ആൽഡ്രിൻ ജിൻസനെ ഫാ. ജിബിൻസ് കൊച്ചോഴത്തിൽ ഉപഹാരം നൽകി അനുമോദിക്കുന്നു.
ചെറുതോണി: കളഞ്ഞുകിട്ടിയ സ്വർണച്ചെയിൻ ഉടമയ്ക്ക് കൈമാറിയ വിദ്യാർഥിക്ക് അനുമോദനപ്രവാഹം. ഭൂമിയാംകുളം കരുപ്പാകുടിയിൽ ജിൻസൺ-അമ്പിളി ദമ്പതികളുടെ മൂത്ത മകൻ ആൾഡ്രിൻ ജിൻസണാണ് നല്ല മാതൃകയായിരിക്കുന്നത്.
കഴിഞ്ഞ ദിവസം ഇടവകപ്പള്ളിയിൽ രാവിലെ വിശുദ്ധ കുർബാനയിൽ പങ്കെടുത്ത ശേഷം സുഹൃത്തിനൊപ്പം വീട്ടിലേക്ക് പോകുംവഴി വീടിനു സമീപമെത്തിയപ്പോഴാണ് റോഡിൽക്കിടന്ന് ആറ് ഗ്രാം തൂക്കമുള്ള സ്വർണ കൈച്ചെയിൻ കിട്ടിയത്. വഴിയരികിലുണ്ടായിരുന്ന ആളുകളോടെല്ലാം അന്വേഷിച്ചെങ്കിലും ഉടമയെ കണ്ടെത്താനായില്ല. ആൽഡ്രിൻ വീട്ടിലെത്തിയ ഉടനെ സ്വർണച്ചെയിൻ മാതാവിനെ ഏൽപ്പിച്ചു. ഇവർ ഇടവക വികാരി ഫാ. ജിബിൻസ് കൊച്ചോഴത്തിലിനെ വിവരമറിയിച്ചു. അയൽവാസികളാരുടെയെങ്കിലുമാകുമെന്നും ആളെ കണ്ടെത്താനായില്ലെങ്കിൽ പള്ളിയിൽ അറിയിക്കാമെന്നും വികാരി പറഞ്ഞു.
പിന്നീട് വാട്സ്ആപ്പ് ഗ്രൂപ്പ് മെസേജിൽനിന്ന് ഉടമയെ കണ്ടെത്തി അവരുടെ വീട്ടിലെത്തി ചെയിൻകൈമാറുകയായിരുന്നു. വാഴത്തോപ്പ് സെന്റ് ജോർജ് ഹയർ സെക്കൻഡറി സ്കൂളിലെ എട്ടാം ക്ലാസ് വിദ്യാർഥിയാണ് ആൽഡ്രിൻ.