുതൽ വൈകിട്ട് 6.30 വരെ ദിവ്യബലി നൊവേന, ആരാധന എന്നിവ നടക്കും. രാവിലെ 9.30 മുതൽ ഊട്ടു നേർച്ചവിതണം ചെയ്യും. രാവിലെ 10.30 ന് നടക്കുന്ന തിരുനാൾ ദിവ്യബലിക്ക് ഫാ. പ്രിൻസ് പഴമ്പിള്ളി മുഖ്യകാർമികനാകും. തുടർന്ന് നൊവേന, ആരാധനഎന്നിവയുണ്ടാകുമെന്ന് റെക്ടർ റവ .ഡോ. ബെന്നി വാഴക്കൂട്ടത്തിൽ, ഫാ. അജയ് ആന്‍റണി പുത്തൻ പറമ്പിൽഎന്നിവർ അറിയിച്ചു.

ആംബുലൻസ് കാറിലിടിച്ചു; കാർ ഡ്രൈവർക്ക് പരിക്ക്

ആലുവ: ദേശീയപാതയിൽ ട്രാഫിക് സിഗ്നൽ തെറ്റിച്ചു വന്ന ആംബുലൻസ് ഇടിച്ച് കാർ ഡ്രൈവർക്ക് പരിക്കേറ്റു. പരിക്കേറ്റ ചൊവ്വര സ്വദേശി നിഹാദ് (40)നെ ആലുവ നജാത്ത് ആശുപത്രിയിൽ പ്രവേശിപ്പിച്ചു. ഇന്നലെ ഉച്ചക്ക് രണ്ടോയോടെ തോട്ടക്കാട്ടുകര ട്രാഫിക് സിഗ്നൽ ജംഗ്ഷനിലാണ് അപകടം നടന്നത്. കടുങ്ങല്ലൂർ റോഡിൽ നിന്ന് ആലുവ ഭാഗത്തേക്ക് പോകാനായി ദേശീയപാതയിലേക്ക് കുറുകെ കടന്നപ്പോഴാണ് കാറിൽ ആംബുലൻസ് വന്നിടിച്ചത്. ഡ്രൈവറുടെ ഭാഗത്ത് വന്നിടിച്ച ആഘാതത്തിൽ കാർ കറങ്ങിയാണ് നിന്നത്. ശക്തമായ മഴയായതിനാൽ ചുവന്ന സിഗ്നൽ കണ്ടില്ലെന്ന് ആംബുലൻസ് ഡ്രൈവർ മലപ്പുറം സ്വദേശി അനന്തു മൊഴി നൽകിയിട്ടുണ്ട്. കാറിൽ നിഹാദിനൊപ്പം മറ്റൊരാൾ കൂടി ഉണ്ടായിരുന്നെങ്കിലും പരിക്കില്ല. ആലുവ പോലീസ് കേസെടുത്തു. തൃശൂർ സിറ്റി സർവീസിന്‍റേതാണ് ആംബുലൻസ്.

ആലുവ നഗരസഭാ ശതാബ്ദി ആഘോഷം‍ : ഓംബുഡ്സ്മാൻ ധനവിനിയോഗ റിപ്പോർട്ട് ആവശ്യപ്പെട്ടു

ആലുവ: ആലുവ നഗരസഭാ ശതാബ്ദി ആഘോഷ പരിപാടികളുടെ ധനവിനിയോഗത്തിനെതിരെയുള്ള ഹർജിയിൽ വിശദമായ ബാങ്ക് സ്‌റ്റേറ്റ്മെന്‍റ് സമർപ്പിക്കാൻ ഓംബുഡ്സ്മാൻ നിർദേശം. മുൻ നഗരസഭാ സെക്രട്ടറിയെ കക്ഷി ചേർത്ത് നോട്ടീസ് നൽകാനും തദ്ദേശ സ്വയം ഭരണ വകുപ്പ് ഓംബുഡ്സ്മാൻ ഉത്തരവിട്ടു. ശതാബ്ദി ആഘോഷത്തിനായി രൂപീകരിച്ച കമ്മിറ്റി സംഭാവനകൾ സ്വീകരിക്കാനായി ആരംഭിച്ച ബാങ്ക് അക്കൗണ്ടിൽ ആലുവനഗരസഭയുടെ പാൻ നമ്പർ ആണ് ഉപയോഗിച്ചത്. എന്നാൽ ചട്ടപ്രകാരം ഓതറൈസ്ഡ് സിഗ്നേറ്ററിയായിരിക്കേണ്ട നഗരസഭ സെക്രട്ടറിയെ ഒഴിവാക്കിയാണ് സാമ്പത്തിക ഇടപാടുകൾ നടത്തിയത്. ഇതിൽ ഭരണ ദുർവിനിയോഗവും അഴിമതിയും ഉന്നയിച്ച് പ്രതിപക്ഷ കൗൺസിലർ എൻ. ശ്രീകാന്ത് ആണ് തദ്ദേശ സ്വയം ഭരണ വകുപ്പ് ഓംബുഡ്സ്മാന് പരാതി നൽകിയത്. ആഘോഷ പരിപാടികളുടെ വരവ് ചെലവ് കണക്കുകൾ അടങ്ങുന്ന വിശദമായ റിപ്പോർട്ട് സമർപ്പിക്കാനാണ് ആലുവ നഗരസഭാ സെക്രട്ടറിയോട് തദ്ദേശ സ്വയം ഭരണ വകുപ്പ് ഓംബുഡ്സ്മാൻ ആവശ്യപ്പെട്ടത്. ആഘോഷകമ്മിറ്റി രൂപീകരണത്തിന്റെ മാനദണ്ഡങ്ങൾ, കമ്മിറ്റി ഘടന, ബാങ്ക് ബാങ്ക് അക്കൗണ്ടിന്റെ വിവരങ്ങൾ, ഓതറൈസ്ഡ് സിഗ്നേറ്ററികൾ തുടങ്ങിയവ അടങ്ങിയ വിശദമായ റിപ്പോർട്ട് ആണ് ആവശ്യപ്പെട്ടിരിക്കുന്നത്. ഒരു വർഷം നീണ്ടു നിന്ന ശതാബ്ദി ആഘോഷം 2023 ലാണ് സമാപിച്ചത്. എന്നാൽ കഴിഞ്ഞ ജനുവരിയിലാണ് - വരവ് ചെലവ് കണക്കുകൾ സംഘാടക സമിതി യോഗത്തിൽ അവതരിപ്പിച്ചത് യഥാർത്ഥ കണക്കുകൾ ധനകാര്യ സ്ഥിരം സമിതിയിലോ കൗൺസിൽ യോഗത്തിലോ ഇതുവരേയും അവതരിപ്പിച്ചിട്ടില്ല. ഇതിനിടയിൽ തദ്ദേശ സ്വയംഭരണ വകുപ്പിന്‍റെ ഇന്‍റേണൽ വിജിലൻസും പണമിടപാടിൽ അന്വേഷണം പ്രഖ്യാപിച്ചിട്ടുണ്ട്.

നേതൃത്വ പരിശീലന ക്ലാസ്

മൂവാറ്റുപുഴ: കാരക്കുന്നം സെന്‍റ് മേരീസ് കത്തോലിക്കാ പള്ളിയിൽ നേതൃത്വ പരിശീലന ക്ലാസ് നടത്തി. വികാരി ഫാ. ജോർജ് വള്ളോംകുന്നേൽ പരിശീലന ക്യാന്പ് ഉദ്ഘാടനം ചെയ്തു. അസിസ്റ്റന്‍റ് വികാരി ഫാ. അലൻ വെട്ടിക്കുഴി മുഖ്യപ്രഭാഷണം നടത്തി. കെവിൻ ജോസഫ് മാണിശേരിൽ ക്ലാസ് നയിച്ചു. അഞ്ചാം മുതൽ പത്താം ക്ലാസ് വരെയുള്ള കുട്ടികളിൽ നേതൃത്വ പരിശീലനം, കലാപരമായ കഴിവുകളിൽ പ്രോത്സാഹനം, പ്രസംഗ പരിശീലനം തുടങ്ങിയവ ഉദ്ദേശിച്ചാണ് ക്ലാസ്. എല്ലാമാസവും രണ്ടാം ശനിയാഴ്ച വിവിധ വിഷയങ്ങളിൽ ഏകദിന സെമിനാർ നടത്തും.

‘സ്വപ്നഭവനം’ താക്കോൽ കൈമാറി

കോതമംഗലം: ലയണ്‍സ് ഇന്‍റർനാഷണൽ ഡിസ്ട്രിക്ട് 318 സി ചിറ്റിലപ്പിള്ളി ഫൗണ്ടേഷനുമായി സഹകരിച്ച് നടപ്പാക്കുന്ന ‘സ്വപ്നഭവനം’ പദ്ധതിയിലൂടെ കോതമംഗലം ടൗണ്‍ ലയണ്‍സ് ക്ലബ് നിർമിച്ചു നൽകിയ വീടിന്‍റെ താക്കോൽ കൈമാറി. നെല്ലിമറ്റം കോളനിപ്പടിയിൽ കളരിക്കുടിയിൽ ജോർജ്-കുമാരി ദന്പതികൾക്കാണ് വീട് നൽകിയത്. താക്കോൽദാനം ലയണ്‍സ് ഡിസ്ട്രിക്ട് ഗവർണർ രാജൻ എൻ. നന്പൂതിരി നിർവഹിച്ചു. ക്ലബ് പ്രസിഡന്‍റ് പൗലോസ് കുട്ടി ജേക്കബ് അധ്യക്ഷത വഹിച്ചു. പദ്ധതിയുടെ ഡിസ്ട്രിക്ട് സെക്രട്ടറി ജോസ് മംഗലി, ഡിസ്ട്രിക്ട് പ്രോഗ്രാം കോ-ഓർഡിനേറ്റർ സാംസണ്‍ തോമസ്, റീജിയൻ ചെയർപേഴ്സണ്‍ കെ.സി. മാത്യൂസ്, വി.ആർ. ശ്രീകുമാർ, ജോർജ് കുര്യയ്പ്, പ്രഫ. കെ.എം. കുര്യാക്കോസ്, ക്ലബ് സെക്രട്ടറി ടിങ്കു സോമൻ ജേക്കബ്, ട്രഷറർ എം.യു. ജേക്കബ് എന്നിവർ പ്രസംഗിച്ചു.

കുഴിമന്തി കഴിച്ചവർക്ക് ഭക്ഷ്യവിഷബാധ

കോതമംഗലം: കുഴിമന്തി കഴിച്ചവർക്ക് ഭക്ഷ്യവിഷബാധ. ഹോട്ടലിനെതിരെ നടപടിയെടുത്ത് ആരോഗ്യ വകുപ്പ്. നെല്ലിക്കുഴി നങ്ങേലിപ്പടിക്ക് സമീപം പ്രവർത്തിക്കുന്ന കുഴിമന്തി കടയാണ് അടച്ചുപൂട്ടിയത്. കഴിഞ്ഞ ഞായറാഴ്ച്ച ഇവിടെ നിന്നും ഭക്ഷണം കഴിച്ച കോളജ് വിദ്യാർഥികൾ അടക്കമുള്ളവർ ചികിത്സ തേടിയതോടെയാണു ആരോഗ്യ വകുപ്പു സ്ഥാപനത്തിൽ പരിശോധന നടത്തി പൊതുജനാരോഗ്യ നിയമ പ്രകാരം അടപ്പിച്ചത്. സമീപത്തെ വിവിധ ഭക്ഷണശാലകൾക്ക് നോട്ടീസ് നൽകി തുടർ നടപടി സ്വീകരിച്ച് വരുന്നതായി അധികൃതർ അറിയിച്ചു.

നഴ്സിംഗ് റിസർച്ച് ശില്പശാല

കോതമംഗലം: മാർ ബസേലിയോസ് നഴ്സിംഗ് കോളജിന്‍റെ ആഭിമുഖ്യത്തിൽ ട്രെയിൻഡ് നഴ്സസ് അസോസിയേഷൻ ഓഫ് ഇൻഡ്യ കേരള ഘടകത്തിന്‍റെ പങ്കാളിത്തത്തോടെ ശില്പശാല നടത്തി. ടിഎൻഎഐ കേരള ഘടകം പ്രസിഡന്‍റ് പ്രഫ. രേണു സൂസൻ തോമസ് ഉദ്ഘാടനം ചെയ്തു. നഴ്സിംഗ് കോളജ് പ്രിൻസിപ്പൽ ഡോ. സെല്ല്യാമ്മ കുരുവിള അധ്യക്ഷത വഹിച്ചു. നഴ്സിംഗ് റിസർച്ചിനെക്കുറിച്ച് നടത്തിയ ശില്പശാലയിൽ ഹോളി ഫാമിലി കോളജ് ഓഫ് നഴ്സിംഗ് മുതലക്കോടം പ്രിൻസിപ്പൽ ഡോ. ജയൻ ജെയിംസ്, എയിംസ് കോളജ് ഓഫ് നഴ്സിംഗ് ഹൈദരാബാദ് അസോസിയേറ്റ് ഡോ. ജിസാ ജോർജ്, എംഒഎസ്‌സി കോളജ് ഓഫ് നഴ്സിംഗ് കോലഞ്ചേരി പ്രിൻസിപ്പൽ ഡോ. നമിത സുബ്രഹ്മണ്യം, മാർ ബസേലിയോസ് നഴ്സിംഗ് കോളജ് വൈസ് പ്രിൻസിപ്പൽ ഡോ. ഐറിൻ സി. പൗലോസ് എന്നിവർ ക്ലാസുകൾ നയിച്ചു. മാർ ബസേലിയോസ് നഴ്സിംഗ് കോളജ് അസോസിയേറ്റ് പ്രഫസർമാരായ എം. ചിത്ര, ജിഷാ പി. മുഹമ്മദ്, അസിസ്റ്റന്‍റ് പ്രഫ. ദിവ്യ ജോർജ് എന്നിവർ പ്രസംഗിച്ചു.

മണ്ണാൻകടവ് തോടിന്‍റെ പുറന്പോക്ക് കൈയേറ്റങ്ങൾ ഒഴിപ്പിക്കുന്നു

മൂവാറ്റുപുഴ: നഗരസഭ 16-ാം വാർഡിലെ മണ്ണാൻകടവ് തോടിന്‍റെ പുറന്പോക്ക് കൈയേറ്റങ്ങൾ പൊളിച്ച് മാറ്റണമെന്നാവശ്യപ്പെട്ട് നഗരസഭാ സെക്രട്ടറി നോട്ടീസ് നൽകി. 14 ദിവസത്തിനുള്ളിൽ കൈയേറ്റമൊഴിയണമെന്നാണ് കൈയേറ്റക്കാർക്ക് നിർദേശം നൽകിയിരിക്കുന്നത്. ആരക്കുഴ റോഡിൽ നിന്നും പേട്ട അങ്കണവാടിയിലേക്ക് പോകുന്ന റോഡിലെ മണ്ണാൻകടവ് തോട് മഴക്കാലത്ത് കവിഞ്ഞൊഴുകി വെള്ളക്കെട്ടുണ്ടാകുന്നുവെന്ന പരാതിക്ക് പരിഹാരം കാണുന്നതിനായാണ് കൈയേറ്റമൊഴിപ്പിക്കുന്നത്. മഴക്കാലങ്ങളിൽ മണ്ണാൻകടവ് തോട് നിറഞ്ഞൊഴുകി പേട്ട അങ്കണവാടിയിലും, വീടുകളിലും വെള്ളം കയറുന്നതും, റോഡിൽ വെള്ളക്കെട്ട് ഉണ്ടാകുന്നതും പതിവായിരുന്നു. തുടർന്ന് വാർഡ് സഭയിലെ ആവശ്യപ്രകാരം നഗരസഭാംഗം ജാഫർ സാദിഖ് നഗരസഭാ സെക്രട്ടറിക്ക് പരാതി നൽകിയിരുന്നു. സെക്രട്ടറിയുടെ നിർദേശത്തെ തുടർന്ന് ഭൂരേഖ തസഹസീൽദാർ മൂവാറ്റുപഴ താലുക്ക് തഹസീൽദാർക്ക് തോട് പുറന്പോക്ക് അളന്ന് തിട്ടപ്പെടുത്തുന്നതിന് ഉത്തരവ് നൽകിയിരുന്നു. പരിശോധനയിൽ പുറന്പോക്ക് അളന്ന് കൈയേറ്റം നടന്നതായി കണ്ടെത്തുകയും ചെയ്തിരുന്നു. കൈയേറ്റമൊഴിപ്പിച്ച് പേട്ട റോഡിന്‍റെ വീതിയും, ഉയരവും വർധിപ്പിച്ച് പ്രശ്നപരിഹാരം കാണാനാണ് നഗരസഭ അധികൃതരുടെ തീരുമാനം. പേട്ട നിവാസികൾ വർഷങ്ങളായി നേരിടുന്ന പ്രശ്നം പരിഹരിക്കണമെന്ന ജില്ലാ കളക്ടറുടെ നിർദേശത്തെ തുടർന്നാണ് പുറന്പോക്ക് കൈയേറിയ അഞ്ച് പേർക്ക് 14 ദിവസത്തിനുള്ളിൽ കൈയേറ്റമൊഴിയണമെന്നാവശ്യപ്പെട്ട് നഗരസഭാ സെക്രട്ടറി നോട്ടീസ് നൽകിയതെന്ന് നഗരസഭാംഗം ജാഫർ സാദിഖ് പറഞ്ഞു.

