ADVERTISEMENT

ADVERTISEMENT

എൻസിപി-എസ് ജില്ലാ ജില്ലാ പ്രസിഡന്‍റായി മോഹൻ ഐസക് ചുമതലയേറ്റു

പാലക്കാട്: എൻസിപി-എസ് ജില്ലാ ജില്ലാ പ്രസിഡന്‍റായി മോഹൻ ഐസക് ചുമതലയേറ്റു. തുടർന്നു നടന്ന ജില്ലാ നേതൃയോഗം സംസ്ഥാന വർക്കിംഗ് പ്രസിഡന്‍റ് പി.കെ. രാജൻ മാസ്റ്റർ ഉദ്ഘാടനം ചെയ്തു.

ജില്ലാ പ്രസിഡന്‍റ് മോഹൻ ഐസക് അധ്യക്ഷത വഹിച്ചു. സംസ്ഥാന ജനറൽ സെക്രട്ടറി പി.എ. റസാക്ക് മൗലവി മുഖ്യപ്രഭാഷണം നടത്തി.

നേതാക്കളായ എ. രാമസ്വാമി, ഓട്ടൂർ ഉണ്ണികൃഷ്ണൻ, കാപ്പിൽ സെയ്തലവി, പി. അബ്ദുറഹിമാൻ, കെ.ഷൗക്കത്തലി, ഷെനിൻ മന്ദിരാട്, ജില്ലാ ഭാരവാഹികൾ, പോഷകസംഘടനാ ഭാരവാഹികൾ പ്രസംഗിച്ചു.

ADVERTISEMENT

കൊച്ചി പാലം തകർന്നുവീണാലും ഇല്ലെങ്കിലും പൊളിച്ചുനീക്കും

ഷൊർണൂർ: ഈ കാലവർഷത്തെ അതിജീവിച്ചാലും ഇല്ലെങ്കിലും പഴയ കൊച്ചി പാലം ഓർമയാവും. ഒന്നേകാൽ നൂറ്റാണ്ട് പഴക്കം വരുന്ന ഈ ചരിത്ര ശേഷിപ്പിന് ഇനി ആയുസില്ല. മഴക്കാലം കഴിഞ്ഞാലുടൻ അവശേഷിക്കുന്ന പാലം ഭാഗങ്ങൾ പൊളിച്ചു നീക്കാൻ നടപടികളായി. പുഴയിലെ ശക്തമായ കുത്തൊഴുക്കിൽ പാലത്തിന്‍റെ ശിഷ്ടഭാഗങ്ങൾ കൂടി ഒലിച്ചുപോകാനുള്ള സാധ്യതയും അധികൃതർ തള്ളിക്കളയുന്നില്ല. തൃശൂർ ജില്ലയിലെ ചെറുതുരുത്തിയെയും ഷൊർണൂരിനെയെയും ബന്ധിപ്പിച്ച് നിളാ നദിക്ക് കുറുകെ നിർമിച്ച ആദ്യത്തെ പാലമായ പഴയ കൊച്ചിപാലം പൊളിച്ചു നീക്കുന്നതിന് നേരത്തെ സർക്കാർ ഉത്തരവിട്ടിരുന്നു. കേരളപ്പിറവിക്ക് മുമ്പ് പഴയ മദിരാശി മലബാറിനെയും തിരുവിതാംകൂർ കൊച്ചിയെയും ഏകോപിപ്പിച്ചാണ് പാലം നിർമിച്ചത്. ഒന്നേകാൽ നൂറ്റാണ്ടിന്‍റെ ചരിത്രം ഈ പാലത്തിന് പറയാനുണ്ട്. തൃപ്പൂണിത്തുറ ശ്രീപൂർണത്രയീശ ക്ഷേത്രത്തിലെ സ്വർണത്തിൽ തീർത്ത 14 നെറ്റിപ്പട്ടങ്ങളും പൊതുഖജനാവിലെ പണവുമായി 84 ലക്ഷം രൂപ ചെലവാക്കിയാണ് കൊച്ചി രാജാവ് ശ്രീ രാമവർമ തമ്പുരാൻ 1902 ൽ പാലം പണി കഴിപ്പിച്ചത്. 1902 ജൂൺ 2ന് ആദ്യത്തെ ചരക്ക് ട്രെയിനും ജൂലൈ 16ന് ആദ്യത്തെ യാത്രാവണ്ടിയും മലബാറിൽ നിന്ന് തിരുവിതാംകൂറിലേക്ക് ഈ പാലത്തിലൂടെ സർവീസ് നടത്തി. കാലാന്തരത്തിൽ അറ്റകുറ്റപ്പണികളുടെ അപര്യാപ്തത മൂലം പാലത്തിനു ബലക്ഷയം വന്നു തുടങ്ങി. തൊട്ടടുത്ത് പുതിയ പാലം 2003 ജനുവരി 25ന് തുറന്നു. പാലത്തിന്‍റെ രണ്ടു സ്പാനുകൾ 2011 നവംബർ 9ന് നിലംപൊത്തി. ഏറ്റവുമൊടുവിലാണ് പാലം പൊളിച്ചുമാറ്റാൻ സർക്കാർ ഉത്തരവിട്ടത്. പഴയ കൊച്ചിപ്പാലം സംരക്ഷണമാവശ്യപ്പെട്ട് നിരവധി സാമൂഹിക പ്രവർത്തകർ മുന്നോട്ട് വന്നെങ്കിലും ഫലമുണ്ടായില്ല. അതേസമയം ശക്തമായ കാലവർഷത്തിൽ ഭാരതപ്പുഴ നിറഞ്ഞൊഴുകുകയാണ്. ഇതിന്‍റെ ശക്തിയിൽ പാലത്തിന്‍റെ അവശേഷിക്കുന്ന ഭാഗങ്ങളും തകർന്നു പുഴയിൽ വീഴാനുള്ള സാധ്യതയും നിലനിൽക്കുന്നുണ്ട്.

മംഗലംഡാമിന്‍റെ ഷട്ടറുകൾ തുറന്നു

മംഗലംഡാം: വൃഷ്ടിപ്രദേശത്തെ കനത്ത മഴയിൽ ജലനിരപ്പ് ഉയർന്നതിനെ തുടർന്ന് മംഗലംഡാമിന്‍റെ ആറ് ഷട്ടറുകളും തുറന്നു. ഇന്നലെ രാവിലെ 11 നാണ് മുഴുവൻ ഷട്ടറുകളും അഞ്ച് സെന്‍റീമീറ്റർ ഉയരത്തിൽ തുറന്നത്. ഡാമിന്‍റെ ഓറഞ്ച് അലർട്ടായ 76.95 മീറ്ററിൽ ജലനിരപ്പെത്തിയപ്പോൾ മുന്നറിയിപ്പുകൾ നൽകി ഷട്ടറുകൾ തുറക്കുകയായിരുന്നു. 77.28 മീറ്ററാണ് ഡാമിന്‍റെ റെഡ് അലർട്ട് വരുന്ന ജലനിരപ്പ് . 77.88 മീറ്ററാണ് ഡാമിന്‍റെ പരമാവധി സംഭരണ ശേഷി. സെക്കൻഡിൽ 30.2 മീറ്റർക്യൂബ് വെള്ളം വൃഷ്ടി പ്രദേശങ്ങളിൽ നിന്നും ഇപ്പോൾ റിസർവോയറിലെത്തുന്നുണ്ട്. കടപ്പാറയിൽ നിന്നുള്ള വെള്ളം ഒഴുകിയെത്തുന്ന രണ്ടാം പുഴ, ഓടംതോട്, ചൂരുപ്പാറ തുടങ്ങിയ പ്രദേശങ്ങളിൽ നിന്നാണ് നീരൊഴുക്ക് കൂടുതലുള്ളത്. എന്നാൽ മഴ തുടർന്നാൽ ജലനിരപ്പ് ക്രമീകരിക്കുന്നതിന്‍റെ ഭാഗമായി ഷട്ടറുകൾ കൂടുതൽ ഉയർത്തുമെന്ന് ഇറിഗേഷൻ അസി. എക്സിക്യൂട്ടീവ് എൻജിനീയർ ടി.പി. ശുഭ, മംഗലംഡാം എഇ ലെസ്ലി വർഗീസ് എന്നിവർ പറഞ്ഞു. മംഗലം പുഴയുടെ തീരത്തു താമസിക്കുന്നവരും കൃഷിയിടങ്ങളിലുള്ളവരും ജാഗ്രത പാലിക്കണമെന്നും അധികൃതർ അറിയിച്ചു. 44 മില്ലിമീറ്റർ മഴയാണ് ഇന്നലെ രാവിലെ മംഗലംഡാമിൽ രേഖപ്പെടുത്തിയത്. വണ്ടാഴി പഞ്ചായത്ത് പ്രസിഡന്‍റ് കെ.എൽ. രമേഷ്, ഡാം പോലീസ് തുടങ്ങിയവരും ഷട്ടറുകൾ തുറക്കുമ്പോൾ സ്ഥലത്തെത്തിയിരുന്നു. വെള്ളം നിറഞ്ഞ് മംഗലംഡാമിന്‍റെ ഷട്ടറുകൾ ജൂൺ മാസം പകുതിയിൽ തുറക്കേണ്ടി വരുന്നത് ഇത് രണ്ടാം തവണയാണ്. ഒന്നാം പ്രളയവർഷമെന്ന് വിശേഷിപ്പിച്ച 2018 ലാണ് ഇതിനുമുമ്പ് വെള്ളം നിറഞ്ഞ് ജൂൺ 14ന് ഷട്ടറുകൾ തുറന്നത്. എന്നാൽ രണ്ടാം പ്രളയവർഷമായ 2019 ൽ ഓഗസ്റ്റ് എട്ടിനാണ് ഷട്ടറുകൾ തുറന്നത്. മിക്കവാറും വർഷങ്ങളിലും ജൂലൈ മാസത്തിലാണ് ഷട്ടറുകൾ തുറന്നിട്ടുള്ളത്. കഴിഞ്ഞവർഷവും ജൂലൈ 15 നാണ് മുഴുവൻ ഷട്ടറുകളും തുറന്നത്.

നെല്ലിയാമ്പതിയിൽ മരംവീണ് ഗതാഗതം തടസപ്പെട്ടു

നെന്മാറ: നെല്ലിയാമ്പതി ഗവ. ഓറഞ്ച് ഫാം വളപ്പിലെ മരം കടപുഴകി റോഡിൽ വീണു. മൂന്നു മണിക്കൂർ പുലയംപാറ- കൈകാട്ടി റൂട്ടിൽ ഗതാഗതം തടസപ്പെട്ടു. ഫാമിനോട് ചേർന്ന് വില്ലേജ് ഓഫീസ് പ്രവർത്തിക്കുന്ന കെട്ടിടത്തിന് സമീപത്തെ വളവിലാണ് മരം കടപുഴകിവീണത്. വന്യമൃഗങ്ങളിൽ നിന്ന് ഫാമിലെ കൃഷി സംരക്ഷിക്കാൻ സ്ഥാപിച്ച സൗരോർജവേലിക്ക് മുകളിലൂടെയാണ് മരം റോഡിലേക്ക് വീണത്. വീടുകൾക്ക് സമീപം നിന്നിരുന്ന മരം റോഡിലേക്ക് മറിഞ്ഞുവീണതിനാൽ വീടുകളിൽ ഉണ്ടായിരുന്നവർ അത്യാഹിതത്തിൽ നിന്ന് രക്ഷപ്പെട്ടു. ഗവ. ഓറഞ്ച് ഫാം തൊഴിലാളികളായ പി.ഒ. ജോസഫ്, മുരുകൻ, ശിവൻ, ഫാമിലെ ഉദ്യോഗസ്ഥരായ നാരായണൻകുട്ടി, വസീം എന്നിവരും പുലയംപാറയിലെ ടാക്സി ഡ്രൈവർമാർ, പ്രദേശവാസികൾ വിനോദസഞ്ചാരികൾ എന്നിവർ ചേർന്ന് മരംമുറിച്ചു വലിയ തടികൾ ഉരുട്ടി റോഡരികിലേക്ക് മാറ്റി. മരംവീണ് ഗതാഗതതടസം നേരിട്ട വിവരം അറിഞ്ഞ നെല്ലിയാമ്പതി ഫോറസ്റ്റ് സ്റ്റേഷൻ ഡെപ്യൂട്ടി റേഞ്ച് ഓഫീസർ ജയേന്ദ്രൻ, ബിഎഫ്ഒമാരായ വി. അഭിലാഷ്, എസ്. പ്രമോദ്, സിവിൽ പോലീസ് ഓഫീസറായ എസ്. സുനിൽ എന്നിവരും ഗതാഗതം നിയന്ത്രിച്ചു.

നെല്ലിയാമ്പതിയിൽ കാടുകയറ്റിയ കാട്ടാന വീണ്ടുമെത്തി

നെല്ലിയാമ്പതി: സീതാർഗുണ്ട് പോബ്സ് എസ്റ്റേറ്റിൽ പാടികൾക്ക് സമീപം വീണ്ടും കാട്ടാന എത്തി. അമ്പലപാടിക്ക് സമീപം രങ്കസാമിയുടെ വീടിനു പിന്നിൽ ഇന്നലെ രാത്രി മലമുകളിൽ നിന്ന് ഇറങ്ങി വന്ന കാട്ടുകൊമ്പൻ തൊഴിലാളികൾ താമസിക്കുന്ന പാടികൾക്ക് സമീപം എത്തി നിലയുറപ്പിച്ചു. പ്രദേശത്ത് ആനയെത്തിയതു രങ്കസ്വാമിയാണ് കണ്ടത്. തുടർന്ന് അയൽക്കാരും നായ്ക്കളും ശബ്ദം ഉണ്ടാക്കിയതിനെ തുടർന്ന് കാട്ടാന സമീപത്തെ കാപ്പിത്തോട്ടത്തിൽ കൂടി മെയിൻ റോഡിൽ ഇറങ്ങി. ഇന്നലെ രാവിലെ 6.15 ന് രാത്രിഡ്യൂട്ടി കഴിഞ്ഞ് വരുന്ന ഗേറ്റ് വാച്ചർ വിജയനും വൈദ്യുതി ഫ്യൂസ് കെട്ടാൻ പോയി വരുന്ന എസ്റ്റേറ്റ് ഇലക്ട്രീഷൻ ജോൺസൻ എന്നിവർ കുതിരപാടി വളവിൽ ആനയ്ക്ക് മുമ്പിൽപെട്ടു. ബൈക്ക് ഉപേക്ഷിച്ച് ഇരുവരും ഓടി രക്ഷപ്പെടുകയായിരുന്നു. ആന ഗേറ്റിന് സമീപംവരെ വന്നെങ്കിലും പിന്നീട് പിന്തിരിഞ്ഞ് കാപ്പിത്തോട്ടം വഴി വെട്ടിയാർ കാട്ടിലേക്ക് കയറിപ്പോയതായി തൊഴിലാളികൾ പറഞ്ഞു. കഴിഞ്ഞ കുറച്ചു ദിവസങ്ങളായി നെല്ലിയാമ്പതി മേഖലയിൽ എത്തിയ കാട്ടുകൊമ്പനെ ഉൾവനത്തിലേക്ക് കയറ്റിവിടാൻ കൊല്ലങ്കോട് റേഞ്ച് ഓഫീസറുടെ നേതൃത്വത്തിൽ ആർആർടി സംഘം ശ്രമം നടത്തിയിരുന്നു. പകൽ പടക്കംപൊട്ടിച്ചും മറ്റും ആനയെ അകറ്റിയെങ്കിലും രാത്രിയോടെ ആന വീണ്ടും വരുന്നത് എസ്റ്റേറ്റ് തൊഴിലാളികൾക്ക് ഭീഷണിയായി മാറി. കാപ്പി തോട്ടത്തിനുള്ളിലും എസ്റ്റേറ്റ് പാടികൾക്കും സമീപമുള്ള പ്ലാവുകളിലെ ചക്ക തേടിയാണ് സ്ഥിരമായി നെല്ലിയാമ്പതിയിൽ മേഖലയിൽ കാണാത്ത അക്രമാസക്തനായ കാട്ടാന എത്തുന്നതെന്ന് തൊഴിലാളികളും വനം വാച്ചർമാരും പറഞ്ഞു. തമിഴ്നാട് വനം ജീവനക്കാർ സേത്തുമട ഭാഗത്തു നിന്ന് കാടുകയറ്റിയ ആനയാണെന്ന് സംശയിക്കുന്നതായി വനം വാച്ചർമാർ പറയുന്നു. മഴക്കാലമായതിനാൽ പ്ലാവുകളിൽ കയറി ചക്ക വെട്ടിമാറ്റി കാട്ടാന ഭീഷണി ഒഴിവാക്കാനും കഴിയാത്ത സ്ഥിതിയാണ്.

കരിമ്പ പാലളം അങ്കണവാടിയിൽ പാമ്പിനെ കണ്ടെത്തി

കല്ലടിക്കോട്: കരിമ്പ പാലളം ഭാഗത്തുള്ള അങ്കണവാടിയിലെ മേൽക്കൂരയിൽ പാമ്പിനെ കണ്ടെത്തി. അങ്കണവാടി അധ്യാപികയും സഹായിയുമാണ് കണ്ടത്. നാട്ടുകാരെ അറിയിച്ചതോടെ നാട്ടുകാരെത്തി പാമ്പിനെ അങ്കണവാടിയുടെ ഓടിനു മുകളിലൂടെ പുറത്തേക്ക് തള്ളിയിട്ടു. സമീപത്തെ കാട്ടിലേക്ക് പോയതായി നാട്ടുകാർ പറഞ്ഞു. വിഷമുള്ള പാമ്പാണെന്നാണ് നാട്ടുകാർ പറയുന്നത്. അല്ലെന്നും അഭിപ്രായം ഉണ്ട്. ഇന്നലെ വൈകുന്നേരം നാലുമണിയോടെയാണ് സംഭവം. അവധിയായിരുന്നതിനാൽ കുട്ടികൾ ഉണ്ടായിരുന്നില്ല. അധ്യാപികയും സഹായിയുമാണ് ഉണ്ടായിരുന്നത്. ജോലികഴിഞ്ഞു വീട്ടിലേക്ക് മടങ്ങാനുള്ള തയ്യറെടുപ്പിനിടയിൽ കുട്ടികൾ ഇരിക്കാറുള്ള ഹാളിന്‍റെ മേൽക്കൂരയിൽ പട്ടികകൾക്കിടയിലായി പാമ്പിനെ കാണുകയായിരുന്നു. ഉടനെ അടുത്തുള്ള ആളുകളെ വിവരം അറിയിക്കുകയാണ് ഉണ്ടായത്. കുട്ടികൾ ഇല്ലാതിരുന്നത് വലിയൊരു ആശ്വാസമായി.

