പ്രതീകാത്മക ചിത്രം
ആർപ്പൂക്കര: കോനാകരിത്തോട് സംരക്ഷണ സമിതിയുടെയും ആർപ്പൂക്കര പഞ്ചായത്തിന്റെയും അഭിമുഖ്യത്തിൽ ഉൾനാടൻ ജല ടൂറിസത്തിലൂടെ അപ്പർ കുട്ടനാട്ടിലേക്ക് വിനോദസഞ്ചാരികളെ ആകർഷിക്കുകയെന്ന ലക്ഷ്യംവച്ച് പ്രഥമ ജലഘോഷയാത്ര നടത്തി.
മത്സ്യത്തൊഴിലാളികളുടെയും കർഷകരുടെയും ഉയർച്ചയ്ക്കും മീനച്ചിലാർ കടന്നുപോകുന്ന അയ്മനം, കുടമാളൂർ, മണിയപറമ്പ്, ആർപ്പൂക്കര മേഖലക്ക് ഇതിലൂടെ പുത്തൻ ഉണർവ് വരുത്തുന്നതിനും ജലഗതാഗതം സുഗമമാക്കുന്നതിനും മുന്നോടിയായാണ് പ്രഥമ ജലഘോഷയാത്ര ആർപ്പൂക്കരയിലെ വിവിധ കക്ഷിനേതാക്കളെ ഉൾപ്പെടുത്തി നടത്തിയത്.
അൽഫോൻസ കടവിൽനിന്നാരംഭിച്ച ജലഘോഷയാത്ര കുട്ടോമ്പുറം ബോട്ട് ജെട്ടി ജംഗ്ഷനിൽ അവസാനിച്ചു. കോനാകരിത്തോട് സംരക്ഷണസമിതി കൺവീനർ ജോഷി ജോസ്, സംരക്ഷണ സമിതി പ്രവർത്തകർ, ആർപ്പൂക്കര പഞ്ചായത്ത് പ്രസിഡന്റ് ആനന്ദ് പഞ്ഞിക്കാരൻ, മഹേഷ് ചന്ദ്രൻ, രാജു ആർപ്പൂക്കര, ബീന രാജേന്ദ്രൻ, മെംബർമാരായ ദീപ ജോസ്, മനോജ് പുന്നക്കുഴം, ബ്ലോക്ക് പഞ്ചായത്ത് വൈസ് പ്രസിഡന്റ് ത്രേസ്യാമ്മ ഫിലിപ്പ്, ജിബിൻ വല്ലേരി എന്നിവരും പങ്കെടുത്തു.