പ്രതീകാത്മക ചിത്രം
ദുബായ്: ആകാശത്തുവച്ച് വിമാനം തകർക്കാനുള്ള സഹപൈലറ്റിന്റെ ശ്രമം ധീരമായി ചെറുത്ത് 180ലേറെ പേരുടെ ജീവൻ രക്ഷിച്ച് ഇന്ത്യൻ പൈലറ്റ്. മുംബൈ സ്വദേശിയായ ക്യാപ്റ്റൻ സ്മിത് മച്ചാറാണ് കുത്തേറ്റിട്ടും സഹപൈലറ്റുമായി പൊരുതി വൻ ദുരന്തം ഒഴിവാക്കിയത്.
മറ്റൊരു "സെപ്റ്റംബർ 11' മോഡൽ ആക്രമണശ്രമമാണ് ഒഴിവായതെന്ന് ഇസ്രേലി അധികൃതർ വ്യക്തമാക്കി. പ്രാദേശിക സമയം ഇന്നലെ രാവിലെ 8.44നായിരുന്നു ലോകത്തെ ഞെട്ടിച്ച സംഭവം.
ദുബായിൽനിന്ന് ഇസ്രയേലിലെ ടെൽ അവീവിലേക്കു പറന്ന ഫ്ലൈ ദുബായുടെ എഫ്ഇസെഡ് 1073 ബോയിംഗ് 737 വിമാനത്തിലായിരുന്നു സംഭവം. വിമാനം ലക്ഷ്യസ്ഥാനത്തോടടുക്കവേ, ഒമാൻ സ്വദേശിയായ സഹപൈലറ്റ് വിമാനത്തിന്റെ നിയന്ത്രണ സംവിധാനങ്ങൾ തകരാറിലാക്കാനും വിമാനം താഴേക്കു പതിപ്പിക്കാനും ശ്രമിക്കുകയായിരുന്നു. തടയാൻ ശ്രമിച്ച ക്യാപ്റ്റൻ സ്മിത് മച്ചാറിന് സഹപൈലറ്റിന്റെ കുത്തേറ്റ് ഗുരുതരമായി പരിക്കേറ്റു. രക്തത്തിൽ കുളിച്ചനിലയിലും ക്യാപ്റ്റൻ അക്രമിയെ ചെറുത്തുതോൽപ്പിച്ചു.
വിമാനം പെട്ടെന്ന് താഴേക്കു പതിക്കാൻ തുടങ്ങിയതോടെ മുൻനിരയിലിരുന്ന ചില ഇസ്രേലി യാത്രക്കാരും കാബിൻ ക്രൂവും കോക്പിറ്റിലേക്കു കയറി സഹപൈലറ്റിനെ നേരിടുകയും പുറത്താക്കി കെട്ടിയിടുകയുമായിരുന്നു. തുടർന്ന്, യാത്രക്കാരായി സഞ്ചരിക്കുകയായിരുന്ന ഓഫ് ഡ്യൂട്ടി പൈലറ്റുമാർ കോക്പിറ്റിൽ പ്രവേശിച്ച് വിമാനത്തിന്റെ നിയന്ത്രണം ഏറ്റെടുത്തു.
ഇവർ വിമാനം സൗദി അറേബ്യയിലെ തബൂക്ക് വിമാനത്താവളത്തിൽ അടിയന്തരമായി ലാൻഡ് ചെയ്യിച്ചു. വെറും രണ്ടു മിനിറ്റിനുള്ളിൽ 17,000 അടിയോളം താഴേക്കു പതിച്ച വിമാനമാണ് വലിയൊരു ദുരന്തത്തിൽനിന്ന് രക്ഷപ്പെട്ടത്.
വിമാനത്തിൽനിന്ന് ആദ്യം റാഞ്ചൽ സന്ദേശം ലഭിച്ചതിനെത്തുടർന്ന് ഇസ്രയേലും സൗദിയും യുദ്ധവിമാനങ്ങൾ അയച്ചെങ്കിലും പിന്നീട് സ്ഥിതിഗതികൾ നിയന്ത്രണവിധേയമായി.
ഇന്ത്യൻ പൗരനായ ക്യാപ്റ്റൻ സ്മിത് മച്ചാറിന് ബോയിംഗ് 737 വിമാനങ്ങൾ പറത്തുന്നതിൽ 13 വർഷത്തിലേറെ പരിചയസമ്പത്തും 9,750ലധികം മണിക്കൂറുകളുടെ ഫ്ലൈയിംഗ് പരിചയവുമുണ്ട്.
മുമ്പ് സ്പൈസ്ജെറ്റിൽ പത്തു വർഷത്തോളം സീനിയർ കമാൻഡറായും ലൈൻ ട്രെയിനിംഗ് ക്യാപ്റ്റനായും സേവനമനുഷ്ഠിച്ച അദ്ദേഹം 2022 ജൂണിലാണ് ഫ്ലൈ ദുബായിൽ ക്യാപ്റ്റനായി ചേർന്നത്. ഗുരുതരമായി പരിക്കേറ്റ സ്മിത് മച്ചാറിന് വിമാനത്തിലുണ്ടായിരുന്ന ഇസ്രേലി ദന്തഡോക്ടറാണ് അടിയന്തര ചികിത്സ നൽകിയത്.
Tags : Bloodshed Cockpit IndianCaptain Thwarts Plane AttemptCrash Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash SmithMachar