തൃശൂർ: അന്താരാഷ്ട്ര ലഹരിവിരുദ്ധദിനത്തോടനുബന്ധിച്ച് കോർപറേഷന്റെ നേതൃത്വത്തിൽ സംഘടിപ്പിച്ച ലഹരിവിരുദ്ധദിനാചരണം മന്ത്രി ഒ.ജെ. ജനീഷ് ഉദ്ഘാടനം ചെയ്തു. ലഹരി വ്യക്തിയെയും കുടുംബത്തെയും സമൂഹത്തെയും ബാധിക്കുന്ന ഗുരുതരമായ സാമൂഹികപ്രശ്നമാണെന്നും ഇതിനെതിരേ ബോധവത്കരണവും കൂട്ടായ പ്രവർത്തനങ്ങളും ശക്തമാക്കേണ്ടതു കാലഘട്ടത്തിന്റെ ആവശ്യകതയാണെന്നും അദ്ദേഹം അഭിപ്രായപ്പെട്ടു.
മേയർ ഡോ. നിജി ജസ്റ്റിൻ അധ്യക്ഷത വഹിച്ചു.
ഡെപ്യൂട്ടി മേയർ എ. പ്രസാദ്, ജില്ലാ കളക്ടർ ശിഖ സുരേന്ദ്രൻ, കമ്മീഷണർ നകുൽ ആർ. ദേശ്മുഖ്, എക്സൈസ് ഡെപ്യൂട്ടി കമ്മീഷണർ സജീവ് കുമാർ, ഡിഡിഇ രോഹിത് നന്ദകുമാർ, കോർപറേഷൻ സ്ഥിരംസമിതി അധ്യക്ഷന്മാരായ അഡ്വ. വില്ലി ജിജോ, ജേക്കബ് പുലിക്കോട്ടിൽ, ഷീന ചന്ദ്രൻ, ടി.ആർ. സന്തോഷ്, കരോളി ജോഷ്വാ, കെ. ഗോപാലകൃഷ്ണൻ, മേഫി ഡെൽസണ് തുടങ്ങിയവർ പങ്കെടുത്തു. തെക്കേഗോപുരനടയിൽ ലഹരിവിരുദ്ധപ്രതിജ്ഞയും റാലിയും ബോധവത്കരണപ്രവർത്തനങ്ങളും ഉണ്ടായിരുന്നു.
ലഹരിവിരുദ്ധ മിനി ലോകകപ്പ്:
വിദ്യാഭ്യാസവകുപ്പിനു വിജയം
തൃശൂർ: ഓപ്പറേഷൻ തൂഫാന്റെ ഭാഗമായി സിറ്റി പോലീസിന്റെ നേതൃത്വത്തിൽ "ലഹരിക്കെതിരേ ഫുട്ബോൾ ലഹരി' എന്ന സന്ദേശവുമായി സംഘടിപ്പിച്ച മിനി ലോകകപ്പിൽ വിദ്യാഭ്യാസവകുപ്പ് ജേതാക്കൾ. തൃശൂർ സിറ്റി പോലീസ് റണ്ണേഴ്സ് അപ്പ് ട്രോഫി കരസ്ഥമാക്കി. തൃശൂർ കോർപറേഷൻ സ്റ്റേഡിയത്തിൽ നടത്തിയ ടൂർണമെന്റ് രാജൻ ജെ. പല്ലൻ എംഎൽഎ ഉദ്ഘാടനം ചെയ്തു.
സിറ്റി പോലീസ് കമ്മീഷണർ നകുൽ ആർ. ദേശ്മുഖ്, കോർപറേഷൻ മേയർ ഡോ. നിജി ജസ്റ്റിൻ, തൃശൂർ റേഞ്ച് ഡിഐജി ടി. നാരായണൻ, ഡെപ്യൂട്ടി മേയർ ആർ. പ്രസാദ്, ആർട്ട് ഓഫ് ലിവിംഗ് സീനിയർ ഫാക്കൽറ്റി ബ്രഹ്മചാരി ചിത്പ്രകാശ, സ്പോർട്സ് കൗണ്സിൽ ജില്ലാ പ്രസിഡന്റ് സി. സുമേഷ്, തൃശൂർ സിറ്റി നാർക്കോട്ടിക്സ് എസിപി പി. ഷിബു, തൃശൂർ എസിപി എം. ശശിധരൻ എന്നിവർ പ്രസംഗിച്ചു.
പ്രസ് ക്ലബ്, കേരള പോലീസ്, കോർപറേഷൻ, എക്സൈസ്, ബാർ അസോസിയേഷൻ, ഫയർ ഫോഴ്സ്, വിദ്യാഭ്യാസവകുപ്പ്, ജയിൽ തുടങ്ങിയ ടീമുകളാണു മാറ്റുരച്ചത്. സിറ്റി പോലീസ് അസിസ്റ്റന്റ് കമ്മിഷണർ എം. ശശിധരൻ, നാർക്കോട്ടിക് സെൽ എസിപി പി. ഷിബു എന്നിവർ സമ്മാനങ്ങൾ വിതരണം ചെയ്തു.