‘മഞ്ഞുമ്മല്‍ ബോയ്‌സ്’സാമ്പത്തിക തട്ടിപ്പുകേസ്: മുന്‍കൂര്‍ ജാമ്യഹര്‍ജി മാറ്റി
Tuesday, June 24, 2025 1:03 AM IST
കൊച്ചി: സാമ്പത്തിക തട്ടിപ്പുകേസില്‍ പ്രതികളായ ‘മഞ്ഞുമ്മല്‍ ബോയ്‌സ്’ സിനിമയുടെ നിര്‍മാതാക്കളുടെ മുന്‍കൂര്‍ ജാമ്യഹര്‍ജി ഹൈക്കോടതി വ്യാഴാഴ്ച പരിഗണിക്കാന്‍ മാറ്റി.
സിനിമ നിര്‍മിച്ച പറവ ഫിലിംസിന്‍റെ പാര്‍ട്ണര്‍മാരായ നടന്‍ സൗബിന്‍ ഷാഹിര്‍, അച്ഛൻ ബാബു ഷാഹിര്‍, ഷോണ്‍ ആന്‍റണി എന്നിവരുടെ ഹര്‍ജികളാണ് ജസ്റ്റീസ് ബെച്ചു കുര്യന്‍ തോമസ് മാറ്റിയത്.
ഹര്‍ജിക്കാര്‍ ചെയ്തതു സംഘടിത കുറ്റകൃത്യമാണെന്നും ഇവരെ കസ്റ്റഡിയിലെടുത്തു ചോദ്യം ചെയ്യേണ്ടതുണ്ടെന്നും തട്ടിപ്പിനെതിരേ മരട് പോലീസില്‍ പരാതി നല്‍കിയ സിറാജ് വലിയതുറ കോടതിയില്‍ ആരോപിച്ചു. തുടര്‍ന്ന് സര്‍ക്കാരിന്‍റെ നിലപാട് തേടിയ കോടതി ഹര്‍ജികള്‍ തുടര്‍വാദത്തിന് മാറ്റുകയായിരുന്നു.
ചോദ്യം ചെയ്യലിനു ഹാജരാകാന്‍ ഇവര്‍ക്ക് പോലീസ് നോട്ടീസ് നല്‍കിയിരുന്നെങ്കിലും മുന്‍കൂര്‍ ജാമ്യഹര്‍ജി പരിഗണനയിലുള്ളതിനാല്‍ വെള്ളിയാഴ്ച വരെ സാവകാശം അനുവദിച്ച് കോടതി നേരത്തേ ഉത്തരവിട്ടിരുന്നു.
സിനിമയില്‍ നിര്‍മാണ പങ്കാളിത്തം വാഗ്ദാനം ചെയ്ത് ഏഴു കോടി രൂപ വാങ്ങിയശേഷം വഞ്ചിച്ചെന്നാണു ‘മഞ്ഞുമ്മല്‍ ബോയ്‌സ്’ നിര്‍മാതാക്കള്‍ക്കെതിരായ കേസ്.