വെള്ളറട : തെക്കൻ കുരിശുമല 66-ാമത് മഹാതീർഥാടനം നാലാം ദിവസം പിന്നിട്ടു. സംഗമവേദിയിൽ രാവിലെ ആറിന് പ്രഭാത വന്ദനവും സങ്കീർത്തന പാരായണവും നടന്നു. ഏഴിന് നടന്ന ദിവ്യബലിയ്ക്ക് ആനപ്പാറ ലാസലൈറ്റ് ആശ്രമം ഡയറക്ടർ ഫാ.ജോബിമുട്ടത്തിൽ മുഖ്യകാർമികത്വം വഹിച്ചു. പനച്ചമൂട് സെന്‍റ് ജൂഡ് ഇടവക വികാരി ഫാ.ജോണി വടക്കൻ വചന പ്രഘോഷണം നടത്തി. ഒന്പതിന് ലഹിരി വിരുദ്ധ ബോധവത്കരണ സെമിനാർ കേരള ലഹരി നിർമാജന സമിതി സംസ്ഥാന പ്രസിഡന്‍റ് രാജൻ അന്പൂരി ഉദ്ഘാടനം ചെയ്തു. ആരാധനാ ചാപ്പലിൽ ആറിന് ദിവ്യബലിയും ദിവ്യകാരുണ്യാശീർവാദവും നടന്നു. പത്തിന് നിത്യജീവിതാനുഭവ ആരാധനയും ദിവ്യബലിക്കും നെയ്യാറ്റിൻകര രൂപത യുവജന ശുശ്രൂഷ ഡയറക്ടർ ഫാ.റോബിൻ സി. പീറ്റർ നേതൃത്വം നൽകി.
ആറിന് നെറുകയിൽ ദിവ്യബലിയ്ക്ക് ഫാ.ജസ്റ്റിൻ ഫ്രാൻസിസും വൈകുന്നേരം 5.30 ന് ഫാ. അഖിൽ ബിറ്റിയും മുഖ്യകാർമികരായി. ഉച്ചയ്ക്ക് ഒന്നിന് നെറുകയിലും ആരാധനാചാപ്പലിലും സംഗമവേദിയിലും കുരിശിന്‍റെ വഴി, വിശുദ്ധകുരിശിന്‍റെ നവനാൾ എന്നിവനടന്നു.
മൂന്നിന് സംഗമവേദിയിൽ സിഎസ്ഐ പന്നിമല ചർച്ച് നേതൃത്വം നൽകിയ പ്രാർത്ഥനാശുശ്രൂഷയിൽ റവ.ലോഡ്വിൻ ലോറൻസ് സന്ദേശം നൽകി.
4.30 ന് തമിഴ് ദിവ്യബലിക്ക് കുഴിത്തുറ രൂപത അഡ്മിനിസ്ട്രേറ്റർ മോണ്.യേശുരത്നം മുഖ്യകാർമികത്വം വഹിച്ചു. ആറിന് ഫാ.മാനുവേൽ കരിപ്പോട്ട് നേതൃത്വം നൽകിയ വചനാനുഭവ ധ്യാനവും എട്ടിന് ദിവ്യകാരുണ്യ ആരാധനയും ആശീർവാദവും നടന്നു. 8.30 ന് ചെന്നൈ കുളത്തൂർ ആരോഗ്യ മാതാ ആലയം അവതരിപ്പിച്ച ക്രിസ്തീയ സംഗീതാർച്ചനയും ആരാധനാചാപ്പലിൽ കരിസ്മാറ്റിക് കമ്മീഷൻ നേതൃത്വം നൽകിയ ജാഗരണ പ്രാർഥനയും നടന്നു.
കുരിശുമലയിൽ ഇന്ന്
നെറുകയിൽ : 6.30 നും 5.30 നും ദിവ്യബലി, പത്തിന് വിശുദ്ധ കുരിശിന്‍റെ നൊവേന, മൂന്നിന് കുരിശിന്‍റെ വഴി.
ആരാധനാചാപ്പലിൽ : ആറിനും 10 നും, 11.30 നും ദിവ്യബലി ദിവ്യകാരുണ്യാശീർവാദം, 8.30 ന് ജാഗരണ പ്രാർഥന.
സംഗമവേദിയിൽ : രാവിലെ ആറിന് പ്രഭാതവന്ദനം, സങ്കീർത്തന പാരായണം. ഏഴിന് ദിവ്യബലി, 8.30 ന് പ്രാർഥനാ ശുശ്രൂഷ, 10 ന് ക്രിസ്തീയ ഗാനസുധ, 12 ന് കുരിശിന്‍റെ വഴി, 4.30 ന് പൊന്തിഫിക്കൽ ദിവ്യബലി, ആറിന് ദിവ്യകാരുണ്യ പ്രദക്ഷിണം, 6.30 ന് സാംസ്കാരിക സദസ് അധ്യക്ഷൻ എം.വിൻസന്‍റ് എംഎൽഎ, ഉദ്ഘാടനം പ്രതിപക്ഷനേതാവ് വി.ഡി.സതീശൻ, 8.30 ന് ക്രിസ്ത്യൻ ഡിവോഷണൽ ലൈവ് മ്യൂസിക് കണ്‍സേർട്ട്.