പ്രതീകാത്മക ചിത്രം
തിരക്കേറിയ ജീവിതത്തിൽ, മാനസിക സമ്മർദ്ദം അനുഭവിക്കാത്തവർ വിരളമാണ്. ജോലിഭാരം, സോഷ്യൽ മീഡിയയുടെ അമിത ഉപയോഗം, ഉറക്കമില്ലായ്മ എന്നിവ മനസിനെ ക്ഷീണിപ്പിക്കുമ്പോൾ, ആശ്വാസത്തിനായി പലരും പുസ്തകങ്ങളിലേക്ക് തിരിയുകയാണ്.ഇതിന് പിന്നാലെയാണ് ജപ്പാനിൽ നിന്നുള്ള 'ഹീലിംഗ് ഫിക്ഷൻ' എന്ന സാഹിത്യ ശാഖ ലോകമെമ്പാടും ശ്രദ്ധ നേടുന്നത്.
സംഘർഷങ്ങളോ, അതിഭീകരമായ ട്വിസ്റ്റുകളോ ഇല്ലാതെ, സാധാരണ മനുഷ്യരുടെ ജീവിതത്തിലൂടെ വായനക്കാരന് മാനസിക ശാന്തി നൽകുന്നവയാണ് ഈ പുസ്തകങ്ങൾ. ഒരു ചെറിയ കഫേ, ഒരു പഴയ പുസ്തകശാല, ഒരു ചെറിയ ഭക്ഷണശാല എന്നിവയാണ് ഈ കഥകളുടെ പശ്ചാത്തലം. അവിടെ എത്തുന്ന കഥാപാത്രങ്ങളുടെ ചെറിയ സങ്കടങ്ങളും, അവർ കണ്ടെത്തുന്ന പരിഹാരങ്ങളുമാണ് കഥ.വായനക്കാരനെ ഉത്തേജിപ്പിക്കുകയല്ല, മറിച്ച് അവനെ ശാന്തനാക്കുകയാണ് ഈ പുസ്തകങ്ങളുടെ ലക്ഷ്യം.
ശ്രദ്ധേയമായ അഞ്ച് പുസ്തകങ്ങൾ
1. ബിഫോർ ദി കോഫി ഗെറ്റ്സ് കോൾഡ് - തോഷികാസു കവാഗുച്ചി
ഒരു പ്രത്യേക കഫേയിലെ സീറ്റിലിരുന്നാൽ ഭൂതകാലത്തിലേക്ക് യാത്ര ചെയ്യാൻ കഴിയും. എന്നാൽ കാപ്പി തണുക്കുന്നതിന് മുൻപ് തിരിചെത്തണം. നഷ്ടപ്പെട്ടവരോട് പറയാൻ ബാക്കിവെച്ച വാക്കുകൾ പറയാൻ ലഭിക്കുന്ന അവസരമാണ് ഈ നോവലിന്റെ പ്രമേയം.
2. ദി കമോഗാവ ഫുഡ് ഡിറ്റക്ടീവ്സ് - ഹിസാഷി കാഷിവായി
ക്യോട്ടോയിലെ ഒരു ഭക്ഷണശാലയിൽ, കുട്ടിക്കാലത്ത് കഴിച്ച മറക്കാനാവാത്ത ഒരു വിഭവം വീണ്ടും കഴിക്കാൻ ആളുകൾ എത്തുന്നു. ഭക്ഷണത്തിലൂടെ മനസിലെ മുറിവുകൾ ഉണക്കുന്നതാണ് ഈ കഥ.
3. സ്ട്രേഞ്ച് വെതർ ഇൻ ടോക്കിയോ - ഹിരോമി കവാകാമി
ഒറ്റയ്ക്ക് ജീവിക്കുന്ന മുപ്പതുകാരിയായ ഒരു സ്ത്രീയും അവരുടെ മുൻ അധ്യാപകനും തമ്മിൽ ഒരു ചെറിയ ഭക്ഷണശാലയിൽ വെച്ച് ഉടലെടുക്കുന്ന സാവധാനത്തിലുള്ള സ്നേഹത്തിന്റെ കഥയാണ് ഇത്.
4. ഡേയ്സ് അറ്റ് ദി മോറിസാക്കി ബുക്ക്ഷോപ്പ് - സതോഷി യാഗിസാവ
പ്രണയനഷ്ടത്തിൽ തകർന്നുപോയ ഒരു യുവതി, ടോക്കിയോയിലെ പഴയ പുസ്തകശാലയിൽ എത്തി പുസ്തകങ്ങളിലൂടെ ജീവിതത്തിലേക്ക് തിരിച്ചുവരുന്ന കഥ. വായന എങ്ങനെ മനുഷ്യനെ രക്ഷിക്കും എന്ന് ഈ നോവൽ വ്യക്തമാക്കുന്നു.
5. ദി നകാനോ ത്രിഫ്റ്റ് ഷോപ്പ് - ഹിരോമി കവാകാമി
പഴയ സാധനങ്ങൾ വിൽക്കുന്ന ഒരു കടയും അവിടെ ജോലി ചെയ്യുന്നവരുടെ ജീവിതവുമാണ് പ്രമേയം. ഓരോ വസ്തുവിനും പിന്നിലുള്ള ഓർമകളിലൂടെ ജീവിതത്തെ നോക്കിക്കാണുന്ന രചന.
ഇന്നത്തെ വായനക്കാർ ആഗ്രഹിക്കുന്നത് ആവേശം മാത്രമല്ല, ആശ്വാസം കൂടിയാണ്. ഒരു ദിവസത്തെ തിരക്കുകൾക്ക് ശേഷം, മനസ്ഒന്ന് തണുപ്പിക്കാൻ ഈ പുസ്തകങ്ങൾ സഹായിക്കുന്നു എന്നതാണ് ഇവയുടെ വിജയത്തിന് കാരണം."ഒന്ന് നിർത്തുക, ഒരു കാപ്പി കുടിക്കുക, എല്ലാം ശരിയാകും" എന്ന സന്ദേശമാണ് ഈ പുസ്തകങ്ങൾ നൽകുന്നത്.
ഹീലിംഗ് ഫിക്ഷൻ വെറുമൊരു ട്രെൻഡ് അല്ല. മാറുന്ന ജീവിതശൈലിയിൽ, മാനസികാരോഗ്യത്തിന് വായന നൽകുന്ന പ്രാധാന്യത്തെയാണ് ഇത് സൂചിപ്പിക്കുന്നത്. പുസ്തകങ്ങൾ വെറും വിനോദമല്ല, അവ മനസ്സിനുള്ള മരുന്ന് കൂടിയാണ് എന്ന് ഈ ജാപ്പനീസ് രചനകൾ തെളിയിക്കുന്നു.