ജി. സുധാകരൻ എംഎൽഎ.
ആലപ്പുഴ: മുഖ്യമന്ത്രി വി.ഡി.സതീശന് പിന്തുണയുമായി ജി. സുധാകരൻ എംഎൽഎ. മുഖ്യമന്ത്രിയെ ഭരിക്കാൻ അനുവദിക്കണമെന്നും മന്ത്രിസഭയിൽ കഴിവില്ലാത്തവരുണ്ടെങ്കിൽ അവരെ മാറ്റണമെന്നും അദ്ദേഹം ആവിശ്യപ്പെട്ടു. മുഖ്യമന്ത്രിയെ വെല്ലുവിളിക്കുന്ന ഒരു മന്ത്രിയും മന്ത്രിക്കസേരയിൽ തുടരാൻ പാടില്ലെന്നും അത്തരക്കാരെ പുറത്താക്കണമെന്നും അദ്ദേഹം തുറന്നടിച്ചു.
മുഖ്യമന്ത്രിയുടെ വിശ്വാസം ആർജിച്ചവരാണ് മന്ത്രിമാരായി അധികാരത്തിലെത്തുന്നത്. എന്നാൽ അതേ മുഖ്യമന്ത്രിക്കെതിരെ പരസ്യമായി പ്രസ്താവനയിറക്കുന്ന മന്ത്രിയെ പുറത്താക്കുകയാണ് വേണ്ടത്. ഇടതും വലതും നോക്കേണ്ട സാഹചര്യമുള്ളതിനാലാണ് മുഖ്യമന്ത്രി അത്തരമൊരു നടപടിയെടുക്കാത്തതെന്നും അദ്ദേഹം കൂട്ടിച്ചേർത്തു. പാർലമെന്റിലേക്ക് പോയവർ സംസ്ഥാന സർക്കാരിൽ മന്ത്രിയാകണമെന്ന് പറയുന്നത് എവിടെയെങ്കിലും കേട്ടിട്ടുണ്ടോ.
സംസ്ഥാന മന്ത്രിസഭയിലെ പദവിയേക്കാൾ എത്രയോ ഉയർന്നതാണ് പാർലമെന്റ് അംഗത്വമെന്നും അദ്ദേഹം അഭിപ്രായപ്പെട്ടു. കേന്ദ്രമന്ത്രി സുരേഷ് ഗോപിക്കെതിരെയും ജി. സുധാകരൻ വിമർശനം ഉന്നയിച്ചു. ആലപ്പുഴ ബീച്ചിലെ വികസന പ്രവർത്തനങ്ങൾ വിലയിരുത്താനായി സുരേഷ് ഗോപി നടത്തിയ സന്ദർശനത്തെയാണ് അദ്ദേഹം ചോദ്യം ചെയ്തത്.
തന്റെ മണ്ഡലത്തിൽ ഉൾപ്പെടുന്ന പ്രദേശമാണ് ആലപ്പുഴ ബീച്ചെന്നും അവിടേക്ക് സന്ദർശനത്തിനെത്തുന്ന വിവരം തന്നെ അറിയിച്ചില്ലെന്നും സുധാകരൻ പറഞ്ഞു. തന്നെ അറിയിക്കാതെ മണ്ഡലത്തിലെ സ്ഥലം സന്ദർശിക്കാൻ സുരേഷ് ഗോപിക്ക് എങ്ങനെ ധൈര്യം വന്നുവെന്നും അദ്ദേഹം ചോദിച്ചു.
Tags : PoliticalStatement, GSudhakaran V.D.Satheesan KeralaPolitics ChiefMinister Alappuzha