പ്രതീകാത്മക ചിത്രം
ഒരു പെണ്ണിന്റെ വില എത്രയാണ്? 50 പവനോ? 100 പവനോ? ഒരു കാറോ? ഒരു വീടോ? കേരളത്തിലെ പല മാതാപിതാക്കളും ഇന്ന് ഈ കണക്ക് കൂട്ടലിലാണ്. പെണ്ണിന്റെ മൂല്യം പൊന്നിന്റെ തൂക്കത്തിൽ അളക്കുന്ന നാട്ടിൽ, ഇന്ന് സ്ത്രീധന വിരുദ്ധ ദിനം.
ഒരു പെൺകുട്ടിയുടെ സ്വപ്നങ്ങളെയും, അവളുടെ ചിരിയെയും, അവളുടെ ജീവനെയും കണ്ടില്ലന്ന് നടിച്ചുകൂടാ.നമ്മൾ മറന്നോ ഉത്തരയെ? പൊന്നിന്റെ തൂക്കം കുറഞ്ഞു എന്ന് പറഞ്ഞ് അടുക്കളയിൽ തൂങ്ങി മരിക്കേണ്ടി വന്ന വിസ്മയയെ? സ്ത്രീധനത്തിന്റെ പേരിൽ കേരളത്തിൽ ഇല്ലാതായ എത്രയോ ജീവനുകൾ.ഇത് പാരമ്പര്യമാണെന്ന് പറയരുത്, പീഡനമാണ്.
ചരിത്രം പരിശോധിച്ചാൽ, 250 വർഷങ്ങൾക്ക് മുൻപ് തന്നെ മാൾവ ഭരിച്ചിരുന്ന റാണി അഹല്യാഭായി ഹോൾക്കർ തന്റെ രാജ്യത്ത് സ്ത്രീധനം നിരോധിച്ചിരുന്നു. സ്വതന്ത്ര ഇന്ത്യയും 1961 ൽ ശക്തമായ നിയമം കൊണ്ടുവന്നു. സ്ത്രീധനം വാങ്ങിയാൽ അഞ്ച് വർഷം വരെ തടവ്. പീഡിപ്പിച്ചാൽ മൂന്ന് വർഷം. സ്ത്രീധന മരണത്തിന് ജീവപര്യന്തവും.
പക്ഷെ എന്ത് പ്രയോജനം? നിയമങ്ങൾ പുസ്തകത്താളുകളിൽ തന്നെ ഇരിക്കുന്നു. സ്ത്രീധനമാകട്ടെ ഇന്നും ഒരു ആചാരമായി തുടരുകയും ചെയ്യുന്നു.നിയമം കൊണ്ട് മാത്രം ഈ തിന്മ ഇല്ലാതാകില്ല. മനസ് മാറണം.മകന് വേണ്ടി സ്ത്രീധനം വാങ്ങി മേനി നടിക്കുന്നതിന് മുൻപ് ഒന്ന് ഓർക്കുക. നാളെ നിങ്ങളുടെ മകളും മറ്റൊരു വീട്ടിൽ ഇതേ ചോദ്യത്തിന് മുന്നിൽ നിൽക്കേണ്ടി വരും എന്ന്.
സ്വർണമല്ല ഒരു പെൺകുട്ടിയുടെ സുരക്ഷ. അവളുടെ വിദ്യാഭ്യാസമാണ്. അവളുടെ ജോലിയാണ്. സ്വന്തം കാലിൽ നിൽക്കാനുള്ള ധൈര്യമാണ്.അതുകൊണ്ട് ഇന്ന് നമുക്ക് ഒരു തീരുമാനമെടുക്കാം. സ്ത്രീധനം വാങ്ങുകയുമില്ല, കൊടുക്കുകയുമില്ല എന്ന്. മക്കളെ പഠിപ്പിക്കാം, പെണ്ണിന്റെ മൂല്യം പൊന്നിന്റെ തൂക്കത്തിൽ അല്ല എന്ന്.ഒരു പെണ്ണിനെ അറിയാൻ അവളുടെ കഴുത്തിലെ മാലയുടെ തൂക്കം നോക്കിയാൽ പോരാ, അവളുടെ മനസിന്റെ നന്മയുടെ തൂക്കം നോക്കണം.