തൂഫാൻ 2.0 പഞ്ചായത്ത് പ്രസിഡന്റ് സിനി ജിനോ ഉദ്ഘാടനം ചെയ്യുന്നു.
കൂരാച്ചുണ്ട്: ലഹരി വസ്തുക്കളുടെ വ്യാപനവും ഉപയോഗവും പൂർണമായി തടയുകയെന്ന ലക്ഷ്യത്തോടെ പൊലിസ്, തദ്ദേശ സ്വയംഭരണ വകുപ്പുമായി ചേർന്ന് നടത്തുന്ന തൂഫാൻ 2.0ന് കൂരാച്ചുണ്ട് പഞ്ചായത്തിൽ തുടക്കമായി. പഞ്ചായത്ത് പ്രസിഡന്റ് സിനി ജിനോ പതാക ഉയർത്തി ഉദ്ഘാടനം ചെയ്തു. വൈസ് പ്രസിഡന്റ് ബിജു കടലാശേരി അധ്യക്ഷത വഹിച്ചു. കൂരാച്ചുണ്ട് പൊലിസ് സ്റ്റേഷൻ എസ്എച്ച്ഒ മുഹമ്മദ് സുഹൈൽ തൂഫാൻ പ്രതിജ്ഞ ചൊല്ലിക്കൊടുത്തു. ലഹരി വിരുദ്ധ പ്രവർത്തനങ്ങൾക്ക് നിരവധി അവാർഡുകൾ നേടിയിട്ടുള്ള കൂരാച്ചുണ്ട് സ്വദേശി പി.കെ. അസീസിനെ ചടങ്ങിൽ ആദരിച്ചു. വിവിധ മേഖലകളിൽ നിന്നുള്ള ഒമ്പത് പേർക്ക് പഞ്ചായത്ത് പ്രസിഡന്റ് തൂഫാൻ ബാഡ്ജ് അണിയിച്ചു.
വാർഡുകളിലെ 140 പേരെ തൂഫാൻ വാരിയേഴ്സായി പ്രഖ്യാപിച്ചു. ലഹരി വിരുദ്ധ സന്ദേശം പകരുന്ന വീഡിയോ പ്രദർശിപ്പിച്ചു. ഒക്ടോബർ അഞ്ച് മുതല് എട്ട് വരെ എല്ലാ വാർഡിലും തൂഫാൻ ഗ്രാമസഭ നടത്തും. സ്റ്റാൻഡിംഗ് കമ്മിറ്റി അധ്യക്ഷരായ ഡാർളി ഏബ്രാഹം പുല്ലംകുന്നേൽ, ചെറിയാൻ ജോസഫ് അറയ്ക്കൽ, മെംബർ എൻ.കെ. കുഞ്ഞമ്മദ്, സെക്രട്ടറി യാദവ് വിൽസൻ, അസിസ്റ്റന്റ് സെക്രട്ടറി കെ.പി. മനിൽകുമാർ എന്നിവർ പ്രസംഗിച്ചു. മെംബർമാരായ ജോസ് വെളിയത്ത്, സണ്ണി ജോസഫ് കാനാട്ട്, റസീന യൂസഫ്, ബിന്ദു കുര്യൻ ആനിക്കാട്ട്, പ്രബീഷ് തളിയോത്ത്, ജലീൽ കുന്നുംപുറത്ത് എന്നിവർ നേതൃത്വം നൽകി.
തിരുവമ്പാടി: ഓപ്പറേഷൻ തൂഫാൻ-നാർക്കോഹണ്ട് കാന്പയിനിന്റെ രണ്ടാംഘട്ട പ്രവർത്തനങ്ങൾക്ക് തിരുവമ്പാടി പഞ്ചായത്തിൽ തുടക്കമായി. കുടുംബശ്രീ, ആശാ പ്രവർത്തകർ, ഹരിതകർമസേന, യുവജന-സന്നദ്ധ സംഘടനകളുടെ സഹകരണത്തോടെ വാർഡ് തലത്തിൽ ശരാശരി പത്ത് തൂഫാൻ വോളന്റിയർമാരെ കണ്ടെത്തി ലഹരി വിരുദ്ധ പ്രവർത്തനങ്ങൾ ശക്തിപ്പെടുത്തുന്നതിനാണ് പദ്ധതി ലക്ഷ്യമിടുന്നത്.
ലഹരി വിരുദ്ധ പ്രവർത്തനങ്ങൾക്കായി പ്രത്യേക തൂഫാൻ ഗ്രാമസഭകളും സംഘടിപ്പിക്കും. ഗ്രാമപഞ്ചായത്ത് ഹാളിൽ നടന്ന പരിപാടിയുടെ പഞ്ചായത്തുതല ഉദ്ഘാടനം തിരുവമ്പാടി നിയോജക മണ്ഡലം എംഎൽഎ സി.കെ. കാസിം തൂഫാൻ ഫ്ലാഗ് ഓഫ് ചെയ്ത് നിർവഹിച്ചു. പഞ്ചായത്ത് പ്രസിഡന്റ് ജിതിൻ പല്ലാട്ട് അധ്യക്ഷത വഹിച്ചു. ബിജു താന്നിക്കാക്കുഴി, പഞ്ചായത്ത് വൈസ് പ്രസിഡന്റ് പി.ആർ. അജിത, അസി. സെക്രട്ടറി ബൈജു തോമസ്, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ബിന്ദു ജോൺസൺ, സിഡിഎസ് ചെയർപേഴ്സൺ റംല ചോലക്കൽ എന്നിവർ പ്രസംഗിച്ചു.
പഞ്ചായത്തംഗങ്ങളായ സരസ്വതി, മറിയാമ്മ വർക്കി, തിരുവമ്പാടി പൊലിസ് സ്റ്റേഷൻ എസ്എച്ച്ഒ ഇ.കെ. രമ്യ, പഞ്ചായത്ത് ജീവനക്കാർ, കുടുംബശ്രീ അംഗങ്ങൾ, പൊലിസ് ഉദ്യോഗസ്ഥർ എന്നിവർ പങ്കെടുത്തു.