ചേർത്തല: ദേശീയപാതയിൽ ചേർത്തല കെവിഎം ആശുപത്രിക്കു സമീപം ടോറസ് ലോറിക്കടിയിൽപ്പെട്ട് സ്കൂട്ടർ യാത്രക്കാരന് ദാരുണാന്ത്യം. തുറവൂർ പഞ്ചായത്ത് ഒന്നാംവാർഡ് പള്ളിത്തോട് പുന്നയ്ക്കൽ ബെൻസൺ ജോസഫിന്റെ മകൻ അമൽ പി. ബെൻ (33) ആണ് മരിച്ചത്. ചേർത്തല ഇസാഫ് ബാങ്കിലെ മാനേജരായ അമൽ ഇന്നലെ കഞ്ഞിക്കുഴി ഭാഗത്തുനിന്ന് ചേർത്തല ഭാഗത്തേക്കു വരുന്പോഴാണ് അപകടം.
ദേശീയപാത നിർമാണത്തിന്റെ ഭാഗമായി വീതികുറഞ്ഞ സർവീസ് റോഡിലൂടെയാണ് വാഹനങ്ങൾ കടത്തിവിട്ടിരുന്നത്. ബൈക്ക് റോഡിന്റെ വശങ്ങളിൽ കയറി ടോറസിന്റെ അടിയിൽപ്പെടുകയായിരുന്നെന്ന് ചേർത്തല പോലീസ് പറഞ്ഞു. പിൻചക്രങ്ങൾ അമലിന്റെ ദേഹത്തുകൂടി കയറിയിറങ്ങി. ചേർത്തല പോലീസും ഫയർഫോഴ്സും സ്ഥലത്തെത്തി.
പോലീസ് ഇൻക്വസ്റ്റ് തയാറാക്കി മൃതദേഹം അരുക്കുറ്റി സാമൂഹികാരോഗ്യകേന്ദ്രം മോർച്ചറിയിലേക്ക് മാറ്റി. സംസ്കാരം ഇന്ന് 3.30ന് പള്ളിത്തോട് സെന്റ് സെബാസ്റ്റ്യൻസ് പള്ളിയിൽ നടക്കും. പിതാവ് : ബെൻസൺ ജോസഫ്. മാതാവ്: പരേതയായ മാഗി ബെൻസൺ. ഭാര്യ: അലീന അലോഷ്യസ് (രാജഗിരി പബ്ലിക് സ്കൂൾ). മകൾ: അമിയ മരിയ.