രാത്രികാല ട്രെയിൻ യാത്രകളിൽ സഹയാത്രക്കാരുടെ അനാവശ്യ ബഹളം കാരണം ഉറക്കം നഷ്ടപ്പെട്ട അനുഭവം പങ്കുവെച്ച് ഒരു യാത്രിക രംഗത്തെത്തിയത് സോഷ്യൽ മീഡിയയിൽ പുതിയൊരു ചർച്ചയ്ക്ക് തുടക്കമിട്ടിരിക്കുകയാണ്.
ലക്നോവിൽ നിന്ന് ആനന്ദ് വിഹാറിലേക്ക് സദ്ഭാവന എക്സ്പ്രസിലെ എസി സെക്കൻഡ് ക്ലാസ് കോച്ചിൽ സഞ്ചരിച്ച പൂജ എന്ന യുവതിയാണ് തനിക്ക് നേരിട്ട മോശം അനുഭവം പങ്കുവെച്ചത്.
ഷാജഹാൻപൂരിൽ നിന്ന് രാത്രി ഒമ്പതരയോടെ ട്രെയിനിൽ കയറിയ ഒരു കുടുംബം പുലർച്ചെ ഒരു മണി കഴിഞ്ഞിട്ടും വലിയ ശബ്ദത്തിൽ സംസാരിക്കുകയും ചിരിക്കുകയും ചെയ്തതാണ് പ്രശ്നങ്ങൾക്ക് കാരണമായത്.
നോയിസ് കാൻസലേഷൻ ഇയർഫോണുകൾ ഉപയോഗിച്ചിട്ടുപോലും ശബ്ദം സഹിക്കാനാവാതെ വന്നതോടെ, മറ്റുള്ളവർക്ക് ഉറങ്ങാൻ സൗകര്യമായി ശബ്ദം കുറച്ച് സംസാരിക്കാമോ എന്ന് പൂജ ഇവരോട് അഭ്യർഥിക്കുകയായിരുന്നു.
എന്നാൽ, ഈ അഭ്യർഥനയോട് വളരെ മോശമായാണ് ആ കുടുംബത്തിലെ മുതിർന്നയാൾ പ്രതികരിച്ചത്. ഏറെ നാളുകൾക്ക് ശേഷമാണ് തങ്ങൾ ഒന്നിച്ച് യാത്ര ചെയ്യുന്നതെന്നും അതിനാൽ സംസാരിക്കുക തന്നെ ചെയ്യുമെന്നുമായിരുന്നു അയാളുടെ നിലപാട്.
താൻ സംസാരിക്കുന്നതിനെ എതിർക്കുന്നില്ലെന്നും ശബ്ദം അൽപ്പം കുറയ്ക്കണമെന്ന് മാത്രമാണ് ആവശ്യപ്പെടുന്നതെന്നും പൂജ വ്യക്തമാക്കിയെങ്കിലും, തങ്ങൾ കുടുംബസമേതം യാത്ര ചെയ്യുന്നവരാണെന്നും ഒറ്റയ്ക്ക് യാത്ര ചെയ്യുന്നവരെപ്പോലെ മിണ്ടാതിരിക്കാൻ കഴിയില്ലെന്നും പറഞ്ഞ് അയാൾ പരിഹസിക്കുകയാണുണ്ടായത്.
പൊതുഗതാഗത സംവിധാനങ്ങൾ വ്യക്തിപരമായ ലിവിംഗ് റൂമുകളല്ലെന്നും രാത്രിസമയങ്ങളിൽ മറ്റുള്ളവരുടെ ഉറക്കത്തിന് വില കൽപ്പിക്കണമെന്നും ചൂണ്ടിക്കാട്ടി യുവതി എക്സിൽ കുറിച്ച കുറിപ്പ് വളരെ പെട്ടെന്നാണ് ശ്രദ്ധനേടിയത്.
ഇതോടെ പൊതുഗതാഗതത്തിലെ അടിസ്ഥാനപരമായ യാത്രമര്യാദകളെക്കുറിച്ചും റെയിൽവേ നിയമങ്ങളെക്കുറിച്ചുമുള്ള ചർച്ചകൾ ശക്തമായി. ഇത്തരം സന്ദർഭങ്ങളിൽ സഹയാത്രക്കാരുമായി അനാവശ്യ തർക്കങ്ങളിൽ ഏർപ്പെടാതെ റെയിൽവേയുടെ പരാതി പരിഹാര സംവിധാനങ്ങൾ ഉപയോഗപ്പെടുത്താനാണ് ഭൂരിഭാഗം ആളുകളും നിർദ്ദേശിക്കുന്നത്.
രാത്രി 10 മണിക്ക് ശേഷം കോച്ചുകളിൽ ലൈറ്റുകൾ അണയ്ക്കണമെന്നും ഉറക്കത്തിന് ഭംഗം വരുത്തുന്ന രീതിയിൽ ബഹളമുണ്ടാക്കാനോ വലിയ ശബ്ദത്തിൽ പാട്ടുകൾ വെക്കാനോ പാടില്ലെന്നുമാണ് റെയിൽവേ ചട്ടം.
ഇത്തരത്തിൽ ബുദ്ധിമുട്ടുകൾ നേരിടുമ്പോൾ 139 എന്ന ഹെൽപ്പ് ലൈൻ നമ്പറിലോ 'റെയിൽ മദദ്' ആപ്പ് വഴിയോ പരാതി നൽകിയാൽ ടിടിഇയോ ആർപിഎഫ് ഉദ്യോഗസ്ഥരോ ഉടനടി ഇടപെട്ട് പ്രശ്നം പരിഹരിക്കുമെന്നും നിരവധി പേർ അഭിപ്രായപ്പെട്ടു.
I had booked a 2AC ticket on Train 14007 Sadbhavana Express for my return journey from Lucknow I thought I had sleep peacefully at night and reach Anand Vihar in the morning. But one family that boarded at Shahjahanpur completely ruined the peace of my journey...1/2 https://t.co/hT4Ab8vxVp
— Pooja (@poojaofficial5) October 7, 2026
Tags : IndianRailways SadbhavanaExpress TrainTravel RailMadad PassengerSafety