ജോലി തട്ടിപ്പ്: മുഴുവൻ പ്രതികളെയും അറസ്റ്റ് ചെയ്യണമെന്ന്

മൂവാറ്റുപുഴ: തിരുവിതാംകൂർ ദേവസ്വം ബോർഡിൽ നിയമനം വാഗ്ദാനം ചെയ്ത് ലക്ഷങ്ങൾ തട്ടിയെടുത്ത കേസിൽ മുഴുവൻ പ്രതികളെയും അറസ്റ്റ് ചെയ്യണമെന്ന് കോണ്‍ഗ്രസ് മുവാറ്റുപുഴ ബ്ലോക്ക് കമ്മിറ്റി ആവശ്യപ്പെട്ടു. പരാതിയിൽ ഒരാൾ മാത്രമാണ് അറസ്റ്റിലായത്. തൃക്കളത്തൂർ കാവുംപടി സ്വദേശിയെയാണ് കഴിഞ്ഞ ദിവസം പോലീസ് അറസ്റ്റ് ചെയ്തത്. എന്നാൽ ഇതിന് പിന്നിൽ പ്രവർത്തിച്ചവർ ഇപ്പോഴും നിയമത്തിനു മുന്നിൽ എത്തിയിട്ടില്ലെന്ന് കോണ്‍ഗ്രസ് ബ്ലോക്ക് പ്രസിഡന്‍റ് സാബു ജോണ്‍ ആരോപിച്ചു. തൃക്കളത്തൂർ സ്വദേശിനിയിൽ നിന്ന് 14 ലക്ഷം തട്ടിയെടുത്തതായാണ് കേസ്. പണം വാങ്ങി മാസങ്ങൾ കഴിഞ്ഞിട്ടും ജോലി ലഭിക്കാതെ വന്നതോടെയാണു യുവതി പരാതി നൽകിയത്. അടുത്ത കാലത്ത് തൃക്കളത്തൂരിൽ സ്ഥിര താമസമാക്കിയ സിപിഎം നേതാവിന് ഇതിൽ പങ്കുണ്ടെന്ന് സാബു ജോണ്‍ ആരോപിച്ചു. മുഴുവൻ പ്രതികളെയും അറസ്റ്റ് ചെയ്യണമെന്നും ഇല്ലെങ്കിൽ പ്രതിഷേധം സംഘടിപ്പിക്കുമെന്നും കോണ്‍ഗ്രസ് നേതൃത്വം മുന്നറിയിപ്പ് നൽകി.

‘എന്‍റെ നാട് ’പ്രവർത്തനങ്ങൾ മാതൃകാപരം: ഡോ. ബാബു സെബാസ്റ്റ്യൻ

കോതമംഗലം: വിദ്യാഭ്യാസ മേഖലയിൽ എന്‍റെ നാട് നടത്തുന്ന പ്രവർത്തനങ്ങൾ അഭിനന്ദനാർഹവും മാതൃകാപരവുമെന്ന് എംജി സർവകലാശാല മുൻ വൈസ് ചാൻസിലർ ഡോ. ബാബു സെബാസ്റ്റ്യൻ. എന്‍റെ നാട് ജനകീയ കൂട്ടായ്മയുടെ നേതൃത്വത്തിൽ സംഘടിപ്പിച്ച എഡ്യൂകെയർ അവാർഡും പ്രതിഭാസംഗമവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കലാ ഓഡിറ്റോറിയത്തിൽ നടന്ന ചടങ്ങിൽ ചെയർമാൻ ഷിബു തെക്കുംപുറം അധ്യക്ഷത വഹിച്ചു. എസ്എസ്എൽസിക്കും പ്ലസ് ടുവിനും ഏറ്റവും കൂടുതൽ എ പ്ലസ് കരസ്ഥമാക്കിയ എയ്ഡഡ് സ്കൂളിനുള്ള അവാർഡ് സെന്‍റ് അഗസ്റ്റിൻ ഹയർ സെക്കൻഡറി സ്കൂളിനും, സർക്കാർ സ്കൂളിനുള്ള അവാർഡ് ഗവ. മോഡൽ ഹയർ സെക്കൻഡറി സ്കൂൾ ചെറുവട്ടൂരിനും സമ്മാനിച്ചു. എസ്എസ്എൽസിക്ക് ഏറ്റവും കൂടുതൽ എ പ്ലസ് നേടിയ സിബിഎസ്ഇ സ്കൂൾ വിഭാഗത്തിൽ വിമലഗിരി പബ്ലിക് സ്കൂളും പ്ലസ്ടുവിന് ഏറ്റവും കൂടുതൽ എ പ്ലസ് വാങ്ങിയ സിബിഎസ്ഇ സ്കൂൾ വിഭാഗത്തിൽ ഗ്രീൻ വാലി പബ്ലിക് സ്കൂളും അവാർഡുകൾ നേടി. ഏറ്റവും മികച്ച ലാബ് സൗഹൃദ വിദ്യാലയത്തിനുള്ള ആൽബർട്ട് ഐൻസ്റ്റീൻ പുരസ്കാരം കീരംപാറ സെന്‍റ് സ്റ്റീഫൻസ് ഹയർ സെക്കൻഡറി സ്കൂളും, കലാരംഗത്തെയും പ്രവർത്തി പരിചയമേളകളിലെയും മികച്ച പ്രകടനത്തിന് ഒഎൻവി പുരസ്കാരം സെന്‍റ് അഗസ്റ്റിൻ ഗേൾസ് ഹയർ സെക്കൻഡറി സ്കൂളും, ഏറ്റവും മികച്ച ശിശു സൗഹൃദ വിദ്യാലയത്തിനുള്ള ഇൻഫ്രാപെക്സ് അവാർഡ് ശോഭന ഇംഗ്ലീഷ് മീഡിയം ഹൈസ്കൂളും, കായിക രംഗത്തെ മികച്ച സംഭാവനകൾക്കുള്ള മിൽഖാ സിംഗ് അവാർഡ് മാർ ബേസിൽ ഹയർ സെക്കൻഡറി സ്കൂളും, ഐടി വിദ്യാഭ്യാസ രംഗത്തെ മികവിനുള്ള ചാൾസ് ബാബേജ് അവാർഡ് സെന്‍റ് ജോർജ് ഹയർ സെക്കൻഡറി സ്കൂളിനും ലഭിച്ചു. ഏറ്റവും മികച്ച പരിസ്ഥിതി സൗഹൃദ വിദ്യാലയങ്ങൾക്കുള്ള ഹരിത പ്രഭ അവാർഡ് മാർ ബേസിൽ ഹയർ സെക്കൻഡറി സ്കൂളും, കോട്ടപ്പടി സെന്‍റ് ജോർജ് ഇംഗ്ലീഷ് മീഡിയം സ്കൂളും പങ്കിട്ടു. സാമൂഹിക സേവന രംഗത്തെ മികച്ച പ്രകടനത്തിന് വിനോഭ ഭാവേ അവാർഡ് ഊന്നുകൽ ലിറ്റിൽ ഫ്ളവർ സ്കൂളും, പുതുപ്പാടി ഫാ. ജോസഫ് മെമ്മോറിയൽ സ്കൂളും പങ്കിട്ടു. പ്ലസ്ടു കുട്ടികളിൽ മുഴുവൻ മാർക്ക് നേടിയ മാർ ഏലിയാസ് ഹയർ സെക്കൻഡറി സ്കൂളിലെ ദീപിക മത്തായിയെയും, ഫാഷൻ ഡിസൈനിംഗിൽ എംജി സർവകലാശാലയിൽ നിന്ന് ഒന്നാം റാങ്ക് നേടിയ നന്ദന ബിജുവിനെയും, ബിഎസ്‌സി സൈബർ ഫോറൻസിക് വിഭാഗത്തിൽ എംജി സർവകലാശാലയിൽ നിന്ന് രണ്ടാം റാങ്ക് നേടിയ അപർണ വിജയനെയും അവാർഡുകൾ നൽകി ആദരിച്ചു. ചലച്ചിത്രതാരം കലാഭവൻ പ്രജോദ് മുഖ്യ അതിഥിയായിരുന്നു. മാധ്യമ പ്രവർത്തകൻ ബാബു ജോസഫ് മുഖ്യപ്രഭാഷണം നടത്തി. ഉന്നത അധികാര സമിതിയംഗം ഡാമി പോൾ അവാർഡ് പ്രഖ്യാപനം നടത്തി. എം.എസ് എൽദോസ്, ഇബ്രാഹിം കവലയിൽ, മാത്യു ജോസഫ്, ജെസി സാജു, പി.കെ മൊയ്തു, കെ.പി. കുര്യാക്കോസ്, സി.കെ സത്യൻ, ജോർജ് മാത്യു അന്പാട്ട്, സി.ജെ എൽദോസ്, ജോഷി പൊട്ടക്കൽ, ജോഷി കുര്യാക്കോസ്, ബിജി ഷിബു, പി.എ. പാദുഷ, കെ.ഇ കാസിം, ജെയിംസ് കോറന്പേൽ, എം.എം. അബ്ദുറഹ്മാൻ എന്നിവർ പ്രസംഗിച്ചു.

മൂവാറ്റുപുഴയിൽ നഗരവികസനം മുടക്കിയ കുടിവെള്ളം പുനഃസ്ഥാപിച്ചു

മുവാറ്റുപുഴ: നഗര വികസനത്തിന്‍റെ ഭാഗമായി തടസപ്പെട്ട നഗരത്തിലെ ജലവിതരണം ഒടുവിൽ പുനഃസ്ഥാപിച്ചു. ജലവിതരണം പുനഃസ്ഥാപിക്കാത്ത ജല അഥോറിറ്റിയുടെ നടപടിക്കെതിരെ കഴിഞ്ഞ ദിവസം മന്ത്രി റോഷി അഗസ്റ്റിനെ ഫോണിൽ വിളിച്ച് എംഎൽഎ പ്രതിഷേധം അറിയിച്ചിരുന്നു. വിഷയത്തിൽ പരിഹാരം കണ്ടെത്തുന്നതിനുള്ള നടപടികൾ കൈക്കൊള്ളാമെന്ന് മന്ത്രി എംഎൽഎയോട് ഉറപ്പുനൽകുകയും ചെയ്തിരുന്നു. ജല അഥോറിറ്റിയുടെ നിർമാണ പ്രവർത്തനങ്ങൾ വേഗത്തിലാക്കുന്നതിനു വേണ്ടി രണ്ടാഴ്ച മുൻപ് എംഎൽഎയുടെ നിർദേശപ്രകാരം സൂപ്രണ്ടിംഗ് എൻജിനീയറുടെ ഓഫീസിൽ ഉദ്യോഗസ്ഥരുടെയും കരാറുകാരന്‍റെയും യോഗം വിളിച്ചിരുന്നു. യോഗത്തിന്‍റെ ഭാഗമായി പഴയ പൈപ്പിൽ നിന്നും പുതിയ കണക്ഷനുകളിലേക്ക് ജലവിതരണ പൈപ്പുകൾ മാറ്റുന്നതിനായി മൂന്നു ദിവസത്തെ സമയമാണ് ജല അഥോറിറ്റി ഡിപ്പാർട്ട്മെന്‍റ് ചോദിച്ചിരുന്നത്. ഇതു പ്രകാരം മുൻകൂട്ടി ജല അഥോറിറ്റി നോട്ടീസ് നൽകി, ജനപ്രതിനിധികൾ മുഖേനയും ജനങ്ങളെ വിവരമറിയിച്ചു. എന്നാൽ മൂന്നുദിവസത്തിൽ തീർക്കുമെന്നുപറഞ്ഞ ജോലികൾ അഞ്ച് ദിവസമായിട്ടും തീരാതെ വന്നതിനെതുടർന്നാണ് എംഎൽഎ മന്ത്രിയെ വിളിച്ച് ജനങ്ങളുടെ ബുദ്ധിമുട്ടുകൾ അറിയിച്ചത്. കച്ചേരിത്താഴത്ത് റോഡിന്‍റെ മധ്യഭാഗത്തുള്ള പഴയ പൈപ്പ് മാറ്റി എൻഡ് ക്യാപ്പ് പിടിപ്പിക്കേണ്ട പ്രവർത്തികൾക്കും, പഴയ പൈപ്പുകൾ മാറ്റി പുതിയ പൈപ്പുകളിലേക്ക് കണക്ഷനുകൾ കൊടുക്കുന്നതിലും വന്ന കാലതാമസമാണ് ജലവിതരണം പുനഃസ്ഥാപിക്കുന്നത് വൈകുന്നതിനു കാരണമായി ജല അഥോറിറ്റി അധികൃതർ പറയുന്നത്. ഇന്നലെ വൈകുന്നേരത്തോടെ പ്രവർത്തികളെല്ലാം പൂർത്തീകരിച്ച് കുടിവെള്ള വിതരണം പുനരാരംഭിക്കുകയും ചെയ്തു. പുതിയ പൈപ്പ് ലൈനായതിനാൽ ആദ്യഘട്ടമെന്നോണം ചെറിയ പ്രഷറിലാണ് വെള്ളം പന്പ് ചെയ്തു തുടങ്ങിയിരിക്കുന്നത്. ക്രമേണ വെള്ളത്തിന്‍റെ പ്രഷർ വർധിപ്പിച്ച് പൂർണതോതിൽ ഉയർന്ന സ്ഥലങ്ങളിലേക്ക് വെള്ളം ലഭ്യമാകാൻ ഒരു ദിവസം വരെ കാലതാമസം ഉണ്ടായേക്കാം.

വിശ്വാസ പരിശീലനം കാലാനുസൃതമായി നവീകരിക്കപ്പെടണം: മാർ മഠത്തിക്കണ്ടത്തിൽ

വാഴക്കുളം: വിശ്വാസപരിശീലനം കാലാനുസൃതമായി നവീകരിക്കപ്പെടണമെന്ന് കോതമംഗലം ബിഷപ് മാർ ജോർജ് മഠത്തിക്കണ്ടത്തിൽ. കോതമംഗലം രൂപതാവിശ്വാസ പരിശീലന കണ്‍വൻഷൻ വാഴക്കുളം വിശ്വജ്യോതി എൻജിനീയറിംഗ് കോളജിൽ ഉദ്ഘാടനം ചെയ്യുകയായിരുന്നു ബിഷപ്. കാലാനുസൃതമായ വിശ്വാസ പരിശീലനമാണ് ഇന്നിന്‍റെ ആവശ്യകതയെന്നും അദ്ദേഹം വ്യക്തമാക്കി. ആമുഖപ്രഭാഷണം വിജ്ഞാന ഭവൻ ഡയറക്ടർ ഫാ. ജോസഫ് കല്ലറയ്ക്കൽ നടത്തി. രൂപതാ വികാരി ജനറാൾ മോണ്‍. പയസ് മലേക്കണ്ടത്തിൽ, മോണ്‍. വിൻസന്‍റ് നെടുങ്ങാട്ട് എന്നിവർ പ്രസംഗിച്ചു. വിശുദ്ധ ബൈബിളിനെ ആസ്പദമാക്കിയുള്ള ക്ലാസ് ഫാ. സെബാസ്റ്റ്യൻ കുറ്റിയാനിക്കൽ നയിച്ചു. ഈ വർഷം 43 സണ്‍ഡേ സ്കൂളുകൾ എ ഗ്രേഡിന് അർഹരായി. 28 ഇടവകകൾ പിടിഎ എ ഗ്രേഡിനും അർഹരായി. നാല്, എഴ്, 10, 12 ക്ലാസുകളിലെ മികച്ച കുട്ടികൾക്കുള്ള സ്കോളർഷിപ്പ് വിതരണം ചെയ്തു. രൂപതയിലെ മികച്ച 14 വിശ്വാസ പരിശീലകരെ ആദരിച്ചു.

പായിപ്രയില്‍ വീടിന് തീപിടിച്ചു

മൂവാറ്റുപുഴ: പായിപ്രയില്‍ വീടിന് തീപിടിച്ചു. തീപടർന്ന മുറിയിൽ അപകട സമയത്ത് ആരുമില്ലാതിരുന്നതിനാൽ ദുരന്തം ഒഴിവായി. പായിപ്ര മുടവൂര്‍ തോമാകവല പച്ചേരിയില്‍ ജോസിന്‍റെ വീടിനാണ് ഇന്നലെ ഉച്ചകഴിഞ്ഞ് 2.45ഓടെ തീപിടുത്തമുണ്ടായത്. വീടിന്‍റെ സ്വീകരണമുറിയിലെ സ്വിച്ച് ബോര്‍ഡില്‍ നിന്ന് തീപടര്‍ന്നതിനെ തുടര്‍ന്ന് ടിവി, സെറ്റി, ഫാനുകള്‍, വീടിന്‍റെ സീലിംഗ് തുടങ്ങിയവ കത്തിനശിച്ചു. ഈ സമയം വീട്ടിലെ ഗൃഹനാഥന്‍ മുകള്‍ നിലയിലും, ഭാര്യ ഷീല വീടിന് പുറത്തുമായിരുന്നു. വിവരമറിഞ്ഞെത്തിയ മൂവാറ്റുപുഴ അഗ്നിരക്ഷാസേന തീയണയ്ക്കുകയായിരുന്നു. തീപിടുത്തതില്‍ രണ്ടുലക്ഷത്തിലധികം രൂപയുടെ നാശനഷ്ടമുണ്ടായതായാണ് പ്രഥമിക നിഗമനം. ഷോര്‍ട്ട് സര്‍ക്യൂട്ടാണ് അപകടകാരണം. സീനിയര്‍ ഫയര്‍ ആൻഡ് റെസ്‌ക്യൂ ഓഫീസര്‍ അനീഷ് കുമാര്‍, അനിബന്‍ കുര്യക്കോസ്, റിനേഷ്, നിബിന്‍ ബോസ്, വിഷ്ണു, പ്രതീഷ് എന്നിവരുടെ നേതൃത്വത്തിലാണ് തീ യണച്ചത്.

