അടൂർ: എനാത്ത് വീടുകളിൽ നടത്തിയ മോഷണങ്ങളുടെ സൂത്രധാരൻ അറസ്റ്റിലായി. ഏനാത്ത് പോലീസ് സ്റ്റേഷൻ പരിധിയിൽ രണ്ടിടങ്ങളിലായി നടത്തിയ മോഷണങ്ങൾ ആസൂത്രണംചെയ്ത തേനി ഉത്തമ പാളയം ബംഗ്ലാമേടം സ്ട്രീറ്റിൽ ചന്ദ്രൻ (61) ആണ് പിടിയിലായത്. ഇതേ മോഷണക്കേസിൽ തമിഴ്നാട് സ്വദേശികളായ ജെറ്റ്ലി (30), രാജ (57) എന്നിവരെ നേരത്തേ അറസ്റ്റ് ചെയ്തിരുന്നു.
മേയ് 31ന് വയലയിൽ വീടിന്റെ കതക് തകർത്ത് അകത്തുകയറി 15 ഗ്രാം സ്വർണവും 60,000 രൂപയും കവർന്നിരുന്നു. കഴിഞ്ഞ ആറിന് നെടുമൺ അഴകത്ത്പടിയിൽ ആൾത്താമസമില്ലാത്ത വീട്ടിൽ കയറി സിസിടിവി കാമറയുടെ ഡിവിആറും മോഷ്ടിച്ചിരുന്നു. വീട്ടുമുറ്റത്തു കിടന്ന ജീപ്പിന് കേടുപാടുകൾ വരുത്തുകയും ചെയ്തു.
ഏനാത്ത് എസ്ഐ വിഷ്ണുരാജിന്റെ നേതൃത്വത്തിലുള്ള സംഘമാണ് അന്വേഷണം നടത്തി പ്രതികളെ അറസ്റ്റു ചെയ്തത്.