തൃശൂര്: പൗരസ്ത്യ കല്ദായ സുറിയാനിസഭയുടെ വിശുദ്ധ മാര് അബിമലേക്ക് തിമോഥെയൂസ് തിരുമേനിയുടെ ഓര്മത്തിരുനാളും സഭയിലെ ദിവംഗതരായ സഭാപിതാക്കന്മാരുടെ ഓര്മദിനവും സമൂഹസദ്യയും 30, മേയ് ഒന്ന് തീയതികളില് വിപുലമായി ആചരിക്കുമെന്നു വികാരി ജനറാള് ഫാ. ജോസ് ജേക്കബ് വേങ്ങാശേരി പത്രസമ്മേളനത്തില് പറഞ്ഞു.
ഇത്തവണ ആദ്യമായി 30നു വൈകീട്ട് 6.30ന് റംശാ പ്രാര്ഥനയും തിരുനാള്പ്രദക്ഷിണവും നടത്തും. വലിയപള്ളിയില്നിന്നു തുടങ്ങി പുത്തന്പള്ളിയുടെ മുന്വശത്തുകൂടി അഞ്ചുവിളക്ക് വഴിയാണ് പ്രദക്ഷിണം. ഒന്നിനു രാവിലെ ഏഴിനു മാര്ത്ത് മറിയം വലിയ പള്ളി കത്തീഡ്രലില് മാര് ഔഗിന് കുരിയാക്കോസ് മെത്രാപ്പോലീത്തയുടെ കാര്മികത്വത്തില് വിശുദ്ധ കുര്ബാന നടത്തും. രാവിലെ 10.30ന് സമൂഹസദ്യ ആശീര്വദിക്കും. 15,000 പേര്ക്കാണ് സമൂഹസദ്യ ഒരുക്കിയിരിക്കുന്നത്.
10.45ന് മാര്ത്ത്മറിയം വലിയ പള്ളിയങ്കണത്തില് നടക്കുന്ന അനുസ്മരണസമ്മേളനം മേജര് ആര്ച്ച്ബിഷപ് മാര് ആന്ഡ്രൂസ് താഴത്ത് ഉദ്ഘാടനം ചെയ്യും. മന്ത്രി കെ. രാജന്, മേയര് എം.കെ. വര്ഗീസ്, ടി.എന്. പ്രതാപന് എംപി, പി. ബാലചന്ദ്രന് എംഎല്എ തുടങ്ങിയവര് പങ്കെടുക്കും. കേന്ദ്ര യൂത്ത്സ്, കേന്ദ്ര വിമണ് യൂത്ത്സ് അസോസിയേഷനുകളുടെ ആഭിമുഖ്യത്തില് തൃശൂര് ഐഎംഎ ബ്ലഡ് ബാങ്കുമായി സഹകരിച്ച് രക്തദാനകൂട്ടായ്മ നടത്തും.
തൃശൂരില് കബറടങ്ങിയ വിശുദ്ധ മാര് അബിമലേക് തിമോഥെയൂസ് മെത്രാപ്പോലീത്ത, മാര് ഔദീശോ മെത്രാപ്പോലീത്ത, മാര് തോമ ധര്മോ മെത്രാപ്പോലീത്ത, മാര് തിമോഥെയൂസ് രണ്ടാമന് മെത്രാപ്പോലീത്ത, ഡോ. പൗലോസ് മാര് പൗലോസ് എപ്പിസ്കോപ്പ എന്നീ സഭാപിതാക്കന്മാരുടെ ഓര്മദിനമാണ് ആചരിക്കുന്നത്.
പത്രസമ്മേളനത്തില് ഫാ. കെ.ആര്. ഈനാശു, ജേക്കബ് ബേബി ഒലക്കേങ്കില്, രാജന് ജോസ് മണ്ണുത്തി, അബി ജെ. പൊന്മണിശേരി, ജില്സന് ജോസ് എന്നിവരും പങ്കെടുത്തു.