റൊണാൾഡോ അമ്മയ്ക്കൊപ്പം
ലിസ്ബൺ: ക്രിസ്റ്റ്യാനോ റോണാൾഡോയുടെ അന്താരാഷ്ട്ര വിരമിക്കലിന് പിന്നാലെ പോർച്ചുഗൽ ടീമിനെതിരെ പൊട്ടിത്തെറിച്ച് താരത്തിന്റെ അമ്മ ഡൊളോറസ് അവെയ്റോ. മകന് ദേശീയ ടീമിൽ നിന്ന് അർഹമായ ബഹുമാനമോ ആദരവോ ലഭിച്ചില്ലെന്നും, സഹതാരങ്ങളിൽ നിന്ന് പോലും മോശം പെരുമാറ്റമാണ് ഉണ്ടായതെന്നും ഡൊളോറസ് തുറന്നടിച്ചു.
യുവേഫ നേഷൻസ് ലീഗിൽ ഡെൻമാർക്കിനെതിരെ പോർച്ചുഗൽ 4-1 എന്ന ദയനീയ തോൽവി ഏറ്റുവാങ്ങിയതിന് പിന്നാലെ മാധ്യമങ്ങളോട് പ്രതികരിക്കുകയായിരുന്നു ഇവർ. ആ തോൽവി അവർ അർഹിച്ചതായിരുന്നു, എനിക്ക് അതിൽ സന്തോഷമേയുള്ളൂ," എന്ന് മാധ്യമങ്ങളോട് പറഞ്ഞ ഡൊളോറസ്, സ്വന്തം തട്ടകമായ സ്പോർട്ടിംഗ് സിപിയാണ് റോണാൾഡോയ്ക്ക് യഥാർഥ ആദരവ് നൽകുകയെന്നും അവിടെയാണ് അവന്റെ യഥാർഥ വിലയറിയുന്നതെന്നും കൂട്ടിച്ചേർത്തു.
നവംബർ അഞ്ചിന് റോണാൾഡോ രാജ്യാന്തര ഫുട്ബോളിൽ നിന്ന് പടിയിറങ്ങിയ ശേഷം പോർച്ചുഗൽ കളിച്ച ആദ്യ മത്സരത്തിലായിരുന്നു ഡെന്മാർക്കിനോട് കനത്ത തോൽവി ഏറ്റുവാങ്ങേണ്ടിവന്നത്. എന്നാൽ പോർച്ചുഗീസ് ഫുട്ബോൾ ഫെഡറേഷൻ മത്സരത്തിനിടെ റോണാൾഡോയ്ക്ക് പ്രത്യേക ആദരവ് സംഘടിപ്പിച്ചിരുന്നു. താരങ്ങൾഏഴാം നമ്പർ ജേഴ്സി അണിഞ്ഞും, ഏഴാം മിനിറ്റിൽ ആരാധകർ എഴുന്നേറ്റ് നിന്ന് കരഘോഷം മുഴക്കിയുമാണ് ആദരം അർപ്പിച്ചത്.
അതേസമയം, ഡൊളോറസിന്റെ വിവാദ പരാമർശങ്ങൾക്ക് മറുപടിയുമായി പോർച്ചുഗൽ പരിശീലകൻ ജോർജ് ജെസ്യൂസ് രംഗത്തെത്തി. മകനെ സംരക്ഷിക്കാൻ ശ്രമിക്കുന്ന ഒരു അമ്മയുടെ വികാരത്തെ താൻ പൂർണമായി മനസിലാക്കുന്നുവെന്നും അവരോട് വലിയ ബഹുമാനമുണ്ടെന്നും 72-കാരനായ പരിശീലകൻ വ്യക്തമാക്കി. "അമ്മ എപ്പോഴും അമ്മ തന്നെയാണ്, അതിൽ നമുക്ക് ഒന്നും ചെയ്യാനാവില്ല," എന്നായിരുന്നു ജെസ്യൂസിന്റെ പ്രതികരണം.
Tags : Christiano Ronaldo Ronaldo Portugal team defeat mother Reaction