ശുഭ്മാൻ ഗിൽ.
വെല്ലിംഗ്ടൺ: ന്യൂസിലൻഡിനെതിരായ ആദ്യ ടെസ്റ്റിൽ ഇന്ത്യൻ ടീമിൽ നാലു പേസർമാരെ ഉൾപ്പെടുത്തിയേക്കുമെന്ന് സൂചന. ഇതുസംബന്ധിച്ച് ക്യാപ്റ്റൻ ശുഭ്മാൻ ഗിൽ നിർണായകമായ സൂചനകൾ നൽകി. ടീമിലുള്ള ആറ് പേസ് ബൗളർമാരിൽ ആരൊക്കെയാകും അന്തിമ ഇലവനിൽ ഇടംപിടിക്കുകയെന്ന് ടീം മാനേജ്മെന്റ് ഇതുവരെ തീരുമാനിച്ചിട്ടില്ലെന്നും ഗിൽ വ്യക്തമാക്കി.
ഏകദിന പരമ്പരയിൽ ഇന്ത്യൻ പേസ് ബൗളർമാർ മികച്ച പ്രകടനമാണ് പുറത്തെടുത്തത്. അന്തിമ ഇലവനെക്കുറിച്ച് ഇപ്പോഴും ആലോചിച്ചുകൊണ്ടിരിക്കുകയാണ്. നാല് പേസ് ബൗളർമാർ ഏതായാലും കളിക്കും. എന്നാൽ ആരൊക്കെയായിരിക്കുമെന്ന് തീരുമാനിച്ചിട്ടില്ല. സ്വന്തം നാട്ടിൽ ടെസ്റ്റ് ക്രിക്കറ്റിൽ ന്യൂസിലൻഡിന് മികച്ച റിക്കാർഡാണുള്ളത്. അതിനാൽ ഏകദിന പരമ്പരയേക്കാൾ വലിയ വെല്ലുവിളിയായിരിക്കും ടെസ്റ്റ് മത്സരമെന്നും ഗിൽ വാർത്താസമ്മേളനത്തിൽ പറഞ്ഞു.
മത്സരത്തിന്റെ മൂന്നാം ദിവസം മുതൽ പിച്ച് ബാറ്റിംഗിന് അനുകൂലമാകാൻ സാധ്യതയുള്ളതിനാൽ വാലറ്റത്തും ബാറ്റിംഗിന് സംഭാവന നൽകാൻ കഴിയുന്ന ബൗളർമാരെയാണ് ടീം പരിഗണിക്കുന്നതെന്നും ഗിൽ കൂട്ടിച്ചേർത്തു. ജസ്പ്രീത് ബുംറ നയിക്കുന്ന പേസ് നിരയിൽ മുഹമ്മദ് സിറാജ്, ആകാശ്ദീപ്, പ്രസിദ്ധ് കൃഷ്ണ, അൻഷുൽ കാംബോജ്, ഗുരുനൂർ ബ്രാർ എന്നിവരാണ് സ്ക്വാഡിലുള്ള മറ്റ് പേസ് ബൗളർമാർ.
Tags : ShubmanGill Cricket Test India NewZealand Deepika DeepikaNewspaper BreakingNews NewsUpdate Headlines CurrentAffairs DailyNews InDepth NewsFlash GlobalNews