20

ബംഗ്ലാദേശ് വനം വകുപ്പിന്‍റെ പുതിയ ഔദ്യോഗിക യൂണിഫോം എന്ന പേരിൽ സമൂഹമാധ്യമങ്ങളിൽ പ്രചരിക്കുന്ന ചിത്രങ്ങൾ വലിയൊരു തട്ടിപ്പാണെന്ന് തെളിഞ്ഞു.

കടുവയുടെ വരകളുള്ള ഷർട്ടും പാമ്പിന്‍റെ തോൽ പോലുള്ള പാന്‍റും ധരിച്ച് രണ്ട് പുരുഷന്മാർ നിൽക്കുന്ന ചിത്രം എക്സ് പ്ലാറ്റ്‌ഫോമിലൂടെയാണ് വൈറലായത്.

ഔദ്യോഗിക വേഷത്തിന് സമാനമായ ഐഡി കാർഡുകളും ബാഡ്ജുകളും ബെൽറ്റും ധരിച്ചിരിക്കുന്നതുകൊണ്ട് ഒറ്റനോട്ടത്തിൽ ഇതൊരു യഥാർഥ വേഷമാണെന്ന് പലർക്കും തോന്നിപ്പോയി.

എന്നാൽ കടുവയുടെയും പാമ്പിന്‍റെയും പ്രിന്‍റുകൾ കൂട്ടിയിണക്കിയുള്ള ഈ വേഷധാരണം വനം വകുപ്പിന്‍റെ യൂണിഫോമായിരിക്കാൻ യാതൊരു സാധ്യതയുമില്ല. ഈ ചിത്രം സമൂഹമാധ്യമങ്ങളിൽ വൻതോതിൽ പരിഹാസത്തിന് വഴിയൊരുക്കി.

വസ്ത്രധാരണത്തെയും വനം വകുപ്പിന്‍റെ പേരിനെയും ബന്ധപ്പെടുത്തി നിരവധി തമാശകളാണ് ആളുകൾ പങ്കുവെച്ചത്. മുകളിൽ കടുവയുടെയും താഴെ പാമ്പിന്‍റെയും പ്രിന്‍റ് ഉള്ള വേഷം ഒരു പൂർണ ആവാസവ്യവസ്ഥയെ തന്നെ സൂചിപ്പിക്കുന്നുണ്ടെന്ന തരത്തിൽ വരെ പരിഹാസങ്ങൾ ഉയർന്നു.

എന്നാൽ ഈ ചിത്രങ്ങൾ എഐ ഉപയോഗിച്ച് നിർമ്മിച്ചതാണെന്ന് വ്യക്തമാക്കുന്ന സൂചനകൾ പലരും കണ്ടെത്തുകയും തുടർന്ന് ഇക്കാര്യം സ്ഥിരീകരിക്കുകയും ചെയ്തു.

ബംഗ്ലാദേശ് വനം വകുപ്പ് ഇത്തരത്തിൽ ഒരു യൂണിഫോം പുറത്തിറക്കിയിട്ടില്ലെന്നും, ഇത് വെറും ഇന്‍റർനെറ്റ് തമാശ മാത്രമാണെന്നും എഐ ടൂളുകൾ സാക്ഷ്യപ്പെടുത്തുന്നു.

ഔദ്യോഗിക പ്രഖ്യാപനങ്ങളോ വിവരങ്ങളോ ഇല്ലാതെ ഇന്‍റർനെറ്റിൽ എത്തുന്ന വിവരങ്ങൾ വിശ്വസിക്കുന്നതിന് മുമ്പ് കാര്യങ്ങൾ പരിശോധിക്കേണ്ടതിന്‍റെ ആവശ്യകതയാണ് ഈ സംഭവം വീണ്ടും ഓർമ്മിപ്പിക്കുന്നത്.

Tags : AIArt ViralNews InternetHoax Bangladesh FactCheck