മന്ത്രിസഭാ യോഗത്തിൽ നിന്ന് (File Photo)
തിരുവനന്തപുരം: പിഎസ്സി, ഗുരുവായൂർ ദേവസ്വം ബോർഡ് അംഗങ്ങളുടെ നിയമനങ്ങളിലും ബില്ലുകളിലെ വ്യവസ്ഥകളിലും മന്ത്രിസഭയിൽ തർക്കം. യുഡിഎഫ് സർക്കാർ ആറുമാസം പിന്നിടുന്ന ദിവസമായ ഇന്നലെ രാവിലെ ചേർന്ന മന്ത്രിസഭാ യോഗത്തിലാണ് മൂന്നു പ്രധാന വിഷയങ്ങളിൽ മുഖ്യമന്ത്രിയും മന്ത്രിമാരും തമ്മിൽ തർക്കമുണ്ടായത്.
ഏകപക്ഷീയമായ തീരുമാനങ്ങൾ മുഖ്യമന്ത്രി നടപ്പാക്കുന്നുവെന്ന വിമർശനമാണ് ഉന്നയിക്കുന്നത്. പോരിനൊടുവിൽ നടന്ന സമവായ ചർച്ചയിൽ പിഎസ്സി അംഗങ്ങളുടെ പട്ടിക അംഗീകരിച്ചു. ഗുരുവായൂർ ദേവസ്വം ബോർഡ് അംഗങ്ങളുടെ തർക്കം മന്ത്രിസഭ ചേരുന്നതിനു മുന്പ് ബന്ധപ്പെട്ട മന്ത്രിമാരുടെ യോഗം ചേർന്നാണു പരിഹരിച്ചത്.
മന്ത്രിസഭയിൽ മുഖ്യമന്ത്രി, പിഎസ്സിയിൽ ഒഴിവുള്ള അഞ്ച് അംഗങ്ങളുടെ പട്ടിക അവതരിപ്പിച്ചു. ആദ്യം മുസ്ലിം ലീഗ് പ്രതിനിധി ഷാഫി ചാലിയത്തിന്റെ പേരാണ് വായിച്ചത്. ഇതോടെ പട്ടികയുമായി ബന്ധപ്പെട്ടു തങ്ങളുമായി ചർച്ച നടന്നില്ലെന്ന് വ്യക്തമാക്കി മന്ത്രി എ.പി. അനിൽകുമാർ രംഗത്തെത്തി. പിന്നാലെ പിഎസ്സി അംഗങ്ങളിൽ തങ്ങളുടെ പാർട്ടികൾക്കു പ്രാതിനിധ്യമില്ലെന്ന വാദം കേരള കോണ്ഗ്രസും ആർഎസ്പിയും ഉന്നയിച്ചു. ലീഗിന് ഒരംഗം മാത്രമാണുള്ളതെന്നും ഇതു പോരെന്നും ലീഗ് മന്ത്രിമാർ വാദിച്ചു.
പിഎസ്സിയുടെ ഭരണഘടനാപരമായ പ്രതിസന്ധി ഒഴിവാക്കാൻ ഒഴിവുള്ള തസ്തികകളിൽ അംഗങ്ങളെ നിശ്ചയിക്കേണ്ടതുണ്ടെന്നു മുഖ്യമന്ത്രി പറഞ്ഞു. അഞ്ച് അംഗങ്ങളുടെ ഒഴിവാണ് നിലവിലുള്ളത്. പിന്നീട് ഒഴിവു വരുന്ന 16 അംഗങ്ങളിൽ കോണ്ഗ്രസ് പാർട്ടിക്കും ഘടകകക്ഷികൾക്കും അർഹമായ പ്രാതിനിധ്യം ചർച്ച ചെയ്തു തീരുമാനിക്കാമെന്നും മുഖ്യമന്ത്രി പറഞ്ഞു. ഇതോടെ സമവായ ചർച്ചകളിലേക്കു കടക്കുകയായിരുന്നു.
നിശ്ചയിച്ച പേരുകൾ വെട്ടി
മന്ത്രിസഭയിലെ ഹിന്ദു മന്ത്രിമാർ തെരഞ്ഞെടുക്കേണ്ട ഗുരുവായൂർ ദേവസ്വം ബോർഡ് അംഗങ്ങളുടെ പേരുകളെച്ചൊല്ലിയും തർക്കം. മന്ത്രിസഭ ചേരുന്നതിനു മുന്പായിരുന്നു വോട്ടവകാശമുള്ള ഹിന്ദു മന്ത്രിമാരുടെ യോഗം ചേർന്നത്. പല മന്ത്രിമാരും നിശ്ചയിച്ച പേരുകൾ വെട്ടിപ്പോയതിലെ പരിഭവം രേഖപ്പെടുത്തി. മുഖ്യമന്ത്രിയുമായി ആലോചിച്ചാണ് പേരുകൾ നിശ്ചയിച്ചതെന്നു ദേവസ്വം മന്ത്രി കെ. മുരളീധരൻ പറഞ്ഞു. മുതിർന്ന മന്ത്രിമാർ അടക്കം ശിപാർശ ചെയ്ത പേരുകൾ ഉൾപ്പെടുത്താത്തതിലെ പരിഭവം ഇവർ പങ്കുവച്ചു.
ബില്ലുകളിലും തർക്കം
നിയമസഭയിൽ അവതരിപ്പിക്കേണ്ട ബില്ലുകളിലെ വ്യവസ്ഥകളെച്ചൊല്ലിയും മന്ത്രിസഭയിൽ മന്ത്രിമാർ തമ്മിൽ തർക്കമുണ്ടായി. സ്വകാര്യ സർവകലാശാല സ്ഥാപിക്കുന്നതിനുള്ള ബില്ലിൽ സ്റ്റാംപ് ഡ്യൂട്ടിയിലും രജിസ്ട്രേഷനിലും നികുതിയിലും ഇളവ് അനുവദിക്കുന്നതിനെയും ഭൂമി തരം മാറ്റി നൽകാനുള്ള വ്യവസ്ഥയെയും റവന്യു മന്ത്രി എ.പി. അനിൽകുമാർ എതിർത്തു. തുടർന്ന് ബില്ലിൽനിന്ന് ഇത്തരം വ്യവസ്ഥകൾ ഒഴിവാക്കി. ശ്രീനാരായണ ഓപ്പണ് സർവകലാശാല നിയമനങ്ങൾ പിഎസ്സിക്കു വിടാനുള്ള ബില്ലിനെയും ചില മന്ത്രിമാർ എതിർത്തു. ഇതോടെ ഇത് ഉപേക്ഷിക്കുകയായിരുന്നു.
Tags : Dispute, Consensus Deepika DeepikaNewspaper BreakingNews Dispute Consensus