കീരംപാറ സണ്‍ഡേ സ്കൂളിന് പുരസ്കാര തിളക്കം

കോതമംഗലം: കീരംപാറ സെന്‍റ് സെബാസ്റ്റ്യൻസ് സണ്‍ഡേ സ്കൂളിന് രൂപതതലത്തിൽ വിവിധ പുരസ്കാരങ്ങൾ ലഭിച്ചു. എ ഗ്രേഡോടുകൂടി രൂപതയിലെ മികച്ച സണ്‍ഡേ സ്കൂൾ, മികച്ച വിശ്വാസ പരിശീലന അധ്യാപിക, മികച്ച പിടിഎ എന്നിവയ്ക്കാണ് പുരസ്കാരം ലഭിച്ചത്. തുടർച്ചയായി മൂന്നാം തവണയാണ് കീരംപാറ ഇടവക സണ്‍ഡേ സ്കൂളും പിടിഎയും രൂപതതലത്തിൽ ഒന്നാമതെത്തുന്നത്. ഈ വർഷത്തെ മികച്ച അധ്യാപികയ്ക്കുള്ള പുരസ്കാരത്തിന് സണ്‍ഡേ സ്കൂൾ പ്രധാനാധ്യാപിക ജീൻസി ജോമോൻ അർഹയായി. വാഴക്കുളം വിശ്വജ്യോതി എൻജിനീയറിംഗ് കോളജിൽ നടന്ന വിശ്വസ പരിശീലന രൂപത കണ്‍വൻഷനിൽ കോതമംഗലം ബിഷപ് മാർ ജോർജ് മഠത്തിക്കണ്ടത്തിലിൽ നിന്നും വികാരി ഫാ. മാത്യു കൊച്ചുപുരയ്ക്കലും അധ്യാപകരും ചേർന്ന് പുരസ്കാരങ്ങൾ ഏറ്റുവാങ്ങി. 2024-25 കാലയളവിൽ ഇടവകയിൽ നടത്തിയിട്ടുള്ളു ആത്മീയ-ഭൗതീക പ്രവർത്തനങ്ങളുടെ മികവ് പരിഗണിച്ചാണ് അവാർഡ്. രൂപതയിലെ മികച്ച മാതൃവേദി യൂണിറ്റിനുള്ള അവാർഡും വിൻസെന്‍റ് ഡി-പോൾ യൂണിറ്റിനുള്ള അവാർഡും ഈ വർഷം കീരംപാറ ഇടവകയ്ക്കു ലഭിച്ചു.

കൂവേലിപ്പടിയിൽ വാഹനാപകടം

വാഴക്കുളം: കൂവേലിപ്പടിയിൽ കാർ നിയന്ത്രണംവിട്ട് മറിഞ്ഞു. യാത്രക്കാർ നിസാര പരിക്കുകളോടെ രക്ഷപ്പെട്ടു. ഇന്നലെ പുലർച്ചെ രണ്ടോടെയായിരുന്നു അപകടം. തൊടുപുഴ ഭാഗത്തേക്കു പോകുകയായിരുന്ന കാർ നിയന്ത്രണം വിട്ട് മറിയുകയായിരുന്നു. രജിസ്ട്രേഷൻ നമ്പർ ആകാത്ത പുതിയ എക്സ്‌യു വി കാറാണ് അപകടത്തിൽപ്പെട്ടത്.

കാലടി പാലത്തിലെ കുഴികൾ: അടിയന്തര നടപടി വേണമെന്ന് പഞ്ചായത്ത് പ്രസിഡന്‍റ്

കാലടി : പാലത്തിൽ വീണ്ടും കുഴികൾ രൂപപ്പെട്ടതോടെ ആരംഭിച്ചിട്ടുള്ള ഗതാഗതക്കുരുക്ക് പരിഹരിക്കാൻ അടിയന്തിര നടപടി സ്വീകരിക്കണമെന്ന് പൊതുമരാമത്ത് അധികൃതരോടാവശ്യപ്പെട്ടിട്ടുണ്ടെന്ന് ഗ്രാമ പഞ്ചായത്ത് പ്രസിഡന്‍റ് ഷൈജൻ തോട്ടപ്പിള്ളി. പാലത്തിലേയും എംസി റോഡിലേയും അറ്റകുറ്റപണികള്‍ നടത്തിയിട്ട് ദിവസങ്ങളേ ആയിട്ടുള്ളു. ടാറിംഗ് ജോലികൾ ചെയ്ത രാത്രിയിൽ പെയ്ത മഴ മൂലം ഈ പ്രവർത്തിക്ക് ആയുസുണ്ടായില്ല. വീണ്ടും രൂപപ്പെട്ടിട്ടുള്ള കുഴികൾ അടിയന്തിരമായി അടച്ച് ഗതാഗതം സുഗമമാക്കാൻ നടപടിയെടുക്കണമെന്നും അദ്ദേഹം പ്രസ്താവനയിൽ ആവശ്യപ്പെട്ടു.

ഫോർട്ടുവൈപ്പിനെ ഹെറിറ്റേജ് പദ്ധതിയിൽപ്പെടുത്താനുള്ള കളക്ടറുടെ കത്ത് സിഎസ്എംഎൽ മുക്കിയെന്നാരോപണം

വൈപ്പിൻ : ചരിത്രത്തിന്‍റെ ശേഷിപ്പുകൾ പേറുന്ന കൊച്ചിൻ കോർപറേഷൻ ഒന്നാം ഡിവിഷനിൽപ്പെട്ട ഫോർട്ടുവൈപ്പിൻ അവഗണനയുടെ തുരുത്തായി മാറുകയാണെന്ന് ആക്ഷേപം. കോർപറേഷനോ കൊച്ചി സ്മാർട്ട് മിഷൻ ലിമിറ്റഡ്, ജിസിസിഎ എന്നീ വികസന ഏജൻസികളോ ഒന്നും തന്നെ തിരിഞ്ഞു പോലും നോക്കാത്ത ഇവിടെ അടിസ്ഥാന സൗകര്യങ്ങളാണ് പരിതാപകരം. അഴുക്കുചാലുകൾ , റോഡുകൾ, സന്ദർശകർക്കായുള്ള അഴിമുഖത്തെനടപ്പാതകൾ, കടൽ ഭിത്തികൾ എന്നിവയെല്ലാം തകർന്നനിലയിലാണ്. പൊതു ശൗച്യാലയങ്ങളില്ല. ജങ്കാർ ജെട്ടിയിലും മറ്റും പൊതു ഇരിപ്പിടങ്ങളുമില്ല. ഇക്കാര്യങ്ങൾ ചൂണ്ടിക്കാട്ടി കഴിഞ്ഞ വർഷം ഫെബ്രുവരിയിൽ കൊച്ചിൻ ഹെറിറ്റേജ് കമ്മിറ്റി ചെയർമാൻ കൂടിയായ ജില്ലാ കളക്ടർ കൊച്ചി സ്മാർട്ട് മിഷൻ ലിമിറ്റഡിനു കത്തു നൽകിയിരുന്നു. ഹെറിറ്റേജ് പദ്ധതിയിൽപ്പെടുത്തി ഫോർട്ടുവൈപ്പിനിലെ പ്രശ്നങ്ങൾക്ക് പരിഹാരം കാണാനാണ് കത്ത് നൽകിയത്. എന്നാൽ ഈ കത്ത് സിഎസ്എംഎൽ പരിഗണിച്ചില്ലെന്ന് വൈപ്പിൻ ജനകീയ കൂട്ടായ്മ കൺവീനർ ജോണി ആരോപിക്കുന്നു. മാത്രമല്ല ഇങ്ങിനെ ഒരു നിർദേശം ലഭിച്ചിട്ടില്ലെന്ന് വിവരാവകാശ നിയമമനുസരിച്ചുള്ള ചോദ്യത്തിനു കളവായി മറുപടി പറയുകയും ചെയ്തത്രേ. ഈ സാഹചര്യത്തിൽ കോടതിയെ സമീപിക്കാനാണ് തീരുമാനമെന്ന് ജനകീയ കൂട്ടായ്മ കൺവീനർ മുന്നറിയിപ്പു നൽകി.

ഞാറക്കൽ താലൂക്കാശുപത്രി കെട്ടിടത്തിനു നന്പർ : നടപടിക്രമങ്ങൾക്കു സ്വകാര്യ വ്യക്തിയെ ഏൽപ്പിച്ചത് വിവാദമാകുന്നു

ൈവപ്പിൻ : ജിഡ ഫണ്ട് ഉപയോഗിച്ച് ഞാറക്കൽ താലൂക്ക് ആശുപത്രി വളപ്പിൽ നിർമിച്ച പുതിയ കെട്ടിടത്തിനു നമ്പർ കിട്ടുന്നതിനുള്ള നടപടിക്രമങ്ങൾ പൂർത്തീകരിക്കാൻ കമ്മിറ്റി തീരുമാനങ്ങൾ ഒന്നുമില്ലാതെ സ്വകാര്യ വ്യക്തിയെ ഏൽപ്പിച്ചത് വിവാദമാകുന്നു. ഈ സേവനത്തിന്‍റെ പേരിൽ സ്വകാര്യ വ്യക്തി 2.39 ലക്ഷം രൂപയുടെ ബില്ലുമായി ബ്ലോക്ക് പഞ്ചായത്ത് സെക്രട്ടറിയെ സമീപിച്ചപ്പോഴാണ് വിവരം പുറത്തറിയുന്നതെന്ന് പ്രതിപക്ഷ നേതാവ് അഗസ്റ്റിൻ മണ്ടോത്ത് പറയുന്നു. എന്നാൽ ഇതുമായി ബന്ധപ്പെട്ട പ്രോജക്ട് സമർപ്പിക്കാത്തതിനാൽ പണം നൽകാൻ സെക്രട്ടറി വിസമ്മതിച്ചു. ഇതിനിടെ കഴിഞ്ഞ ദിവസം ബ്ലോക്ക് പഞ്ചായത്ത് പ്രസിഡന്‍റിന്‍റെ അധ്യക്ഷതയിൽചേർന്ന ആശുപത്രി വികസന സമിതിയിൽ ഈ വിഷയം ചർച്ചയ്ക്ക് വന്നു. പണം കൊടുക്കേണ്ടതില്ലെന്ന് എച്ച് എം സി കമ്മിറ്റി സെക്രട്ടറിയായ ആശുപത്രി സൂപ്രണ്ടും ആവർത്തിച്ചു. ഇതോടെ ബഹളമയമായ കമ്മിറ്റി മറ്റ് അജണ്ടകൾ ഒന്നും ചർച്ച ചെയ്യാതെ ഇടയ്ക്ക് വച്ച് പിരിയും ചെയ്തു.

പൊങ്ങം നൈപുണ്യയിൽ ഒറിയന്‍റേഷൻ പ്രോഗ്രാം സംഘടിപ്പിച്ചു

കൊരട്ടി: പൊങ്ങം നൈപുണ്യ ഇൻസ്റ്റിറ്റ്യൂട്ട് ഓഫ് മാനേജ്മെന്‍റ് ആൻഡ് ഇൻഫർമേഷൻ ടെക്നോളജി, കൊരട്ടി ഇൻഫോപാർക്കിലെ അന്താരാഷ്ട്ര കമ്പനിയായ ജിആർ 8 ഗ്ലോബലുമായിച്ചേർന്ന് സംഘടിപ്പിക്കുന്ന ട്രെയിനിംഗ് പ്രോഗ്രാമിന്‍റെ ഈ വർഷത്തെ ഓറിയന്‍റേഷൻ കോളജിൽ വച്ചു നടന്നു. വി-ഇന്നിംഗ്സ് എന്ന പേരിൽ സംഘടിപ്പിക്കപ്പെട്ട ഈ പരിപാടിയിൽ നൈപുണ്യ കോളജ് എക്സിക്യൂട്ടീവ് ഡയറക്ടറും പ്രിൻസിപ്പാളുമായ ഫാ. പോളച്ചൻ കൈത്തോട്ടുങ്കൽ അധ്യക്ഷത വഹിച്ചു. ജിആർ 8 ഗ്ലോബൽ ഡയറക്ടർ അനന്തേഷ് ബില്ലവ ട്രെയിനിംഗ് പ്രോഗ്രാമിന്‍റെ സാധ്യതകൾ പരിചയപ്പെടുത്തി. ജിആർ 8 ഗ്ലോബൽ സിഇഒ അനീഷ് നങ്ങേലിൽ മുഖ്യാതിഥിയായി. നൈപുണ്യയിലെ ബികോം വിദ്യാർഥികളാണ് യുഎസ് ടാക്സേഷൻ കേന്ദ്രീകരിച്ചുള്ള ഈ പരിശീലന പരിപാടിയുടെ ഗുണഭോക്താക്കളാവുക. കഴിഞ്ഞ അക്കാദമിക് ഇയറിൽ ഈ പദ്ധതിയിലൂടെ പരിശീലനം ലഭിച്ച എട്ടു ബികോം വിദ്യാർത്ഥികൾ ജിആർ 8 ഗ്ലോബൽ പ്ലേസ്‌മെന്‍റ് നേടിയിരുന്നു. ഇവർക്കുള്ള ആദരവ് സിഇഒ ഫ്രാങ്ക് പാട്രി നിർവഹിച്ചു. പരിപാടിയിൽ ഓഫർലെറ്ററുകളും സർട്ടിഫിക്കറ്റുകളും വിതരണം ചെയ്തു.

ലോക രക്തദാന ദിനാചരണം : ലൂർദിൽ രക്തദാന ക്യാമ്പ് സംഘടിപ്പിച്ചു

കൊച്ചി: ലൂര്‍ദ് ആശുപത്രി ബ്ലഡ് സെന്‍ററിന്‍റെയും ലൂര്‍ദ് കോളജ് ഓഫ് നഴ്‌സിംഗിന്‍റെയും കൊച്ചിന്‍ ചാരിറ്റബിള്‍ സൊസൈറ്റിയുടെയും സഹകരണത്തോടെ എറണാകുളം സെന്‍റര്‍ സ്‌ക്വയര്‍ മാളില്‍ രക്തദാന ക്യാമ്പ് സംഘടിപ്പിച്ചു. എറണാകുളം സെന്‍ട്രല്‍ എസ്‌ഐ അനൂപ് ചാക്കോ ഉദ്ഘാടനം ചെയ്തു. ലൂര്‍ദ് ആശുപത്രി ലാബ് ഇന്‍ചാര്‍ജ് സിസ്റ്റര്‍ ജോത്സ്‌ന, കൊച്ചിന്‍ ചാരിറ്റി സൊസൈറ്റി പ്രസിഡന്‍റ് സലിം ഷുക്കൂര്‍, സെക്രട്ടറി ഷംസു യാക്കുബ്, സെന്‍റര്‍ ഹെഡ് ബ്ലിസണ്‍ ആന്‍റണി, കോ-ഓര്‍ഡിനേറ്റര്‍ വാഹിത, സെന്‍റര്‍ സ്‌ക്വയര്‍ മാള്‍ ടെക്‌നിക്കല്‍ മാനേജര്‍ പോള്‍, മാര്‍ക്കറ്റിംഗ് മാനേജര്‍ മുഹമ്മദ് നാസീം എന്നിവര്‍ പ്രസംഗിച്ചു. ബോധവത്കരണ പരിപാടികളുടെ ഭാഗമായി ലൂര്‍ദ് നഴ്‌സിംഗ് കോളജിലെ വിദ്യാഥികളുടെ ഫ്ലാഷ് മോബും ഉണ്ടായരുന്നു. എൽഎഫ് ആശുപത്രിയിൽ ജീവനക്കാർ രക്തദാനം നടത്തി അങ്കമാലി: ലോക രക്ത ദാന ദിനത്തോടനുബന്ധിച്ച് ലിറ്റിൽ ഫ്ലവർ ആശുപത്രിയിൽ രക്തദാന ദിനാചരണം അങ്കമാലി സ്റ്റേഷൻ ഹൗസ് ഓഫീസർ എ. രമേശ് രക്തദാനം നൽകി ഉദ്ഘാടനം നിർവഹിച്ചു. ജോയ് ആലുക്കാസ് ഫൗണ്ടേഷന്‍റേയും എൽഎഫ് ആശുപത്രി ജീവനക്കാർ ഉൾപ്പെടെ നിരവധി പേർ രക്തം ദാനം നടത്തി. രക്തദാനത്തെപ്പറ്റി ആളുകളിൽ അവബോധം വളർത്തുക, രക്തദാതാക്കളുടെ നിസ്വാർഥ സേവനത്തെ ആദരിക്കുക എന്നീ ലക്ഷ്യങ്ങളോടെയാണ് രക്തദാന ദിനം ആചരിക്കുന്നതെന്ന് ആശുപത്രി ഡയറക്ടർ ഫാ. തോമസ് വൈക്കത്ത് പറമ്പിൽ പറഞ്ഞു. ഡോ. ജോസഫ് കെ. ജോസഫ്, ഡോ. സുകുമാരൻ, ജോയ് ആലുക്കാസ് മാനേജർ മനോജ് സ്കറിയാ, സിസ്റ്റർ പൂജിത, സിസ്റ്റർ നോബർട്ട എന്നിവർ ആശംസകൾ നേർന്നു സംസാരിച്ചു. രക്തദാനം പ്രോത്സാഹിപ്പിക്കാൻ രാജഗിരി ആശുപത്രി കൊച്ചി: ലോക രക്തദാന ദിനത്തിന്‍റെ ഭാഗമായി കോളജ് വിദ്യാര്‍ഥികള്‍ക്കിടയില്‍ രക്തദാനം പ്രോത്സാഹിപ്പിക്കാന്‍ വിപുലമായ പരിപാടികളുമായി ആലുവ രാജഗിരി ആശുപത്രി. രാജഗിരി ട്രാന്‍സ്ഫ്യൂഷന്‍ മെഡിസിന്‍ വിഭാഗം ബോധവത്കരണ പരിപാടികള്‍ നടത്തി. രക്തം നല്‍കി പ്രതീക്ഷ നല്‍കാം, നമുക്കൊരുമിച്ച് ജീവന്‍ രക്ഷിക്കാം എന്നതാണ് ഈ വര്‍ഷത്തെ ദിനാചരണ സന്ദേശം. രക്തദാന ദിനത്തോടനുബന്ധിച്ച് കേരള സ്റ്റുഡന്‍റ്സ് നഴ്‌സസ് അസോസിയേഷനും, രാജഗിരി ആശുപത്രിയുമായി സഹകരിച്ച് രക്തദാന ക്യാമ്പ് സംഘടിപ്പിച്ചു. വിവിധ നഴ്‌സിംഗ് കോളജുകളില്‍ നിന്നായി നൂറോളം വിദ്യാര്‍ഥികള്‍ രക്തദാനം നടത്തി. വിവിധ കോളജുകളിലെ എന്‍എസ്എസ്, എന്‍സിസി യൂണിറ്റുകളുമായി സഹകരിച്ച് ജൂണ്‍ മാസം രക്തദാന ക്യാമ്പുകള്‍, ബോധവത്കരണ ക്ലാസുകള്‍ എന്നിവ നടത്തുമെന്ന് ഡോ. രാജേഷ് ആര്‍. ചന്ദ്രന്‍ അറിയിച്ചു. രക്തദാനം ചെയ്തവര്‍ക്ക് സര്‍ട്ടിഫിക്കറ്റും, ബാഡ്ജും വിതരണം ചെയ്തു. രക്തദാതാക്കളെ ആദരിച്ച് അപ്പോളോ അഡ്‌ലക്സ് ആശുപത്രി കൊച്ചി: ലോക രക്തദാന ദിനാചരണത്തിന്‍റെ ഭാഗമായി സന്നദ്ധ രക്തദാതാക്കളെ ആദരിച്ച് അങ്കമാലി അപ്പോളോ അഡ്‌ലക്സ് ആശുപത്രി. അടിയന്തര ഘട്ടത്തിൽ സ്ഥിരമായി രക്തം ദാനം ചെയ്യുന്ന 45 പേർക്ക് പ്രത്യേക മെമന്‍റോയും ഏറ്റവും കൂടുതൽ തവണ രക്തദാനം ചെയ്ത 15 പേർക്ക് പ്രത്യേക ആദരവും സൗജന്യ ആരോഗ്യ പരിശോധനാ പാക്കേജും നൽകിയാണ് ദാതാക്കളെ ആദരിച്ചത്. അപ്പോളോ അഡ്‌ലക്‌സ് ആശുപത്രി സിഇഒ ഡോ. ഏബൽ ജോർജ് , മെഡിക്കൽ സർവീസസ് ഡയറക്ടർ ഡോ. രമേശ് കുമാർ എന്നിവർ രക്തദാതാക്കളെ പ്രശംസിച്ചു. സൊസൈറ്റി ഫോർ ബ്ലഡ് ട്രാൻസ്ഫ്യൂഷൻ അവേർനെസ് അപ്പോളോ അഡ്‌ലക്സ് ആശുപത്രിയെ 2025ലെ മികച്ച മാതൃകാ രക്തദാതാക്കളുടെ സംഘങ്ങളിലൊന്നായി തിരഞ്ഞെടുത്തു. സംസ്ഥാനത്തെ 130ലധികം കേന്ദ്രങ്ങളിൽ നിന്ന് നാറ്റ് അംഗീകാരം ലഭിച്ച 15 മാതൃകാ രക്ത കേന്ദ്രങ്ങളിൽ ഒന്നായിട്ടാണ് അപ്പോളോ അഡ്‌ലക്സ് ആശുപത്രി തെരഞ്ഞെടുക്കപ്പെട്ടത്.

