കൊല്ലം : ആശ്രാമം ഇഎസ്ഐ മോഡല് ആന്ഡ് സൂപ്പര് സെപ്ഷാലിറ്റി ആശുപത്രി മെഡിക്കല് കോളജ് ആയി ഉയര്ത്തുന്നതിന് സംസ്ഥാന സര്ക്കാര് എസന്ഷ്യാലിറ്റി സര്ട്ടിഫിക്കറ്റ് നല്കിയതായി എന്.കെ. പ്രേമചന്ദ്രന് എംപി അറിയിച്ചു.
2026-2027 അധ്യയന വര്ഷം 50 എംബിബിഎസ് സീറ്റുകളിലേയ്ക്ക് പ്രവേശനത്തിനാണ് സര്ട്ടിഫിക്കറ്റ് നല്കിയത്. സര്ട്ടിഫിക്കറ്റിന് മൂന്ന് വര്ഷത്തെ കാലാവധിയാണുളളത്. 2026-27 ല് 50 എംബിബിഎസ് സീറ്റുകള്ക്ക് വേണ്ടിയാണ് ഇഎസ്ഐ കോര്പറേഷന് സര്ട്ടിഫിക്കറ്റിനായി അപേക്ഷ നല്കിയത്. പുതിയ മെഡിക്കല് കോളജിന് നാഷണല് മെഡിക്കല് കമ്മീഷന് അപേക്ഷ സമര്പ്പിക്കേണ്ട അവസാന തീയതി വരെ പിണറായി സര്ക്കാര് എസന്ഷ്യാലിറ്റി സര്ട്ടിഫിക്കറ്റ് നല്കിയിരുന്നില്ല.
കേന്ദ്ര സര്ക്കാരിന്റെ കീഴിലുളള ഇഎസ്ഐ കോര്പറേഷന് ഡയറക്ടര് ജനറല് നേരിട്ട് ആവശ്യപ്പെട്ടിട്ടു പോലും സര്ട്ടിഫിക്കറ്റ് നല്കുന്നതില് കാലതാമസം വരുത്തിയതായി എന്.കെ. പ്രേമചന്ദ്രന് ആരോപിച്ചു.
യുഡിഎഫ് സര്ക്കാര് അധികാരത്തില് വന്ന ശേഷം വിഷയം ആരോഗ്യവകുപ്പ് മന്ത്രി കെ. മുരളീധരന്റെ ശ്രദ്ധയില് കൊണ്ടു വന്നു. തുടര്ന്ന് മന്ത്രി ഫയല് പഠിച്ച് സമയബന്ധിതമായി തുടര് നടപടി സ്വീകരിച്ചതിനെ തുടര്ന്നാണ് സര്ട്ടിഫിക്കറ്റ് ലഭിച്ചത്. നീറ്റ് പരീക്ഷയിലൂണ്ടായ പ്രശ്നങ്ങള് മൂലം ഒന്നാം വര്ഷ എംബിബിഎസ് പ്രവേശനം വൈകാന് സാധ്യതയുണ്ട്. ഈ പ്രത്യേക സാഹചര്യത്തില് ഏതെങ്കിലും തരത്തില് അപേക്ഷ സമര്പ്പിക്കുന്നതില് ഇളവ് ലഭിക്കുവാന് കഴിയുമോയെന്ന് പരിശോധിക്കാന് ഈ മാസം അവസാനം ചേരുന്ന ഇഎസ്ഐ ബോര്ഡ് യോഗത്തില് ആവശ്യപ്പെടും.
എന്തെങ്കിലും സാധ്യതയുണ്ടെങ്കില് ഈ വര്ഷം തന്നെ കോളജ് ആരംഭിക്കാന് നടപടിയും സ്വീകരിക്കുമെന്നും അതിനായി പരിശ്രമം തുടരുമെന്നും എന്.കെ. പ്രേമചന്ദ്രന് എംപി അറിയിച്ചു.
Tags : Local News Nattuvishesham Kollam