കേരള കോണ്ഗ്രസ് പാർട്ടി സംസ്ഥാന മുൻ ജനറൽ സെക്രട്ടറി ചാക്കോ വർഗീസിന്റെ ചരമവാർഷിക ചടങ്ങിൽ ജില്ലാ പ്രസിഡന്റ് മാത്യു വർഗീസ് പ്രസംഗിക്കുന്നു.
പെരിന്തൽമണ്ണ: യുഡിഎഫ് സർക്കാർ പിഎംശ്രീ പദ്ധതി പൂർണമായും ഉപേക്ഷിക്കണമെന്ന് കേരള കോണ്ഗ്രസ് ജില്ലാ കമ്മിറ്റി യോഗം ആവശ്യപ്പെട്ടു. തുടക്കത്തിൽ കേന്ദ്ര ഗവണ്മെന്റിൽ നിന്ന് സാന്പത്തിക ലാഭങ്ങൾ ലഭിക്കുമെങ്കിലും പിന്നീട് ഗവണ്മെന്റ് പാഠ്യപദ്ധതിയിലും കരിക്കുലത്തിലും പിടിമുറുക്കുകയും കുട്ടികളുടെ ചിന്തകളിലേക്ക് ഫാസിസ്റ്റ് ആശയങ്ങൾ അടിച്ചേൽപ്പിക്കുന്ന രീതിയിലേക്ക് കാര്യങ്ങൾ മാറ്റപ്പെടും. ഇത് മതേതര കേരളത്തിന് അപകടകരമാംവിധം പ്രതിസന്ധി സൃഷ്ടിക്കുമെന്ന് യോഗം ചൂണ്ടിക്കാട്ടി.
സ്ത്രീകൾക്ക് കെഎസ്ആർടിസി ബസുകളിൽ സൗജന്യ യാത്ര നടപ്പാക്കിയ സർക്കാരിനെ യോഗം അഭിനന്ദിച്ചു. പ്രകടനപത്രികയിൽ റബർ കർഷകർക്ക് വാഗ്ദാനം നൽകിയ കിലോയ്ക്ക് 300 രൂപ എന്ന സബ്സിഡി വില വാഗ്ദാനം ഉടൻ നടപ്പാക്കണം. കർഷകർ വ്യാപകമായി ഉപയോഗിക്കുന്ന യൂറിയവളത്തിന്റെ വിലക്കയറ്റത്തിൽ പൊറുതിമുട്ടുന്ന കർഷകർക്ക് കൃഷിഭവൻ മുഖേന യൂറിയ വളത്തിന് സബ്സിഡി അനുവദിക്കണമെന്നും യോഗം സർക്കാരിനോട് ആവശ്യപ്പെട്ടു.
പാർട്ടിയുടെ മുൻ സംസ്ഥാന ജനറൽ സെക്രട്ടറി ചാക്കോ വർഗീസിന്റെ ആറാം ചരമവാർഷിക ദിനത്തിൽ പ്രാർഥനയും അനുസ്മരണവും നടത്തി. ചടങ്ങിൽ പ്ലസ്ടു പരീക്ഷയിൽ ഉന്നത വിജയം നേടിയ പാർട്ടി പ്രവർത്തകരുടെ മക്കളെ മെമെന്റോ നൽകി അനുമോദിച്ചു. യോഗത്തിൽ ജില്ലാ പ്രസിഡന്റ് മാത്യു വർഗീസ് അധ്യക്ഷത വഹിച്ചു.
സംസ്ഥാന ഹൈപവർ കമ്മിറ്റി അംഗം ആലിക്കുട്ടി എറക്കോട്ടിൽ, ജില്ലാ നേതാക്കളായ കെ.എം. ഇഗ്നീഷ്യസ്, ടി.ഡി. ജോയ്, കെ.വി. ജോർജ്, ജോസി വർഗീസ്, ഏബ്രഹാം കുര്യൻ, സക്കീർ ഒതല്ലൂർ, പി.കെ. മാത്തുക്കുട്ടി, വി.ബി. സുരേഷ്, റോയി ജോസഫ്, നിധിൻ ചാക്കോ, എ.ജെ. ആന്റണി, ജോണ്കുട്ടി മഞ്ചേരി, അനിൽ പുലിപ്ര, തങ്കച്ചൻ പാറത്തറ, തോമസ് ടി. ജോർജ്, ബാബു കോലാനിക്കൽ, സജേഷ് ഫിലിപ്പ് തുടങ്ങിയവർ പ്രസംഗിച്ചു.
Tags : Local News Nattuvishesham Malappuram