കൊച്ചി നഗരസഭ കരുവേലിപ്പടി ഡിവിഷനിലെ ടർഫ് അടച്ചുപൂട്ടിയ നിലയിൽ
ഫോർട്ടുകൊച്ചി: കൊച്ചി നഗരസഭയുടെ ആദ്യത്തെ ടര്ഫ് അറ്റകുറ്റപ്പണികളുടെ പേരില് അടച്ച് പൂട്ടിയിട്ട് ഒരു മാസം പിന്നിടുന്നു. നഗരസഭ കരുവേലിപ്പടി ഡിവിഷനിലെ ടിപ്പ് ടോപ്പ് അസീസ് സ്മാരക ടര്ഫാണ് അധികൃതര് അറ്റകുറ്റപ്പണിയുടെ പേരില് അടച്ച് പൂട്ടിയത്. എന്നാല് ഒരു മാസം പിന്നിട്ടിട്ടും യാതൊരു അറ്റകുറ്റ പണികളും ഇവിടെ നടന്നിട്ടില്ല.
യുവാക്കള്ക്ക് കളിക്കാന് പൊതുയിടങ്ങള് കുറവായ കൊച്ചിയില് കുറഞ്ഞ ചെലവില് കളിക്കാന് സഹായകരമായിരുന്ന ടര്ഫാണ് അടച്ച് പൂട്ടിയത്. ഒരു കോടിയോട് അടുത്ത് ചിലവഴിച്ച് നിര്മിച്ച ടര്ഫിന്റെ പരിപാലന ചുമതല സി ഹെഡിനായിരുന്നു. 2024 ഓഗസ്റ്റ് 17 നാണ് സി ഹെഡ് ടര്ഫിന്റെ ചുമതല ഏറ്റെടുത്തത്. ടര്ഫ് പരിപാലനത്തിനായി രണ്ട് ജോലിക്കാരേയും നിയോഗിച്ചിരുന്നു.
പുതിയ കൗണ്സില് നിലവില് വന്നതിന് പിന്നാലെ ഈ വര്ഷം ജനുവരി 13 ന് സി ഹെഡ് പരിപാലനത്തില് നിന്ന് പിന്മാറുകയാണെന്ന് കാണിച്ച് നഗരസഭയ്ക്ക് കത്ത് നല്കുകയായിരുന്നു. പരിപാലനത്തിനും ഫീസ് ഈടാക്കുന്നതിനും നിരവധി പരിമിതികള് നേരിടുന്നതായും നഗരസഭ നേരിട്ട് നടത്തുന്നതായിരിക്കും അഭികാമ്യം എന്ന് കാണിച്ചായിരുന്നു കത്ത് നല്കിയത്.