പാതാളം കവലയിലെ കുഴികൾ കൗൺസിലറുടെ നേതൃത്വത്തിൽ അടച്ചു

ഏലൂർ: പാതാളം കവലയിലെ അപകടക്കുഴികൾ കൗൺസിലറുടെ നേതൃത്വത്തിൽ ഓട്ടോ തൊഴിലാളികളും നാട്ടുകാരും ചേർന്ന് അടച്ചു. അപകടങ്ങൾ വർധിച്ച സാഹചര്യത്തിലാണ് താത്കാലികമായി കുഴികൾ അടച്ചതെന്നും ഇതിന് ശാശ്വത പരിഹാരം ഉണ്ടാവണമെന്നും കൗൺസിലർ കെ.എ. മാഹിൻ പറഞ്ഞു. വ്യാപ്തി കുറക്കാൻ ഒരു പരിധിവരെ തത്കാലം ഇത് സഹായകരമാകുമെന്ന് കൗൺസിലർ പറഞ്ഞു. പാതാളം കവലയിലെ റോഡ് ആകെ തകർന്ന് പലയിടങ്ങളിലായി വലിയ കുഴികൾ രൂപപ്പെട്ടിരിക്കുകയാണ്. മഴപെയ്ത് വെള്ളം നിറഞ്ഞു കിടക്കുന്നതിനാൽ വാഹനയാത്രികർ കുഴി മനസിലാക്കാതെ അപകടത്തിൽപ്പെടുക പതിവാണ്. നിരവധി വാഹനങ്ങൾക്ക് കേടുപാടുകളും സംഭവിക്കുകയും ചെയ്തു. അധികാരികൾ അടിയന്തരമായി ഇടപെട്ടില്ലെങ്കിൽ ഇനിയും അപകടങ്ങൾ ഈ ഭാഗങ്ങളിൽ സംഭവിക്കും. എത്രയും വേഗം വേണ്ട നടപടികൾ അധികാരികൾ സ്വീകരിക്കണമെന്ന് ഓട്ടോ തൊഴിലാളികളും നാട്ടുകാരും ആവശ്യപ്പെട്ടു.

കാഞ്ഞൂർ ഫൊറോനയിൽ ഇടവകദിനാഘോഷം

കാലടി: കാഞ്ഞൂർ ഫൊറോന പള്ളിയിൽ ഇടവക ദിനം ആഘോഷിച്ചു. കുർബാന, പൊതു സമ്മേളനം , കലാപരിപാടികൾ , സ്നേഹവിരുന്ന് എന്നിവ നടന്നു. പൊതു സമ്മേളനം മഞ്ഞപ്ര ഫൊറോന വികാരി ഫാ. വർഗീസ് പൊട്ടയ്ക്കൽ ഉദ്ഘാടനം ചെയ്തു. കാഞ്ഞൂർ ഫൊറോന വികാരി ഫാ. ജോയ് കണ്ണമ്പുഴ അധ്യക്ഷത വഹിച്ചു. ഫാ. ഡോൺ മുളവരിയ്ക്കൽ, ഫാ. ജോസ് വലിയ കടവിൽ കൈക്കാരന്മാരായ ജോസി കോഴിക്കാടൻ, ജോസ് പാറയ്ക്ക, വൈസ് ചെയർമാൻ ഡേവീസ് വരേക്കുളം, സിസ്റ്റർ ലിസബത്ത്, തുടങ്ങി യവർ പ്രസംഗിച്ചു. 90നു മുകളിൽ പ്രായമുള്ള 35 ഓളം ഇടവകാംഗങ്ങളെയും വിവിധ മേഖലകളിൽ മികവ് തെളിയിച്ചവരെയും ചാരിറ്റി പ്രവർത്തനങ്ങളിൽ സജീവമായ വിമല ആശുപത്രിയിലെ ഡോ. ശോഭനയെയും ആദരിച്ചു.

ചൂണ്ടി ജംഗ്ഷനിലെ കുഴികൾ: ഹൈക്കോടതി വിശദീകരണം തേടി

ആലുവ: ആലുവ-മൂന്നാർ റോഡിൽ ചൂണ്ടി ജംഗ്ഷനിലെ അപകട ഗർത്തങ്ങളെക്കുറിച്ചുള്ള വാർത്തകളെ തുടർന്ന് ഹൈക്കോടതിയുടെ ഇടപെടൽ. റോഡിന്‍റെ അവസ്ഥയെക്കുറിച്ച് ജസ്റ്റിസ് ദേവൻ രാമചന്ദ്രൻ കളക്ടറോട് വിശദീകരണം തേടി. ടെൻഡർ എടുക്കാൻ ആളില്ലാത്തതിനാലാണ് അറ്റകുറ്റപ്പണി വൈകുന്നതെന്നും കഴിഞ്ഞ ദിവസം ടെൻഡർ നൽകിയെന്നും ഉടൻ അറ്റകുറ്റപ്പണി നടത്തുമെന്നുമാണ് കളക്ടർക്കു വേണ്ടി പൊതുമരാമത്ത് വകുപ്പ് മറുപടി നൽകിയത്. പൊതുമരാമത്ത് റോഡിലെ കുഴിയിൽ ചാടി ബൈക്ക് യാത്രികൻ അപകടത്തിൽപ്പെടുന്ന വീഡിയോ ദൃശ്യങ്ങളും കഴിഞ്ഞ ദിവസം സോഷ്യൽ മീഡിയയിൽ പ്രചരിച്ചിരുന്നു. അപകടത്തിന്‍റെ സിസിടിവി ദൃശ്യം പൊതുമരാമത്ത് റോഡ്സ് വിഭാഗം ജില്ലാ കളക്ടർക്ക് ഇന്നലെ കൈമാറി. പൊതുപ്രവർത്തകനും എടത്തല ചേമ്പർ ഓഫ് കൊമേഴ്സ് ഭാരവാഹിയുമായ ഹുസൈൻ കുന്നുകര സോഷ്യൽ മീഡിയയിൽ പങ്കുവച്ചതാണ് വീഡിയോ. ദീപിക വാർത്തയുടെ അടിസ്ഥാനത്തിൽ വ്യാപാരികൾ പൊതുമരാമത്ത് മന്ത്രിക്ക് കഴിഞ്ഞ ദിവസം പരാതി നൽകിയിട്ടുണ്ട്. എടത്തല മലയപ്പിള്ളി വാരിയത്ത് വീട്ടിൽ ഷിഹാബ് (38) ഇരുചക്രവാഹനം കുഴിയിൽ വീണ് അപകടത്തിൽപ്പെട്ടത്. പിന്നിൽ വാഹനങ്ങൾ ഇല്ലാതിരുന്നതാണ് രക്ഷയായത്. വെള്ളിയാഴ്ച്ച രാത്രി 10.30ഓടെയായിരുന്നു സംഭവം.

ജലധാര അഴിമതി: ഓംബുഡ്സ്മാൻ സിറ്റിംഗ് തുടങ്ങി

ആലുവ: ആലുവ നഗരസഭയിലെ ജലധാര പുനരുദ്ധാരണവുമായി ബന്ധപ്പെട്ട പരാതിയിൽ ഓംബുഡ്സ്മാൻ സിറ്റിംഗ് ആരംഭിച്ചു. ആലുവ നഗരസഭ ചെയർമാൻ എം.ഒ. ജോൺ, സെക്രട്ടറി ജസീന്ത, സിഎംആർഎൽ കമ്പനി പ്രതിനിധി, പരാതിക്കാരൻ ആർ. പത്മകുമാർ എന്നിവരുടെ വിശദീകരണങ്ങൾ കേട്ട ശേഷമാണ് വിശദമായ റിപ്പോർട്ട് സമർപ്പിക്കാൻ നഗരസഭാ സെക്രട്ടറിയോട് ഓംബുഡ്സ്മാൻ ആവശ്യപ്പെട്ടത്. സിഎംആർഎൽ കമ്പനിയുടെ സിഎസ്ആർ ഫണ്ടായ 7.5 ലക്ഷം രൂപ ജലധാര നവീകരണ കരാർ കമ്പനിയായ എൻവിറോൻമെന്‍റ് സൊലൂഷൻസ് എന്ന സ്ഥാപനത്തിന് നേരിട്ട് നൽകിയത് അഴിമതിയാണെന്ന ഹർജിയിലാണ് വാദം നടന്നത്. ഓംബുഡ്സ്മാന്‍റെ മൂന്നാമത്തെ സിറ്റിംഗ് ആണിത്. നഗരസഭ എടുക്കുന്ന തീരുമാനങ്ങൾ കേരളം മുനിസിപ്പൽ ആക്ട് പ്രകാരമായിരിക്കണമെന്നും അല്ലാത്തതെന്തും അഴിമതിയുടെ പരിധിയിൽ വരുമെന്നും ഓംബുഡ്സ്മാൻ സൂചിപ്പിച്ചു. ഓഫീസിന് മുന്നിലുള്ള ജലധാര നവീകരിക്കുന്നതിനെക്കുറിച്ച് നഗരസഭ എൻജിനീയറിംഗ് വിഭാഗത്തിനോ കൗൺസിലിനോ അറിയില്ലെന്ന് വിവരാവകാശ രേഖകൾ വ്യക്തമാക്കുന്നുണ്ട്. ഈ സാഹചര്യത്തിൽ സിഎംആർഎൽ പൊതു ഫണ്ട് ദുരുപയോഗം ചെയ്തതായും ഓംബുഡ്‌സ്മാൻ സിറ്റിംഗിൽ പറഞ്ഞു. അടുത്ത സിറ്റിംഗിൽ കരാറു കമ്പനിയുടെ പ്രതിനിധി നാലാം കക്ഷിയായി പങ്കെടുക്കണം. പുനർ നിർമാണവുമായി ബന്ധപ്പെട്ട പ്രവർത്തികളുടെയും സിഎസ്ആർ ഫണ്ട് അടക്കം അതിനുപയോഗിച്ച ഫണ്ടുകളുടെയും വിവരങ്ങൾ സമർപ്പിക്കാനും ഓംബുഡ്സ്മാൻ നിർദ്ദേശിച്ചിട്ടുണ്ട്.

രസരഞ്ജനം കഥകളി ഉത്സവം തുടങ്ങി

തൃപ്പൂണിത്തുറ: തൃപ്പൂണിത്തുറ കഥകളി കേന്ദ്രത്തിന്‍റെ ആഭിമുഖ്യത്തിൽ ശ്രീ വെങ്കിടേശ്വര സ്കൂൾ ഓഡിറ്റോറിയത്തിൽ സംഘടിപ്പിച്ച രസരഞ്ജനം കഥകളി ഉത്സവം അജയ് തമ്പി ഉദ്ഘാടനം ചെയ്തു. വനിതാ കഥകളി സംഘത്തിന്‍റെ സുവർണ ജൂബിലിയാഘോഷത്തിന്‍റെ സുവർണ സുഷമം ബ്രോഷർ പ്രകാശനം കഥകളി കേന്ദ്രം പ്രസിഡന്‍റ് ഡോ. സി. ഉണ്ണിക്കൃഷ്ണൻ, കെ.എസ്. ദാമോദരൻ നമ്പൂതിരി, രാധിക അജയൻ എന്നിവർ ചേർന്ന് നിർവഹിച്ചു. തുടർന്ന് കലാമണ്ഡലം വൈശാഖ്, കോട്ടക്കൽ പ്രദീപ്, ഡോ. ഇ.എൻ. നാരായണൻ, മധു വാരണാസി എന്നിവർ വേഷമിട്ട ഉത്തരാ സ്വയംവരം കഥകളി അരങ്ങേറി. ഇന്ന് വൈകിട്ട് അഞ്ചിന് ദക്ഷയാഗം കഥകളി നടക്കും.

