കൊല്ലം: ബിഷപ് ജെറോം ഇൻസ്റ്റിറ്റ്യൂട്ടിൽ കംപ്യൂട്ടർ സയൻസ് ആൻഡ് എൻജിനിയറിംഗ് വിഭാഗം ഒമ്പതിന് 'ഇൻഡസ്ട്രി-അക്കാഡമിയ കോൺക്ലേവ് 2025' സംഘടിപ്പിക്കും. കോൺക്ലേവിൽ ആർട്ടിഫിഷ്യൽ ഇന്‍റലിജൻസ് സാങ്കേതിക വിദ്യയുടെ മുന്നേറ്റം, വ്യാവസായിക, വിദ്യാഭ്യാസ മേഖലയിൽ ഉണ്ടാകുന്ന വിപ്ലവകരമായ മാറ്റങ്ങൾ എന്നിവ ചർച്ച ചെയ്യും.
വ്യവസായത്തിന് ആവശ്യമായ രീതിയിൽ കുട്ടികളുടെ അറിവ്, ആശയങ്ങൾ എന്നിവ മെച്ചപ്പെടുത്താൻ ആവശ്യമായ ബോധവൽക്കരണം നൽകി, നൂതന സാങ്കേതിക വിദ്യയിൽ കുട്ടികളുടെ പ്രാഗത്ഭ്യം വർധിപ്പിക്കുക എന്നതാണ് ഇതി െ ന്‍റ ലക്ഷ്യം. ആർട്ടിഫിഷ്യൽ ഇന്‍റലിജൻസ്, ക്ലൗഡ് കംപ്യൂട്ടിംഗ്, സൈബർ സെക്യൂരിറ്റി, മെഷീൻ ലേണിംഗ്, ഡേറ്റാ സയൻസ് എന്നീ വിഷയങ്ങൾ കോൺക്ലേവിൽ ചർച്ച ചെയ്യും.
വിവിധ കമ്പനികളിലെ പ്രമുഖർ, അധ്യാപകർ, വിദ്യാർഥികൾ, വ്യവസായ രംഗത്തെ വിദഗ്ധർ എന്നിവർ പങ്കെടുക്കും. പഠന പരിപാടികളുടെ നവീകരണം, സാങ്കേതിക മുന്നേറ്റങ്ങൾ, വ്യവസായത്തെ ബാധിക്കുന്ന പുതിയ പരിണാമങ്ങൾ, കമ്പ്യൂട്ടർ രംഗത്തെ പുതിയ പ്രവണതകൾ എന്നിവയാണ് ചർച്ചാ വിഷയങ്ങൾ. അധ്യാപകർക്കും വിദ്യാർഥികൾക്കും നൂതന ഗവേഷണത്തിന് പ്രാധാന്യം കൊടുക്കുന്ന വ്യവസായ മേഖലയുമായി ബന്ധപ്പെടാനും അതുവഴി എൻജിനീയറിംഗിനും, വിദ്യയും വികസിക്കാനാവശ്യമായ വഴികൾ തുറന്നു കൊടുക്കാനും ഉപകരിക്കുന്നതാണ് കോൺക്ലേവ്.
ദേശീയതലത്തിൽ ശാസ്ത്ര സാങ്കേതികവിദ്യ, മാനവശേഷി എന്നിവയുടെ വികസനം, വികസന നയങ്ങളുടെ പ്രശ്‌നങ്ങൾ, പുതിയ വിദ്യാഭ്യാസ നയം ഇവയെക്കുറിച്ച് ചർച്ച ചെയ്യാനുള്ള വേദിയാകും കോൺക്ലേവ്. ഇതിനു പുറമെ നൂതന ശാസ്ത്ര ശാഖകകളിലെ ഗവേഷണ-തൊഴിൽ അവസരങ്ങളെക്കുറിച്ചു വിദ്യാർഥികളിൽ അവബോധം സൃഷ്‌ടിക്കാനും കോൺക്ലേവ് ലക്ഷ്യമിടുന്നു. കോഴിക്കോട് ടാറ്റാ എൽ എക്‌സിയിലെ റിസർച്ച് എൻജിനിയർ ഡോ.എൻ.കെ.രാഗേഷ് രാവിലെ 10ന് കോൺക്ലേവ് ഉദ്ഘാടനം ചെയ്യും.
കാസർഗോഡ് സെൻട്രൽ യൂണിവേഴ്‌സിറ്റിയിലെ കംപ്യൂട്ടർ സയൻസ് എൻജിനിയറിംഗ് വിഭാഗം പ്രഫ. ഡോ.ആർ.രാജേഷ്, തിരുവനന്തപുരം കോളജ് ഓഫ് എൻജിനിയറിംഗിലെ, ഇലക്‌ട്രോണിക്‌സ് വിഭാഗം അസോ.പ്രഫ. ഡോ. ക്രിസ്റ്റി ജെയിംസ് ജോസ്, ഓഗ്സെൻസ് ലാബ് റിസർച്ച് എൻജിനിയർ ഡോ. ദിവ്യ എസ്. വിദ്യാധരൻ, ബാർട്ടൺ ഹിൽ എൻജിനിയറിംഗ് കോളജിലെ ഇലക്‌ട്രോണിക്‌സ് എൻജിനിയറിംഗ് വിഭാഗം അസോ.പ്രഫ. ഡോ. ആർ.എസ്.ജീന,
കോളേജ് ഓഫ് എൻജിനിയറിംഗ് പുന്നപ്രയിലെ കംപ്യൂട്ടർ സയൻസ് ആൻഡ് എൻജിനിയറിംഗ് വിഭാഗം മേധാവി ഡോ. എൻ.സുരേഷ് കുമാർ, എന്നിവർ കോൺക്ലേവിൽ പങ്കെടുക്കും. പത്രസമ്മേളനത്തിൽ കോളജ് മാനേജർ ഫാ.ബെഞ്ചമിൻ പള്ളിയാടിയിൽ, പ്രിൻസിപ്പൽ ഡോ. എ.ആർ.അനിൽ, കംപ്യൂട്ടർ സയൻസ് വിഭാഗം മേധാവി ദീപാ രാജൻ, പിആർഒ ബിബി ഫിലിപ്പ് തുടങ്ങിയവർ പങ്കെടുത്തു.