ലെഫ്റ്റനന്റ് നിതിക കൗൾ ധൗണ്ടിയാൽ
ആ ഫോട്ടോ കണ്ടവരാരും അന്ന് ഉറങ്ങിയിട്ടുണ്ടാവില്ല.ചിത ഒരുങ്ങിക്കഴിഞ്ഞു. ത്രിവർണ്ണ പതാക പുതച്ച്, തന്റെ പ്രിയപ്പെട്ടവൻ നിശ്ചലനായി കിടക്കുന്നു. ചുറ്റും സൈനികർ, കുടുംബം, കണ്ണീരോടെ നിൽക്കുന്ന ഒരു നാട് മുഴുവൻ. അതിനിടയിൽ നിന്ന് ഒരു പെൺകുട്ടി ഓടിച്ചെന്ന് ആ മൃതദേഹത്തോട് ചേർന്ന് നിന്നു. കെട്ടിപ്പിടിച്ച്, ഉറക്കെ, ലോകം മുഴുവൻ കേൾക്കെ അവൾ വിളിച്ചു പറഞ്ഞു.
"I Love You Vibhu... Jai Hind"അതൊരു കരച്ചിലായിരുന്നില്ല. ഒരു ഭാര്യ തന്റെ ഭർത്താവിന് നൽകിയ അവസാനത്തെ സല്യൂട്ടായിരുന്നു . പ്രണയത്തിനും രാജ്യസ്നേഹത്തിനും ഇടയിൽ ഒരേ സമയം നിൽക്കുന്ന ഒരു പെൺകുട്ടിയുടെ ഹൃദയം പൊട്ടിയുള്ള നിലവിളി.
വിവാഹം കഴിഞ്ഞിട്ട് വെറും ഒന്പത് മാസം. പുതിയ ജീവിതം തുടങ്ങിയിട്ടേ ഉണ്ടായിരുന്നുള്ളൂ. 2019 ഫെബ്രുവരി 18ന് പുൽവാമയിൽ ഭീകരരുമായുള്ള ഏറ്റുമുട്ടലിൽ മേജർ വിഭൂതി ശങ്കർ ധൗണ്ടിയാൽ വീരമൃത്യു വരിച്ചപ്പോൾ, നിതികയുടെ ലോകം അവസാനിച്ചു എന്നാണ് എല്ലാവരും കരുതിയത്.പക്ഷെ നിതികയുടെ കഥ അവിടെ തീർന്നില്ല.
അവിടെ നിന്നാണ് അത് തുടങ്ങിയത്.കണ്ണീരിൽ നിന്ന് യൂണിഫോമിലേക്ക് ഭർത്താവിന്റെ മരണത്തിന് ആറു മാസത്തിന് ശേഷം നിതിക ഒരു തീരുമാനമെടുത്തു. തന്റെ കോർപ്പറേറ്റ് ജോലി അവൾ രാജിവെച്ചു. ഭർത്താവ് നടന്ന അതേ വഴിയിലൂടെ നടക്കാൻ, അദ്ദേഹം ധരിച്ച അതേ യൂണിഫോം ധരിക്കാൻ അവൾ തീരുമാനിച്ചു.ആരും വിശ്വസിച്ചില്ല. ഒരു 27 കാരി, ഒരു വീരനാരി, വീണ്ടും ജീവിതത്തിലേക്ക് വരുമോ?
പക്ഷെ നിതിക പിന്മാറിയില്ല. എഴുത്തുപരീക്ഷ, SSB യിലെ അഞ്ച്ദിവസത്തെ കഠിനമായ ഇന്റർവ്യൂ, ചെന്നൈയിലെ ഓഫീസേഴ്സ് ട്രെയിനിങ് അക്കാദമിയിലെ 11 മാസത്തെ കഠിന പരിശീലനം. അവിടെ ഓരോ രാത്രിയും അവൾക്ക് കൂട്ട് ഭർത്താവിന്റെ ഓർമ്മകൾ മാത്രമായിരുന്നു. നോർത്തേൺ കമാൻഡ് മേധാവി ലെഫ്റ്റനന്റ് ജനറൽ വൈ.കെ ജോഷി, തോളിൽ നക്ഷത്രം പതിപ്പിക്കുമ്പോൾ, നിതികയുടെ കണ്ണുകൾ നിറഞ്ഞിരുന്നു. അവിടെ ജനിച്ചത് ഒരു പുതിയ ലെഫ്റ്റനന്റ് ആയിരുന്നു - ലെഫ്റ്റനന്റ് നിതിക കൗൾ ധൗണ്ടിയാൽ.
ഭർത്താവിന്റെ മരണശേഷം അദ്ദേഹത്തിന് ലഭിച്ച ശൗര്യ ചക്രത്തിന് പകരം, തന്റെ തോളിലെ ഈ നക്ഷത്രമാണ് താൻ അദ്ദേഹത്തിന് നൽകുന്ന ഏറ്റവും വലിയ ആദരവ് എന്ന് അവൾ പറഞ്ഞു."ഞാൻ അദ്ദേഹം സഞ്ചരിച്ച അതേ യാത്രയിലൂടെയാണ് സഞ്ചരിക്കുന്നത്. അദ്ദേഹം എപ്പോഴും എന്റെ കൂടെയുണ്ട്" - യൂണിഫോം അണിഞ്ഞ ശേഷം നിതിക പറഞ്ഞ ആ വാക്കുകൾ ഓരോ ഇന്ത്യക്കാരന്റയും നെഞ്ചിൽ തട്ടുന്നു.ഇത് വെറുമൊരു പ്രണയകഥയല്ല. ഒരു ഭാര്യ ഭർത്താവിന് നൽകിയ വാക്കാണ്. "നീ വിട്ടുപോയ യൂണിഫോം ഞാൻ തുടരും, നീ കാത്ത രാജ്യത്തെ ഞാൻ കാക്കും" എന്ന വാക്ക്.
ചിതയ്ക്ക് മുന്നിൽ കരഞ്ഞ പെൺകുട്ടിയല്ല ഇന്ന് നിതിക. ഭർത്താവിന്റെ രാജ്യസ്നേഹം തോളിൽ ചുമക്കുന്ന ഒരു ഓഫീസറാണ്. അവളുടെ കണ്ണീർ ദുർബലതയായിരുന്നില്ല, അത് ശക്തിയായിരുന്നു എന്ന് അവൾ തെളിയിച്ചു.