കരുമാലൂരിൽ സമരം നടത്തിയ യുഡിഎഫ് അംഗങ്ങൾ വെട്ടിലായി

കരുമാലൂർ : കരുമാലൂർ പഞ്ചായത്തിൽ ഡിവൈഎഫ്ഐ നേതാവ് മാലിന്യം വലിച്ചെറിഞ്ഞ സംഭവത്തിൽ പഞ്ചായത്ത് പ്രസിഡന്‍റും സെക്രട്ടറിയും അനാസ്ഥ കാട്ടിയെന്ന് ആരോപിച്ച് പഞ്ചായത്തിൽ സമരം നടത്തിയ യുഡിഎഫ് അംഗങ്ങൾ വെട്ടിലായി. കരുമാലൂർ മേഖല പ്രസിഡന്‍റ് ദീപു ശശിധരനെതിരെയാണ് യുഡിഎഫ് സമരവുമായി ഇറങ്ങിയത്. കൃഷിസ്ഥലത്തേക്ക് കാറിൽ പോകുമ്പോഴാണ് ഒരു പ്ലാസ്റ്റിക്ക് കവർ ഒഴിഞ്ഞ പറമ്പിലേക്ക് വലിച്ചെറിഞ്ഞത്. തൊട്ടടുത്ത വീടിന്‍റെ കാമറയിൽ ദൃശ്യം പതിയുകയും അത് പഞ്ചായത്ത് അധികൃതർക്ക് കൈമാറുകയും ചെയ്തു. പരാതി ലഭിച്ച ഉടനെ വാഹന ഉടമയുടെ വിവരങ്ങൾ ശേഖരിക്കുന്നതിനായി ആലുവ വെസ്റ്റ് പോലീസിൽ പഞ്ചായത്ത് അധികൃതർ പരാതി നൽകുകയും ചെയ്തു. ഉടമയെ വ്യക്തമായതോടെ കഴിഞ്ഞ നാലിന് കാർ ഉടമയ്ക്ക് പഞ്ചായത്ത് 5,000 രൂപ പിഴ ചുമത്തി നോട്ടീസ് നൽകി.ആറിന് പഞ്ചായത്തിൽ പിഴ ഒടുക്കുകയും ചെയ്തു. എന്നാൽ പിഴ അടച്ച ശേഷം അതറിയാതെ 12നാണ് യുഡിഎഫ് അംഗങ്ങൾ പഞ്ചായത്തിന് മുന്നിൽ സമരം നടത്തിയത്. പഞ്ചായത്തിലെ അനധികൃത ബന്ധുനിയമനത്തിനെതിരെ ഡിവൈഎഫ്ഐ പ്രക്ഷോഭം സംഘടിപ്പിച്ചിരുന്നു.ആറാം വാർഡ് മെമ്പറും സ്ഥിരം സമിതി അധ്യക്ഷയുമായ കോൺഗ്രസ്‌ നേതാവിന്‍റെ മകനെ പഞ്ചായത്ത് ഓഫീസിൽ താത്കാലിക നിയമനം നൽകിയിരുന്നു. കാലാവധി കഴിഞ്ഞും വീണ്ടും തുടരാൻ ശ്രമിച്ചതിനെതിരെ ഡിവൈഎഫ്ഐ പരാതി നൽകുകയും തുടർന്ന് ജോലിയിൽ നിന്ന് ഒഴിവാക്കുകയും ചെയ്തു. ഇതിന്‍റെ വൈരാഗ്യത്തിലാണ് ചെയ്ത തെറ്റിന് പിഴ ഒടുക്കിയിട്ടും ദീപു ശശിധരനെ അപകീർത്തിപ്പെടുത്താൻ ശ്രമം നടന്നതത്രേ. പൊതു ഇടങ്ങളിൽ മാലിന്യം നിക്ഷേപിച്ചതിൽ തന്‍റെ ഭാഗത്ത് നിന്ന് വീഴ്ച സംഭവിച്ചതായും അതിന് പിഴ അടച്ചതായും ദീപു സാമൂഹ്യ മാധ്യമങ്ങളിൽ പോസ്റ്റു ചെയ്തപ്പോഴാണ് യുഡിഎഫിന് അബദ്ധം മനസിലായത്.

വല്ലം-പാണംകുഴി റോഡ് തകര്‍ന്നു; അപകടങ്ങള്‍ പതിവാകുന്നു

പെരുമ്പാവൂര്‍: വല്ലം പാണംകുഴി റോഡില്‍ വല്ലം മുതല്‍ കുറിച്ചിലക്കോട് വരെ റോഡിന്‍റെ വിവിധ സ്ഥലങ്ങളില്‍ കുഴികള്‍ രൂപപ്പെട്ടതിനാല്‍ അപകടങ്ങള്‍ പതിവാകുന്നു. ഐമുറി സെന്‍റ് ആന്‍സിന്‍റെ മുന്‍വശം, ആയത്തുപടി കപ്പേള, പഞ്ചായത്ത് ഓഫീസിന് മുന്‍വശം, കോടനാട് വില്ലേജ് ഓഫീസിന് മുന്‍വശം എന്നീ സ്ഥലങ്ങളില്‍ വലിയ കുഴികളും വിവിധ സ്ഥലങ്ങളില്‍ പെട്ടക്കുഴികളും രൂപപ്പെട്ടിട്ടുണ്ട്. ഐമുറി കവലയില്‍ കഴിഞ്ഞ ദിവസങ്ങളിലായി രണ്ട് ഇരുചക്രവാഹനാപകടങ്ങള്‍ നടന്നു. ആയത്തുപടി സ്വദേശി ഷാജി, കല്ലമ്പലം സ്വദേശി രാധിക എന്നിവരെ പെരുമ്പാവൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. വലിയ വാഹനങ്ങള്‍ വരുമ്പോള്‍ പെട്ടെന്ന് ഇരുചക്ര വാഹനങ്ങൾ വെട്ടിച്ചു മാറ്റുമ്പോഴാണ് വലിയ കുഴിയില്‍ വീണ് അപകടങ്ങള്‍ ഉണ്ടാകുന്നത്. പെരുമ്പാവൂര്‍ നിയോജക മണ്ഡലത്തിലെ പ്രധാനപ്പെട്ട റോഡാണിത്. പാണേലിപ്പോര്, കപ്രികാട് എക്കോ ടൂറിസം, മഹാഗണിത്തോട്ടം, മലയാറ്റൂര്‍ അന്തര്‍ദേശീയ തീര്‍ത്ഥാടന കേന്ദ്രം എന്നീ സ്ഥലങ്ങളിലേക്കുള്ള പ്രധാന റോഡുകൂടിയാണിത്. ആയത്തുപടി, ഐമുറി, കൂവപ്പടി, ചേരാനല്ലൂര്‍, തോട്ടുവാ, കൂടാലപ്പാട്, കോടനാട്, ആലാട്ടുചിറ, പാണംകുഴി എന്നീ പ്രദേശങ്ങളിലെ ആയിരക്കണക്കിന് ആളുകളും നിരവധി യാത്ര ബസുകളും വിവിധ കമ്പനികളിലേക്കുള്ള വലിയ വണ്ടികള്‍ അടക്കം നൂറുകണക്കിന് വാഹനങ്ങളുമാണ് ഇതുവഴി കടന്നുപോകുന്നത്. പെരുമ്പാവൂര്‍- കൂവപ്പടി റോഡ്, കൂവപ്പടി - ഇടവൂര്‍ റോഡ്, തോട്ടുവ- നമ്പള്ളി റോഡ്, കുറിച്ചിലക്കോട്- കുറുപ്പുംപടി റോഡ്, കാലടി -മലയാറ്റൂര്‍ റോഡ് എന്നീ റോഡുകളിലൂടെയുള്ള വാഹനങ്ങള്‍ ഈ റോഡിലൂടെ ആണ് എംസി റോഡില്‍ പ്രവേശിക്കുന്നത്. നിരവധി സ്‌കൂളുകളിലേക്കും ആശുപത്രികളിലേക്കും സര്‍ക്കാര്‍ ഓഫീസുകളിലേക്ക് ആളുകള്‍ പോകുന്ന പ്രധാന റോഡാണിത്. മഴക്കാലത്തിനു മുന്‍പ് അറ്റകുറ്റപ്പണികള്‍ നടക്കാത്തതുകൊണ്ടാണ് മഴ ആരംഭിച്ചതോടെ റോഡ് തകര്‍ന്നത്. എത്രയും പെട്ടെന്ന് വല്ലം പാണംകുഴി റോഡിന്‍റെ അറ്റകുറ്റ പണികള്‍ നടത്തി സഞ്ചാരയോഗ്യമാക്കണമെന്ന് ബിജെപി നേതാക്കളായ പി. അനില്‍കുമാര്‍, അരുണ്‍ കോടനാട്, നിഷാ രാകേഷ്, ദേവച്ചന്‍ പടയാട്ടില്‍, മാര്‍ട്ടിന്‍ വര്‍ഗീസ് എന്നിവരുടെ നേതൃത്വത്തില്‍ മന്ത്രി മുഹമ്മദ് റിയാസിന് പരാതി നല്‍കി. എത്രയും പെട്ടെന്ന് റോഡിന്‍റെ അറ്റകുറ്റപ്പണികള്‍ നടത്തി സഞ്ചാരയോഗ്യമാക്കിയില്ലെങ്കില്‍ സമര പരിപാടികളുമായി ബിജെപി മുന്നോട്ടുപോകുമെന്ന് നേതാക്കള്‍ അറിയിച്ചു.

ഇടപ്പള്ളി തോട്ടിലെ പോള നീക്കല്‍ : അഴിമതി ആരോപിച്ച് പ്രതിപക്ഷം

കൊച്ചി: ഇടപ്പള്ളിത്തോട്ടിലെ പോള, പായല്‍ നീക്കം ചെയ്യുന്നതുമായി ബന്ധപ്പെട്ട് കരാര്‍ നല്‍കിയതില്‍ അഴിമതി ആരോപണവുമായി പ്രതിപക്ഷം. 17 ലക്ഷം രൂപ രേഖപ്പെടുത്തിയ കരാറുകാര്‍ക്ക് ടെന്‍ഡര്‍ നല്‍കാതെ ക്വട്ടേഷന്‍ വിളിച്ച് 26 ലക്ഷത്തിന് കരാര്‍ നല്‍കിയെന്നാണ് പ്രതിപക്ഷത്തിന്‍റെ ആരോപണം. 32.77 ലക്ഷം രൂപ അടങ്കല്‍ വരുന്ന വര്‍ക്കുകള്‍ക്ക് 15.83 ലക്ഷത്തിന് ടെൻഡര്‍ ഏറ്റെടുത്ത ആളുടെ പ്രവൃത്തികള്‍ തൃപ്തികരമല്ലെന്ന് കണ്ടതോടെ ദുരന്തനിവാരണ നിയമം ഉപയോഗിച്ച് കളക്ടറുടെ ഉത്തരവുപ്രകാരം കരാറുകാരനെ ഒഴിവാക്കിയിരുന്നു. ഈ സാഹചര്യത്തില്‍ കുറഞ്ഞ നിരക്ക് കോട്ട് ചെയ്ത രണ്ടാമത്തെ കരാറുകാരനാണ് വര്‍ക്ക് കൈമാറേണ്ടത്. 17 ലക്ഷമാണ് രണ്ടാമത്തെ കരാറുകാരന്‍ കോട്ട് ചെയ്തിരുന്നത്. എന്നാല്‍ ഷോര്‍ട്ട് ടെൻഡര്‍ നോട്ടീസ് നല്‍കി 26.38 ലക്ഷം രൂപയ്ക്ക് കരാര്‍ നല്‍കിയത് അഴിമതിയാണെന്ന് പ്രതിപക്ഷ കക്ഷി നേതാവ് അഡ്വ. ആന്‍റണി കുരിത്തറയും പാര്‍ലമെന്‍ററി പാര്‍ട്ടി സെക്രട്ടറി എം.ജി. അരിസ്‌റ്റോട്ടിലും പറഞ്ഞു.

കുട്ടികള്‍ക്കായി ബാലാവകാശ കമ്മീഷന്‍റെ "റേഡിയോ നെല്ലിക്ക'

സീമ മോഹന്‍ലാല്‍ കൊച്ചി: വിജ്ഞാനവും വിനോദവും കോര്‍ത്തിണക്കി കുട്ടികള്‍ക്കായി സംസ്ഥാന ബാലാവകാശ സംരക്ഷണ കമ്മീഷന്‍റെ ഇന്‍റര്‍നെറ്റ് റേഡിയോ "റേഡിയോ നെല്ലിക്ക' ഒരുങ്ങുന്നു. കുട്ടികളിലെ മാനസിക സംഘര്‍ഷങ്ങള്‍, ലഹരിയുപയോഗം, സൈബര്‍ ഇടങ്ങളിലെ ചതിക്കുഴികള്‍, ആത്മഹത്യ, സോഷ്യല്‍ മീഡിയ അഡിക്ഷന്‍ എന്നിവ വര്‍ധിച്ചുവരുന്ന സാഹചര്യത്തിലാണ് പദ്ധതി നടപ്പാക്കുന്നത്. ബാലസൗഹൃദം യാഥാര്‍ഥ്യമാക്കുക, ബാലാവകാശ സാക്ഷരത ഉറപ്പാക്കുക എന്നിവയാണ് ഇതിലൂടെ ലക്ഷ്യമിടുന്നത്. റേഡിയോ നെല്ലിക്കയുടെ ഉദ്ഘാടനം 18ന് മുഖ്യമന്ത്രി പിണറായി വിജയന്‍ അദ്ദേഹത്തിന്‍റെ ചേംബറില്‍ നിര്‍വഹിക്കും. ലോകത്ത് എവിടെനിന്നും 24 മണിക്കൂറും പരിപാടികള്‍ കേള്‍ക്കാനാകും. തുടക്കത്തില്‍ തിങ്കള്‍ മുതല്‍ വെള്ളിവരെ നാലു മണിക്കൂറാണ് പ്രോഗ്രാം. ശനിയും ഞായറും പ്രോഗ്രാം ആവര്‍ത്തിക്കും. പരിപാടികള്‍ക്കിടയില്‍ പരസ്യങ്ങളുമില്ല. കുട്ടികളുടെ അവകാശ നിയമങ്ങളെക്കുറിച്ചുള്ള റൈറ്റ് ടേണ്‍ എന്ന പരിപാടി രാവിലെ ഏഴു മുതല്‍ എട്ടുവരെയാണ്. ഈ പരിപാടി വൈകിട്ട് നാലു മുതല്‍ അഞ്ചു വരെ വീണ്ടും ശ്രവിക്കാം. രാവിലെ എട്ടു മുതല്‍ ഒമ്പതുവരെയുള്ള ഇമ്മിണി ബല്യ കാര്യം എന്ന ഫോണ്‍ ഇന്‍ പരിപാടിയില്‍ കുട്ടികളെയും രക്ഷിതാക്കളെയും അധ്യാപകരെയും ഒരുമിച്ച് ചേര്‍ത്ത് യഥാര്‍ഥ ജീവിത കഥകള്‍, ചിന്തിപ്പിക്കുന്ന സംഭാഷണങ്ങള്‍, പരസ്പര സംവാദങ്ങള്‍ എന്നിവ നടത്തും. വൈകിട്ട് അഞ്ചു മുതല്‍ ആറു വരെ ഇത് വീണ്ടും ശ്രവിക്കാം. ഉച്ചക്ക് 12 മുതല്‍ ഒന്നു വരെ കുട്ടികളും രക്ഷിതാക്കളും അധ്യാപകരും സംശയങ്ങള്‍, പരിഭവങ്ങള്‍, പ്രയാസങ്ങള്‍, സന്തോഷങ്ങള്‍, അനുഭവങ്ങള്‍, കഥകള്‍ എന്നിവ കത്തുകളിലൂടെ പങ്കുവയ്ക്കുന്ന ആകാശദൂത് എന്ന പരിപാടി. ഇത് രാത്രി എട്ടു മുതല്‍ ഒമ്പതു വരെ വീണ്ടും കേൾക്കാം. ഉച്ചയ്ക്ക് ഒന്നു മുതല്‍ രണ്ടു വരെയുള്ള റേഡിയോ ചാറ്റ് പ്രോഗ്രാമായ അങ്കിള്‍ ബോസില്‍ കുട്ടികള്‍ക്ക് അങ്കിള്‍ ബോസിനോട് ചോദ്യങ്ങള്‍ ചോദിക്കാം. പരിപാടി രാത്രി ഒന്പതു മുതല്‍ 10 വരെ വീണ്ടും കേള്‍ക്കാനുമാകും. ആൻഡ്രോയിഡ് ഫോണില്‍ പ്ലേ സ്റ്റോറില്‍ നിന്നും ഐഒഎസില്‍ ആപ് സ്റ്റോറില്‍ നിന്നും റേഡിയോ നെല്ലിക്ക ഡൗണ്‍ലോഡ് ചെയ്യാം. കംപ്യൂട്ടറില്‍ radionellikka.com ലൂടെയും കാറില്‍ ഓക്‌സ് കേബിള്‍, ബ്ലൂടൂത്ത് എന്നിവയിലൂടെയും റേഡിയോ കേള്‍ക്കാം. പരിപാടിയിലേക്ക് കുട്ടിക്കാല ഓര്‍മകള്‍, അനുഭവങ്ങള്‍, സ്‌കൂള്‍ ജീവിതം, സന്തോഷങ്ങള്‍, പ്രയാസങ്ങള്‍ തുടങ്ങിയവ ആകാശദൂത് പരിപാടിയിലേക്ക് [email protected] എന്ന ഇ-മെയിലിലേക്കും വാട്ട്സ്ആപ്പായും അറിയിക്കാം. ഇമ്മിണി ബല്യ കാര്യം, അങ്കിള്‍ ബോസ് എന്നീ പരിപാടികളിലേക്ക് +91 9993338602 എന്ന മൊബൈലിലും വിളിക്കാം. ലക്ഷ്യമിടുന്നത് 25 ലക്ഷം കുടുംബങ്ങളെ തുടക്കത്തില്‍ കേരളത്തിലെ 25 ലക്ഷം കുടുംബങ്ങളെ റേഡിയോ നെല്ലിക്കയുടെ ശ്രോതാക്കളാക്കാനാണ് കമ്മീഷന്‍ ലക്ഷ്യമിടുന്നത് ബാലാവകാശ കമ്മീഷന്‍ ചെയര്‍പേഴ്‌സണ്‍ കെ.വി. മനോജ് പറഞ്ഞു. സംസ്ഥാനത്തെ 15, 397 സ്‌കൂളുകളിലെ വിദ്യാര്‍ഥികള്‍, അധ്യാപകര്‍, പിടിഎ, എസ്പിസി, എന്‍എസ്എസ്, സ്‌കൂള്‍ ക്ലബുകള്‍ എന്നിവ വഴിയാകും റേഡിയോ കുട്ടികളില്‍ എത്തുക. കുടുംബശ്രീയുടെ 29,202 ബാലസഭകളും വനിത ശിശുവികസന വകുപ്പിനുകീഴിലുള്ള 33,120 അങ്കണവാടികളിലെ അധ്യാപകരും രക്ഷിതാക്കളും, ജില്ലകളിലെ 464 ശിശു സംരക്ഷണ സ്ഥാപനങ്ങളിലും കമ്മിഷന്‍റെ റേഡിയോ നെല്ലിക്ക എത്തും. എന്‍ജിഒകള്‍, റസിഡന്‍സ് അസോസിയേഷനുകള്‍ തുടങ്ങി സമൂഹത്തില്‍ മുഴുവനായും ബാലാവകാശ സാക്ഷരത എത്തിക്കാന്‍ റേഡിയോയിലൂടെ കഴിയുമെന്നാണ് പ്രതീക്ഷ.