ഓഫീസ് പിടിക്കാനുള്ള ശ്രമം സംഘർഷത്തിൽ കലാശിച്ചു

പാലക്കാട്: കോട്ടായിയിൽ കോണ്‍ഗ്രസിന്‍റെ മണ്ഡലം പ്രസിഡന്‍റ് സിപിഎമ്മിൽ ചേർന്നതിന് പിന്നാലെ മണ്ഡലം കമ്മിറ്റി ഓഫീസ് പിടിച്ചെടുക്കാനുള്ള നീക്കം സംഘർഷത്തിൽ കലാശിച്ചു. ഇന്നലെ രാവിലെ സിപിഎം ജില്ലാ കമ്മിറ്റി ഓഫീസിൽ വെച്ചാണ് മോഹൻകുമാറും 13 അംഗങ്ങളും സിപിഎം ജില്ലാ സെക്രട്ടറി ഇ.എൻ. സുരേഷ് ബാബുവിന്‍റെ പക്കൽ നിന്ന് അംഗത്വം സ്വീകരിച്ചത്. തുടർന്ന് കോട്ടായി മണ്ഡലം ഓഫീസ് തുറന്ന് സിപിഎം കൊടി നാട്ടാൻ ശ്രമിച്ചതോടെ കോണ്‍ഗ്രസ് പ്രവർത്തകർ പ്രതിരോധിക്കാനെത്തി. ഇരുവിഭാഗവും തമ്മിലുണ്ടായ സംഘർഷം നിയന്ത്രണാധീനമായതിനെ തുടർന്ന് പോലീസ് ലാത്തി വീശിയാണ് പ്രവർത്തകരെ വിരട്ടിയോടിച്ചത്. ലാത്തി ചാർജിൽ ഒരു സിപിഎം പ്രവർത്തകന് പരിക്കേറ്റു. ഡിസിസി നേതൃത്വത്തോട് ഇടഞ്ഞ് നിൽക്കുന്ന മോഹൻകുമാർ പാർട്ടി വിടുന്നതിന് മുന്പ് ചെന്നൈയിലുള്ള കെട്ടിട ഉടമയുമായി സംസാരിക്കുകയും കോണ്‍ഗ്രസ് പാർട്ടി ഓഫീസ് സമയത്തെ കുടിശിക തീർത്ത് കെട്ടിടം തന്‍റെ പേരിൽ എഗ്രിമെന്‍റ് എഴുതി വാങ്ങുകയായിരുന്നു. ഇതിന് പിന്നാലെയാണ് സിപിഎമ്മിൽ അംഗത്വം സ്വീകരിച്ചതും പാർട്ടി ഓഫീസ് കൈയടക്കാനും ശ്രമം നടത്തിയത്. ഇരുവിഭാഗങ്ങളും ഉറച്ച നിലപാടെടുത്തതോടെ പോലീസ് തീരുമാനം ആർഡിഒ വിന് വിടുകയും പ്രവർത്തകരെ ഒഴിപ്പിച്ച് ഓഫീസ് പൂട്ടുകയും ചെയ്തു. പോലീസ് കാവലും ഓഫീസിന് മുന്നിൽ ഏർപ്പെടുത്തിയിട്ടുണ്ട്്. ഇന്നലെ രാത്രി 9.30യോടെ സിപിഎമ്മിൽ ചേർന്ന കോട്ടായി മണ്ഡലം പ്രസിഡന്‍റ് കെ. മോഹൻകുമാറിന്‍റെ നേതൃത്വത്തിൽ സിപിഎം പ്രവർത്തകർ സംഘടിച്ച് എത്തി ഓഫീസിന്‍റെ താഴ് തകർത്ത് സിപിഎം കൊടി സ്ഥാപിച്ചു. പോലീസ് കാവൽ നിൽക്കെയാണ് നൂറുകണക്കിന് പ്രവർത്തകർ ഓഫീസ് തകർത്ത് ആധിപത്യം സ്ഥാപിച്ചത്. പോലീസിന്‍റെ ഒത്താശയോടെയാണ് സിപിഎം പ്രവർത്തകർ ഓഫീസ് തകർത്ത് കയറിയതെന്ന് കോണ്‍ഗ്രസ് നേതാക്കൾ ആരോപിച്ചു. ഇതിനെതിരേ ശക്തമായി പ്രതിഷേധിക്കുമെന്ന് നേതാക്കൾ അറിയിച്ചു.

മഴ കനത്തു; ശാന്തിനഗർ നിവാസികൾക്ക് ഇനി ഉറക്കമില്ലാത്ത രാത്രികൾ

ഒറ്റപ്പാലം: കാലവർഷം ശക്തമായതോടെ ശാന്തിനഗർ കോളനിക്കാർക്ക് ഇനി ഉറക്കമില്ലാത്ത രാവുകൾ. ഒറ്റപ്പാലം നഗരത്തിനുള്ളിലാണ് വീടുകളിൽ വെള്ളം കയറുമെന്ന് ഭയന്ന് നിരവധി കുടുംബങ്ങൾ കഴിയുന്നത്. ഓരോ മഴ പെയ്യുമ്പോഴും കനത്ത ആശങ്കയിലാണിവർ. കണ്ണിയംപുറം തോട്ടിൽ ഒഴുക്കിന് തടസമായി മുറിച്ചിട്ടിരുന്ന മരങ്ങൾ നീക്കിയെങ്കിലും തോട്ടിൽ ഒഴുക്ക് സുഗമമല്ല. മഴ ശക്തമായി പെയ്താൽ തോട് കരകവിഞ്ഞ് വീടുകളിലേക്കെത്തുമെന്ന കാര്യം ഉറപ്പാണ്. ‌50-തിലേറെ കുടുംബങ്ങൾ താമസിക്കുന്ന ശാന്തിനഗറിൽ കഴിഞ്ഞ ജൂലൈയിൽ പെയ്ത ശക്തമായ മഴയിൽ വെള്ളപ്പൊക്കമുണ്ടായി കുടുംബങ്ങൾക്ക് മാറിത്താമസിക്കേണ്ട സ്ഥിതി വന്നിരുന്നു. ആറടിയിലേറെ ഉയരത്തിൽ വെള്ളം പൊങ്ങിയിരുന്ന പ്രദേശത്തുനിന്ന് അഗ്നിരക്ഷാസേനയെത്തിയാണ് പലരെയും സുരക്ഷിതകേന്ദ്രങ്ങളിലേക്ക്‌ മാറ്റിയിരുന്നത്. 2018-ലും 2019-ലും തോട്ടിൽ വെള്ളമുയർന്ന് സമാനരീതിയിലുള്ള പ്രശ്നങ്ങൾ ശാന്തിനഗറുകാർക്ക് അഭിമുഖീകരിക്കേണ്ടി വന്നിരുന്നു. ഇത്തവണയും ഇത് ആവർത്തിക്കുമോ എന്ന് ആശങ്കയിലാണ് ഇവിടെയുള്ളവർ. മഴ ശക്തമായി തുടർന്നാൽ തോട് കരകവിഞ്ഞൊഴുകും എന്ന കാര്യം ഉറപ്പാണ്. തോടിന്‍റെ ഇരുവശങ്ങളും കോൺക്രീറ്റ് ചെയ്ത് ഉയർത്തണമെന്നും മണ്ണും ചെളിയും നീക്കി ഇതിന്‍റെ ആഴം കൂട്ടണമെന്നും കാലങ്ങളായി ഈ പ്രദേശത്തുകാരുടെ ആവശ്യമാണ്. എന്നാൽ അധികൃതർ ആരും ഇത് ചെവികൊള്ളുന്നില്ലെന്ന് മാത്രം. ഇത്തവണയും സാധനങ്ങൾ മുറുക്കികെട്ടി ഒഴിഞ്ഞുപോകാനുള്ള സാഹചര്യവും നോക്കിയിരിക്കുകയാണ് ഇവിടത്തുകാർ.

ലിസ്യൂ മെട്രിക്കുലേഷൻ ഹയർ സെക്കൻഡറി സ്കൂളിൽ പഠനവർഷാരംഭവും സ്റ്റുഡന്‍റ്സ് കാബിനറ്റ് ഉദ്ഘാടനവും

കോയമ്പത്തൂർ: സായിബാബ കോളനി ലിസ്യൂ മെട്രിക്കുലേഷൻ ഹയർ സെക്കൻഡറി സ്കൂളിൽ പഠനവർഷാരംഭവും സ്റ്റുഡന്‍റ്സ് കാബിനറ്റിന്‍റെ ഉദ്ഘാടനവും നടന്നു. പ്രിൻസിപ്പൽ റവ.ഡോ. (അഡ്വ.) ജോയ് അറയ്ക്കലിന്‍റെ നേതൃത്വത്തിലായിരുന്നു പരിപാടികൾ. സ്കൂൾ കറസ്പോണ്ടന്‍റ് റവ.ഡോ. ഫിലിപ്സ് പൊന്തേക്കൻ അധ്യക്ഷത വഹിച്ചു. സിആർപിഎഫ് (റിട്ട.) പോലീസ് ഐജി ടി. ചന്ദ്രശേഖർ, ബ്യൂട്ടി പേജന്‍റ് ഡോ. ഗായത്രി നടരാജൻ, ജർമ്മനിയിൽ നിന്നുള്ള വിദ്യാർഥിനിയായ ഫ്രെഡെറിക് എന്നിവർ ചടങ്ങിൽ മുഖ്യാതിഥികളായിരുന്നു. 10, 11, 12 ക്ലാസുകളിലെ പൊതു പരീക്ഷകളിൽ വിജയിച്ചവരെ ചടങ്ങിൽ ആദരിച്ചു. പൂർവവിദ്യാർഥി സംഘടന പ്രസിഡന്‍റ് രാകേഷ് മേനോൻ, അഡ്മിനിസ്ട്രേറ്ററും സ്റ്റാഫ് സെക്രട്ടറിമാരുമായ ഫാ. ലിൻജോ ജോസഫ്, സുകന്യ, മേരി ടീന പ്രസംഗിച്ചു.

കോയന്പത്തൂരിന്‍റെ പ്രതീക്ഷകളിലേക്കു ശിരുവാണി ഡാം ജലനിരപ്പുയരുന്നു

കോയന്പത്തൂർ: ശിരുവാണി അണക്കെട്ടിലെ ജലനിരപ്പ് വീണ്ടും ഉയർന്നു. കേരള സംസ്ഥാനത്തിനകത്തു സ്ഥിതിചെയ്യുന്ന അട്ടപ്പാടി ശിരുവാണി അണക്കെട്ടാണ് കോയമ്പത്തൂർ മുനിസിപ്പൽ കോർപ്പറേഷന്‍റെ പ്രധാന കുടിവെള്ള സ്രോതസ്. ഈ അണക്കെട്ടിൽ 49.53 അടി വെള്ളം സംഭരിക്കാൻ കഴിയുമെങ്കിലും സുരക്ഷാ കാരണങ്ങളാൽ പരമാവധി 44.61 അടി മാത്രമേ സംഭരിക്കുന്നുള്ളൂ. ഇന്നലത്തെ കണക്കനുസരിച്ച് ഡാമിലെ ജലനിരപ്പ് നിലവിൽ 43.13 അടിയാണ്. ശിരുവാണി അണക്കെട്ട് പ്രദേശത്ത് 147 മില്ലിമീറ്റർ മഴ പെയ്തതായും അധികൃതർ അറിയിച്ചു. പ്രതിദിനം 100 എംഎൽഡി വെള്ളമാണ് കോർപറേഷന്‍റെ കീഴിലുള്ള പ്രദേശങ്ങളിൽ വിതരണം ചെയ്യുന്നത്.

പെരുവെമ്പിൽ ഉന്നതവിജയികളെ ആദരിച്ചു

പെരുവെമ്പ്: യൂത്ത് കോൺഗ്രസ്‌ പെരുവെമ്പ് മണ്ഡലം കമ്മിറ്റിയുടെ നേതൃത്വത്തിൽ എസ്എസ്എൽസിയിലും പ്ലസ്ടുവിലും ഫുൾ എപ്ലസ് കരസ്ഥമാക്കിയ വിദ്യാർഥികളെ ആദരിക്കുകയും പഠനോപകരണങ്ങൾ വിതരണവും ചെയ്തു. ഡിസിസി പ്രസിഡന്‍റ് എ. തങ്കപ്പൻ ഉദ്ഘാടനം ചെയ്തു. മണ്ഡലം പ്രസിഡന്‍റ് അജീഷ് അധ്യക്ഷത വഹിച്ചു. ഡിസിസി ജനറൽ ജനറൽ സെക്രട്ടറി കെ.എം. ഫെബിൻ, ബ്ലോക്ക്‌ കോൺഗ്രസ്‌ വൈസ് പ്രസിഡന്‍റ് വി. ബാബു, സർവീസ് സഹകരണ ബാങ്ക് പ്രസിഡന്‍റ് കെ. മോഹനൻ, കോൺഗ്രസ്‌ മണ്ഡലം പ്രസിഡന്‍റ് പി. സുരേഷ് ബാബു, യൂത്ത് കോൺഗ്രസ്‌ ജില്ലാ സെക്രട്ടറി പി.വി. വത്സൻ, ബ്ലോക്ക്‌ കോൺഗ്രസ്‌ സെക്രട്ടറി വി. ജയദാസ്, വാർഡ് മെംബർ കെ. ശോഭന, യൂത്ത് കോൺഗ്രസ്‌ നിയോജകമണ്ഡലം സെക്രട്ടറി ഷാഹിദ് എന്നിവർ പ്രസംഗിച്ചു .

മണ്ഡലത്തിലെ 3480 ഉന്നതവിജയികളെ അനുമോദിച്ച് വി.കെ. ശ്രീകണ്ഠൻ എംപി

പാലക്കാട്: മണ്ഡലത്തിലെ 3480 വിദ്യാർഥികളെ നേരിട്ട് അനുമോദിച്ച് വി.കെ. ശ്രീകണ്ഠൻ എംപി. തന്‍റെ മണ്ഡലത്തിൽ ഉൾപ്പെടുന്ന എല്ലാ സ്കൂളുകളിലെയും കഴിഞ്ഞ എസ്എസ്എൽസി, പ്ലസ്ടു പരീക്ഷകളിൽ ഫുൾ എപ്ലസ് കിട്ടിയ വിദ്യാർഥികളെ ആറു വിവിധ പ്രദേശങ്ങളിൽ സംഘടിപ്പിക്കുന്ന പരിപാടിയിലാണ് ആദരിച്ചത്. പട്ടാമ്പി, മണ്ണാർക്കാട്, ചെർപ്പുളശ്ശേരി, ഒറ്റപ്പാലം, കരിമ്പ, പാലക്കാട് എന്നിവിടങ്ങളിലായി നടത്തിയ അനുമോദന സദസുകളിൽ വിദ്യാർഥികളോടൊപ്പം അവരുടെ രക്ഷകർത്താക്കളും പങ്കെടുത്തു. എക്സലൻസ് അവാർഡ് സമ്മാനിക്കുന്നതിനൊപ്പം ഉപരിപഠനത്തിനാവശ്യമായ ബോധവത്കരണക്ലാസും സംഘടിപ്പിച്ചു. സൈലം ലേണിംഗ് എന്ന സ്ഥാപനവുമായി സഹകരിച്ച് മികച്ച പരിശീലകരെ എത്തിച്ചാണ് ക്ലാസുകൾ നടത്തിയത്. പാലക്കാട്, മലമ്പുഴ നിയോജകമണ്ഡലത്തിലെ വിദ്യാർഥികളെ കഴിഞ്ഞ ദിവസം കാണിക്കമാത സ്കൂൾ ഓഡിറ്റോറിയത്തിൽ നടന്ന പരിപാടിയിലാണ് അനുമോദിച്ചത്. ചടങ്ങിൽ സൈലം ലേണിംഗ് കോ- ഓർഡിനേറ്റർ ജിൻസി അധ്യക്ഷത വഹിച്ചു. സിനിമാതാരം ഷാജു ശങ്കർ, മറിമായം ഫെയിം റിയാസ്, സലിം എന്നിവർ വിശിഷ്ടാതിഥികളായി. കെപിസിസി ജനറൽ സെക്രട്ടറി കെ.എ. തുളസി, മാത്തൂർ പഞ്ചായത്ത് വൈസ് പ്രസിഡന്‍റ് പി. പ്രസാദ്, നഗരസഭാ കൗൺസിലർമാരായ മിനി ബാബു, അനുപമ പ്രശോഭ്, മൻസൂർ മണലാഞ്ചേരി, എ. കൃഷ്ണൻ, മലമ്പുഴ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് കെ. വാസു, പാലക്കാട് മണ്ഡലം യുഡിഎഫ് കൺവീനർ സുധാകരൻ പ്ലാക്കാട്ട് എന്നിവർ പങ്കെടുത്തു.

