പ്രതീകാത്മക ചിത്രം
ലക്നോ: വീട്ടുകാർ ഉറപ്പിച്ചു നൽകിയ വിവാഹത്തിന് വിസമ്മതിച്ച് പ്രണയിച്ച യുവാവിനൊപ്പം ജീവിക്കാൻ തീരുമാനിച്ച മകളുടെ തലയ്ക്ക് വെടിയുതിർത്ത പിതാവ് പിടിയിൽ. ഉത്തർപ്രദേശിലെ മെയ്ൻപുരി ജില്ലയിലെ ഭോങ്കാവിൽ തിങ്കളാഴ്ച രാത്രിയാണ് സംഭവം നടന്നത്. ഉറങ്ങിക്കിടക്കുകയായിരുന്ന പത്തൊൻപതുകാരിയായ മകളുടെ നേരെയാണ് പിതാവ് അസിൻ ഖാൻ (48) വെടിയുതിർത്തത്. ഗുരുതരമായി പരിക്കേറ്റ പെൺകുട്ടി ആശുപത്രിയിൽ ചികിത്സയിലാണ്.
പെൺകുട്ടിക്ക് മറ്റൊരു യുവാവുമായി പ്രണയബന്ധമുണ്ടായിരുന്നു. എന്നാൽ നവംബർ 19-ന് കുടുംബം മറ്റൊരു യുവാവുമായി ഇവരുടെ വിവാഹം നിശ്ചയിക്കുകയും ചെയ്തിരുന്നു. ഈ ബന്ധത്തിന് പെൺകുട്ടി എതിർപ്പ് പ്രകടിപ്പിക്കുകയും പ്രണയിച്ചയാളെ മാത്രമേ വിവാഹം കഴിക്കൂ എന്ന് നിലപാടിൽ ഉറച്ചുനിൽക്കുകയും ചെയ്തു.
തുടർന്ന് തിങ്കളാഴ്ച രാത്രി ഉറങ്ങിക്കിടക്കുകയായിരുന്ന പെൺകുട്ടിയുടെ തലയ്ക്ക് നേരെ പിതാവ് വെടിയുതിർക്കുകയായിരുന്നു. മുറിയിൽ നിന്ന് വെടിയൊച്ച കേട്ട് ഓടിയെത്തിയ പെൺകുട്ടിയുടെ അമ്മയാണ് രക്തത്തിൽ കുളിച്ചുകിടന്ന മകളെ ഉടൻ തന്നെ ആശുപത്രിയിൽ എത്തിച്ചത്.
ആക്രമണത്തിന് ശേഷം സ്റ്റേഷനിൽ കീഴടങ്ങാൻ പോവുന്നതിനിടെയാണ് അസിൻ ഖാനെ പൊലിസ് പിടികൂടിയത്. സംഭവത്തിൽ കൂടുതൽ അന്വേഷണം നടന്നുവരികയാണ്.
Tags : Arrest Marriage Father Shoot Kill