കപ്പല്‍ അപകടം; മത്സ്യങ്ങള്‍ ഭക്ഷ്യയോഗ്യമെന്ന് സിഫ്റ്റ്

കൊച്ചി: കൊച്ചി പുറംകടലില്‍ കപ്പല്‍ മുങ്ങിയതിനെ തുടര്‍ന്ന് മത്സ്യമേഖലയിലുണ്ടായ ആശങ്ക പരിഹരിക്കാനായി സെന്‍ട്രല്‍ ഇന്‍സ്റ്റിറ്റ്യൂട്ട് ഓഫ് ഫിഷറീസ് ടെക്‌നോളജി (സിഫ്റ്റ്) നടത്തിയ പ്രാഥമിക പരിശോധനയില്‍ മത്സ്യങ്ങള്‍ ഭക്ഷ്യയോഗ്യമെന്ന് റിപ്പോര്‍ട്ട്. സിഫ്റ്റ് ആലപ്പുഴ പുറംകടലില്‍ നടത്തിയ പഠനത്തിന്‍റെ റിപ്പോര്‍ട്ട് സര്‍ക്കാരിന് സമര്‍പ്പിച്ചു. കൊച്ചി, ആലപ്പുഴ, കൊല്ലം, തിരുവനന്തപുരം എന്നീ തെക്കന്‍ തീരദേശങ്ങളിലെ 30 സാമ്പിള്‍ പരിശോധിച്ചതില്‍ ഒന്നില്‍പ്പോലും നെഗറ്റീവ് ഫലമില്ലെന്ന് സിഫ്റ്റ് ഡയറക്ടര്‍ ഡോ. ജോര്‍ജ് നൈനാന്‍ പറഞ്ഞു. കടല്‍വെള്ളത്തിന്‍റെ സാമ്പിളും പരിശോധിച്ചിരുന്നു. എണ്ണയുടെ അംശം കണ്ടെത്താനായില്ല. പിഎച്ച് മൂല്യം സ്വാഭാവിക തോതിലാണുള്ളതെന്നും അദ്ദേഹം പറഞ്ഞു.ബേപ്പൂരിലെ കപ്പലപകടത്തിന്‍റെ പശ്ചാത്തലത്തില്‍ കോഴിക്കോട് മുതല്‍ വടക്കോട്ടുള്ള തീരപ്രദേശങ്ങളിലെ മീന്‍ സാമ്പിള്‍ ശേഖരിക്കും. മത്സ്യഫെഡ് ശേഖരിക്കുന്ന സാമ്പിളുകളില്‍ പഠനം നടത്തി അടുത്തയാഴ്ച സര്‍ക്കാരിന് റിപ്പോര്‍ട്ട് സമര്‍പ്പിക്കും. ദീര്‍ഘകാലാടിസ്ഥാനത്തില്‍ പരിസ്ഥിതിക്കും ആവാസവ്യവസ്ഥയ്ക്കും ഉണ്ടായ പ്രത്യാഘാതം പഠിക്കാന്‍ കുഫോസ്, സിഎംഎഫ്ആര്‍ഐ, സിഫ്റ്റ് എന്നീ സ്ഥാപനങ്ങളുടെ സംയുക്തസമിതിയെ ഫിഷറീസ് വകുപ്പ് ചുമതലപ്പെടുത്തിയിട്ടുണ്ട്. അതേസമയം, കേരളതീരത്തെ കപ്പലപകടങ്ങളുമായി ബന്ധപ്പെട്ട നാശനഷ്ടം നിശ്ചയിക്കുമ്പോള്‍ മത്സ്യസമ്പത്തിന്‍റെ നാശമടക്കം കണക്കിലെടുക്കണമെന്ന് ഹൈക്കോടതി നിര്‍ദേശിച്ചിട്ടുണ്ട്.

വരുന്നൂ... പെരുമഴ : ജില്ലയില്‍ ഓറഞ്ച് അലര്‍ട്ട്

കൊച്ചി: ജില്ലയില്‍ മഴ വീണ്ടും ശക്തമാകുന്നു. ഇടവിട്ട് പെയ്യുന്ന ശക്തമായ മഴ തീരദേശത്തെ വീണ്ടും വെള്ളത്തിലാക്കി. കൊച്ചി നഗരത്തിലക്കം താഴ്ന്ന പ്രദേശങ്ങള്‍ വീണ്ടും വെള്ളപ്പൊക്ക ഭീഷണിയിലണ്. മലയോര മേഖലകളിലും മഴ ശക്തമായി തുടരുന്നു. ഈ സാഹചര്യത്തില്‍ ജില്ലയില്‍ 17 വരെ കേന്ദ്ര കാലാവസ്ഥാ വകുപ്പ് ഓറഞ്ച് അലര്‍ട്ട് പ്രഖ്യാപിച്ചു. ഒറ്റപ്പെട്ടയിടങ്ങളില്‍ അതിശക്തായ മഴയ്ക്ക് സാധ്യതയുണ്ടെന്ന് മുന്നറിയിപ്പില്‍ പറയുന്നു. 24 മണിക്കൂറില്‍ 115.6 മില്ലിമീറ്റര്‍ മുതല്‍ 204.4 മില്ലിമീറ്റര്‍ വരെ മഴ ലഭിച്ചേക്കാം. മഴ ശക്തമാകുന്ന സാഹചര്യത്തില്‍ അത്യാവശ്യമല്ലാത്ത യാത്രകള്‍ പരമാവധി ഒഴിവാക്കുക. വെള്ളച്ചാട്ടങ്ങള്‍, ജലാശയങ്ങള്‍, മലയോര മേഖലകള്‍ എന്നിവിടങ്ങളിലേക്കുള്ള വിനോദ യാത്രകള്‍ മഴ മുന്നറിയിപ്പ് മാറുന്നതു വരെ ഒഴിവാക്കേണ്ടതാണെന്നും, നദികള്‍ മുറിച്ചു കടക്കാനോ, നദികളിലോ മറ്റ് ജലാശയങ്ങളിലോ കുളിക്കാനോ മീന്‍പിടിക്കാനോ മറ്റ് ആവശ്യങ്ങള്‍ക്കോ ഇറങ്ങാന്‍ പാടുള്ളതല്ലെന്നും കാലാവസ്ഥാ വകുപ്പ് മുന്നറിയിപ്പ് നല്‍കുന്നു. അതിശക്തമായ മഴയുടെ സാഹചര്യത്തില്‍ റോഡ് അപകടങ്ങളും‍ മുന്നില്‍ കാണണം. കടലാക്രമണം ശക്തമാകാന്‍ സാധ്യതയുള്ളതിനാല്‍ അപകട മേഖലകളില്‍ താമസിക്കുന്നവര്‍ ജാഗ്രത പാലിക്കണം. ആവശ്യമായ ഘട്ടത്തില്‍ മാറി താമസിക്കണമെന്നും മത്സ്യബന്ധനോപാധികള്‍ സുരക്ഷിതമാക്കി വയ്ക്കണമെന്നും മുന്നറിയിപ്പില്‍ വ്യക്തമാക്കുന്നു.

സാമ്പത്തിക തിരിമറി : സിപിഎം ലോക്കൽ കമ്മിറ്റി അംഗത്തെ പാർട്ടിയിൽ നിന്ന് പുറത്താക്കി

ചോറ്റാനിക്കര: സാമ്പത്തിക തിരിമറി നടത്തിയതിനെ തുടർന്ന് സിപിഎം ലോക്കൽ കമ്മിറ്റി അംഗത്തെ പാർട്ടിയിൽ നിന്ന് പുറത്താക്കി. സിപിഎം ചോറ്റാനിക്കര ലോക്കൽ കമ്മിറ്റി അംഗവും ഡിവൈഎഫ്ഐ തൃപ്പൂണിത്തുറ ബ്ലോക്ക് പ്രസിഡന്‍റുമായ വൈശാഖ് മോഹനെയാണ് തെരഞ്ഞെടുക്കപ്പെട്ട സ്ഥാനങ്ങളിൽ നിന്നും പാർട്ടിയുടെ പ്രാഥമികാംഗത്വത്തിൽ നിന്നും പുറത്താക്കിയത്. പാർട്ടി ഭരിക്കുന്ന കണയന്നൂർ സർവീസ് സഹകരണ ബാങ്കിലെ കളക്ഷൻ ഏജന്‍റായിരുന്ന ഇയാൾ 12 ലക്ഷത്തോളം രൂപ തിരിമറി നടത്തുകയായിരുന്നു. ദിവസവും കളക്ഷനായി ലഭിച്ചിരുന്ന തുക ബാങ്കിൽ അടയ്ക്കാതെ സിസ്റ്റത്തിൽ ചേർത്താണ് തിരിമറി നടത്തിയിരുന്നത്. രണ്ടു വർഷത്തിനിടെയാണ് ബാങ്കിൽ തിരിമറി നടന്നത്. ബാങ്ക് ഇന്‍റേണൽ ഓഡിറ്റിംഗിൽ തട്ടിപ്പ് കണ്ടെത്തുകയായിരുന്നു. തുടർന്ന് പാർട്ടി ഇടപെട്ട് ബാങ്കിൽ നിന്നു തന്നെ വൈശാഖിനെ കൊണ്ട് വായ്പ എടുപ്പിച്ച് പണം തിരിച്ചടിപ്പിച്ചു. കഴിഞ്ഞ ദിവസം ചേർന്ന ലോക്കൽ കമ്മിറ്റി യോഗത്തിലാണ് പാർട്ടി ചുമതലകളിൽ നിന്നു മാറ്റണമെന്ന് വൈശാഖിൽ നിന്ന് കത്തെഴുതി വാങ്ങിയ ശേഷം നടപടിയെടുത്തത്.

എംഡിഎംഎയുമായി യുവാക്കള്‍ അറസ്റ്റിൽ

കൊച്ചി: കൊച്ചിയില്‍ വിവിധയിടങ്ങളില്‍ നടത്തിയ പരിശോധനയില്‍ എംഡിഎംഎയുമായി മൂന്ന് യുവാക്കള്‍ അറസ്റ്റില്‍. അരൂര്‍ സ്വദേശി ജോബിന്‍ ജോസഫ്, മാള പുത്തന്‍ചിറ സ്വദേശി വി.എ. അസ്‌ലം, വയനാട് സ്വദശി അഭിജിത്ത് എന്നിവരെയാണ് പോലീസും ഡാന്‍സാഫും ചേര്‍ന്ന് പിടികൂടിയത്. പാലാരിവട്ടം പോലീസും ഡാന്‍സാഫും ചേര്‍ന്ന് സ്റ്റേഡിയം ലിങ്ക് റോഡിന് സമീപം നടത്തിയ പരിശോധനയിലാണ് ജോബിന്‍ ജോസഫിനെ പിടികൂടിയത്. ഇയാളുടെ പക്കല്‍നിന്നും 4.63 ഗ്രാം എംഡിഎംഎ പിടികൂടി. മുളവുകാട് പോലിസ് പട്രോളിംഗ് നടത്തുന്നതിനിടെ പൊന്നരിമംഗലം റെയില്‍വേ ഓവര്‍ ബ്രിഡ്ജിന് സമീപത്തു നിന്നാണ് അസ്‌ലം, അഭിജിത്ത് എന്നിവര്‍ പിടിയിലായത്. ഇരുടെപക്കല്‍നിന്നും 0.53 ഗ്രാം എംഡിഎംഎ പിടികൂടി.

കാർ വൈദ്യുത പോസ്റ്റിൽ ഇടിച്ചു തകർന്നു

കൂത്താട്ടുകുളം: എംസി റോഡിൽ കാർ വൈദ്യുത പോസ്റ്റിൽ ഇടിച്ചു തകർന്നു. ഉപ്പുകണ്ടം പ്രതീക്ഷാഭവനു സമീപം ഇന്നലെ പുലർച്ചെ 2.30നാണ് അപകടം. പത്തനാപുരം സ്വദേശികൾ സഞ്ചരിച്ച വാഹനമാണ് അപകടത്തിൽപ്പെട്ടത്. വാഹനത്തിൽ കുട്ടികളും മുതിർന്നവരുമടക്കം നാലു പേരുണ്ടായിരുന്നു. വാഹനത്തിലുണ്ടായവർക്ക് നിസാര പരിക്കേറ്റു. കോയന്പത്തൂർ പോയി മടങ്ങും വഴിയാണ് അപകടം. ഡ്രൈവർ ഉറങ്ങിയപ്പോയതാകാം അപകടകാരണമെന്നാണ് കരുതുന്നത്. അപകടത്തെത്തുടർന്ന് പ്രദേശത്ത് വൈദ്യുതി ബന്ധം തകരാറിലായി.

റെയില്‍വേ അവലോകന യോഗം 18ന്

കൊച്ചി: ദക്ഷിണ റെയില്‍വേ തിരുവനന്തപുരം ഡിവിഷണല്‍ റെയില്‍വേ മാനേജരുടെ നേതൃത്വത്തില്‍ എറണാകുളത്തെ റെയില്‍ വികസന പുരോഗതി അവലോകനം ചെയ്യുന്നതിന് റെയില്‍വേ കണ്‍സ്ട്രക്ഷന്‍ എന്‍ജിനിയറിംഗ് വിഭാഗം ഉദ്യോഗസ്ഥരുടെ യോഗം ചേരും. 18നു രാവിലെ 11 ന് എറണാകുളം ഏരിയാ മാനേജരുടെ ഓഫീസിലാണ് യോഗം ചേരുന്നത്. എറണാകുളം മേഖലയില്‍ നിലവില്‍ റെയില്‍വേ ആരംഭിച്ചിട്ടുള്ള വികസന പദ്ധതികളുടെ പൂര്‍ത്തീകരണം വൈകുന്നത് ഗൗരവത്തിലെടുക്കണമെന്നും പ്രവര്‍ത്തന പുരോഗതി അവലോകനം ചെയ്യണമെന്നും ഹൈബി ഈഡന്‍ എംപി ഡിവിഷണല്‍ റെയില്‍വേ മാനേജരോട് ആവശ്യപ്പെട്ടതിനെ തുടര്‍ന്നാണ് യോഗം. എറണാകുളം മാര്‍ഷലിംഗ് യാര്‍ഡിനെ നാല് പ്ലാറ്റ്‌ഫോമുകളുള്ള ഒരു പുതിയ ടെര്‍മിനലായി വികസിപ്പിക്കല്‍, നോര്‍ത്ത് സൗത്ത് റെയില്‍വേ സ്റ്റേഷനുകള്‍ പുനര്‍വികസനം സമയബന്ധിതമായി പൂര്‍ത്തിയാക്കല്‍, എറണാകുളം നോര്‍ത്ത് റെയില്‍വേ സ്റ്റേഷന്‍റെ അയല്‍പക്കത്തുള്ള ഇഎസ്‌ഐ ആശുപത്രിയില്‍ നിന്ന് ഒരു ഭാഗം ഭൂമി ഏറ്റെടുത്ത് പ്ലാറ്റ്‌ഫോം ഒന്നിന്‍റെ വീതി കൂട്ടല്‍, ഉള്‍പ്പെടെയുള്ള എറണാകുളത്തിന്‍റെ വിവിധ റെയില്‍വേ വികസന പദ്ധതികളുടെ പുരോഗതി അവലോകനം ചെയ്യാനാണ് യോഗം.

മഹാരാഷ്ട്ര ഗവര്‍ണര്‍ ശ്രേഷ്ഠ കാതോലിക്കയെ സന്ദര്‍ശിച്ചു

കൊച്ചി: മഹാരാഷ്ട്ര ഗവര്‍ണര്‍ സി.പി. രാധാകൃഷ്ണന്‍ യാക്കോബായ സഭയുടെ ശ്രേഷ്ഠ കാതോലിക്ക മാര്‍ ബസേലിയോസ് ജോസഫ് ബാവയെ സന്ദര്‍ശിച്ചു. തിരുവാങ്കുളം ക്യംതാ സെമിനാരി കാതോലിക്കോസ് റസിഡന്‍സില്‍ നടന്ന കൂടിക്കാഴ്ചയില്‍ കുര്യാക്കോസ് മാര്‍ തെയോഫിലോസ് മെത്രാപ്പോലീത്ത, ഒസ്താത്തിയോസ് മെത്രാപ്പോലീത്ത എന്നിവരും ഉണ്ടായിരുന്നു.

മെട്രോയിലെ വിദ്യാര്‍ഥി പാസ് : ഒരു തീരുമാനവും എടുത്തിട്ടില്ലെന്ന് കെഎംആര്‍എല്‍

കൊച്ചി: മെട്രോയില്‍ വിദ്യാര്‍ഥികള്‍ക്ക് പാസ് നല്‍കുന്നതുമായി ബന്ധപ്പെട്ട് ഒരു തീരുമാനവും ഇതേവരെ കൈക്കൊണ്ടിട്ടില്ലെന്ന് കെഎംആര്‍എല്‍. അവധിക്കാലമായ മാര്‍ച്ച്, ഏപ്രില്‍ മാസങ്ങളില്‍ പാസ് താത്കാലികമായി നിര്‍ത്തിയതാണ്. ഇതു പുനഃസ്ഥാപിക്കണം എന്നാവശ്യപ്പെട്ട് വിദ്യാഭ്യാസ സ്ഥാപനങ്ങള്‍ ഉള്‍പ്പെടെ കെഎംആര്‍എല്ലിനെ സമീപിച്ചിട്ടുണ്ട്. പാസ് പുനഃസ്ഥാപിക്കുന്ന കാര്യം പരിഗണനയിലാണെന്നും എന്നാല്‍ അതില്‍ ഒരു തീരുമാനവും ഇതുവരെ കൈക്കൊണ്ടിട്ടില്ലെന്നും കെഎംആര്‍എല്‍ പുറത്തുവിട്ട പത്രക്കുറുപ്പില്‍ വ്യക്തമാക്കി.