300 ഏക്കർ നെൽകൃഷിക്കു ഞാറ്റടി ഒരുങ്ങുന്നു

പാലക്കാട്: എലപ്പുള്ളിയിലെ രാമശേരി ഗാന്ധി ആശ്രമവും പാലക്കാടൻ കർഷകമുന്നേറ്റവും ചേർന്ന് നടപ്പിലാക്കുന്ന സംഘകൃഷി പദ്ധതിയിൽ 300 ഏക്കർ നെൽകൃഷിക്കുള്ള ഞാറ്റടി തയാറാവുന്നു. പ്രാദേശികമായി കൃഷി ചെയ്തെടുത്ത ഗുണനിലവാരമുള്ള വിത്തുപാകിയാണ് ഞാറ്റടി തയാറാക്കിയിട്ടുള്ളത്. ഇതിൽ 200 ഏക്കറിൽ കൃഷി ചെയ്യുന്നതിനുള്ള കർഷകർ ബുക്കിംഗ് ചെയ്തുകഴിഞ്ഞു. ബാക്കി 100 ഏക്കറിലേക്കുള്ള കർഷകരുടെ ബുക്കിംഗ് തുടരുകയാണ്. ഞാറ്റടി ഒരുമിച്ച് തയാറാക്കിയതുപോലെ നടീൽ ചെയ്യുന്നതിനുള്ള തൊഴിലാളികളെ പദ്ധതിയുടെ ലേബർബാങ്കിൽനിന്ന് ഒരുമിച്ചു നൽകും. കരാറടിസ്ഥാനത്തിലാണ് തൊഴിലാളികൾ നടീൽ ചെയ്യുക. തുടർന്ന് നടക്കുന്ന കളവലി, വളപ്രയോഗം, പുല്ലുവെട്ടൽ, സ്പ്രേയർ ഉപയോഗം, കൊയ്ത്ത്, നെല്ലുണക്കൽ തുടങ്ങി പണികൾക്കെല്ലാം തൊഴിലാളികളെ ലേബർബാങ്കിൽനിന്ന് ഒരുമിച്ചു നൽകുന്നതിനു വേണ്ട ക്രമീകരണങ്ങൾ നടത്തുന്നുണ്ട്. കൊയ്ത്തുയന്ത്രം, ട്രാക്ടർ, റൊട്ടവേറ്റർ, ലേസർ ലെവലിംഗ് യന്ത്രം തുടങ്ങി സംവിധാനങ്ങളും ഒരുക്കുന്നുണ്ട്. നിലവിൽ ഞാറ്റടി തയാറാക്കിയ കർഷകർക്ക് ലേബർബാങ്കിൽനിന്ന് ആവശ്യമുള്ള തൊഴിലാളികളെ എത്തിച്ച് നടീൽ ചെയ്തുകൊടുക്കുന്നതിനും സംവിധാനം ഒരുക്കിയിട്ടുണ്ട്. ഏറ്റവും ചെലവു കുറഞ്ഞ രീതിയിലും ശാസ്ത്രീയമായും യന്ത്രോപകരണങ്ങൾ പ്രയോജനപ്പെടുത്തിയും കൃഷി ചെയ്യുന്നതിന് കർഷകരെ സഹായിക്കുക എന്ന ലക്ഷ്യത്തോടെയാണ് സംഘകൃഷി പദ്ധതിക്ക് രൂപം നൽകിയിട്ടുള്ളത്. കഴിഞ്ഞ 10 വർഷമായി സംഘകൃഷി പദ്ധതിക്ക് നേതൃത്വം നൽകുന്ന വിദഗ്ധരുടെ സഹായത്തോടെയാണ് പദ്ധതി നടപ്പിലാക്കുന്നതെന്ന് രാമശേരി ഗാന്ധി ആശ്രമത്തിന്‍റെയും പാലക്കാടൻ കർഷക മുന്നേറ്റത്തിന്‍റെയും ഭാരവാഹികൾ പറഞ്ഞു. ബാക്കി 100 ഏക്കറിലേക്കുള്ള ബുക്കിംഗ് ചെയ്യാൻ താത്പര്യമുള്ള കർഷകർ 9447483106 എന്ന നന്പറിൽ ബന്ധപ്പെടണമെന്നും അധികൃതർ അറിയിച്ചു.

നെൽകർഷകരുടെ ആനുകൂല്യങ്ങൾ വെട്ടിക്കുറയ്ക്കുന്നെന്ന് ആക്ഷേപം

ജോജി തോമസ് നെന്മാറ: നെൽകൃഷി പ്രോത്സാഹിപ്പിക്കുന്നെന്നു പറയുന്പോഴും സർക്കാർ കർഷകർക്കു നൽകിവന്ന ആനുകൂല്യങ്ങൾ വെട്ടിക്കുറയ്ക്കുന്നതായി പരാതി. ലാഭകരമല്ലാത്തതിനാൽ നെൽകൃഷി ഉപേക്ഷിക്കുന്നവരും തരിശിടുന്നതും വർധിച്ചതിനെതുടർന്നാണ് സർക്കാർ നെൽകർഷകർക്ക് ആനുകൂല്യങ്ങൾ നൽകിത്തുടങ്ങിയത്. ഭക്ഷ്യസ്വയംപര്യാപ്തത ഉറപ്പുവരുത്താൻ സംസ്ഥാനത്തുതന്നെ അരിയുത്പാദനം വർധിപ്പിക്കാനും ലക്ഷ്യമിട്ടിരുന്നു. ഇതിന്‍റെ ഭാഗമായാണ് പലപ്പോഴായി ആനുകൂല്യങ്ങൾ നൽകിത്തുടങ്ങിയത്. ബജറ്റ് പ്രഖ്യാപനങ്ങളിൽ വൻതുക കാർഷിക ആനുകൂല്യങ്ങളായി പ്രഖ്യാപിക്കാറുണ്ടെങ്കിലും വിതരണംചെയ്യേണ്ട സമയത്ത് ഫണ്ട് അനുവദിക്കാതെയും സാമ്പത്തിക ഞെരുക്കത്തിന്‍റെയും പേരിൽ ബജറ്റ് വിഹിതം വെട്ടിക്കുറക്കുന്നതിലൂടെയും ആനുകൂല്യങ്ങൾ കടലാസിൽ ഒതുങ്ങുന്നതായാണ് പരാതി. ഹെക്ടറിന് ആയിരംരൂപ നിരക്കിൽ നെൽകർഷകർക്ക് സംസ്ഥാന സർക്കാർ നൽകിയിരുന്ന 2019 മുതൽ 2023 വരെയുള്ള ഉത്പാദന ബോണസ് സർക്കാർ കുടിശികയാക്കി. പിന്നീട് വിതരണം ചെയ്തില്ല. എന്നാൽ 2024ൽ ഇതു ആയിരംരൂപയ്ക്കുപകരം 500 രൂപയായി വെട്ടിക്കുറച്ചു. ഇതിന്‍റെയും കുടിശികത്തുക നൽകിയില്ല. സർക്കാർ ജീവനക്കാർ, പെൻഷൻകാർ, തുടങ്ങിയ വിഭാഗക്കാർക്ക് ക്ഷാമബത്തയും പരിഷ്കരണ ആനുകൂല്യങ്ങളും ക്ഷേമപെൻഷനും കുടിശിക ഉൾപ്പെടെ നൽകുമ്പോഴാണ് കാർഷിക ആനുകൂല്യങ്ങൾ കുടിശികയാക്കുന്നതും വെട്ടിക്കുറയ്ക്കുന്നതും. സുസ്ഥിര നെൽകൃഷി വികസന പദ്ധതി പ്രകാരം ഹെക്ടറിന് 5500 രൂപ നൽകാറുള്ളത് 2024ൽ ഒന്നാംവിളയ്ക്ക് സാമ്പത്തിക ഞെരുക്കത്തിന്‍റെ പേരിൽ പകുതിയായി വെട്ടിക്കുറച്ചു. ഇത് രണ്ടാംവിളയ്ക്കു നൽകിയില്ല. നെൽകൃഷിക്ക് സബ്സിഡി നിരക്കിൽ ചുണ്ണാമ്പ് വിതരണം ചെയ്യുന്നതും നേർപകുതിയാക്കി വെട്ടിക്കുറച്ചു. 2021 മുതൽ നിലവിലുണ്ടായിരുന്ന നെല്ലിന്‍റെ താങ്ങുവില കേന്ദ്രസർക്കാർ വർധിപ്പിക്കുന്നതിന് സമാനമായ തുക സംസ്ഥാനസർക്കാർ വിഹിതത്തിൽനിന്ന് കുറയ്ക്കുന്നതോടെ സർക്കാർ താങ്ങുനില പ്രകാരമുള്ള സംഭരണ വില കഴിഞ്ഞ അഞ്ചുവർഷമായി കുറച്ചുവരികയാണ്. കേന്ദ്രസർക്കാറിന്‍റെ കാലാവസ്ഥാ വിള ഇൻഷ്വറൻസ് ആനുകൂല്യം 2023 മുതൽ വിതരണം നിലച്ചിരിക്കുകയാണ്. സംസ്ഥാന സർക്കാറിന്‍റെ വിള ഇൻഷ്വറൻസ് പദ്ധതിയും പ്രീമിയംസ്വീകരിക്കൽ പദ്ധതി മാത്രമായി ചുരുങ്ങി. കർഷകരുടെ അക്കൗണ്ടുകളിലേക്ക് ആനുകൂല്യങ്ങൾ നേരിട്ടു കൈമാറുന്ന രീതി വന്നതോടെ കർഷകർക്ക് ലഭിക്കുന്ന ആനുകൂല്യങ്ങൾ എത്രയെന്നോ, എത്ര കിട്ടിയെന്നോ, എത്ര കിട്ടാനുണ്ടെന്നോ എന്ന വിവരംപോലും ലഭ്യമല്ലാതായതോടെയാണ് ആനുകൂല്യങ്ങൾ സർക്കാർ വെട്ടിച്ചുരുക്കാൻ തുടങ്ങിയത്.

വടക്കഞ്ചേരി- മണ്ണുത്തി ദേശീയപാതയിൽ യാത്ര അതികഠിനം

വടക്കഞ്ചേരി: വെള്ളക്കെട്ടും കുഴികളും കുരുക്കുകൂട്ടാൻ മേൽപ്പാലങ്ങളുടെ നിർമാണവുമായി വടക്കഞ്ചേരി- മണ്ണുത്തി ആറുവരി ദേശീയപാതയിയിലൂടെയുള്ള യാത്ര അതികഠിനം. വാണിയംപാറ, കല്ലിടുക്ക്, മുടിക്കോട് എന്നിവിടങ്ങളിലാണ് മേൽപ്പാലം നിർമാണം നടക്കുന്നത്. ഇതിൽ കല്ലിടുക്കിലാണ് ഏതുസമയവും വലിയ കുരുക്ക് രൂപപ്പെടുന്നത്. ഇന്നലെ രാവിലെ മണിക്കൂറിലേറെ സമയമെടുത്താണ് വാഹനങ്ങൾ കടന്നുപോയിരുന്നത്. ദിവസവും ഇതാണവസ്ഥ. തൃശൂർ ഭാഗത്തേക്കുള്ള വാഹനങ്ങളാണ് കൂടുതലും കുരുക്കിൽ കുടുങ്ങിക്കിടക്കുന്നത്. ചില സമയങ്ങളിൽ രണ്ടുമൂന്നു കിലോമീറ്റർ ദൂരം വാഹനങ്ങൾ കുടുങ്ങികിടക്കും. മേൽപ്പാലങ്ങളുടെ പണികൾ നടക്കുന്നതിനാൽ സർവീസ് റോഡിലൂടെയാണ് വാഹനങ്ങൾ തിരിച്ചുവിടുന്നത്. എന്നാൽ ഈ സർവീസ് റോഡുകൾ പൊട്ടിപ്പൊളിഞ്ഞ് വലിയ കുഴികളാണ്. ഇതിനാൽ വാഹനങ്ങൾ കുഴിയിൽ ഇറങ്ങിക്കയറി പോകാൻ ഏറെ സമയമെടുക്കും. ഒറ്റവരിയായി പോകേണ്ട സർവീസ് റോഡിലെ കുഴികളെല്ലാം യഥാസമയം മൂടി വാഹനങ്ങൾക്ക് വേഗത്തിൽ കടന്നു പോകാൻ വഴിയൊരുക്കിയിരുന്നെങ്കിൽ ഇത്രയേറെ കുരുക്കുണ്ടാകില്ല. അത്യാവശ്യങ്ങൾക്ക് പോകുന്ന ആയിരക്കണക്കിനു യാത്രക്കാരാണ് അധികൃതരുടെ അനാസ്ഥയിൽ കഷ്ടപ്പെടുന്നത്. എയർപോർട്ടിലേക്കും റെയിൽവേ സ്റ്റേഷനിലേക്കും ചികിത്സകൾക്കും ജോലിക്കും മറ്റു അത്യാവശ്യങ്ങൾക്കുമായി പോകുന്ന യാത്രക്കാർക്കാണ് വഴിയിൽകിടന്ന് വിഷമിക്കേണ്ട ഗതികേടുണ്ടാകുന്നത്. പോലീസിന്‍റെ സേവനം കാര്യക്ഷമമല്ലാത്തതും കുരുക്കുകൂടാൻ കാരണമാകുന്നുണ്ട്. സ്വകാര്യ ബസുകൾ ഉൾപ്പെടെ വാഹനങ്ങൾ കുത്തിക്കയറി കുരുക്കുമുറുകും. യാതൊരു നാഥനില്ലാത്ത വിധമാണ് ദേശീയപാതയിലെ സ്ഥിതി. വാഹനക്കുരുക്കിന് പരിഹാരം കാണാൻ കളക്ടർമാർ ഇടപെട്ട് അടിയന്തര നടപടി സ്വീകരിക്കണമെന്നാണ് യാത്രക്കാർ ആവശ്യപ്പെടുന്നത്. മഴപെയ്താൽ റോഡിലുണ്ടാകുന്ന വെള്ളക്കെട്ട് മൂലമുള്ള അപകടങ്ങളും കുറവല്ല. കൊമ്പഴ ഭാഗത്ത് രണ്ടടിയോളം ഉയരത്തിലാണ് റോഡിൽ വെള്ളം കെട്ടിനിൽക്കുന്നത്. ഇതിലൂടെ വാഹനങ്ങൾ കടന്നുപോകുമ്പോൾ നിയന്ത്രണം തെറ്റി ട്രാക്കുകൾ മാറുന്നത് കൂട്ടിയിടിക്കു കാരണമാകുന്നുണ്ട്. വാഹനങ്ങൾ വേഗതയിൽ കടന്നു പോകുമ്പോൾ പത്തടിയോളം വെള്ളംപൊങ്ങി കാഴ്ച മറയുന്ന സാഹചര്യവുമുണ്ട്.

വാച്ചുകളും പണവും നഷ്ടപ്പെട്ടു; ക്ഷേത്രത്തിലും മോഷണശ്രമം

വടക്കഞ്ചേരി: ടൗണിനോടുചേർന്ന് വിനായക സ്ട്രീറ്റിലെ ഉഷാദേവിയുടെ വീട്ടിലും ഗണപതി ക്ഷേത്രത്തിലും മോഷണം. ശനിയാഴ്ച അർധരാത്രി പന്ത്രണ്ടിനും ഒരുമണിക്കും ഇടയിലാണ് മോഷണം നടന്നിട്ടുള്ളത്. മോഷ്ടാവിന്‍റേതെന്നു സംശയിക്കുന്ന ദൃശ്യം സിസി ടിവിയിൽ പതിഞ്ഞിട്ടുണ്ട്. ഉഷാദേവിയുടെ വീട്ടിൽനിന്നും രണ്ടുവാച്ചുകളും ക്ഷേത്രത്തിലേക്ക് നിക്ഷേപിക്കാനായി സൂക്ഷിച്ച ചില്ലറത്തുട്ടുകളുമാണ് മോഷണം പോയിട്ടുള്ളത്. കൊട്ടിയൂർ ക്ഷേത്രദർശനം കഴിഞ്ഞ് ഇന്നലെ രാവിലെ വീട്ടുകാർ എത്തിയപ്പോഴാണ് മോഷണവിവരം അറിഞ്ഞത്. സമീപത്തെ ഗണപതി ക്ഷേത്രത്തിലെ സിസി ടിവി കാമറ പരിശോധിച്ചതിലാണ് ഗണപതി ക്ഷേത്രത്തിലും മോഷണം നടത്താനുള്ള ശ്രമം മോഷ്ടാവ് നടത്തുന്നതായുള്ള ദൃശ്യങ്ങളും കണ്ടെത്തിയത്. പിറകുവശം വഴി ഉഷാദേവിയുടെ വീട്ടിലേക്ക് മോഷ്ടാവ് പോകുന്നതിന്‍റെ ദൃശ്യവും സിസി ടിവിയിലുണ്ട്. ഇവരുടെ വീടിന്‍റെ പൂട്ടുതകർത്താണ് മോഷ്ടാവ് അകത്തു കയറിയിരിക്കുന്നത്. അലമാരയും മറ്റും കുത്തിപ്പൊളിച്ച നിലയിലാണ്. വടക്കഞ്ചേരി സിഐ കെ.പി. ബെന്നിയുടെ നേതൃത്വത്തിലുള്ള സംഘം സ്ഥലത്തെത്തി അന്വേഷണം ആരംഭിച്ചു.

