കോഴിക്കോട്: അറ്റകുറ്റ പ്രവൃത്തികള്ക്കായുള്ള സര്ക്കാര് അനുമതി വൈകുന്നതിനാല് ഗവ. മെഡിക്കൽ കോളജിലെ സീവേജ് ട്രീറ്റ്മെന്റ് പ്ലാന്റ് പ്രവർത്തനം അവതാളത്തില്. അമൃത് പദ്ധതിയിൽ ഉൾപ്പെടുത്തി 17 കോടി ചെലവിൽ കോഴിക്കോട് കോർപറേഷൻ നിർമിച്ച രണ്ട് സീവേജ് ട്രീറ്റ്മെന്റ് പ്ലാന്റുകളിൽ ഒന്നിന്റെ പ്രവർത്തനമാണ് തടസപ്പെട്ടത്. മെഡിക്കല് കോളജ് സ്റ്റേഡിയത്തിന്റെ കിഴക്കുഭാഗത്തെ രണ്ട് എംഎൽഡി ശേഷിയുള്ള പ്ലാന്റിലെ മലിനജലം പരിസരത്തേക്ക് ഒഴുകുകയാണ്. വെള്ളം കെട്ടിക്കിടക്കുന്നതിനാൽ കൊതുകുശല്യവും ദുർഗന്ധവും രൂക്ഷമാണ്. പ്ലാന്റ് നടത്തിപ്പ് മെഡിക്കൽ കോളജിന് കൈമാറുന്നതിൽ സർക്കാർ അനുമതി വൈകുന്നതാണ് പ്രതിസന്ധിക്കിടയാക്കുന്നത്. അറ്റകുറ്റ പ്രവൃത്തികള് നടത്തിവേണം പ്ലാന്റ് കൈമാറാന്. പ്ലാന്റിലെ ഇലക്ട്രോഡുകൾ സമയബന്ധിതമായി മാറ്റാത്തതിനാൽ 24 മണിക്കൂറും നടക്കേണ്ട പമ്പിംഗ് കാര്യക്ഷമമല്ല. അറ്റകുറ്റപ്പണികൾക്കായി ഏകദേശം 70 ലക്ഷം രൂപയെങ്കിലും ആവശ്യമാണ്.
നിർമാണ കമ്പനിക്കായിരുന്നുആദ്യവർഷം നടത്തിപ്പ്. അടുത്ത രണ്ടുവർഷം കോർപറേഷനും ശേഷം മെഡിക്കൽ കോളജ് നേരിട്ടും നടത്തിപ്പ് നിർവഹിക്കണമെന്നായിരുന്നു വ്യവസ്ഥ. കോർപറേഷന്റെ കരാർ മാസങ്ങൾക്കുമുമ്പ് അവസാനിച്ചു. ആശുപത്രി വികസന സമിതി (എച്ച്ഡിഎസ്) യോഗത്തിൽ പ്ലാന്റ് ഏറ്റെടുക്കാൻ മെഡിക്കല് കോളജ് അധികൃതര് തീരുമാനിച്ചതാണ്. കരാർ കാലാവധി കഴിഞ്ഞതിനാൽ ഇനി അറ്റകുറ്റപ്പണി നടത്തണമെങ്കിൽ സർക്കാർ അനുമതി വേണം. ഇതിനായുള്ള കാത്തിരിപ്പിലാണ് കോളജ് അധികൃതർ. പ്ലാന്റിന് സമീപത്തായി ജീവനക്കാരുടെ നാനൂറോളം ക്വാർട്ടേഴ്സുകളുണ്ട്.മെഡിക്കൽ കോളജിൽനിന്നും അനുബന്ധ സ്ഥാപനങ്ങളിൽനിന്നുമായി പ്രതിദിനം 50 ലക്ഷം ലിറ്ററോളം മലിനജലമാണ് പുറത്തുവരുന്നത്. 30 ലക്ഷം ലിറ്റർ കോർപറേഷൻ നിർമിച്ച രണ്ട് പ്ലാന്റുകളിലായാണ് ശുദ്ധീകരിക്കുന്നത്. ബാക്കി മലിനജലം രണ്ട് എംഎൽഡി ശേഷിയുള്ള പ്ലാന്റിലാണ് സംസ്കരിക്കുന്നത്. എല്ലാ പ്ലാന്റുകളും പ്രവർത്തിച്ചാലേ മലിനജലം പൂർണമായി സംസ്കരിക്കാനാകൂ.