കെനിയയിലെ വാഹനാപകടം : അഞ്ചു മലയാളികളുടെ മൃതദേഹം ഇന്ന് കൊച്ചിയിലെത്തിക്കും

കൊച്ചി: കെനിയയിലെ നെഹ്‌റൂറുവിലുണ്ടായ ബസപകടത്തില്‍ മരിച്ച അഞ്ച് മലയാളികളുടെ മൃതദേഹങ്ങള്‍ ഇന്ന് കൊച്ചിയിലെത്തിക്കും. മൂവാറ്റുപുഴ സ്വദേശിനി ജസ്‌ന (29), മകള്‍ റൂഹി മെഹ്‌റിന്‍ ( ഒന്നര വയസ്), മാവേലിക്കര ചെറുകോല്‍ സ്വദേശിനി ഗീത ഷോജി ഐസക്(58), പാലക്കാട് മണ്ണൂര്‍ സ്വദേശിനി റിയ ആന്‍ (41), മകള്‍ ടൈറ റോഡ്രിഗസ്(ഏഴ്) എന്നിവരുടെ മൃതദേഹങ്ങളാണ് രാവിലെ 8.45 ന് ഖത്തര്‍ എയര്‍വേയ്സ് വിമാനത്തില്‍ നെടുമ്പാശേരി വിമാനത്താവളത്തില്‍ എത്തിക്കുന്നത്. സംസ്ഥാന സര്‍ക്കാരിനെ പ്രതിനിധീകരിച്ച് മൃതദേഹങ്ങള്‍ നോര്‍ക്ക റൂട്ട്‌സ് ഏറ്റുവാങ്ങും. ഇവിടെ നിന്നും മൃതദേഹങ്ങള്‍ വീടുകളിലേക്കു കൊണ്ടുപോകും. മരണപ്പെട്ടവരുടെ ബന്ധുക്കളും വിമാനത്തില്‍ ഒപ്പമുണ്ടാകും. കെനിയയില്‍ നിന്നും കൊണ്ടുവരുന്ന ഭൗതിക ശരീരങ്ങള്‍ക്കും ഒപ്പമുള്ള ബന്ധുക്കള്‍ക്കും ഇന്ത്യയിലേക്ക് പ്രവേശിക്കുന്നതിന് യെല്ലോ വാക്‌സിന്‍ സര്‍ട്ടിഫിക്കറ്റ് വേണമെന്ന നിബന്ധനയില്‍ മുഖ്യമന്ത്രി പിണറായി വിജയന്‍റെ ഇടപെടലിനെ തുടര്‍ന്ന് കേന്ദ്രസര്‍ക്കാര്‍ പ്രത്യേക ഇളവനുവദിച്ചു. കെനിയയിലെ ലോക കേരള സഭാംഗങ്ങള്‍ അടിയന്തര ഇടപെടല്‍ തേടി നോര്‍ക്ക റൂട്ട്‌സിനെ വിവരം അറിയിച്ചതോടെയാണ് മുഖ്യമന്ത്രി പ്രശ്‌നത്തില്‍ ഇടപെട്ടത്. കഴിഞ്ഞ ഒമ്പതിന് ഇന്ത്യന്‍ സമയം വൈകിട്ട് ഏഴിനാണ് വിനോദസഞ്ചാരത്തിനെത്തിയ 28 പേരടങ്ങുന്ന ഇന്ത്യന്‍സംഘം സഞ്ചരിച്ച ടൂറിസ്റ്റ് ബസ് അപകടത്തില്‍ പെട്ടത്. ഖത്തറില്‍ നിന്നും വിനോദസഞ്ചാരത്തിനായി എത്തിയതായിരുന്നു ഇവര്‍. നെയ്‌റോബിയില്‍ നിന്നും 150 കിലോമീറ്റര്‍ അകലെ നെഹ്‌റൂറുവിലായിരുന്നു അപകടം. ഇവര്‍ സഞ്ചരിച്ച ബസ് താഴ്ചയിലേയ്ക്ക് കീഴ്‌മേല്‍ മറിയുകയായിരുന്നു. ജസ്നയുടെയും മകൾ റൂഹി മെഹ്റിന്‍റെയും ഭൗതിക ശരീരം ഇന്നുരാവിലെ 11 ഓടെ പേഴയ്ക്കാപ്പിള്ളി സെൻട്രൽ ജൂമാമസ്ജിദിൽ കബറടക്കും.

നിത്യോപയോഗ സാധനങ്ങളുടെ വില കുതിച്ചുയരുന്നു; നട്ടംതിരിഞ്ഞ് ജനം

കൊച്ചി: കാലവര്‍ഷക്കെടുതിക്കൊപ്പം സാധാരണക്കാരെ പൊള്ളിച്ച് നിത്യോപയോഗ സാധനങ്ങളുടെ വില കുതിച്ചുയരുന്നു. പച്ചക്കറി, മത്സ്യം, മാംസം എന്നിവയുടെ എല്ലാം വില വര്‍ധിച്ചിട്ടുണ്ട്. സ്‌കൂള്‍ തുറന്ന മാസം കൂടിയായതിനാല്‍ നിത്യോപയോഗ സാധനങ്ങളുടെ വിലവര്‍ധന സാധാരണക്കാരുടെ ദുരിതം ഇരട്ടിയാക്കി. പൊള്ളുന്ന മീന്‍ വില ട്രോളിംഗ് നിരോധനത്തെ തുടര്‍ന്ന് കടലില്‍ നിന്നുള്ള മത്സ്യവരവ് കുറഞ്ഞതോടെയാണ് മത്സ്യവില കുതിച്ചുയര്‍ന്നത്. പരമ്പരാഗത മത്സ്യബന്ധനം മാത്രമാണ് ഇപ്പോഴുള്ളത്. നിലവില്‍ ഇന്‍ബോര്‍ഡ്, ഔട്ട്‌ബോര്‍ഡ് വള്ളങ്ങളിലെ മീന്‍പിടുത്തവും കായല്‍, പുഴമീന്‍ പിടുത്തവുമാണ് നടക്കുന്നത്. വിപണിയില്‍ കൂടുതലും സംസ്ഥാനത്തിന് പുറത്തുനിന്നു വരുന്ന മീനുകളാണ്. അതിനാൽ എല്ലാ മീനുകള്‍ക്കും തീപിടിച്ച വിലയാണ്. കൂടാതെ പുഴമീന്‍റെയും വില വര്‍ധിച്ചു. ചാള കിലോക്ക് 350 രൂപയ്ക്ക് മുകളിലാണ്. അയലയ്ക്ക് 240 രൂപയാണ്. ചെറിയ ചെമ്മീന് 380 രൂപയും വലിയ ചെമ്മീന് 420 രൂപയുമാണ് വില. കൂരി 160, തിലോപ്പി 280, കരിമീന്‍ 400, വലിയ കരിമീന്‍ 580, കണമ്പ് 480 എന്നിങ്ങനെയാണ് പുഴമീനുകളുടെ വില. ചിക്കനും ബീഫിനും വില കൂടി മത്സ്യത്തിനൊപ്പം മാംസത്തിനും വില വര്‍ധിച്ചു. കഴിഞ്ഞ ഒരാഴ്ചയ്ക്കിടെ കോഴി ഇറച്ചിയുടെ വില 150 രൂപയ്ക്കു മുകളിലാണ്. ബീഫിന് കിലോയ്ക്ക് 400 രൂപ മുതല്‍ 460 രൂപ വരെ. ആട്ടിറച്ചി കിലോയ്ക്ക് 950 രൂപയാണ് വില. കഴിഞ്ഞയാഴ്ച 900 രൂപയായിരുന്നു. ബീഫ് കൂടുതലും കയറ്റുമതി ചെയ്യുന്നതിനാല്‍ ഇവിടെ ആവശ്യത്തിന് എത്തുന്നില്ലെന്നും അതിനാലാണ് വില വര്‍ധിക്കുന്നതെന്നും വ്യാപാരികള്‍ പറയുന്നു. പച്ചക്കറികള്‍ക്കും തീവില മിക്ക പച്ചക്കറികൾക്കും വിപണിയില്‍ തീവിലയാണ്. ബീന്‍സ്, വെളുത്തുള്ളി, തക്കാളി, ചേന എന്നിവയുടെയെല്ലാം വില കൂടി. ബീന്‍സിന് കഴിഞ്ഞയാഴ്ച 60 രൂപയായിരുന്നത് ഇപ്പോൾ 120 രൂപയായി. ചെറിയ ഉള്ളിക്ക് 30 രൂപയായിരുന്നത് 50 രൂപയായി. സവാളയ്ക്ക് 35 രൂപ മുതല്‍ 40 രൂപ വരെയാണ്. വെണ്ട-35, മത്തന്‍-35, പയര്‍-55 മുതൽ 70 വരെ കാബേജ്-35 തുടങ്ങിയവയാണ് വിവിധയിടങ്ങളില്‍ പച്ചക്കറികളുടെ വില. ചേനയ്ക്ക് കിലോ 75 രൂപയും തേങ്ങയ്ക്ക് കിലോയ്ക്ക് 80 രൂപയുമാണ്. മഴ കൂടുതല്‍ ശക്തമാകുന്നതോടെ അടുത്ത മാസം മുതല്‍ പച്ചക്കറി വില ഇനിയും വര്‍ധിക്കാനാണ് സാധ്യതയെന്ന് വ്യാപാരികള്‍ പറയുന്നു. വെളിച്ചെണ്ണ വിലയും കുതിച്ചുയരുകയാണ്. കിലോയ്ക്ക് 380 രൂപ മുതലാണ് വില.

വാഹന പരിശോധനയ്ക്കിടെ എസ്ഐയെ കാറിടിപ്പിച്ച് വധിക്കാൻ ശ്രമം

വാഴക്കുളം: വാഹന പരിശോധനയ്ക്കിടെ എസ്‌ഐയെ കാറിടിച്ച് കൊല്ലാന്‍ ശ്രമം. ഇന്നലെ വൈകുന്നേരം 4.15ന് കല്ലൂര്‍ക്കാട് വഴിയാഞ്ചിറയാണ് സംഭവം. കല്ലൂര്‍ക്കാട് പോലീസ് സ്റ്റേഷനിലെ ഗ്രേഡ് എസ്‌ഐ ഇ.എം. മുഹമ്മദിനാണ് പരിക്കേറ്റത്. കാലിലൂടെ കയറ്റിയിറക്കിയ ശേഷം നാഗപ്പുഴ ഭാഗത്തേക്ക് നിര്‍ത്താതെ പോയ കെഎല്‍ 63ഡി 7933 എന്ന കറുത്ത സാന്‍ട്രോ കാര്‍ കണ്ടെത്താനായിട്ടില്ല. വാഹന പരിശോധനയ്ക്കിടെ വഴിയാഞ്ചിറയില്‍ കാര്‍ നിര്‍ത്തിയിട്ടിരിക്കുന്നത് കണ്ട് സംശയം തോന്നിയാണ് എസ്ഐയും ഒപ്പമുണ്ടായിരുന്ന സിപിഒ കെ.സി. ജിബിയും ഡ്രൈവറെ ചോദ്യം ചെയ്തത്. തുടര്‍ന്ന് ഡ്രൈവറും എസ്‌ഐയും തമ്മില്‍ വാക്കേറ്റമുണ്ടായി. ഇതിനിടെ കാറിന്‍റെ മുന്‍സീറ്റിലിരുന്ന സഹയാത്രികന്‍ ഇറങ്ങി. ഇയാളുമായും വാക്കേറ്റമുണ്ടായി. ഇതിനിടെ കാര്‍ മുന്നോട്ട് എടുത്ത ശേഷം വേഗതയില്‍ പിന്നോട്ട് വന്ന് എസ്‌ഐയെ ഇടിച്ചു വീഴ്ത്തുകയായിരുന്നു. അതേ വേഗത്തില്‍ തന്നെ എസ്‌ഐയുടെ കാലിലൂടെ കാര്‍ കയറ്റി ഇറക്കിയ ശേഷം നാഗപ്പുഴ ഭാഗത്തേക്ക് നിര്‍ത്താതെ പോയി. ഒപ്പമുണ്ടായിരുന്ന സഹയാത്രികൻ ഓടി രക്ഷപ്പെട്ടു. പരിക്കേറ്റ എസ്‌ഐ തൊടുപുഴ സെന്‍റ് മേരീസ് ഹോസ്പിറ്റലില്‍ ചികിത്സ തേടി. വലതു കാലില്‍ രണ്ട് ഒടിവുണ്ട്. വധശ്രമം, ഔദ്യോഗിക കൃത്യനിര്‍വഹണം തടസപ്പെടുത്തല്‍ എന്നീ വകുപ്പുകള്‍ ചുമത്തിയാണ് കേസെടുത്തിരിക്കുന്നത്. സമീപ പ്രദേശങ്ങളിലെ സിസി ടിവി ദൃശ്യങ്ങള്‍ പരിശോധിച്ചതില്‍ നിന്ന് ആളെ തിരിച്ചറിഞ്ഞിട്ടുണ്ട്. ഇയാളെ കണ്ടെത്താനുള്ള ശ്രമത്തിലാണ് പോലീസ്.

സ്കോർപിയോ ഇടിച്ച് ഇരുചക്ര വാഹന യാത്രികൻ മരിച്ചു

കാലടി: ശ്രീമൂലനഗരം വെള്ളാരപ്പള്ളിയിൽ സ്കോർപിയോയും സ്കൂട്ടറും കൂട്ടിയിടിച്ച് ഒരാൾ മരിച്ചു. സ്കൂട്ടർ യാത്രക്കാരനായ തിരുനാരായണപുരം പുല്ലൂറ്റുകാരൻ രമേശനാ(48)ണ് മരിച്ചത്. ഇന്നലെ വൈകിട്ടായിരുന്നു അപകടം. ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. വാർക്കപണിക്കാരനായ രമേശൻ ജോലികഴിഞ്ഞ് വീട്ടിലേക്ക് മടങ്ങുകയായിരുന്നു. മൃതദേഹം ആലുവയിലെ സ്വകാര്യ ആശുപത്രിയിൽ. ഭാര്യ: ഇന്ദു. മക്കൾ: ശ്രീലക്ഷ്മി, ഗോപിക.

പരിസ്ഥിതി ദിനാഘോഷം നടത്തി

മൂവാറ്റുപുഴ: തൃക്കളത്തൂർ ശലഭം ബാലവേദിയുടെ ആഭിമുഖ്യത്തിൽ പരിസ്ഥിതി ദിനാഘോഷം നടത്തി. ഔഷധത്തോട്ടം, പരിസ്ഥിതിദിന ബോധവൽക്കരണ ക്ലാസ്, പരിസ്ഥിതിദിന സന്ദേശം, ഫീൽഡ് ട്രിപ്പ് തുടങ്ങി വിവിധ പരിപാടികളാണ് ബാലവേദി സംഘടിപ്പിച്ചത്. എഐവൈഎഫ് സംസ്ഥാന പ്രസിഡന്‍റ് എൻ. അരുണ്‍ ഔഷധച്ചെടി നട്ട് ചടങ്ങ് ഉദ്ഘാടനം ചെയ്തു. ഇഞ്ചക്കാട് ഗവ. എൽപി സ്കൂൾ അധ്യാപിക ശ്രീലത പരിസ്ഥിതി ദിന ബോധവത്കരണ ക്ലാസ് നയിച്ചു. വൈഗ അനിലിന്‍റെ നേതൃത്വത്തിൽ എല്ലാവരും പരിസ്ഥിതിദിന പ്രതിജ്ഞയെടുത്തു. ഫീൽഡ് ട്രിപ്പിന്‍റെ ഭാഗമായി യുവകർഷകർക്കുള്ള സംസ്ഥാന സർക്കാർ അവാർഡ് ജേതാവായ മൃദുല ഹരിയുടെ നേതൃത്വത്തിൽ പേഴയ്ക്കാപ്പിള്ളി മാനാറിയിൽ പ്രവർത്തിക്കുന്ന സ്നേഹ ഓർഗാനിക് ഫാം കുട്ടികൾ സന്ദർശിച്ചു. ശലഭം ബാലവേദി സെക്രട്ടറി വൈഗ അനിൽ, പ്രസിഡന്‍റ് വിജയ് സാരംഗി, മറ്റ് അംഗങ്ങളായ അന്ന, ഐറിൻ, കാളിദാസ്, കാർത്തികേയൻ, ആര്യൻ, ആർദ്ര, നിള, തൻവിത എന്നിവരും ചടങ്ങിന്‍റെ ഭാഗമായി. എഐവൈഎഫ് അംഗങ്ങളായ ജിനേഷ് ഗംഗാധരൻ, സനു വേണുഗോപാൽ, കെ.വി ശ്രീലേഖ എന്നിവർ പ്രസംഗിച്ചു.