അട്ടപ്പാടിചുരം ഒന്പതാംവളവിൽ പാറക്കല്ലുവീണ് ആറുമണിക്കൂറോളം ഗതാഗതം മുടങ്ങി

മണ്ണാർക്കാട്: അട്ടപ്പാടി ചുരത്തിലെ ഒന്പതാംവളവിൽ കൂറ്റൻ പാറക്കല്ലുവീണ് ആറുമണിക്കൂറോളം ഗതാഗതം മുടങ്ങി. 20 അടി ഉയരത്തിൽനിന്നുമാണ് കൂറ്റൻ പാറക്കല്ല് റോഡിലേക്കു വീണത്. ഇന്നലെ ഉച്ചയ്ക്ക് ശേഷം മൂന്നോടെയായിരുന്നു സംഭവം. ഈസമയം റോഡിൽ വാഹനങ്ങളില്ലാത്തതിനാൽ വൻദുരന്തം ഒഴിവായി. ചുരത്തിലെ ഗതാഗതം പൂർണമായും നിലച്ചു. ഇരുഭാഗത്തുനിന്നും എത്തിയ ജനങ്ങൾ ആറുമണിക്കൂറോളം ചുരത്തിൽ കുടുങ്ങി. അപകടമുണ്ടായ സ്ഥലത്തുനിന്ന് ചുരത്തിന്‍റെ ഇരുഭാഗത്തേക്കും വാഹനങ്ങളുടെ നീണ്ടനിരയായിരുന്നു. മണ്ണാർക്കാട്ടുനിന്നും ആംബുലൻസിലാണ് വെള്ളം ഉൾപ്പെടെ ചുരത്തിൽ കുടുങ്ങിയവർക്ക് എത്തിച്ചുനൽകിയത്. വൈകുന്നേരം നാലുമണിയോടെ മണ്ണാർക്കാട് തഹസിൽദാറിന്‍റെ നേതൃത്വത്തിലുള്ള റവന്യൂസംഘവും പോലീസും അഗ്നിരക്ഷാസേനയും വിവിധ സന്നദ്ധ സംഘടനാ പ്രവർത്തകരും സ്ഥാലത്തെത്തി റോഡിലെ പാറയുംമണ്ണും ഒഴിവാക്കുന്നതിനുള്ള നടപടികൾ തുടങ്ങി. രാത്രി ഏഴിനാണ് പാറപൊട്ടിക്കുന്നതിനുള്ള മെഷീൻ അടങ്ങിയ വാഹനമെത്തിയത്. ചുരത്തിലെ കനത്ത മഴ പ്രവർത്തനങ്ങൾക്കു തടസമായി. മണ്ണാർക്കാട് ആനമൂളിയിലും അട്ടപ്പാടി മുക്കാലിയിലും വാഹനങ്ങളെ പോലീസ് തിരിച്ചുവിട്ടു. ചുരത്തിൽ കുടുങ്ങിയ ചെറിയ വാഹനങ്ങളെയും തിരിച്ചുവിട്ടു. രാത്രി എട്ടോടെയാണ് പാറ പൊട്ടിക്കൽ നടപടി പൂർത്തിയായത്. ഒന്പതിനു ഗതാഗതം പുനഃസ്ഥാപിക്കാനായി. രാത്രിയിൽ ചുരത്തിലൂടെ യാത്ര ചെയ്യുന്നവർ ജാഗ്രത പാലിക്കണമെന്നു റവന്യൂവകുപ്പ് മുന്നറിയിപ്പു നൽകിയിട്ടുണ്ട്.

ഷോളയൂർ സെന്‍റ് ആന്‍റണീസ് പള്ളി തിരുനാൾ കൊടിയിറങ്ങി

അഗളി: ഷോളയൂർ സെന്‍റ് ആന്‍റണീസ് പള്ളിയിൽ തിരുനാൾ ആഘോഷങ്ങൾക്കു കൊടിയിറങ്ങി. സമാപനത്തോടനുബന്ധിച്ച് ഇന്നലെ നടന്ന തിരുകർമങ്ങൾക്ക് പുല്ലിശ്ശേരി സെന്‍റ് മേരിസ് പള്ളി വികാരി ഫാ. കുര്യാക്കോസ് മാരിപ്പുറത്ത് മുഖ്യകാർമികത്വം വഹിച്ചു. കാരറ സെന്‍റ് ജോസഫ് പള്ളിവികാരി ഫാ. ജോഷി പുത്തൻപുരക്കൽ സന്ദേശം നൽകി. സ്വർണപ്പിരിവ് കുരിശടിയിലേക്കു വാദ്യമേള അകമ്പടിയോടെ പ്രദക്ഷിണം, സ്നേഹവിരുന്ന്, കുട്ടികളുടെ വിവിധ കലാപരിപാടികൾ എന്നിവയുണ്ടായി. ഇടവക വികാരി ഫാ. തോമസ് കുളമ്പള്ളിൽ, തിരുനാൾ കൺവീനർ ജെയിംസ് പോളക്കാടൻ, കൈക്കാരന്മാരായ ജോസഫ് പാലിതൈ, വർഗീസ് താന്നിപ്പള്ളിൽ നേതൃത്വം നൽകി.

ദേശീയപാത കൊടക്കാട്ട് വാഹനങ്ങളുടെ കൂട്ടയിടി: രണ്ടുപേർക്കു പരിക്ക്

മണ്ണാർക്കാട്: കോഴിക്കോട്- പാലക്കാട് ദേശീയപാത മേലെ കൊടക്കാട്ട് വാഹനങ്ങളുടെ കൂട്ടയിടി. രണ്ടുപേർക്കു പരിക്കേറ്റു. ഇന്നലെ വൈകുന്നേരം അഞ്ചിനായിരുന്നു സംഭവം. നിയന്ത്രണംതെറ്റിയ കാർ ഓട്ടോറിക്ഷയിൽ ഇടിക്കുകയും ഇടിയുടെ ആഘാതത്തിൽ നിയന്ത്രണം തെറ്റിയ ഓട്ടോറിക്ഷ നിർത്തിയിട്ട ചരക്കുലോറിക്കു പിന്നിൽ ഇടിച്ചുമാണ് അപകടം. ഓട്ടോ ഡ്രൈവർ റഷീദിനു പരിക്കേറ്റു. കാർ ഡ്രൈവർ നിസാരപരിക്കുകളോടെ രക്ഷപ്പെട്ടു. രണ്ടുപേരുടേയും പരിക്ക് ഗുരുതരമല്ല. ഇടിയുടെ ആഘാതത്തിൽ കാറിന്‍റെ മുൻഭാഗം പൂർണമായും തകർന്നു. ഓട്ടോറിക്ഷ റോഡിൽ മറിഞ്ഞു. ഓട്ടോറിക്ഷയിൽ നിന്നും ഇന്ധന ചോർച്ചയുണ്ടായി. അഗ്നിരക്ഷാസേനയും നാട്ടുകാരും ചേർന്നാണ് റോഡ് വൃത്തിയാക്കിയത്.

വന്യമൃഗശല്യത്തിനു നിയമനിർമാണത്തിലൂടെ പരിഹാരം കാണണം: കത്തോലിക്ക കോൺഗ്രസ്

വടക്കഞ്ചേരി: വന്യമൃഗശല്യത്തിനു നിയമനിർമാണത്തിലൂടെ പരിഹാരം കാണണമെന്ന് കത്താലിക്കാ കോൺഗ്രസ് വടക്കഞ്ചേരി ഫൊറോനസമിതി യോഗം ആവശ്യപ്പെട്ടു. ഇതിനു സംസ്ഥാന സർക്കാർ താത്പര്യമെടുക്കണം. പ്രസംഗത്തിനൊപ്പം പ്രവൃത്തിയിലും കർഷകരെ രക്ഷിക്കുന്ന സമീപനമുണ്ടാകണം. കിഴക്കഞ്ചേരി, മംഗലംഡാം മേഖലകളിൽ വർധിച്ചുവരുന്ന വന്യമൃഗശല്യത്തിന് അധികൃതരുടെ ഭാഗത്തുനിന്നുള്ള നിസംഗത തുടരുന്നതു ഇനിയും കണ്ടുനിൽക്കാനാവില്ല. പനംകുറ്റി, പാലക്കുഴി പ്രദേശങ്ങളിൽ ആന ഉൾപ്പെടെയുള്ള വന്യമൃഗങ്ങൾ ഇറങ്ങി കൃഷിനാശമുണ്ടാക്കുന്നത് നിത്യസംഭവമായി മാറിയിരിക്കുന്നു. പകൽപോലും വന്യമൃഗശല്യം രൂക്ഷമായ പ്രദേശത്ത് സ്കൂളിൽ പോകുന്ന കുട്ടികളും ജോലിക്കുംമറ്റുംപോകുന്ന സ്ത്രീകൾ, വയോധികർ ഉൾപ്പെടെയുള്ളവരും ഏറെ ഭയത്തോടെയാണ് യാത്രചെയ്യുന്നത്. പല പ്രദേശങ്ങളിലും വനാതിർത്തിയിൽ നിന്നും ഏറെ കിലോമീറ്റർ താഴെയിറങ്ങിയാണ് വന്യമൃഗങ്ങൾ നാട്ടിലെത്തുന്നത്. ഇതുമൂലം കർഷകർക്ക് കൃഷിയിറക്കാൻ കഴിയാത്ത അവസ്ഥയാണിപ്പോൾ. നാട്ടിൽ സുലഭമായിരുന്ന കപ്പ, കാച്ചിൽ, ചേമ്പ് തുടങ്ങിയവയൊക്കെ ഇന്ന് അന്യമാകുന്ന സ്ഥിതിയായി. ഇതിനെല്ലാം ഇപ്പോൾ തീവിലയാണെന്നും യോഗം ചൂണ്ടിക്കാട്ടി. കൃഷി നാശമുണ്ടായ കർഷകർക്ക് നഷ്ടപരിഹാരം നൽകാൻ വൈകരുതെന്നും യോഗം ആവശ്യപ്പെട്ടു. ഡയറക്ടർ ഫാ.അഡ്വ. റെജി മാത്യു പെരുമ്പിള്ളിൽ ഉദ്ഘാടനം ചെയ്തു. ഫൊറോന പ്രസിഡന്‍റ് ഡെന്നി തെങ്ങുംപള്ളി അധ്യക്ഷത വഹിച്ചു. ജിജോ അറക്കൽ, ജോസ് വടക്കേക്കര, വിത്സൻ കൊള്ളന്നൂർ, ടെന്നി അഗസ്റ്റ്യൻ, ബെന്നി ആന്‍റണി, റെനി അറക്കൽ, ദീപ ബൈജു, അഡ്വ. റോസ്മിൻ ഡെന്നി എന്നിവർ പ്രസംഗിച്ചു.

പുലയന്പാറയിലെ അഴുക്കുചാലുകൾ വൃത്തിയാക്കി സന്നദ്ധപ്രവർത്തകർ

നെന്മാറ: അഴുക്കുചാലിൽ കുന്നുകൂടിക്കിടന്ന മാലിന്യങ്ങൾ ശ്രമദാനത്തിലൂടെ നീക്കംചെയ്തു. നെല്ലിയാമ്പതി പുലയമ്പാറ ടൗണിലെ അഴുക്കുചാലുകളിലെ മാലിന്യ കൂമ്പാരങ്ങളുമാണ് സന്നദ്ധ പ്രവർത്തകർ വൃത്തിയാക്കിയത്. ഏറെകാലമായി ഹോട്ടൽ, റിസോർട്ട് മാലിന്യങ്ങളും ചപ്പുചവറുകളും വന്നടിഞ്ഞാണ് ഓടകൾ നിറഞ്ഞും പാതയോരത്തു കുമിഞ്ഞുകൂടിയും ദുർഗന്ധം പരത്തിയിരുന്നത്. സന്നദ്ധ പ്രവർത്തകനായ പി.ഒ. ജോസഫിന്‍റെ നേതൃത്വത്തിൽ സ്റ്റീഫൻ, വേണു എന്നിവരും നെല്ലിയാമ്പതി ഗവ. ഓറഞ്ച് ആൻഡ് വെജിറ്റിബിൾ ഫാമിലെ ജീവനക്കാരായ നാരായണൻകുട്ടി, വാസിം, മഹേഷ്, റപ്പായി എന്നിവരും ഒത്തുചേർന്ന് കഴിഞ്ഞ രണ്ടുദിവസം കൊണ്ടാണ് പ്രദേശത്തെ മാലിന്യം നീക്കിയത്.

പറമ്പിക്കുളം തൂണക്കടവിലെ വിദ്യാർഥികൾക്ക് പഠനോപകരണങ്ങൾ വിതരണംചെയ്തു

മുതലമട: പറമ്പിക്കുളം ജനമൈത്രി പോലീസിന്‍റെ നേതൃത്വത്തിൽ ജിടിഡബ്ല്യുഎൽപി എസ്, തമിഴ്നാട് എൽപി സ്കൂൾ വിദ്യാർഥികൾക്കും പഠനോപകരണങ്ങൾ വിതരണം ചെയ്തു. പാലക്കാട് ഓൾ ഇന്ത്യാ എംപ്ലോയീസ് അസോസിയഷന്‍റെ സഹകരണത്തിൽ നടന്ന പഠനോപകര വിതരണം സബ്ഇൻസ്പെക്ടർ ടി.സി. റോയ് മോൻ ഉദ്ഘാടനം ചെയ്തു. ജനമൈത്രി ബീറ്റ് ഓഫീസർമാരായ സന്തോഷ് , കെ. ശിവകുമാർ, അസോസിയേഷൻ ജില്ലാ സെക്രട്ടറി കെ. സന്തോഷ്, ഷാഹിൻ പരമേശ് ,സജു, ബിനിത, സ്കൂൾ അധ്യാപകർ, ജീവനക്കാർ പങ്കെടുത്തു.

എംഇടി സ്കൂളിൽ വിദ്യാർഥികളെ അനുമോദിച്ചു

മണ്ണാർക്കാട്: എംഇടി സ്കൂളിൽ മെറിറ്റ് ഫിയസ്റ്റ - 2025ചടങ്ങ് സംഘടിപ്പിച്ചു. യുഎസ്എസ്, എൽഎസ്എസ്, എംടിഎസ്ഇ , എസ്എസ്എൽസി വിജയികളെ അനുമോദിക്കുന്ന ചടങ്ങിൽ ഗതാഗത വകുപ്പ് സെക്രട്ടറി പി.ബി. നൂഹ് അവാർഡ് ദാനം നിർവഹിച്ചു. കൂടാതെ റോബോട്ടിക്സ്, ആർട്ടിഫിഷ്യൽ ഇന്‍റലിജന്‍റ്സ് ലാബുകളുടെ ഉദ്ഘാടനവും നിർവഹിച്ചു. സ്കൂൾ പ്രിൻസിപ്പൽ വിദ്യാ അനൂപ് സ്വാഗതം പറഞ്ഞു. എംഇടി പ്രസിഡന്‍റ് സി. മുരളികുമാർ അധ്യക്ഷനായി. ചടങ്ങിൽ എംഇടി സെക്രട്ടറി ജോബ് ഐസക്, എംഇടി ട്രസ്റ്റ് മെംബർ എം. പുരുഷോത്തമൻ, വൈസ് പ്രസിഡന്‍റ് മത്തായി ഈപ്പൻ, ജോയിന്‍റ് സെക്രട്ടറി വിനു ജേക്കബ്, അക്കാദമിക് കൗൺസിൽ ചെയർമാൻ പ്രഫസർ സാബു ഐപ്പ് , ഡയറക്ടർ ബോർഡ് അംഗങ്ങളായ കെ.എ. ശിവദാസൻ, ബാസിത് മുസ്ലിം, ടി.കെ. സുബ്രഹ്്മണ്യൻ, പിടിഎ പ്രസിഡന്‍റ് അബു താഹിർ എന്നിവർ പ്രസംഗിച്ചു. വൈസ് പ്രിൻസിപ്പൽ എൻ.കെ. രോഹിണി നന്ദി പറഞ്ഞു.

വടക്കഞ്ചേരി മംഗലംപാലത്ത് വാഹനങ്ങൾ അപകടത്തിൽപ്പെട്ടു

വടക്കഞ്ചേരി: വാളയാർ - വടക്കഞ്ചേരി ദേശീയപാതയിൽ മംഗലംപാലത്ത് മിനിലോറി ജീപ്പിനു പുറകിലിടിച്ചു. ഇടിയുടെ ശക്തിയിൽ മുന്നോട്ടുനീങ്ങിയ ജീപ്പ് മുന്നിലുണ്ടായിരുന്ന കെഎസ്ആർടിസി സ്വിഫ്റ്റ് ബസിനു പിന്നിലുമിടിച്ചു. ഇന്നലെ രാത്രിയായിരുന്നു അപകടം. ദേശീയപാതയിലെ അറ്റകുറ്റപ്പണിയുടെ ഭാഗമായി മംഗലംപാലത്ത് ഗതാഗതകുരുക്കുണ്ടായിരുന്നു. ഇതേതുടർന്ന് നിർത്തിയിട്ട ജീപ്പിനു പിറകിൽ നിയന്ത്രണം തെറ്റിവന്ന മിനിലോറി ഇടിക്കുകയായിരുന്നു. അപകടത്തിൽ ആർക്കും പരിക്കില്ല. ഹൈവേ പോലീസ് സ്ഥലത്തെത്തി മേൽനടപടികൾ സ്വീകരിച്ചു. അശ്രദ്ധമായി വാഹനമോടിച്ചതിനു ലോറി ഡ്രൈവർക്കെതിരെ വടക്കഞ്ചേരി പോലീസ് കേസെടുത്തു.

വയോജനങ്ങൾക്കു കട്ടിലുകൾ വിതരണം ചെയ്തു

പല്ലശ്ശന: ഗ്രാമപഞ്ചായത്തിന്‍റെ 2024- 25 സാന്പത്തിക വർഷത്തെ വാർഷിക പദ്ധതിയിൽ ഉൾപ്പെടുത്തി വയോജനങ്ങൾക്കു കട്ടിലുകൾ വിതരണം ചെയ്തു. വിതരണോദ്ഘാടനം പല്ലശ്ശന ഗ്രാമപഞ്ചായത്ത് പ്രസിഡന്‍റ് എൽ. സായ്‌രാധ നിർവഹിച്ചു. ജനറൽ വിഭാഗത്തിൽപ്പെട്ട 65 വയസിന് മുകളിലുള്ള വയോജനങ്ങൾക്കാണ് കട്ടിൽവിതരണം നടത്തിയത്. കൂടാതെ 60 വയസ്‌ പൂർത്തിയാകാത്ത ചലനശേഷി നഷ്ടപ്പെട്ടവരോ കിടപ്പുരോഗികളായവർക്കും കട്ടിലുകൾ നൽകി. 24,71,000 രൂപ വകയിരുത്തി 700 കട്ടിലുകളാണ് വിതരണം ചെയ്യുന്നത്. ഗ്രാമപഞ്ചായത്ത് വൈസ് പ്രസിഡന്‍റ് സി. അശോകൻ അധ്യക്ഷനായ പരിപാടിയിൽ കെ. അനന്തക്യഷ്ണൻ, കെ. പുഷ്പലത, പി. വാസന്തി, ഉദ്യോഗസ്ഥർ, വയോജനങ്ങൾ എന്നവർ പങ്കെടുത്തു.

പൊറ്റശേരി ഹയർ സെക്കൻഡറി സ്കൂളിൽ വിജയോത്സവം

കാഞ്ഞിരപ്പുഴ: പൊറ്റശേരി ഗവ. ഹയർ സെക്കൻഡറി സ്കൂളിൽ 2024-25 അധ്യയനവർഷത്തെ വിജയോത്സവം- സിംഫണി ഓഫ് സിനർജി നടത്തി. കഴിഞ്ഞ വർഷത്തെ പൊതുപരീക്ഷകളിൽ മികച്ച വിജയം നേടിയ വിദ്യാർഥികളെ അനുമോദിക്കാനായി സംഘടിപ്പിച്ച ചടങ്ങ് കാഞ്ഞിരപ്പുഴ ഗ്രാമപഞ്ചായത്ത് പ്രസിഡന്‍റ് സതി രാമരാജൻ ഉദ്ഘാടനം ചെയ്തു. ഹയർ സെക്കൻഡറി പരീക്ഷയിൽ മുഴുവൻ മാർക്കും നേടിയ എം. രമ്യശ്രീയെ അഭിനന്ദിച്ചു. ഗ്രാമപഞ്ചായത്ത് മെംബർ പി. രാജൻ അധ്യക്ഷത വഹിച്ച ചടങ്ങിൽ ചലച്ചിത്ര നിരൂപകൻ ജി.പി. രാമചന്ദ്രൻ മുഖ്യപ്രഭാഷണം നടത്തി. പ്രിൻസിപ്പൽ പി. സന്തോഷ്കുമാർ, ഹെഡ്മിസ്ട്രസ് ടി. സബിത, പിടിഎ പ്രസിഡന്‍റ് കെ.എസ്. സുനേഷ്, എസ്. മൂർത്തി, പിടിഎ ഭാരവാഹികളായ അബ്ദുൾ നാസർ, എം. വിശ്വനാഥൻ, പ്രജിത, ദിവ്യ അച്യുതൻ, ബി. ജ്യോതിശ്രീ, ഹൃദ്യ കൃഷ്ണ, എം. റിതിക, പി.എസ്. ആരതി എന്നിവർ പ്രസംഗിച്ചു.

ഡെയ്ഞ്ച ഉഴുതുമറിക്കലിനും കർഷകനു വൻചെലവ്

ചിറ്റൂർ: ഡെയ്ഞ്ച ഉഴുതുമറിക്കലിനും വൻചെലവെന്നു കർഷകർ. ഡെയ്ഞ്ച മണ്ണിന്‍റെ ജൈവാവസ്ഥ കൂട്ടുമെങ്കിലും സമയത്തിന് ഉഴുതുമറിച്ച് മണ്ണിനുള്ളിലാക്കിയില്ലെങ്കിൽ തണ്ടിനു മൂപ്പുകൂടി കൃഷിച്ചെലവ് ഏറുമെന്നാണ് കർഷകർ പറയുന്നത്. മൂപ്പുകൂടിയ തണ്ടുകൾ ചെളിയിലലിഞ്ഞുചേരില്ല. കൂടാത വെള്ളത്തിൽ പൊങ്ങിക്കിടക്കും. ഡെയ്ഞ്ച വിതച്ച് വളർന്നത് മണ്ണിനുള്ളിലാക്കണമെങ്കിൽ ഒരു ഏക്കർകൃഷിക്ക് 2000രൂപ ഉഴവുകൂലി നൽകണം. ഞാറുവളർന്ന് നടീൽ നടത്തണമെങ്കിൽ വീണ്ടും ട്രാക്ടർ ഉഴുതുമറിക്കണമെങ്കിൽ ചെലവ് ഇരട്ടിയായി വർധിക്കുന്നുമുണ്ട്. മഴക്കെടുതിയിൽ നശിച്ച കർഷകർക്കുകിട്ടിയ ഉമ വിത്ത് ഞാറുപാകിയതും ഇപ്പോൾതന്നെ കനത്തമഴയിൽ മുങ്ങുമെന്നതാണ് നല്ലേപ്പിള്ളിയിലെ വിവിധ പാടശേഖര സമിതികളെ ആശങ്കപ്പെടുത്തുന്നത്. കാലവർഷ സമയത്തെ രോഗങ്ങളെയും മറ്റു പ്രതിസന്ധികളെയും അതിജീവിക്കേണ്ട ഗതികേടിലാണ് കർഷകർ.

വാണിയങ്കോട്ടെ എആർസി ഗാർഡൻ മിനിഅഗ്രികൾച്ചർ യൂണിവേഴ്സിറ്റി

ഫ്രാൻസിസ് തയ്യൂർ വടക്കഞ്ചേരി: മിനിഅഗ്രികൾച്ചർ യൂണിവേഴ്സിറ്റിയാണ് 18 വർഷംമുമ്പ് സംസ്ഥാന സർക്കാരിന്‍റെ കേരകേസരി പട്ടം ലഭിച്ചിട്ടുള്ള വണ്ടാഴി ചാമക്കാട് വീട്ടിൽ സി.ആർ. ഭവദാസിന്‍റെ കിഴക്കഞ്ചേരി വാണിയങ്കോടുള്ള 23 ഏക്കർ കൃഷിയിടം. മണ്ണുത്തി കാർഷിക സർവകലാശാലയിലെ വിദ്യാർഥികളും അവിടുത്തെ ശാസ്ത്രസംഘവും കർഷകസംഘങ്ങളും കൃഷിവകുപ്പിലെ മറ്റു ഉദ്യോഗസ്ഥരുമെല്ലാം തീയറികൾക്കപ്പുറം കർഷകന്‍റെ അനുഭവത്തിലൂടെ കൃഷിയെ ആധികാരികമായി പഠിക്കാനും അറിയാനുമായി ഓടിയെത്തുന്നത് ഈ തോട്ടത്തിലാണ്. കഴിഞ്ഞ ദിവസവും മണ്ണുത്തി അഗ്രികൾച്ചർ യൂണിവേഴ്സിറ്റിയിൽ നിന്നും പ്രഫ. ഭാവന സജീവിന്‍റെ നേതൃത്വത്തിൽ അഗ്രികൾച്ചർ കോഴ്സിലെ വിദ്യാർഥികളുടെ വലിയ ഒരുപടതന്നെ ഇവിടെയെത്തിയിരുന്നു. ചിട്ടയായ പരിപാലന രീതികളാണ് ഈ സമ്മിശ്രകൃഷിത്തോട്ടത്തിന്‍റെ മനോഹാരിത. തെങ്ങും ജാതി മരങ്ങളും കവുങ്ങും മാവും പ്ലാവും തുടങ്ങിയ ഇനങ്ങൾ തോട്ടത്തിന്‍റെ കരഭാഗങ്ങളിലായി നിറഞ്ഞു നിൽക്കുമ്പോൾ കൃഷിയിടത്തിലെ മധ്യത്തിലാണ് നെൽകൃഷി. അഞ്ച് ഏക്കറിലുണ്ട് നെൽകൃഷി. മത്സ്യക്കുളം, പച്ചക്കറി സെക്്ഷൻ, റമ്പൂട്ടാൻ, മാങ്കോസ്റ്റിൻ തുടങ്ങിയ പഴവർഗ തോട്ടങ്ങൾ, ജാതി ഉൾപ്പെടെയുള്ള ഇടവിളകൾ അങ്ങനെ കർഷകർക്ക് കണ്ടു കൊതിതീരാത്തത്രയുണ്ട് തോട്ടത്തിലെ സമ്മിശ്ര വിളവിശേഷങ്ങൾ. കായ് ഫലം നിറഞ്ഞു തൂങ്ങുന്ന 50 വർഷം പ്രായമായ തെങ്ങുകളാണ് തോട്ടത്തിലെ ഹൈലൈറ്റ്. നാടൻ ഇനം (ഡ്ബ്ലുസിടി) 600 തെങ്ങുണ്ട്. 1964ൽ അച്ഛൻ രാമചന്ദ്രൻ 23 ഏക്കറുള്ള ഈ സ്ഥലം രാമനാഥ അയ്യരിൽ നിന്നും വാങ്ങുന്നത് ഒന്നുമില്ലാത്ത തരിശുഭൂമിയായിട്ടായിരുന്നു. അച്ഛമ്മ കുഞ്ചയായിരുന്നു കൃഷി വിദഗ്ദ്ധ.1975 മുതൽ കൃഷി കാര്യങ്ങളുടെ പൂർണ ചുമതല ഏറ്റെടുത്തതോടെ കൃഷി പിന്നെ ഹരമായി മാറിയെന്നു വടക്കഞ്ചേരി ടൗണിൽ ഹാർഡ്‌വെയർ ബിസിനസ് നടത്തിയിരുന്ന ഭവദാസൻ പറഞ്ഞു. ഇവിടെ ഇപ്പോൾ 600 തെങ്ങുകൾക്കു പുറമെ മോഹിദ് നഗർ, കാസർഗോഡ് നാടൻ ഇനങ്ങളിലായി 1200 കവുങ്ങ്, തെങ്ങിൻ തോട്ടത്തിൽ ഇടവിള യായി 20 വർഷം പ്രായമായ ജാതിമരങ്ങൾ 500 എണ്ണം, എട്ടിനങ്ങളിലായി 125 മാവുകൾ, കടും ചുവപ്പ് ചുളയുള്ള ചക്ക ഉൾപ്പെടെ വിവിധയിനം പ്ലാവിനങ്ങൾ, കുള്ളൻ കവുങ്ങുകൾ, കവുങ്ങുകളിലെല്ലാം കുരുമുളക് തുടങ്ങി കൗതുകമുണർത്തുന്ന കാഴ്ചകളാണ് എആർസി ഗാർഡനിലുള്ളത്. പച്ചക്കറി മുഴുവൻ ജൈവകൃഷി രീതിയിലാണ്. മറ്റു കൃഷികൾ സെമി ഓർഗാനിക് സിസ്റ്റത്തിലൂടെയാണ് സംരക്ഷിക്കുന്നത്. മറ്റു എല്ലായിടത്തും തെങ്ങുകൾക്ക് വെളളീച്ച രോഗബാധ വ്യാപകമായി തെങ്ങുകൾ കൂട്ടത്തോടെ നശിച്ചുപോകുമ്പോഴും എആർസി ഗാർഡനിൽ രോഗബാധയില്ലാത്തത് പഠിക്കാനും ഇവിടെ ശാസ്ത്ര സംഘങ്ങളെത്തുന്നുണ്ട്.

നെല്ലിയാമ്പതി ജനവാസ മേഖലയിൽ കാട്ടാനകൾ; തോട്ടം തൊഴിലാളികൾ ഭീതിയിൽ

നെല്ലിയാമ്പതി: ജനവാസമേഖലയിൽ പകൽ കാട്ടാനയെത്തിയതോടെ തോട്ടം തൊഴിലാളികൾ ഭീതിയിലായി. കാപ്പി, കമുക് തുടങ്ങിയ കൃഷി നശിപ്പിച്ചു. നെല്ലിയാമ്പതി സീതാർഗുണ്ട് പോബ്സ് എസ്റ്റേറ്റിൽ കാപ്പിത്തോട്ടത്തിനകത്ത് രണ്ട് കാട്ടാനകൾ നിലയുറപ്പിച്ചതോടെ സാമൂഹിക പ്രവർത്തകനായ വി.എസ്. പ്രസാദ് വനംവകുപ്പ് അധികൃതരെ അറിയിക്കുകയും കൊല്ലങ്കോട് ഫോറസ്റ്റ് റേഞ്ച് ഓഫീസർ പ്രമോദിന്‍റെ നേതൃത്വത്തിൽ ആർആർടി സംഘമെത്തുകയും കാട്ടാനകളെ മണിക്കൂറുകൾക്കു ശേഷം ഉൾക്കാട്ടിലേക്ക് തുരത്തുകയും ചെയ്തു. കഴിഞ്ഞ ദിവസം രാത്രി 11 മണിയോടുകൂടി നെല്ലിയാമ്പതി ചന്ദ്രമല എസ്റ്റേറ്റിലെ ഊത്തുക്കുഴി ഡിവിഷനിലെ സൂപ്പർവൈസർ ശോഭനയുടെ വീടിന്‍റെ മുന്നിലെയും പിന്നിലേയും ഷെഡ് ആന വന്ന് പൊളിച്ചു. വീടിന്‍റെ മുന്നിലെ പ്രധാനവാതിൽ തട്ടിത്തുറന്ന് തുമ്പിക്കൈ വാതിലിലൂടെ കടത്തി വീട്ടിനകത്തുള്ള കുറെ സാധനങ്ങളെടുത്ത് പുറത്തേക്ക് എറിയുകയും ചെയ്തു. വീട്ടിനകത്ത് പഴുത്ത ചക്ക ഉണ്ടായിരുന്നതിനാൽ അതിന്‍റെ മണം കിട്ടിയതിനാലാണ് ചില്ലികൊമ്പനെ പോലെ തോന്നുന്ന വേറൊരു ആനയാണ് വന്നതെന്നും പ്രദേശവാസികൾ പറഞ്ഞു.

കാട്ടുപന്നിക്കൂട്ടം കൃഷി നശിപ്പിച്ചു

നെന്മാറ: കാട്ടുപന്നിക്കൂട്ടം വീട്ടുവളപ്പിലെ കൃഷി നശിപ്പിച്ചു. കരിമ്പാറ തളിപ്പാടം എ. കുട്ടിരാജൻ, എ. വാസു എന്നിവരുടെ കൃഷിയിടങ്ങളിലാണ് കാട്ടുപന്നിക്കൂട്ടം വ്യാപകകൃഷി നാശം ഉണ്ടാക്കിയത്. ഇരുമ്പ് നെറ്റ് വേലി സ്ഥാപിച്ച കുട്ടി രാജന്‍റെ കൃഷിയിടത്തിലെ നൂറോളം ചുവട് കപ്പ, പച്ചക്കറികൾ, വാഴ എന്നിവ നശിപ്പിച്ചിട്ടുണ്ട്. രാജന്‍റെ വീട്ടിലെ സ്കൂൾ വിദ്യാർഥികളായ കുട്ടികൾ താലോലിച്ചു വളർത്തിയ വഴുതന, വെണ്ട, പയർ എന്നിവയും കുത്തിമറിച്ച് നശിപ്പിച്ചു. വാസുവിന്‍റെ കൃഷിയിടത്തിൽ ഒരാഴ്ച മുമ്പ് നട്ട പത്തോളം റബർ തൈകളും കാട്ടുപന്നിക്കൂട്ടം കുത്തിമറിച്ചു. രണ്ടുപേർക്കുമായി പതിനായിരം രൂപയുടെ നഷ്ടമുണ്ടായതായി കണക്കാക്കുന്നു. അത്യുത്പാദനശേഷിയുള്ള ആമ്പക്കാടൻ ഇനത്തിൽപ്പെട്ട തുടങ്ങിയ കപ്പകൃഷിയാണ് നശിപ്പിച്ചത്. റബറിന് നിലമൊരുക്കലിന്‍റെ ഭാഗമായി തയാറാക്കിയ പ്ലാറ്റ് ഫോം ഉഴുതുമറിച്ച രീതിയിൽ കുത്തിമറിച്ച് റബർ തൈകൾ ഉൾപ്പെടെ നാശം വരുത്തി. രാത്രിയിലെ മഴയിൽ കാട്ടുപന്നിക്കൂട്ടം എത്തിയത് വീട്ടുകാർ അറിഞ്ഞില്ല. മാസങ്ങൾക്ക് മുമ്പ് ഈ വീട്ടിലെയും സമീപവീട്ടിലെയും നായകളെ പുലി പിടിച്ചതോടെ വീട്ടിൽ നായകളും ഇല്ലാതായി. ഇത് കാട്ടുപന്നികൾക്ക് കൃഷിയിടം വ്യാപകമായ തോതിൽ നാശം വരുത്താൻ സൗകര്യമായി. മേഖലയിലെ കൃഷിയിടങ്ങളിൽ കാട്ടുപന്നികൾ വരാറുണ്ടെങ്കിലും വീടിനോട് ചേർന്ന് കൃഷിയിടങ്ങളിലേക്ക് കാട്ടുപന്നി സാധാരണ വരാറില്ലെന്ന് പ്രദേശത്തെ താമസക്കാർ പറഞ്ഞു. സമീപത്തെ വനമേഖലയോട് ചേർന്ന് സൗരോർജവേലി ഉണ്ടെങ്കിലും കാട്ടുപന്നികൾക്ക് സുഖമായി ഇതിനിടയിലൂടെ കടന്നുവരാൻ കഴിയുന്നുണ്ട്.

മലയോരപാതയുടെ അവഗണനക്കെതിരെ റോഡിലെ കുഴികളിൽ ഞാറ് നടീൽ സമരം

വടക്കഞ്ചേരി: കിഴക്കഞ്ചേരി കോ രഞ്ചിറയിൽ നിന്നു തുടങ്ങി വാൽകുളമ്പ് -പനംകുറ്റി വഴി പന്തലാംപാടം മേരിഗിരിയിലെത്തുന്ന മലയോരപാതയുടെ അവഗണനക്കെതിരെ യൂത്ത് കോൺഗ്രസ് കിഴക്കഞ്ചേരി മണ്ഡലം കമ്മിറ്റിയുടെ നേതൃത്വത്തിൽ റോഡിലെ ഭീമാകാരമായ കുഴികളിൽ ഞാറ് നടീൽ സമരം നടത്തി.മലയോരപാത പൂർണമായും തകർന്ന നിലയിലാണ്. വാഹനം ഓടിച്ചുപോകാൻ പറ്റാത്തവിധം ശോചനീയാവസ്ഥയിലാണ് റോഡ്. പാലക്കുഴി, കണച്ചിപരുത, മംഗലംഡാം മേഖലകളിലെ ജനങ്ങൾക്ക് വടക്കഞ്ചേരി വരാതെ പന്നിയങ്കരയിലെ ടോൾ ഒഴിവാക്കി തൃശൂർ ഭാഗത്തേക്ക് പോകാനുള്ള ഏറ്റവും എളുപ്പമാർഗമാണിത്. എന്നാൽ വർഷങ്ങളായി റോഡിൽ നവീകരണമില്ല. റീടാറിംഗിനായി ഒരു കോടി രൂപ അനുവദിച്ചെന്ന് രണ്ട് വർഷം മുമ്പ് എംഎൽഎ പറഞ്ഞിരുന്നെങ്കിലും അതിന്‍റെ വർക്കുകളൊന്നും റോഡിൽ നടന്നില്ല. ലവണപ്പാടത്ത് നടന്ന സമരപരിപാടി കോൺഗ്രസ് മണ്ഡലം പ്രസിഡന്‍റ് സി. ചന്ദ്രൻ ഞാറ് നട്ട് ഉദ്ഘാടനം ചെയ്തു. യൂത്ത് കോൺഗ്രസ് മണ്ഡലം പ്രസിഡന്‍റ് അരുൺ മാണിക്യത്തിൽ അധ്യക്ഷത വഹിച്ചു. ബ്ലോക്ക് വൈസ് പ്രസിഡന്‍റ് വി.ജെ. ജോസഫ് , മഹിളാ കോൺഗ്രസ് ജില്ലാ സെക്രട്ടറി ലീലാമ്മ ജോസഫ്, സുനിൽ എം. പോൾ, ബാബു മാസ്റ്റർ, ടി.കെ. ഉസനാർ, കെ.ജി. പ്രദീപ്, ബീന അരുൺ, വാർഡ് പ്രസിഡന്‍റ് റോയി എന്നിവർ പ്രസംഗിച്ചു.

