ഡൽഹി ഐടിസി മൗര്യ ഹോട്ടലിൽ നടന്ന പുസ്തക പ്രകാശനച്ചടങ്ങിൽ പ്രിയങ്ക, സോണിയ ഗാന്ധി, രാഹുൽ എന്നിവർ.
ന്യൂഡൽഹി: കോൺഗ്രസ് പാർലമെന്ററി പാർട്ടി അധ്യക്ഷ സോണിയ ഗാന്ധിയുടെ ആത്മകഥയായ ‘ബിലോംഗിംഗ്: എ ജേർണി ഓഫ് ല വ് ’ഔദ്യോഗികമായി പ്രകാശനം ചെയ്തു.
ഈ മാസം പത്തിനു വിപണിയിലെത്തിയ പുസ്തകത്തിന്റെ ഔദ്യോഗിക പ്രകാശനച്ചടങ്ങ് ഇന്നലെയാണു സംഘടിപ്പിച്ചത്. സ്നേഹം, നഷ്ടം, വിശ്വാസ്യത എന്നിവയ്ക്കൊപ്പം തനിക്ക് അപരിചിതമായിരുന്ന ഒരു രാജ്യത്ത് സ്വന്തം ഇടം കണ്ടെത്താനുള്ള വ്യക്തിപരമായ യാത്രയും പുസ്തകത്തിൽ പ്രതിഫലിക്കുന്നുണ്ടെന്ന് സോണിയ പറഞ്ഞു.
ഐടിസി മൗര്യ ഹോട്ടലിൽ നടന്ന ചടങ്ങിൽ സമാജ്വാദി പാർട്ടി അധ്യക്ഷൻ അഖിലേഷ് യാദവ്, തൃണമൂൽ കോൺഗ്രസ് നേതാവ് അഭിഷേക് ബാനർജി, തമിഴ്നാട് മുഖ്യമന്ത്രി സി. ജോസഫ് വിജയ്, ബിജെപി നേതാവ് അമരീന്ദർ സിംഗ് തുടങ്ങിയവർ പങ്കെടുത്തു.
ഇന്ത്യ സഖ്യത്തിലെ നിരവധി നേതാക്കൾക്കൊപ്പം കേരള മുഖ്യമന്ത്രി വി.ഡി. സതീശൻ, ജാർഖണ്ഡ് മുഖ്യമന്ത്രി ഹേമന്ത് സോറൻ, കോൺഗ്രസ് അധ്യക്ഷൻ മല്ലികാർജുൻ ഖാർഗെ, എഐസിസി ജനറൽ സെക്രട്ടറി കെ.സി. വേണുഗോപാൽ തുടങ്ങിയവരും സന്നിഹിതരായിരുന്നു.
വർഷങ്ങളായി തന്റെ കുടുംബത്തെക്കുറിച്ച് വേദനിപ്പിക്കുന്ന തരത്തിലുള്ള പല കാര്യങ്ങളും പ്രചരിക്കപ്പെട്ടിട്ടുണ്ടെന്നും സ്വന്തം ഭാഗം വിശദീകരിക്കാനുള്ള അവസരമായാണ് ആത്മകഥയെ കാണുന്നതെന്നും സോണിയ പറഞ്ഞു. രാഷ്ട്രീയ പ്രസ്താവനകൾ ഒഴിവാക്കി, വ്യക്തിജീവിതത്തിലെ അനുഭവങ്ങൾ പങ്കുവയ്ക്കാനാണ് ചടങ്ങിൽ അവർ ശ്രദ്ധിച്ചത്.
രാജീവ് ഗാന്ധിയുടെ മരണശേഷം അമ്മ മറ്റൊരു വ്യക്തിയായി മാറിയെന്ന് മകൻ രാഹുൽ ഗാന്ധി പറഞ്ഞു. തന്റെ ജീവിതത്തിൽ ഒരിക്കൽപ്പോലും അമ്മ ഭയപ്പെടുന്നതായോ പ്രതിസന്ധികളിൽനിന്നു പിൻവാങ്ങുന്നതായോ കണ്ടിട്ടില്ലെന്നും അദ്ദേഹം കൂട്ടിച്ചേർത്തു.
അമ്മ അന്തർമുഖയല്ലെന്നും എല്ലാവരോടും സംസാരിക്കാൻ ഇഷ്ടപ്പെടുന്ന ബഹിർമുഖയാണെന്നും രാഹുൽ പറഞ്ഞു. എന്നാൽ, പിതാവിന്റെ മരണം അമ്മയെ ഏറെ മാറ്റിമറിച്ചു. രാജീവ് ഗാന്ധിയുടെ വിയോഗത്തിനുശേഷം കുടുംബത്തിന്റെ ഉത്തരവാദിത്വങ്ങൾ ഏറ്റെടുത്ത സോണിയയുടെ ജീവിതത്തിലെ മാറ്റങ്ങളും അതിജീവനവുമാണ് രാഹുലിന്റെ വാക്കുകളിൽ നിറഞ്ഞുനിന്നത്.
Tags : Sonia Gandhi Autobiography Released Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash