കൽപ്പറ്റ: പടിഞ്ഞാറത്തറ പന്തിപ്പോയിലിലെ വീട്ടിൽനിന്ന് 323 ഗ്രാം ഹാഷിഷ് ഓയിലും 1.362 ഗ്രാം മെത്താംഫിറ്റമിനും പിടികൂടിയ കേസിലെ മുഖ്യപ്രതിയെ എക്സൈസ് സംഘം അറസ്റ്റ് ചെയ്തു.
പടിഞ്ഞാറത്തറ വാരാന്പറ്റ നരിപ്പാറ സ്വദേശി ഐക്കാരൻ എ.കെ. സുബൈർ (36) ആണ് അറസ്റ്റിലായത്. ഇയാൾക്ക് ഒളിത്താവളം ഒരുക്കിയ സുഹൃത്ത് പടിഞ്ഞാറത്തറ തെങ്ങുമുണ്ട സ്വദേശി കൊപ്പര ഷിയാസ് മുസ്തഫ (27) യേയും അറസ്റ്റ് ചെയ്തു. ഒക്ടോബർ 15നായിരുന്നു പടിഞ്ഞാറത്തറ പന്തിപ്പൊയിലിലെ ഒരു വീട്ടിൽനിന്ന് അതിമാരക മയക്കുമരുന്നുകൾ പിടികൂടിയത്. തുടർന്ന് നടത്തിയ അന്വേഷണത്തിലാണ് കോഴിക്കോട് ജില്ലയിലെ കൊയിലാണ്ടിയിലുള്ള ഒരു ക്വാർട്ടേഴ്സിൽ ഒളിവിൽ കഴിയുകയായിരുന്ന സുബൈറിനെ കൽപ്പറ്റ എക്സൈസ് സംഘം പിടികൂടിയത്. രണ്ട് പ്രതികളും നേരത്തെയും മയക്കുമരുന്ന് കേസുകളിൽ ഉൾപ്പെട്ടിട്ടുണ്ട്. ഇരുവരെയും മാനന്തവാടി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ഒന്നിൽ ഹാജരാക്കി റിമാൻഡ് ചെയ്തു. എക്സൈസ് സർക്കിൾ ഇൻസ്പെക്ടർ ടി. ഷറഫുദ്ദീൻ, ഇൻസ്പെക്ടർ സൻഫീർ മുഹമ്മദ്, സിവിൽ എക്സൈസ് ഓഫിസർമാരായ ഒ. ഷാഫി, പി.എൻ. ശശികുമാർ, ജോണ് ജോസ്, വനിതാ സിവിൽ എക്സൈസ് ഓഫിസർ എം. അനിത എന്നിവരാണ് സംഘത്തിലുണ്ടായിരുന്നത്.
Tags : methamphetamine Nattuvishesham Districtnews