ജ്വല്ലറിയിൽ കവർച്ച
പാറ്റ്ന: ബിഹാറിലെ ബെട്ടിയായിൽ സെങ്കോ ഗോൾഡ് ആൻഡ് ഡയമണ്ട്സ് ജ്വല്ലറിയിൽ വൻ കവർച്ച. മൂന്ന് ബൈക്കുകളിലായി എത്തിയ എട്ടംഗ സംഘം കോടിക്കണക്കിന് രൂപയുടെ സ്വർണം, വെള്ളി ആഭരണങ്ങളും പണവും കവർന്ന് കടന്നുകളഞ്ഞു. 30 മുതൽ 40 കോടി രൂപ വരെയാണ് കവർച്ച ചെയ്യപ്പെട്ട ആഭരണങ്ങളുടെ മൂല്യമായി കണക്കാക്കുന്നത്. കൃത്യമായ കണക്കുകൾ തിട്ടപ്പെടുത്തി വരികയാണ്.
ജ്വല്ലറിയിലേക്ക് അതിക്രമിച്ചു കയറിയ അക്രമികൾ തോക്കുകളും മാരകായുധങ്ങളും കാണിച്ച് ജീവനക്കാരെയും ഉപഭോക്താക്കളെയും ബന്ദികളാക്കുകയായിരുന്നു. എല്ലാവരുടെയും മൊബൈൽ ഫോണുകൾ പിടിച്ചെടുക്കുകയും കൈകൾ കൂട്ടിക്കെട്ടി മാറ്റിനിർത്തുകയും ചെയ്ത ശേഷമാണ് സംഘം കൊള്ള നടത്തിയത്. ഷോറൂമിലുണ്ടായിരുന്ന സ്വർണവും വെള്ളിയും പണവും ഏതാണ്ട് പൂർണമായും കവർന്നെടുത്തതായി ജീവനക്കാർ വ്യക്തമാക്കി.
കവർച്ചയ്ക്കിടെ ഒരു ജീവനക്കാരന് തോക്കിന്റെ പിടി കൊണ്ട് തലയ്ക്കടിയേറ്റ് പരുക്കേറ്റു. "ഞങ്ങൾ തിരിച്ചുവരും, ഇതൊരു സിനിമയാണ്" എന്ന് വെല്ലുവിളിച്ചാണ് അക്രമികൾ സ്ഥലം വിട്ടതെന്ന് സംഭവസമയത്ത് ഷോറൂമിലുണ്ടായിരുന്ന യുവതി പറഞ്ഞു.
വിവരമറിഞ്ഞ് ഉടൻ സ്ഥലത്തെത്തിയ പൊലിസ് അന്വേഷണം ഊർജിതമാക്കി. പ്രതികളെയും അവർ സഞ്ചരിച്ച വാഹനങ്ങളെയും കുറിച്ച് സൂചനകൾ ലഭിക്കുന്നതിനായി ഷോറൂമിലെയും പരിസരത്തെയും സിസിടിവി ദൃശ്യങ്ങൾ പൊലിസ് പരിശോധിച്ചുവരികയാണ്.
Tags : Robbery Jewellery Threat