മുംബൈയിൽ ട്രെയിനിൽനിന്നു താഴെ വീണ് അഞ്ചുപേർക്കു ദാരുണാന്ത്യം
Tuesday, June 10, 2025 1:49 AM IST
മുംബൈ: മുംബൈയിൽ തിരക്കേറിയ സബർബൻ ട്രയിനിന്‍റെ ചവിട്ടുപടിയിൽനിന്നു വീണ് അഞ്ച് യാത്രക്കാർക്ക് ദാരുണാന്ത്യം. ഏഴുപേർ പരിക്കുകളോടെ ആശുപത്രിയിൽ ചികിത്സയിലാണ്.
താനെയിലെ കസറയിൽനിന്ന് മുംബ്ര സ്റ്റേഷനിലേക്കു വരികയായിരുന്ന ട്രെയിനിൽനിന്ന് ഇന്നലെ രാവിലെ ഒന്പതോടെയാണ് യാത്രക്കാർ താഴെ വീണത്. ട്രെയിനില്‍ ക്രമാതീതമായ തിരക്കുണ്ടായിരുന്നു. ഒട്ടേറെ യാത്രക്കാര്‍ വാതിലുകളുടെ കമ്പിയില്‍ തൂങ്ങിയാണ് യാത്രചെയ്തിരുന്നത്. അപകടത്തിന്‍റെ യഥാര്‍ഥ കാരണം വ്യക്തമല്ല.
ദിവ-മുംബ്ര സ്റ്റേഷനുകള്‍ക്ക് ഇടയിൽ എതിർദിശയിൽനിന്ന് മറ്റൊരു ട്രെയിൻ കടന്നുപോകുന്നതിനിടെ അപകടമുണ്ടായെന്നും വിവരമുണ്ട്. താഴെ വീണവരിൽ രണ്ടു ട്രെയിനുകളിൽനിന്നുള്ള യാത്രക്കാർ ഉള്ളതായും പറയപ്പെടുന്നു.
അനിയന്ത്രിത തിരക്കാണ് അപകടകാരണമെന്ന് റെയിൽവേ സ്ഥിരീകരിച്ചു. അന്വേഷണത്തിനു നിർദേശം നൽകി. മുംബൈ സബര്‍ബന്‍ സര്‍വീസിന് സ്വയം അടയുന്ന വാതിലുകളുള്ള റാക്ക് ഉപയോഗിക്കാൻ തീരുമാനമായി. നിലവിലുള്ള റാക്കുകളിൽ വാതിൽ ഘടിപ്പിക്കുന്നതിന്‍റെ സാധ്യതകളെക്കുറിച്ച് ചെന്നൈ ഇന്‍റഗ്രൽ കോച്ച് ഫാക്ടറി അധികൃതരോടു സംസാരിക്കുമെന്നും അധികൃതർ വ്യക്തമാക്കി.
അപകടത്തിൽ മുഖ്യമന്ത്രി ദേവേന്ദ്ര ഫഡ്നാവിസ് ദുഃഖം രേഖപ്പെടുത്തി. ദുരന്തത്തിൽ അനുശോചിച്ച ഉപമുഖ്യമന്ത്രി ഏക്‌നാഥ് ഷിൻഡെ, അപകടത്തിനിരയായവര്‍ക്കും കുടുംബങ്ങള്‍ക്കും സഹായം വാഗ്ദാനം ചെയ്തു.