പ്രതീകാത്മക ചിത്രം
പുല്പ്പള്ളി: മുള്ളന്കൊല്ലി പഞ്ചായത്തില് ഏഴ് ക്വാറികള്ക്ക് പുതിയതായി അനുമതി നല്കാനുള്ള പഞ്ചായത്തിന്റെ നീക്കം അങ്ങേയറ്റം പ്രതിഷേധാര്ഹമാണെന്ന് സിപിഎം മുള്ളന്കൊല്ലി ലോക്കല് കമ്മിറ്റി പ്രസ്ഥാവനയില് പറഞ്ഞു.
പഞ്ചായത്ത് ഭരണ സമിതിയും കോണ്ഗ്രസ് നേതാക്കളും ക്വാറി ഉടമകളും തമ്മിലുള്ള ഒത്തുകളിയുടെ ഭാഗമായാണ് പുതിയ ക്വാറികള് വരുന്നത്. കാലാവസ്ഥ വ്യതിയാനവും മഴകുറവും മൂലം കടുത്ത വരള്ച്ചയാണ് പുല്പ്പള്ളി, മുള്ളന്കൊല്ലി പഞ്ചായത്തുകളില് അനുഭവപ്പെടുന്നത്. കുടിവെള്ളത്തിനു പോലും രൂക്ഷമായ ക്ഷാമം അനുഭവപ്പെടുന്ന ഈ സമയത്ത് പഞ്ചായത്തിന്റെ നിസംഗത മൂലമാണ് കോടതി അനുമതിയുമായി ക്വാറി മാഫിയ രംഗത്ത് വരുന്നത്.
ഇതിനെതിരേ സിപിഎം ബഹുജനങ്ങളെ അണിനിരത്തി ശക്തമായ പ്രക്ഷോഭത്തിന് നേതൃത്വം നല്കുമെന്ന് കമ്മിറ്റി വ്യക്തമാക്കി. യോഗത്തില് സിപിഎം ജില്ലാ കമ്മിറ്റി അംഗം എം.എസ്. സുരേഷ് ബാബു, ഏരിയ സെക്രട്ടറി ബൈജു നമ്പികൊല്ലി, ലോക്കല് സെക്രട്ടറി സി.പി. വിന്സെന്റ്, പി.ജെ. പൗലോസ്, കെ.വി. ജോബി എന്നിവര് പ്രസംഗിച്ചു.
Tags : Nattuvishesham DistrictNews DeepikaNews