സുരക്ഷയില്ലാതെ തൊഴിലാളികളുടെ യാത്ര

നെന്മാറ: സുരക്ഷാ മാനദണ്ഡങ്ങൾ പാലിക്കാതെ ഇതരസംസ്ഥാന തൊഴിലാളികൾ ജോലിക്കായി യാത്ര നടത്തുന്നു. നിർമാണ മേഖലയിലെ കോൺക്രീറ്റ് ജോലികൾക്കും കാർഷിക മേഖലയിലെ നടീലിനും തൊഴിലാളികൾ യാത്രചെയ്യുന്നത് ഇരിപ്പിടം പോലും ഇല്ലാത്ത തുറന്ന പെട്ടിഓട്ടോറിക്ഷകളിൽ. താമസസ്ഥലത്തുനിന്നും അതിരാവിലെ പുറപ്പെടുന്നവർ സ്ഥിരമായി പെട്ടി ഓട്ടോറിക്ഷ പോലെയുള്ളവയാണ് ഉപയോഗിക്കുന്നത്. പിടിച്ചിരിക്കാൻ യാതൊരു സൗകര്യമില്ലാത്ത പിൻവാതിലിൽ പോലും തിക്കിതിരക്കി യാത്ര ചെയ്യുന്നത് വഴിയാത്രക്കാരിലും ഭീതി ഉണ്ടാക്കുന്നു. കുഴികളും വളവും ചെരിവുമുള്ള റോഡുകളിൽ അതിവേഗം വാഹനത്തിൽ യാത്ര ചെയ്യുന്നത് അപകടഭീതി ഉളവാക്കുന്നു. അത്യാവശ്യഘട്ടത്തിൽ ഇത്തരം വാഹനങ്ങളിൽ യാത്ര ചെയ്യുന്നവർ പിടിച്ചിരിക്കാനും നിൽക്കാനുമായി വാഹനത്തിൽ കയറെങ്കിലും കെട്ടി യാത്ര ചെയ്യാൻ അധികൃതർ പ്രേരിപ്പിക്കണം എന്നും ആവശ്യം ഉയരുന്നു. കുറഞ്ഞ ചെലവിൽ യാത്ര ചെയ്യാമെന്ന സൗകര്യം കണക്കിലെടുത്താണ് തൊഴിലാളികൾ പണിക്കു പോകാനും തിരിച്ചുവരലും പെട്ടി ഓട്ടോ പോലുള്ള വാഹനങ്ങളെ ആശ്രയിക്കുന്നത്. വാഹനങ്ങൾ കുഴിയിലും മറ്റും പെട്ട് വശങ്ങളിൽ ഇരിക്കുന്നവർ ഉയർന്നു ചാടുന്നതിനാൽ പിറകിൽ വരുന്ന വാഹനക്കാർ മറികടക്കാൻ പോലും പേടിച്ച് കരുതലോടെയാണ് ഇതുമൂലം യാത്ര ചെയ്യേണ്ടിവരുന്നത്.

മുണ്ടൂർ-തൂത പാതയിലെ കാക്കാതോട് പാലം അപ്രോച്ച്റോഡ് നിർമാണം ഉടൻ പൂർത്തിയാക്കും

ഷൊർണൂർ: കാക്കാത്തോട് പാലത്തിന്‍റെ അപ്രോച്ച് റോഡ് നിർമാണം യുദ്ധകാലാടിസ്ഥാനത്തിൽ പൂർത്തീകരിക്കാൻ നടപടി. നവീകരണം നടക്കുന്ന മുണ്ടൂർ-തൂത പാതയിൽ വരുന്ന ചെർപ്പുളശേരി കാക്കാത്തോട് പാലത്തിന്‍റെ അപ്രോച്ച് റോഡ് നിർമാണമാണ് ഉടൻ പൂർത്തിയാക്കുന്നത്. ഞായറാഴ്ചയ്ക്കകം അപ്രോച്ച് റോഡ് നിർമാണം പൂർത്തിയാക്കി ഗതാഗതം നിയന്ത്രിതമായെങ്കിലും പുന:സ്ഥാപിക്കലാണ് പൊതുമരാമത്ത് വകുപ്പിന്‍റെ ലക്ഷ്യം. ഇതിനായി രാത്രിയും പകലുമായാണ് പണികൾ പുരോഗമിക്കുന്നത്. ഗതാഗതം തിരിച്ചുവിടാൻ താത്കാലികമായി തീരുമാനിച്ചിരുന്ന റോഡ് മഴയിൽ ഒലിച്ചുപോയി അപ്രതീക്ഷിതമായി ഗതാഗത തടസമുണ്ടായതാണ് നിർമാണത്തിൽ പ്രതിസന്ധിയായത്. നിലവിൽ അപ്രോച്ച് റോഡ് പാലത്തിന്‍റെ ഇരുവശങ്ങളിലും മുട്ടിക്കാനായി മണ്ണിടലും ഉറപ്പാക്കലുമാണ് നടക്കുന്നത്. പാലത്തിന് മുകളിലൂടെ നടക്കാൻ കുറച്ചുകൂടി സുരക്ഷിതമാർഗം പൊതുമരാമത്ത് വകുപ്പ് ഒരുക്കിയിട്ടുണ്ട്. കിഴക്ക് ഭാഗത്ത് മണ്ണിട്ട് ഉയർത്തിയാണ് ഇപ്പോൾ നടക്കാൻ സൗകര്യമാക്കിയിട്ടുള്ളതെന്ന് സ്റ്റേറ്റ് ട്രാൻസ്‌പോർട്ട് പ്രൊജക്ടർ അസി. എൻജിനീയർ കെ.എം. മനോജ് പറഞ്ഞു. പാലം പൂർണമായും പണി പൂർത്തിയാകില്ലെങ്കിലും ഗതാഗതം തുറന്നുകൊടുക്കാമെന്നതാണ് ലക്ഷ്യം. മറ്റ് പണികൾ ഗതാഗതം നിയന്ത്രിച്ച് ചെയ്യാനാകുമെന്നുമാണ് അധികൃതരുടെ ഭാഷ്യം. സ്‌കൂൾ തുറക്കുംമുൻപ് ഗതാഗതം പുനഃസ്ഥാപിക്കണമെന്നു കരുതിയെങ്കിലും കാലവർഷം നേരത്തെ എത്തിയതോടെ പണി പൂർത്തിയാക്കാനായില്ല. പാലത്തിന് സമീപത്തുകൂടിയുണ്ടായിരുന്ന ചെറിയ റോഡാണ് മേയ് മാസത്തെ ശക്തമായ മഴയിൽ ഒലിച്ചുപോയത്. ഇതോടെ വാഹനങ്ങളെ ഇരുവശങ്ങളിൽ നിന്നുമായി വഴിതിരിച്ച് വിടേണ്ടിവന്നു. എല്ലാ ബസുകൾക്കും ഈ വഴി സഞ്ചരിക്കാനാകാതെകൂടി വന്നതോടെ യാത്രാദുരിതമായി. മുണ്ടൂർ-തൂത പാതയുടെ നിർമാണത്തിന്‍റെ ഭാഗമായാണ് കാക്കാത്തോട് പാലവും നിർമിക്കുന്നത്. ഇവിടെയുണ്ടായിരുന്ന രണ്ടുവരിയുള്ള പഴയപാലം പൊളിച്ചാണ് പുതിയത് നിർമിക്കുന്നത്. 30 മീറ്റർ നീളമുള്ള നാലുവരി പാതയ്ക്ക് അനുയോജ്യമായ പാലമാണ് പണിതുകൊണ്ടിരിക്കുന്നത്. 18 മീറ്ററാണ് പാലത്തിന്‍റെ വീതി. ഇരുഭാഗത്തും നടപ്പാതയുമുണ്ടാകും. നടുവിൽ ഡിവൈഡറുകളും സ്ഥാപിച്ചാണ് നിർമിക്കുന്നത്. പൊതുമരാമത്ത് വകുപ്പിന് കീഴിലെ കേരള സ്റ്റേറ്റ് ട്രാൻസ്‌പോർട്ട് പ്രൊജക്ടി (കെഎസ്ടിപി) നാണ് നിർമാണചുമതല.

നെല്ലിന്‍റെ വില കാത്ത് 43,086 കർഷകർ; കിട്ടാനുള്ളത് 311.95 കോടി രൂപ

നെന്മാറ: പാലക്കാട് ജില്ലയിൽ നെല്ല് വില കാത്ത് 43086 കർഷകർ. രണ്ടാംവിളയിൽ 54,596 കർഷകരിൽ നിന്നു 386.34 കോടി രൂപയുടെ നെല്ലെടുത്തതിൽ ഇതുവരെ 11,510 പേർക്കായി 74.39 കോടി രൂപയാണ് നെല്ലു വിലയായി നൽകിയിട്ടുള്ളത്. 43086 കർഷകർക്കായി ഇനിയും 311.95 വിതരണം ചെയ്യാൻ കുടിശികയാണ്. കനറാ ബാങ്ക് വഴി 23,899 കർഷകർക്കാണു വില നൽകേണ്ടതെങ്കിലും ഇതുവരെ തുക നൽകിയത് 5,274 പേർക്കാണ്. 140.92 കോടി രൂപ 18625 കനറാബാങ്ക് വഴി ഇനിയും നൽകാനുണ്ട്. എസ്‌ബിഐ വഴി 30,697 കൃഷിക്കാർക്കു വില നൽകേണ്ടതിൽ 6,236 പേർക്കാണ് വില നൽകിയിട്ടുള്ളത്. 171.03 കോടി രൂപ 24461 കർഷകർക്ക് സ്റ്റേറ്റ് ബാങ്ക് വഴി ഇനിയും നൽകാനുണ്ട്. എസ്ബിഐ വഴി വില വിതരണ കരാർ പുതുക്കാത്തതിനാൽ നിലവിൽ വില വിതരണം സ്തംഭിച്ചിരിക്കുകയാണ്. സംസ്ഥാനസർക്കാർ കരാർ പുതുക്കുന്ന ചർച്ച പുരോഗതിയിൽ ആണെന്നും അടുത്തയാഴ്ചയോടെ വിതരണം പുന:രാരംഭിക്കുമെന്നും സപ്ലൈകോ അധികൃതർ പറയുന്നു. സർക്കാർ സപ്ലൈകോ മുഖേന കോടികൾ കൈമാറി എന്ന് പറയുമ്പോഴും ബാങ്കുകൾക്ക് മുൻവർഷത്തെ സംഭരണവിലയുടെ കുടിശിക പൂർണമായും നൽകിയിട്ടില്ലെന്ന് ബാങ്ക് അധികൃതരും പറയുന്നു. രണ്ടാംവിള നെല്ല് സംഭരണം പൂർത്തിയായി മാസങ്ങൾ കഴിഞ്ഞിട്ടും 20 ശതമാനം കർഷകർക്ക് മാത്രം തുക ലഭിച്ചത് കാർഷികമേഖലയിൽ വൻ സാമ്പത്തിക പ്രതിസന്ധിയാണ് സൃഷ്ടിച്ചിരിക്കുന്നത്. കിസാൻ ക്രെഡിറ്റ് കാർഡ്, കാർഷിക സ്വർണപണയ വായ്പ, കാർഷിക വായ്പകൾ തുടങ്ങിയവ അടച്ചു തീർക്കേണ്ട നിശ്ചിത സമയപരിധി വൈകിയതിനാൽ പല കർഷകർക്കും നാലും, അഞ്ചും ശതമാനം പലിശ നിരക്കിൽ ഉള്ള കാർഷിക വായ്പ ആനുകൂല്യം നഷ്ടപ്പെടുകയാണെന്ന് കർഷകർ പറഞ്ഞു. കാർഷിക വായ്പകൾക്ക് വിളവെടുത്ത സീസൺ കഴിഞ്ഞ് നിശ്ചിത മാസങ്ങൾക്കുള്ളിൽ തിരിച്ചടവ് നടത്തിയില്ലെങ്കിൽ കാർഷിക വായ്പ എന്ന കുറഞ്ഞ പലിശ ആനുകൂല്യവും നഷ്ടപ്പെട്ടു തുടങ്ങി. പല ബാങ്കുകളിൽ നിന്നും കർഷകർക്ക് വായ്പാതിരിച്ചടവിന് നോട്ടീസും അയച്ചുതുടങ്ങിയതായി കർഷകർ പറഞ്ഞു. ജോജി തോമസ്

കാട്ടാനശല്യം: ചോലമണ്ണിൽ തെരുവിളക്കുകൾ സ്ഥാപിച്ചു

മണ്ണാർക്കാട്: എടത്തനാട്ടുകര ചോലമണ്ണിൽ കാട്ടാന ആക്രമണത്തിൽ കർഷകൻ കൊല്ലപ്പെട്ട പശ്ചാത്തലത്തിൽ വീണ്ടും തെരുവിളക്കുകൾ സ്ഥാപിച്ചു. വനംവകുപ്പിന്‍റെ നേതൃത്വത്തിൽ ചോലമണ്ണ്, ഉപ്പുകുളം മേഖലയിൽ 15 തെരുവുവിളക്കുകൾ കൂടി സ്ഥാപിച്ചു. ഉപ്പുകുളം, കുഞ്ഞുകുളം, ചളവ, മുണ്ടക്കുന്ന് വാർഡുകളിൽ 10 വിളക്കുകൾ കൂടി സ്ഥാപിക്കുമെന്ന് അലനല്ലൂർ പഞ്ചായത്ത് അധികൃതർ അറിയിച്ചു. കഴിഞ്ഞ മാസമാണ് എടത്തനാട്ടുകര കോട്ടപ്പള്ള എംഇഎസ് പടിയിൽ വാലിപ്പറമ്പൻ ഉമ്മർ കാട്ടാനയുടെ ആക്രമണത്തിൽ കൊല്ലപ്പെട്ടത്. തുടർന്ന് എൻ. ഷംസുദ്ദീൻ എംഎൽഎയുടെ നേതൃത്വത്തിൽ വനം വകുപ്പ് ഉദ്യോഗസ്ഥരും ജനപ്രതിനിധികളും നാട്ടുകാരും യോഗം ചേർന്നിരുന്നു. ഈ തീരുമാനത്തിന്‍റെ കൂടി ഭാഗമാണ് തെരുവുവിളക്കുകൾ സ്ഥാപിച്ചത്. വനം വകുപ്പ് 10 തെരുവിളക്കുകൾ മുമ്പ് സ്ഥാപിച്ചിരുന്നു. തകരാറിലായ 20 തെരുവുവിളക്കുകൾ പഞ്ചായത്ത് അറ്റകുറ്റപ്പണി നടത്തിയിരുന്നു. തെരുവ് വിളക്കുകളുടെ അഭാവത്തിൽ റോഡിലൂടെയുള്ള രാത്രി സഞ്ചാരം ഏറെ ദുഷ്കരമായിരുന്നു. പുലർച്ചെ ടാപ്പിംഗിന് ഇറങ്ങുന്നവർക്കും പ്രയാസം സൃഷ്ടിച്ചിരുന്നു. ഇക്കാര്യങ്ങൾ യോഗത്തിൽ നാട്ടുകാർ പറഞ്ഞിരുന്നു. ഇതേതുടർന്നാണ് വനംവകുപ്പ് നടപടി സ്വീകരിച്ചത്. വൈദ്യുതി എത്താത്ത ഭാഗങ്ങളിൽ സൗരോർജ വിളക്കുകൾ സ്ഥാപിക്കുന്നതിന് നടപടി സ്വീകരിക്കുമെന്ന് സൈലന്‍റ് വാലി അസിസ്റ്റൻറ് വൈൽഡ് ലൈഫ് വാർഡൻ വി.എസ്. വിഷ്ണു അറിയിച്ചു. കാട്ടാനകളെ നിരീക്ഷിക്കുന്നതിനും തുരത്തുന്നതിനുമായി മൂന്ന് വാച്ചർമാരെ നിയമിച്ചിട്ടുണ്ട്. വന്യജീവിശല്യം കുറയ്ക്കാൻ റോഡിനോട് ചേർന്നുള്ള ഭാഗങ്ങളിൽ അടിക്കാട് വെട്ടുന്നതിനുള്ള നടപടി വൈകാതെ ഉണ്ടാവുമെന്ന് അസിസ്റ്റന്‍റ് വൈൽഡ് ലൈഫ് വാർഡൻ പറഞ്ഞു.