മൂവാറ്റുപുഴയിൽ ബിജെപി പ്രക്ഷോഭത്തിനൊരുങ്ങുന്നു

മൂവാറ്റുപുഴ : ബിജെപി മണ്ഡലം സമിതിയുടെ നേതൃത്വത്തിൽ നഗരസഭയുടെ വികസന മുരടിപ്പിനെതിരെ പ്രക്ഷോഭം ആരംഭിക്കുന്നു. നഗരവികസനവുമായി ബന്ധപ്പെട്ട് മൂവാറ്റുപുഴ നഗരസഭയുടെ റിംഗ് റോഡുകൾ മുഴുവനും തകർന്നു അറ്റകുറ്റപ്പണികൾ പോലും നടത്തുവാൻ നഗരസഭ ഭരണസമിതി ശ്രമിക്കുന്നില്ലെന്ന് ബിജെപി കുറ്റപ്പെടുത്തി. നഗരത്തിലെ മാലിന്യ ശേഖരിക്കുന്നത് നിർജീവാവസ്ഥയിലാണ്. ഫുഡ് വേസ്റ്റ് മാത്രം എടുക്കാൻ വേണ്ടി ഒരു ഏജൻസിയെ നിയോഗിക്കുകയും അവരുടെ ഫാമിലേക്കായ ഹോട്ടലുകളിൽ നിന്നും വീടുകളിൽ നിന്നും ഫുഡ് വേസ്റ്റ് എടുക്കുന്ന രീതിയാണ് നിലവിലെ രീതി. ഗ്രീൻ സിറ്റി എന്ന പേരിൽ മൂവാറ്റുപുഴയുടെ ഓരങ്ങളിൽ ചെടി വച്ചുപിടിപ്പിക്കുകയും ബാനറുകൾ കെട്ടി പ്രദർശിപ്പിക്കുന്നതും അല്ലാതെ യാതൊന്നും നടത്തുന്നില്ലെന്നും ബിജെപി ചൂണ്ടിക്കാട്ടി. സമരപരിപാടികളുടെ ഭാഗമായി മൂവാറ്റുപുഴയിലെ വ്യാപാരികളെയും പൊതുജനങ്ങളെയും നേരിൽകണ്ട് പരാതി സ്വീകരിക്കുകയും അവരെ ഉൾപ്പെടുത്തി ബഹുജന പ്രക്ഷോഭം സംഘടിപ്പിക്കുമെന്നും ബിജെപി മൂവാറ്റുപുഴ മണ്ഡലം സമിതി പ്രസിഡന്‍റ് ടി. ചന്ദ്രൻ പറഞ്ഞു.

കഞ്ചാവുമായി യുവാക്കൾ പിടിയിൽ

മൂവാറ്റുപുഴ: കഞ്ചാവുമായി യുവാക്കൾ പിടിയിൽ. ഏനാനല്ലൂർ കടുക്കച്ചിറയിൽ നടത്തിയ പരിശോധനയിലാണ് വെണ്ടറയിൽ രാജീവ് (40), മുണ്ടക്കയം കരിനിലം കൊല്ലംപറന്പിൽ പ്രവീണ്‍ പൈലി (32) എന്നിവരെയാണ് മൂവാറ്റുപുഴ എക്സൈസ് സിഐ ജി. കൃഷ്ണകുമാറും സംഘവും ചേർന്ന് പിടികൂടിയത്.1.645 കിലോഗ്രാം കഞ്ചാവ് ഇവരുടെ പക്കൽനിന്ന് കണ്ടെടുത്തു. ഒന്നാം പ്രതി രാജീവിന്‍റെ വീട്ടിൽ നിന്ന് കഞ്ചാവ് തൂക്കാൻ ഉപയോഗിക്കുന്ന ത്രാസ്, പോളിത്തിൻ കവർ, പണം എന്നിവ എക്സൈസ് കണ്ടെടുത്തു. കഞ്ചാവ് വില്പന കേസിലെ പ്രധാനികളാണ് പിടിയിലായതെന്ന് സിഐ പറഞ്ഞു. പ്രതികളെ മൂവാറ്റുപുഴ ജുഡീഷ്യൽ ഒന്നാം ക്ലാസ് ജുഡീഷ്യൽ മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു.

സെന്‍റ് ജോർജ് എച്ച്എസ്എസിൽ വിജയികളെ ആദരിച്ചു

കോതമംഗലം: സെന്‍റ് ജോർജ് ഹയർ സെക്കൻഡറി സ്കൂളിൽ പ്ലസ് ടു, എസ്എസ്എൽസി, യുഎസ്എസ്, എൻഎംഎംഎസ് പരീക്ഷകളിൽ ഉന്നത വിജയം നേടിയവരെ ആദരിച്ചു. ഹയർ സെക്കൻഡറി വിഭാഗത്തിലെ 49 വിദ്യാർഥികളെയും, ഹൈസ്കൂൾ വിഭാഗത്തിൽ 52 വിദ്യാർഥികളെയും യുഎസ്എസ് സ്കോളർഷിപ്പ് നേടിയ 12 കുട്ടികളെയും, എൻഎംഎംഎസ് സ്കോളർഷിപ്പിന് അർഹരായ നാലു കുട്ടികളെയുമാണ് ആദരിച്ചത്. രൂപത വിദ്യാഭ്യാസ സെക്രട്ടറി ഫാ. മാത്യു മുണ്ടക്കൽ ഉദ്ഘാടനം നിർവഹിച്ചു. സ്കൂൾ മാനേജർ റവ. ഡോ. മാത്യു കൊച്ചുപുരയ്ക്കൽ അധ്യക്ഷത വഹിച്ചു. സ്കൂൾ പ്രിൻസിപ്പൽ ജെയിൽ ജോസ്, പ്രധാനാധ്യാപിക സ്റ്റെല്ല മാത്യു, മുൻ പ്രിൻസിപ്പൽ ബിജു ജോസഫ്, പിടിഎ പ്രസിഡന്‍റ് സജി എ. പോൾ, എംപിടിഎ പ്രസിഡന്‍റ് ആഷ വർഗീസ്, അധ്യാപകരായ ഷിന്‍റോ ജോസ്, അനി ജോസ്, റെജിമോൾ ജോണ്‍ എന്നിവർ പ്രസംഗിച്ചു.

പരിസ്ഥിതി വാരാഘോഷം സമാപിച്ചു

കോതമംഗലം: കാരക്കുന്നം ഫാത്തിമ മാതാ എൽപി സ്കൂളിൽ പ്ലാറ്റിനം ജൂബിലി വർഷത്തിന്‍റെ ഭാഗമായി 75 തരം വൃക്ഷത്തൈകൾ വിദ്യാർഥികൾക്ക് കൈമാറി. വിവിധ പ്രവർത്തനങ്ങളോടെ ഒരാഴ്ച നീണ്ടുനിന്ന സ്കൂൾ പരിസ്ഥിതി വാരാഘോഷവും സംഘടിപ്പിച്ചു. ഇതിന്‍റെ ഭാഗമായി എന്‍റെ വീട്ടിലെ കുട്ടി മരം, ബാഡ്ജ് നിർമാണം, പോസ്റ്റർ നിർമാണം, പ്ലക്കാർഡ് നിർമാണം, മുദ്രാവാക്യം എഴുത്ത്, പ്രകൃതി നടത്തം എന്നിവ നടത്തി. വാരാഘോഷ സമാപനം സ്കൂൾ അങ്കണത്തിൽ ഫലവൃക്ഷ തൈ നട്ടുകൊണ്ട് സ്കൂൾ മാനേജർ ഫാ. ജോർജ് വള്ളോംകുന്നേൽ നിർവഹിച്ചു. പ്രധാനാധ്യാപകൻ വിൻസെന്‍റ് ജോസഫ്, സീനിയർ അസിസ്റ്റന്‍റ് പി. വിനിത, ഇക്കോ ക്ലബ് ഇൻചാർജ് വി.കെ. ലൈല, അധ്യാപികമാരായ എൽന എൽദോസ്, നിൻസി പി. ജോളി എന്നിവർ പരിപാടികൾക്ക് നേതൃത്വം നൽകി.

നിർമല പബ്ലിക് സ്കൂളിൽ രക്തദാന ക്യാന്പ് നടത്തി

മൂവാറ്റുപുഴ: ലോക രക്തദാന ദിനാചരണത്തിന്‍റെ ഭാഗമായി തൊടുപുഴ ഐഎംഎ ബ്ലഡ് സെന്‍ററുമായി സഹകരിച്ച് മൂവാറ്റുപുഴ നിർമല പബ്ലിക് സ്കൂൾ സംഘടിപ്പിച്ച രക്തദാന ക്യാന്പ് നിർമല കോളജ് പ്രിൻസിപ്പൽ റവ. ഡോ. ഫ്രാൻസിസ് കണ്ണാടൻ ഉദ്ഘാടനം ചെയ്തു. സ്കൂൾ പ്രിൻസിപ്പൽ ഫാ. പോൾ ചൂരത്തൊട്ടി ഉൾപ്പെടെ 36 പേർ രക്തം ദാനം ചെയ്തു. നഗരസഭാംഗം ജിനു മടേയ്ക്കൽ 50-ാമത് തവണ രക്തം ദാനം ചെയ്ത് ക്യാന്പിന്‍റെ ഭാഗമായി. ഡോ. ദേവിക അന്തർജനം രക്തദാന ബോധവത്‌കരണ ക്ലാസ് നയിച്ചു. സ്കൂൾ വൈസ് പ്രിൻസിപ്പൽ ഫാ. ജെൻസണ്‍ ഞാലിപ്പറന്പിൽ, പഞ്ചായത്തംഗം രാജേഷ് പൊന്നുംപുരയിടം, പിടിഎ പ്രസിഡന്‍റ് സി.വി. ജോണി എന്നിവർ പ്രസംഗിച്ചു. രക്തദാന ദിനാചരണത്തിന്‍റെ ഭാഗമായി വിദ്യാർഥികൾ തയാറാക്കിയ പോസ്റ്ററുകളുടെ പ്രദർശനവും നടന്നു.

അപകടക്കെണിയൊരുക്കി കൂത്താട്ടുകുളം-നടപ്പുറം ബൈപ്പാസ്

കൂത്താട്ടുകുളം: അപകടക്കെണിയൊരുക്കി കൂത്താട്ടുകുളം നടപ്പുറം ബൈപ്പാസ്. എംസി റോഡിൽ നിന്നും ബൈപ്പാസ് റോഡിലേക്ക് കയറുന്ന ഭാഗം മുതൽ യാത്രക്കാരെ കാത്തിരിക്കുന്നത് വലിയ അപകടക്കെണികളാണ്. മഴക്കാലം ആരംഭിക്കുന്പോൾ തന്നെ ബൈപാസ് റോഡിന്‍റെ തുടക്കഭാഗത്ത് റോഡിൽ വലിയകുഴി രൂപപ്പെടുന്നത് പതിവായിരിക്കുകയാണ്. പ്രധാന റോഡിൽ നിന്നും കെസ്ആർടിസി, സ്വകാര്യ ബസുകൾ സ്റ്റാൻഡിലേക്ക് പോകുന്നത് ഇതുവഴിയാണ്. ഇതിനുപുറമേ ഈ ഭാഗത്തെ സ്വകാര്യ സ്ഥാപങ്ങളിലേക്ക് ഇരുചക്ര വാഹങ്ങൾ അടക്കം നിരവധി വാഹനങ്ങൾ ഇതുവഴി കടന്നുപോകുന്നുണ്ട്. കുഴിയിൽ ചാടിയ വാഹനങ്ങൾ നിയന്ത്രണംവിട്ടു വീഴുന്നതും ഇവിടുത്തെ സ്ഥിരം കാഴ്ചയാണ്. സമീപത്ത് തന്നെയാണ് ടൗണ്‍ തോട് സ്ഥിതി ചെയ്യുന്നത്. ഇത് വലിയ അപകടങ്ങളിലേക്കും വഴിവയ്ക്കും. ഇതിന് ഒരു ശാശ്വത പരിഹാരം കാണാൻ ഇതുവരെ അധികൃതർക്ക് കഴിഞ്ഞിട്ടില്ല. ഈ റോഡിലെ നടപ്പാതയുടെ അവസ്ഥയും വിഭിന്നമല്ല. നടപ്പാതയിലെ ടൈൽ ഇളകിമാറി വലിയ ഗർത്തങ്ങൾ രൂപപ്പെട്ട നിലയിലാണ്. കാൽനടക്കാരന്‍റെ ശ്രദ്ധ തെറ്റിയാൽ ജീവൻ പോലും നഷ്ട്ടമാകുന്ന സ്ഥിതിയിലാണുള്ളത്. നടപ്പാതയുടെ പലഭാഗങ്ങളും വാഹനം ഇടിച്ച് തകർന്ന നിലയിലാണ്. റോഡിലെ അനധികൃത പാർക്കിംഗും വീതി കുറവുമൂലവും ഇതുവഴി കടന്നു പോകുന്ന വാഹനങ്ങൾ പലപ്പോഴും നടപ്പാതയുടെ വശങ്ങളിൽ ഇടിക്കറുണ്ട്. അധികൃതർ അടിയന്തരമായി നടപടി സ്വീകരിക്കണമെന്നാണ് ജനങ്ങളുടെ ആവശ്യം.

വിസാറ്റ് കോളജ് മുൻകൂർ ഓഫർ ലെറ്റർ നൽകി

ഇലഞ്ഞി: വിദ്യാർഥികളുടെ ഭാവി സുരക്ഷിതമാക്കുന്നതിന്‍റെ ഭാഗമായി വിദ്യാർഥികൾക്ക് മുൻകൂർ ഓഫർ ലെറ്റർ നൽകി വിസാറ്റ് കോളജ്. വിസാറ്റ് ഗ്രൂപ്പ് ഓഫ് ഇൻസ്റ്റിറ്റ്യൂഷൻസിൽ പഠിക്കുന്ന 142 വിദ്യാർഥികൾക്കാണ് കോളജ് ഓഫർ ലെറ്റർ നൽകിയത്. വിസാറ്റ് ഗ്രൂപ്പിന്‍റെ കീഴിലുള്ള എൻജിനീയറിംഗ്, ആർട്സ് ആൻഡ് സയൻസ് കോളജുകളിലെ വിദ്യാർഥികളിൽ വിജയകരമായി പഠനം പൂർത്തിയാക്കുന്നവർക്കാണ് പഠനശേഷമാണ് ഈ ഓഫർ ലഭിക്കുക. ഇലഞ്ഞി വിസാറ്റ് എൻജിനീയറിംഗ് കോളജിലെ മുഴുവൻ ആദ്യവർഷ ബി. ടെക് വിദ്യാർഥികൾക്കും യൂണിസിസ് ഗ്രൂപ്പ് ഓഫ് കന്പനീസ് ജോബ് ഓഫർ ലെറ്റർ മുൻകൂറായി നൽകി. മോൻസ് ജോസഫ് എംഎൽഎ ഓഫർ ലെറ്ററുകൾ വിതരണം ചെയ്തു. എൻജിനീയറിംഗ് കോളജ് പ്രിൻസിപ്പൽ ഡോ. കെ.ജെ. അനൂപ് അധ്യക്ഷത വഹിച്ചു. വിസാറ്റ് ഗ്രൂപ്പ് ഓഫ് ഇൻസ്റ്റിറ്റ്യൂഷൻ ചെയർമാൻ രാജു കുര്യൻ മുഖ്യപ്രഭാഷണം നടത്തി. പ്രിൻസിപ്പൽ ഡോ. രാജു മാവുങ്കൽ, ഡയറക്ടർ ഡോ. കെ. ദിലീപ്, പ്ലെയ്സ്മെന്‍റ് ഓഫീസർ സാം ടി. മാത്യു, പബ്ലിക് റിലേഷൻ ഓഫീസർ ഷാജി ആറ്റുപുറം എന്നിവർ പ്രസംഗിച്ചു.

കൊടിമരം സാമൂഹ്യവിരുദ്ധർ മുറിച്ചുകൊണ്ടുപോയെന്ന് പരാതി

കോതമംഗലം: നെല്ലിക്കുഴി ഇരമല്ലൂർ ചിറപ്പടിയിൽ സ്ഥാപിച്ചിരുന്ന സിപിഐയുടെ കൊടിമരം സാമൂഹ്യവിരുദ്ധർ മുറിച്ചെടുത്ത് കൊണ്ടുപോയതായി പരാതി. ഇത് സംബന്ധിച്ച് സിപിഐ ബ്രാഞ്ച് സെക്രട്ടറി കെ.ബി. അൻസാർ കോതമംഗലം പോലീസിൽ നൽകി. പോലീസ് സ്ഥലത്തെത്തി അന്വേഷണം ആരംഭിച്ചു.

മലഞ്ചരക്ക് കവർന്ന പ്രതി പിടിയിൽ

മൂവാറ്റുപുഴ: ഉണക്കി സൂക്ഷിച്ചിരുന്ന മലഞ്ചരക്കും വീട്ടുപകരണങ്ങളും കവർന്ന കേസിലെ പ്രതി പിടിയിൽ. പെരിങ്ങഴ മടശേരി സിജോ (37)യെയാണ് മൂവാറ്റുപുഴ സിഐ ബേസിൽ തോമസിന്‍റെ നേതൃത്വത്തിൽ പിടികൂടിയത്. പെരിങ്ങഴ ഭാഗത്തെ വീട്ടിൽനിന്നുമാണ് ഇയാൾ മോഷണം നടത്തിയത്. പ്രതി വില്പന നടത്തിയ സ്ഥലത്തുനിന്ന് പോലീസ് മോഷണ മുതൽ കണ്ടെടുത്തു. ഇയാളുടെ പേരിൽ മുവാറ്റുപുഴ സ്റ്റേഷനിൽ അടിപിടി കേസുകൾ നിലവിലുണ്ട്. അന്വേഷണ സംഘത്തിൽ എസ്ഐമാരായ വിഷ്ണു രാജു, എം.വി. ദിലീപ് കുമാർ, എം.ആർ. രജിത്, സിവിൽ പോലീസ് ഓഫീസർമാരായ കെ.എ. ഷിഹാബ്, കെ.ടി. നിജാസ് എന്നിവരാണുണ്ടായിരുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]