റോഡരികിൽ കാടുവളർന്ന നിലയിൽ.
കൂരാച്ചുണ്ട്: റോഡരികിൽ വളർന്ന കാട് യാത്രക്കാർക്ക് അപകട ഭീഷണിയെന്ന് ആക്ഷേപം. കൂരാച്ചുണ്ട്-കൂട്ടാലിട റോഡിലെ ഊളേരി മേഖലയിലുള്ള കള്ളുഷാപ്പിനു സമീപമാണ് യാത്രക്കാർക്ക് ഭീഷണിയായ രീതിയിൽ കാട് വളർന്നത്. കോഴിക്കോട്ടേക്കുള്ള പ്രധാന റോഡായതിനാൽ ഇതുവഴി വാഹനങ്ങളുടെ തിരക്ക് ഏറെ അനുഭവപ്പെടാറുണ്ട്.
റോഡിന്റെ ഒരു ഭാഗം വനമേഖലയോട് ചേർന്ന് കിടക്കുന്നതിനാൽ കാട്ടുപന്നികൾ ഉൾപ്പെടെയുള്ള വന്യജീവികളുടെ ഭീഷണിയും നേരിടുന്നുണ്ട്. ബസുകൾ ഉൾപ്പെടെയുള്ള വലിയ വാഹനങ്ങൾ കടന്നുപോകുമ്പോൾ കാൽനട യാത്രക്കാർ ഏറെ പ്രയാസപ്പെട്ടാണ് ഇതുവഴി കടന്നുപോകുന്നതെന്നും പരാതിയുണ്ട്.
ഈ മേഖല റോഡിന് ഇറക്കമായതിനാൽ വാഹനങ്ങൾ വലിയ വേഗതയിലാണ് കടന്നുപോകുന്നത്. പഞ്ചായത്ത് തൊഴിലുറപ്പ് പദ്ധതിയിൽ ഉൾപ്പെടുത്തിക്കൊണ്ട് യാത്രക്കാരുടെ സുരക്ഷ ഉറപ്പാക്കാൻ കാടുവെട്ടി നീക്കാൻ അധികൃതർ നടപടി സ്വീകരിക്കണമെന്നാണ് ആവശ്യം ഉയരുന്നത്.