വേതനവർധനവ് ആവശ്യപ്പെട്ട് സമരം നടത്തിയ കരാർ ശുചീകരണ തൊഴിലാളികളെ അറസ്റ്റ് ചെയ്തു

കോയമ്പത്തൂർ: കോർപറേഷനിൽ കരാർ അടിസ്ഥാനത്തിൽ ജോലി ചെയ്യുന്ന ശുചീകരണ തൊഴിലാളികൾക്ക് ദിവസവേതനമായി 770 രൂപ കോയമ്പത്തൂർ കളക്ടർ പ്രഖ്യാപിച്ചിരുന്നു. കഴിഞ്ഞ തിങ്കൾ മുതൽ ശുചീകരണ തൊഴിലാളികൾ കളക്ടറുടെ ഓഫീസിന് മുന്നിൽ സമരം നടത്തിവരികയായിരുന്നു. ഈ വേതനം തങ്ങൾക്ക് നൽകുന്നില്ലെന്നും ഉടൻ നൽകണമെന്നും ആവശ്യപ്പെട്ടാണ് ശുചീകരണ തൊഴിലാളികൾ സമരം നടത്തുന്നത്. പ്രതിഷേധം ശക്തമായതിനെത്തുടർന്ന് കഴിഞ്ഞ തവണ നടത്തിയ ചർച്ചകളിൽ ശുചീകരണ തൊഴിലാളികൾക്ക് പ്രതിമാസം 20,454 രൂപ ശമ്പളം നൽകേണ്ടതില്ലെന്നും കളക്ടർ പ്രഖ്യാപിച്ച 770 രൂപ ആവശ്യമില്ലെന്നും കോർപറേഷൻ പ്രഖ്യാപിച്ചതായി റിപ്പോർട്ടുണ്ട്. ഈ സാഹചര്യത്തിൽ കളക്ടർ പ്രഖ്യാപിച്ച 770 രൂപ ശമ്പളം ഉൾപ്പെടെയുള്ള ആവശ്യങ്ങൾ ഉന്നയിച്ച് കളക്ടറുടെ ഓഫീസിലെത്തിയ ശുചീകരണ തൊഴിലാളികളെ പോലീസ് അറസ്റ്റ് ചെയ്തു. ഇതിനെത്തുടർന്ന് ജില്ലാ കളക്ടറുടെ ഓഫീസിന് മുന്നിൽ പോലീസ് സുരക്ഷ ശക്തമാക്കിയിട്ടുണ്ട്. പ്രതിഷേധിക്കാൻ വരുന്നവരെ അറസ്റ്റ് ചെയ്തുവരികയാണ്.

കെവിവിഇഎസ് വനിതാ വിംഗ് ജില്ലാ കമ്മിറ്റി രൂപീകരിച്ചു

പാലക്കാട്: കേരള വ്യാപാരി വ്യവസായി ഏകോപന സമിതി വനിതാ വിംഗ് ജില്ലാ കമ്മിറ്റി രൂപീകരണ യോഗം ജില്ലാ പ്രസിഡന്‍റും സംസ്ഥാന വൈസ് പ്രസിഡന്‍റുമായ ബാബു കോട്ടയിൽ ഉദ്ഘാടനം ചെയ്തു. ജില്ലാ ജനറൽ സെക്രട്ടറി കെ.എ. ഹമീദ് അധ്യക്ഷത വഹിച്ചു. ട്രഷറർ കെ.കെ. ഹരിദാസ്, വൈസ് പ്രസിഡന്‍റ് ടി.പി. ഷക്കീർ, സെക്രട്ടറി എം.എസ്. സിറാജ്, ഗിരീഷ് പട്ടാന്പി, ഹരിപ്രസാദ് നെന്മാറ, വിജയകുമാർ റെയിൽവേ കോളനി എന്നിവർ പ്രസംഗിച്ചു. വനിതാവിംഗിന്‍റെ ജില്ലാ ഭാരവാഹികളായി പി.സന്ധ്യ മണ്ണാർക്കാട്- ജില്ലാ പ്രസിഡന്‍റ് , എസ്.ശാന്തിനി പട്ടാന്പി- ജനറൽ സെക്രട്ടറി, ടി.സുപ്രിയ റെയിൽവേ കോളനി-ട്രഷറർ, ഷീജ നെന്മാറ, പ്രീത ഒറ്റപ്പാലം, ഷീജ ചെർപ്പുളശേരി, പ്രസന്ന കോങ്ങാട്-വൈസ് പ്രസിഡന്‍റുമാർ, നീതു ജോണ്‍ കല്ലടിക്കോട്,ഗീതാ വല്ലങ്ങി, റഫീന കൂറ്റനാട്, ഷൈനി അലനല്ലൂർ, ജിനിമോൾ എടത്തനാട്ടുകര, ഗീതാ കൃഷ്ണ തെങ്കര- സെക്രട്ടറിമാർ എന്നിവരെ തെരഞ്ഞെടുത്തു.

നല്ലേപ്പിള്ളിയിൽ നെൽകൃഷി പണികൾ ദ്രുതഗതിയിൽ

നല്ലേപ്പിള്ളി: കോട്ടപ്പള്ളത്തെ കർഷകൻ കെ.ബി. ബിജു നെൽകൃഷി പണികൾ ദ്രുതഗതിയിൽ തുടങ്ങി. മൂപ്പ്കൂടിയ ഭദ്ര നെൽവിത്താണ് ഉപയോഗിക്കുന്നത്. നേരത്തെ കുഴൽകിണർ വെള്ളത്തിൽ ഞാറ്റടി തയാറാക്കി. ഇപ്പോൾ ഞാറിന് കൃത്യം ഒരു മാസത്തെ മൂപ്പായി. പതിറ്റാണ്ടുകൾക്ക് മുമ്പ് ആലപ്പുഴയിലെ കോൾ നിലങ്ങൾക്ക് വേണ്ടി തയാറാക്കിയ വിത്താണ് ബിജു കൃഷിയിറക്കിയത്. നല്ലേപ്പിള്ളിയിൽ വളക്കൂറുള്ള പുന്തൽപാടങ്ങളിലും രണ്ടാംകാലായ് പാടങ്ങളിലും ഈ ഭദ്ര നെൽവിത്ത് നല്ല വിളവു ലഭിക്കുന്നതായാണ് കർഷകന്‍റെ വിലയിരുത്തൽ. രാസവളപ്രയോഗം നിയന്ത്രിച്ച് നെൽചെടികളുടെ ഓലകളിൽ കൂടുതൽ തഴച്ചുവളരാതെ നോക്കിയാൽ നല്ല വിളവ് ലഭിക്കും. മൂന്നും നാലും ഞാറ് അടുപ്പിച്ചു നടീൽ നടത്താതിരുന്നാൽ വിളവു കൂടുമെന്നും ബിജു പറയുന്നു.

ഗ്രീൻഫീൽഡ് ഫൗണ്ടേഷൻ സൗജന്യ തൊഴിൽമേള നടത്തി

ചിറ്റൂർ: ഗ്രീൻഫീൽഡ് ഫൗണ്ടേഷന്‍റെ നേതൃത്വത്തിൽ നടന്ന സൗജന്യ തൊഴിൽ മേള പട്ടഞ്ചേരി ഗ്രാമപഞ്ചായത്ത് പ്രസിഡന്‍റ് പി.എസ്. ശിവദാസ് ഉദ്ഘാടനം ചെയ്തു. ഫൗണ്ടേഷൻ ചെയർമാൻ കെ.സി. പ്രീത് അധ്യക്ഷത വഹിച്ചു. നിർമാൺ ഓർഗനൈസേഷൻ, ഇൻഫോസിസ് ഫൗണ്ടേഷൻ എന്നിവയുടെ സംയുക്താഭിമുഖ്യത്തിലാണ് തൊഴിൽ മേള നടത്തിയത്. നിർമാൺ ഓർഗനൈസേഷൻ ഇൻഫോസിസ് ഫൗണ്ടേഷൻ സ്റ്റേറ്റ് പ്രോ ഗ്രീൻ ഫൗജക്ട് ഹെഡ് അമൃത രാമചന്ദ്രൻ, മൊബലൈസർ സുരേന്ദ്രൻ കോബിയിൽ, ജോബ് ഫെയർ കോ-ഓർഡിനേറ്റർ പി. മധുസൂദനൻ, ഗ്രീൻ ഫീൽഡ് ഫൗണ്ടേഷൻ സെക്രട്ടറി സനു എം. സനോജ്, ഗ്രീൻഫീൽഡ് ഫാർമേഴ്സ് ക്ലബ് വൈസ് പ്രസിഡന്‍റ് ഡോ.പി. പ്രലോബ് കുമാർ, സിഇഒ എൻ. ദിനേഷ്, മാലതി കൃഷ്ണൻ, എസ്. സുശീൽ, എ. ആഷിഫ്, പി.ആർ. പ്രജയ് എന്നിവർ പ്രസംഗിച്ചു. സാമൂഹികസേവനം മുൻനിർത്തി നടപ്പാക്കുന്ന മേളയിൽ യുവതി യുവാക്കൾക്ക് സൗജന്യമായാണ് ജോലി നേടുവാനുള്ള അവസരം ഒരുക്കിയത്.

ക്ഷേമനിധി ബോർഡ് പ്രവർത്തനം അവതാളത്തിൽ: 16 മാസത്തെ പെൻഷൻ കുടിശികയായി

മണ്ണാർക്കാട്: തൊഴിലാളികൾക്കായി പ്രവർത്തിക്കുന്ന ക്ഷേമനിധി ബോർഡ് പ്രവർത്തനം അവതാളത്തിലെന്ന് തൊഴിലാളികൾ. പെൻഷൻ കുടിശിക 16 മാസത്തെയായി. നിരവധി തവണ ആവശ്യപ്പെട്ടിട്ടും കുടിശിക തുക ലഭിക്കുന്നില്ല. കൂടാതെ തൊഴിലാളി എത്ര രൂപയാണ് അടയ്ക്കുന്നത് അതിനെ തുല്യമായ തുക സർക്കാർ അടയ്ക്കും എന്നാണ് ഉറപ്പു പറഞ്ഞിരുന്നത്. എന്നാൽ തൊഴിലാളി അടച്ച തുക മാത്രമാണ് പെൻഷൻ സമയത്ത് ലഭിക്കുന്നത്. അതിനുതന്നെ രണ്ടു വർഷത്തോളം കാലതാമസവും ഉണ്ടാവുന്നുണ്ട്. 2018 ന് ശേഷം കർഷക തൊഴിലാളി പെൻഷന് അർഹരായ ആർക്കും പാസായി കിട്ടുകയോ ഇതുവരെ അടച്ച തുക തിരികെ കൊടുക്കുകയോ ചെയ്തിട്ടില്ലെന്നും തൊഴിലാളികൾ പറഞ്ഞു. തൊഴിലാളികൾക്ക് അർഹതപ്പെട്ടത് നൽകാതിരിക്കുന്നത് നിയമവിരുദ്ധമാണ്. ഇത് തൊഴിലാളികളുടെ അവകാശമാണെന്ന് തിരിച്ചറിഞ്ഞു പ്രശ്നത്തിൽ ഇടപെടണമെന്ന് തൊഴിലാളികൾ ആവശ്യപ്പെട്ടു.

നീലഗിരി ജില്ലയിൽ ഇന്നും നാളെയും റെഡ് അലർട്ട്

കോയന്പത്തൂർ: നീലഗിരി ജില്ലയിൽ ഇന്നും നാളെയും അതിശക്തമായ മഴയ്ക്ക് സാധ്യതയുള്ളതിനാൽ ചെന്നൈ കാലാവസ്ഥാ വകുപ്പ് റെഡ് അലർട്ട് പുറപ്പെടുവിച്ചു. കോയമ്പത്തൂർ, തിരുനെൽവേലി, തെങ്കാശി, കന്യാകുമാരി, തിരുപ്പൂർ, തേനി, ദിണ്ടിഗൽ ജില്ലകളിൽ കനത്ത മഴയ്ക്കും അതിശക്തമായ കാറ്റിനും സാധ്യതയുണ്ട്. നാളെ നീലഗിരി, കോയമ്പത്തൂർ, തിരുനെൽവേലി, തേനി, തെങ്കാശി, കന്യാകുമാരി, ഈറോഡ്, സേലം, ധർമ്മപുരി, തിരുനെൽവേലി, മധുര, വിരുദുനഗർ ജില്ലകളിലെ മലയോരമേഖലകളിലും മറ്റു സ്ഥലങ്ങളിലും കനത്ത മഴയ്ക്കും സാധ്യതയുണ്ട്. ചൊവ്വാഴ്ച കോയമ്പത്തൂർ, തിരുനെൽവേലി ജില്ലകളിലെ മലയോര മേഖലകളിൽ ഒന്നോ രണ്ടോ സ്ഥലങ്ങളിൽ കനത്തതോ അതിശക്തമായ മഴയ്ക്കും, ധർമ്മപുരി, ഈറോഡ്, തിരുപ്പൂർ, സേലം, നാമക്കൽ, കരൂർ, ദിണ്ടിഗൽ, മധുര, വിരുദുനഗർ ജില്ലകളിലെ ഒന്നോ രണ്ടോ സ്ഥലങ്ങളിൽ കനത്ത മഴയ്ക്കും സാധ്യതയുണ്ട്.

മെഗാ ജോബ് ഡ്രൈവ് 21ന്

പാലക്കാട്: ജില്ലാ എംപ്ലോയ്മെന്‍റ് എക്സ്ചേഞ്ച്, എംപ്ലോയബിലിറ്റി സെന്‍ററിന്‍റെ ആഭിമുഖ്യത്തിൽ മൂന്ന് പ്രമുഖ സ്വകാര്യ സ്ഥാപനങ്ങളിലേക്ക് നിയമനം നടത്തുന്നതിനായി മെഗാജോബ് ഡ്രൈവ് സംഘടിപ്പിക്കുന്നു. റൂഫിംഗ് ഫാബ്രിക്കേറ്റർ, വെൽഡർ, വെൽഡിംഗ് ഹെൽപ്പർ, മാനേജർ, അസിസ്റ്റന്‍റ് മാനേജർ, ബിസിനസ് ഡെവലപ്മെന്‍റ് ഓഫീസർ, ഫീൽഡ് സെയിൽസ് മാനേജർ, ഫീൽഡ് സെയിൽസ് ഓഫീസർ, സർവീസ് എഞ്ചിനീയർ, പ്രൊഫഷണൽ അക്കൗണ്ടന്‍റ് എന്നീ തസ്തികകളിലാണ് ഒഴിവുകളുള്ളത്. ജില്ലാ എംപ്ലോയ്മെന്‍റ് എക്സ്ചേഞ്ചിനോടനുബന്ധിച്ച് പ്രവർത്തിക്കുന്ന എംപ്ലോയബിലിറ്റി സെന്‍ററിൽ 21 രാവിലെ 10 ന് അഭിമുഖം നടക്കും. പത്താംക്ലാസ്, പ്ലസ്ടു, ഡിഗ്രി, ഐടിഐ ഡിപ്ലോമ യോഗ്യതയുള്ളതും എംപ്ലോയബിലിറ്റി സെന്‍ററിൽ പേര് രജിസ്റ്റർ ചെയ്തിട്ടുള്ളതുമായ ഉദ്യോഗാർഥികൾക്ക് മാത്രമാണ് മേളയിൽ പ്രവേശനം. രജിസ്റ്റർ ചെയ്യാൻ തിരിച്ചറിയൽ രേഖയുടെ പകർപ്പും, ഒറ്റത്തവണ രജിസ്ട്രേഷൻ ഫീസായി 250 രൂപയും സഹിതം ജില്ലാ എംപ്ലോയ്മെന്‍റ് എക്സ്ചേഞ്ച്, എംപ്ലോയബിലിറ്റി സെന്‍ററിൽ നേരിട്ട് ഹാജരാവണം. 0491 2505435, 2505204.

വിമാനത്താവളത്തിൽ യാത്രക്കാരിയിൽനിന്ന് വെടിയുണ്ടകൾ പിടികൂടി

കോയമ്പത്തൂർ: വിമാനത്താവളത്തിൽ വനിതാ യാത്രക്കാരിയിൽ നിന്ന് തോക്കിൽ ഉപയോഗിക്കുന്ന വെടിയുണ്ടകൾ പിടികൂടി. പോലീസ് അന്വേഷണം തുടങ്ങി. ഇന്നലെ രാവിലെയാണ് വിമാനത്താവള സുരക്ഷാ ഉദ്യോഗസ്ഥർ ബാഗേജ് പരിശോധനയ്ക്കിടയിൽ യാത്രക്കാരിയായ സ്ത്രീയുടെ ബാഗിൽ നിന്നും വെടിയുണ്ടകൾ കണ്ടെത്തിയത്. വിമാനത്താവള ലൊക്കേഷൻ മാനേജരെയും സുരക്ഷാ ഉദ്യോഗസ്ഥരെയും ഉടൻ തന്നെ ഇക്കാര്യം അറിയിച്ചു. വിവരം ലഭിച്ചയുടൻ ഉദ്യോഗസ്ഥർ സ്ഥലത്തെത്തി സ്ത്രീയിൽ നിന്ന് വെടിയുണ്ടകൾ പിടിച്ചെടുത്തു. കോയമ്പത്തൂർ സ്വദേശിയായ സരള എന്ന സ്ത്രീയുടെ ബാഗിൽ നിന്നാണ് കണ്ടെത്തിയത്. ബാംഗ്ലൂരിലേക്ക് പോകാൻ വിമാനത്താവളത്തിൽ എത്തിയതായിരുന്നു ഇവർ. യുവതിക്ക് വെടിയുണ്ടകൾ എങ്ങനെ ലഭിച്ചു, ആർക്കുവേണ്ടിയാണ് അവർ അത് കൊണ്ടുപോയത് എന്നതിനെക്കുറിച്ച് പോലീസ് കൂടുതൽ അന്വേഷണം നടത്തിവരികയാണ്.

മൊബൈൽ മോഷ്ടാവിനെ പിടികൂടി

വടക്കഞ്ചേരി: വടക്കഞ്ചേരിയിലെ സ്വകാര്യ ആശുപത്രിയിൽ നിന്നു മൊബൈൽ ഫോൺ മോഷണം നടത്തിയയാളെ പിടികൂടി. തമിഴ്നാട് ഉദുമൽപേട്ട ഇരിപ്പാളയം പൊരിക്കാര തെരുവ് രാജേന്ദ്ര പെരുമാളി (62) നെയാണ് വടക്കഞ്ചേരി പോലീസ് പിടികൂടിയത്. ഇക്കഴിഞ്ഞ ഒന്നിനാണ് ആശുപത്രിയിലെ ജീവനക്കാരിയുടെ മൊബൈൽ ഫോൺ മോഷണം പോയത്. ഹോസ്പിറ്റലിലെ സിസി ടിവിയിൽ ഒരാൾ മൊബൈൽമോഷണം നടത്തുന്നത് കണ്ടെത്തിയിരുന്നു. തുടർന്ന് നടത്തിയ അന്വേഷണത്തിലാണ് ഇയാൾ പിടിയിലായത്. തമിഴ്നാട്, കേരളം എന്നിവിടങ്ങളിൽ നിന്നും നിരവധി മൊബൈൽ ഫോണുകൾ ഇയാൾ കവർന്നിട്ടുണ്ടെന്നാണ് പോലീസ് പറയുന്നത്. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. വടക്കഞ്ചേരി സിഐ കെ.പി. ബെന്നി, എസ്ഐ സി.ബി. മധു, സീനിയർ സിവിൽ പോലീസ് ഓഫീസർമാരായ ഭവീഷ് ഗോപാലൻ, ബ്ലസൺ ജോസ്, റിനു മോഹൻ എന്നിവരടങ്ങിയ സംഘമാണ് പിടികൂടിയത്.

ആശുപത്രികളിൽ മോഷണം നടത്തിയ പ്രതി അറസ്റ്റിൽ

മണ്ണാർക്കാട്: വട്ടമ്പലം മദർ കെയർ ആശുപത്രി, കുന്തിപ്പുഴ സിവിആർ ആശുപത്രി എന്നിവിടങ്ങളിൽ നിന്നും മോഷണം നടത്തിയ പ്രതി അറസ്റ്റിൽ. തെങ്കര കരിമ്പൻകുന്ന് ചിറ്റയിൽ റഫീഖ് (39) ആണ് അറസ്റ്റിലായത്. മദർകെയർ ആശുപത്രിയിൽ നിന്നും കെട്ടിട നിർമാണം നടക്കുന്ന ഭാഗത്തുനിന്നും പ്ലംബിംഗ് ഉപകരണങ്ങളും ഇലക്ട്രിക് ഉപകരണങ്ങളുമാണ് മോഷണം നടത്തിയത്. രോഗികളുടെ കൂട്ടിരിപ്പുകാരനെന്ന വ്യാജേന ആശുപത്രിയിൽ എത്തി രണ്ടുതവണകളായി ഒരു ലക്ഷം രൂപയുടെ പ്ലംബിംഗ്, ഇലക്ട്രിക് ഉപകരണങ്ങൾ ഇയാൾ മോഷണം നടത്തിയതായി പോലീസ് പറഞ്ഞു. കുന്തിപ്പുഴയിലെ പൂട്ടികിടക്കുന്ന സിവിആർ ആശുപത്രിയിലും ഇയാൾ മോഷണം നടത്തിയതായി പോലീസ് അറിയിച്ചു. ഫാർമസിയിൽ നിന്നും ഇൻവെർട്ടർ, യുപിഎസ്, ബാറ്ററികൾ, പീഡിയാട്രിക് വാർഡിൽ നിന്നും വയറുകൾ, കോപ്പർ ഗ്യാസ് പൈപ്പുകൾ, ഇലക്ട്രിക് ഉപകരണങ്ങൾ തുടങ്ങി 14,50,000 രൂപയുടെ സാമഗ്രികൾ മോഷണം പോയതായാണ് ഉടമ നൽകിയ പരാതിയിലുള്ളത്. സോഫ സെറ്റ് നിർമാണമാണ് റഫീക്കിന്‍റെ തൊഴിൽ. പ്രതിയെ കോടതി റിമാൻഡ് ചെയ്തു.

റൂറൽ ബാങ്ക് അനുമോദന സദസ്് സംഘടിപ്പിച്ചു

മണ്ണാർക്കാട്: റൂറൽ സർവീസ് സഹകരണ ബാങ്ക് സംഘടിപ്പിച്ച അനുമോദനസദസ് ഗതാഗത സെക്രട്ടറി പി.ബി. നൂഹ് ഉദ്ഘാടനം ചെയ്തു. പ്ളസ് ടു പരീക്ഷയിൽ മുഴുവൻമാർക്ക് നേടിയ പൊറ്റശേരി ഗവ. ഹയർ സെക്കൻഡറി സ്കൂളിലെ വിദ്യാർഥിനി എം. രമ്യശ്രീ ഉൾപ്പെടെ 178 സമ്പൂർണ എപ്ലസുകാരെ ഉപഹാരവും കാഷ് അവാർഡും നൽകി അനുമോദിച്ചു. ബാങ്ക് ഓഡിറ്റോറിയത്തിൽ നടന്ന ചടങ്ങിൽ പ്രസിഡന്‍റ് പി.എൻ. മോഹനൻ അധ്യക്ഷനായി. കേരള സഹകരണ നിക്ഷേപ ഗാരന്‍റി ഫണ്ട് ബോർഡ് മെംബർ എൻ.കെ. നാരായണൻകുട്ടി, റൂറൽ സർവീസ് സഹകരണ ബാങ്ക് അഡ്മിനിസ്ട്രേറ്റീവ് ഓഫീസർ എം. പുരുഷോത്തമൻ, മുനിസിപ്പൽ കൗൺസിലർ ടി.ആർ. സെബാസ്‌റ്റ്യൻ എന്നിവർ പ്രസംഗിച്ചു. മണ്ണാർക്കാട് റൂറൽ സർവീസ് സഹകരണ ബാങ്ക് സെക്രട്ടറി എസ്. അജയകുമാർ സ്വാഗതവും വൈസ് പ്രസിഡന്‍റ് റഷീദ് ബാബു നന്ദിയും പറഞ്ഞു. ബാങ്ക് ഭരണസമിതി അംഗങ്ങളും മുൻ ഭാരവാഹികളും ജനപ്രതിനിധികളും പങ്കെടുത്തു.

മണ്ണാർക്കാട്ടെ ഹോട്ടലുകളിൽ ആരോഗ്യവകുപ്പിന്‍റെ പരിശോധന

മണ്ണാർക്കാട്: നഗരത്തിലെ പ്രധാന ഹോട്ടലുകളിൽ നഗരസഭ ആരോഗ്യ വിഭാഗത്തിന്‍റെ മിന്നൽ പരിശോധന. ഹോട്ടലുകളിലെ ജീവനക്കാരുടെ ഹെൽത്ത് കാർഡ്, വ്യക്തിശുചിത്വം എന്നിവ പരിശോധിച്ചു. ഹെൽത്ത് കാർഡ് ഇല്ലാത്തവർ ഒരാഴ്ചക്കകം എടുക്കാൻ നിർദേശം നൽകി. നഗരസഭയിലെ ഹോട്ടലുകളിൽ വൃത്തിയുള്ള ഭക്ഷണം ഉറപ്പാക്കുക എന്ന ലക്ഷ്യത്തോടെയാണ് പരിശോധന ആരംഭിച്ചത്. കഴിഞ്ഞ ദിവസത്തെ കൗൺസിൽയോഗ തീരുമാനപ്രകാരമാണ് പരിശോധന. ചില ഹോട്ടലുകളിൽ ഹെൽത്ത് കാർഡ് ഇല്ലാത്തവരും ജോലി ചെയ്യുന്നുണ്ട്. അവർ ഉടൻ ഹെൽത്ത് കാർഡ് എടുക്കാൻ നിർദേശിച്ചു. ഭക്ഷണം വിളമ്പുന്നവർ തൊപ്പിയും കയ്യുറയും ധരിക്കുന്നുണ്ടെന്ന് ഉറപ്പുവരുത്തണം. തൊപ്പിയും കയ്യുറയും ഇല്ലാതെ ഭക്ഷണം വിളമ്പുന്നത് ശ്രദ്ധയിൽപ്പെട്ടാൽ ഫോട്ടോയെടുത്ത് നഗരസഭയെ അറിയിച്ചാൽ നടപടി ഉണ്ടാകുമെന്ന് സെക്രട്ടറി പറഞ്ഞു. തുടർന്നുള്ള ദിവസങ്ങളിൽ ചെറിയ ഹോട്ടലുകളിലും പരിശോധന നടത്തും. തൊഴിലാളികളുടെ താമസസ്ഥലങ്ങളിലും പരിശോധന നടത്തും. തുടർന്നുള്ള പരിശോധനകളിൽ വീഴ്ച കണ്ടെത്തുന്ന ഹോട്ടലുകളുടെ പേരുകൾ മാധ്യമങ്ങളിലും നഗരസഭയുടെ ഫെയ്സ്ബുക്ക് പേജിലും പ്രസിദ്ധീകരിക്കും. പരിശോധന നടത്തി ഓരോ മാസവും ഇത് പരിഷ്കരിക്കും. അടുത്തദിവസം ഹോട്ടൽ അസോസിയേഷന്‍റെ യോഗം വിളിക്കുമെന്ന് സെക്രട്ടറി പറഞ്ഞു.

കരിമ്പയിൽ വഴിവിളക്കുകൾ തെളിയുന്നില്ല

കല്ലടിക്കോട്‌: പഞ്ചായത്തിലെ വഴിവിളക്കുകൾ പ്രവർത്തിക്കുന്നില്ലെന്നു പരാതി. തെരുവുവിളക്കുകൾ പല പ്രദേശങ്ങളിലും കേടുവന്നതായും തെളിയുന്നില്ലെന്നും കരിമ്പ പഞ്ചായത്ത്‌ അംഗം കെ.കെ. ചന്ദ്രൻ ആരോപിച്ചു. ഗുണനിലവാരമില്ലാത്ത സാമഗ്രികൾ ഉപയോഗിച്ചാണ് വിളക്കുകൾ ഇട്ടതെന്നും മഴക്കാലമായതോടെ കേടുവന്നുവെന്നും അദ്ദേഹം കുറ്റപ്പെടുത്തി. വഴിവിളക്കുകൾ തെളിയിക്കാൻ നടപടിയുണ്ടായില്ലെങ്കിൽ പഞ്ചായത്തിനെതിരെ ശക്തമായ സമരം നടത്തുമെന്നും അദ്ദേഹം പറഞ്ഞു.

ക്ഷീരകർഷകർക്കുള്ള പദ്ധതിനടത്തിപ്പ് അവതാളത്തിൽ

മണ്ണാർക്കാട്: കുമരംപുത്തൂർ പഞ്ചായത്തിൽ വെറ്ററിനറി ഡോക്ടറില്ല; കർഷകർക്കുള്ള പദ്ധതികൾ മുടങ്ങി. പശു വളർത്തൽ പദ്ധതിയിൽ ഗുണഭോക്തൃ വിഹിതം അടച്ചവർക്ക് ആനുകൂല്യം നൽകാനാവാതെ പഞ്ചായത്ത് ഭരണസമിതി. ഡോക്ടറെ നിയമിക്കണമെന്ന് ആവശ്യപ്പെട്ട് പ്രസിഡന്‍റിന്‍റെ നേതൃത്വത്തിൽ ഭരണസമിതി അംഗങ്ങൾ ബ്ലോക്ക് വെറ്ററിനറി ആശുപത്രിയിൽ എത്തി പ്രതിഷേധം അറിയിച്ചു. 2024 - 25 വാർഷിക പദ്ധതിയിൽ ഉൾപ്പെടുത്തി നടപ്പാക്കുന്ന പശു, ആട്, മുട്ടക്കോഴി വളർത്തൽ പദ്ധതിയാണ് വെറ്ററിനറി ഡോക്ടർ ഇല്ലാത്തതിനാൽ മുടങ്ങിക്കിടക്കുന്നത്. 30 ലക്ഷം രൂപയാണ് പദ്ധതിക്ക് വകയിരുത്തിയിട്ടുള്ളത്. പശു വളർത്തൽ പദ്ധതിക്ക് ഗുണഭോക്തൃ വിഹിതമായ മുപ്പതിനായിരം രൂപ വീതം അടച്ച 32 പേർ പഞ്ചായത്തിലുണ്ട്. ഗുണഭോക്തൃ വിഹിതവും പഞ്ചായത്തിന്‍റെ വിഹിതവുമായി മുപ്പതിനായിരം രൂപയും ഉൾപ്പെടെ അറുപതിനായിരം രൂപ വീതമാണ് ഗുണഭോക്താക്കൾക്ക് നൽകേണ്ടത്. ഇംപ്ലിമെന്‍റിംഗ് ഓഫീസർ ഇല്ലാത്തതിനാൽ തുക നൽകാൻ കഴിയാത്തതാണ് പ്രതിസന്ധി. 95000 വരെ മുടക്കിയാണ് പലരും പശു വാങ്ങി ഇൻഷുർ ചെയ്തിരിക്കുന്നത്. ഇത്രയും തുക ബാങ്ക് വായ്പയെടുത്തും കടം വാങ്ങിയുമാണ് പശുവിനെ വാങ്ങിയത്. പഞ്ചായത്തിൽ നിന്ന് പണം ലഭിക്കുന്ന മുറയ്ക്ക് തിരിച്ചു നൽകാമെന്ന കണക്കുകൂട്ടലിലായിരുന്നു ക്ഷീരകർഷകർ. കണക്കുകൂട്ടൽ തെറ്റിയതോടെ ഇവർ നിരന്തരം പഞ്ചായത്തിൽ കയറി ഇറങ്ങുന്ന സ്ഥിതിയായി. നാലു മാസത്തിലേറെയായി കുമരംപുത്തൂർ വെറ്ററിനറി ഡോക്ടറുടെ ഒഴിവ് വന്നിട്ട്. സമീപത്തെ ഡോക്ടർക്ക് കുമരംപുത്തൂരിന്‍റെ അധികചുമതല നൽകുകയാണ് ചെയ്യുന്നത്. എന്നാൽ നിലവിൽ ചുമതലയുള്ള ഡോക്ടർ ഈ പദ്ധതി നടപ്പാക്കാൻ തയ്യാറാവുന്നില്ല എന്നാണ് പഞ്ചായത്ത് ഭരണസമിതി അംഗങ്ങൾ പറയുന്നത്. പണം ഉണ്ടായിട്ടും ഗുണഭോക്താക്കൾക്ക് പണം നൽകാതിരിക്കുന്നത് അനുവദിക്കാനാകില്ലെന്നും അടിയന്തരമായി ഡോക്ടറെ നിയമിക്കുകയോ പദ്ധതി നടപ്പാക്കാൻ തയ്യാറാവുന്ന ഡോക്ടർക്ക് ചുമതല നൽകുകയോ വേണമെന്ന് പഞ്ചായത്ത് പ്രസിഡന്‍റ് രാജൻ അമ്പാടത്ത് ആവശ്യപ്പെട്ടു. അഞ്ചുദിവസത്തിനകം ഡോക്ടറെ നിയമിച്ചില്ലെങ്കിൽ ഭരണസമിതി ജില്ലാ ഓഫീസിൽ കുത്തിയിരിപ്പ് നടത്തുമെന്ന് സ്ഥിരം സമിതി അംഗം സഹദ് അരിയൂർ പറഞ്ഞു. വൈസ് പ്രസിഡന്‍റ് റസീന വറോടൻ, അംഗങ്ങളായ കെ.കെ. ലക്ഷ്മിക്കുട്ടി, ഇന്ദിര മടത്തുംപുള്ളി, ഡി. വിജയലക്ഷ്മി, സിദ്ദിഖ് മല്ലിയിൽ എന്നിവരാണ് പ്രതിഷേധവുമായി വെറ്ററിനറി ആശുപത്രിയിൽ എത്തിയത്.

ദേശീയ ലോക് അദാലത്ത്: 608 കേസുകൾ തീർപ്പാക്കി; 8.87 കോടി രൂപ വിതരണം ചെയ്തു

പാലക്കാട്: പൊതുജനങ്ങൾക്ക് വേഗത്തിലും കാര്യക്ഷമമായും നീതി ലഭ്യമാക്കുക എന്ന ലക്ഷ്യത്തോടെ ജില്ലയിലെ കോടതികളിൽ ദേശീയ ലോക് അദാലത്ത് സംഘടിപ്പിച്ചു. 608 കേസുകൾ തീർപ്പാക്കുകയും വിവിധ കേസുകളിലായി 8,87,80,315 രൂപ വിതരണം ചെയ്യുകയും ചെയ്തു. പാലക്കാട് ലീഗൽ സർവീസസ് അഥോറിറ്റിയാണ് ലോക് അദാലത്ത് സംഘടിപ്പിച്ചത്. വാഹനാപകട നഷ്ടപരിഹാര കേസുകളിൽ അർഹരായ ഇരകൾക്ക് 5,76,59,000 രൂപ നഷ്ടപരിഹാരമായി ലഭിച്ചു. ദേശസാത്കൃത, സ്വകാര്യ ബാങ്കുകൾ ഉൾപ്പെടെയുള്ള വായ്പാ പരാതികളിൽ 3,01,42,028 രൂപ തിരിച്ചടവായി ലഭിച്ചു. മജിസ്ട്രേറ്റ് കോടതികളിൽ നടന്ന പ്രത്യേക സിറ്റിംഗിൽ 4293 ഫൈൻ കേസുകളിൽ നിന്നായി സർക്കാരിന് പിഴ ഇനത്തിൽ 70,95,350 രൂപ ലഭിച്ചു. രാവിലെ 10 ന് ആരംഭിച്ച അദാലത്ത് വൈകുന്നേരം 4:30 നാണ് പൂർത്തിയായത്. പ്രിൻസിപ്പൽ ജില്ലാ ജഡ്ജി കെ.ഇ. സാലിഹ്, ജില്ലാ ലീഗൽ സർവീസസ് അഥോറിറ്റി സെക്രട്ടറി, സിവിൽ ജഡ്ജ് (സീനിയർ ഡിവിഷൻ) ദേവിക ലാൽ എന്നിവർ ദേശീയ ലോക് അദാലത്തിന് നേതൃത്വം നൽകി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]