തലശേരി-മൈസൂരു അന്തർസംസ്ഥാന പാതയിൽ ഇരിട്ടി പൊതുമരാമത്ത് ഓഫിസിന് സമീപത്തെ അനധികൃത വ്യാപാര സ്ഥാപനം പൊതുമരാമത്ത് വകുപ്പ് പൊളിച്ചുനീക്കുന്നു.
ഇരിട്ടി: പാതയോരങ്ങൾ കൈയേറിയുള്ള അനധികൃത വ്യാപാര സ്ഥാപനങ്ങൾക്കെതിരേ പൊതുമാരാമത്ത് വകുപ്പ് നടപടി തുടങ്ങി. തലശേരി-മൈസൂരു അന്തർസംസ്ഥാന പാതയോരത്തെ പൊതുമരാമത്ത് വകുപ്പ് ഓഫിസ് പരിസരത്ത് നിർമിച്ച് അനധികൃത നിർമാണങ്ങൾ മണ്ണുമാന്തി യന്ത്രം ഉപയോഗിച്ച് പൊളിച്ചുനീക്കി. മിൽമ ബൂത്തിന് സമീപത്താണ് കഴിഞ്ഞ ദിവസങ്ങളിലായിരുന്നു നിർമാണം നടത്തിയത്.
തൊട്ടടുത്തുള്ള മറ്റൊരു ഷെഡ് പൊളിച്ചുനീക്കാൻ പൊതുമരാമത്ത് വകുപ്പ് നോട്ടീസ് നൽകി. പൊതുമരാമത്ത് വകുപ്പിന്റെ അനുമതിയില്ലാതെ റോഡരികിൽ നിർമിച്ച മറ്റ് ഷെഡുകളും ഘട്ടംഘട്ടമായി പൊളിച്ചുനീക്കുമെന്ന് ഉദ്യോഗസ്ഥർ അറിയിച്ചു. പാതയോരങ്ങളിലെ അനധികൃത നിർമാണം സംബന്ധിച്ച് ദീപിക റിപ്പോർട്ട് ചെയ്തതിനു പിന്നാലെയാണ് നടപടി കർശനമാക്കിയത്.
പൊതുമരാമത്ത് വകുപ്പ് റോഡ്സ് വിഭാഗം എക്സിക്യുട്ടീവ് എൻജിനിയർ ടി. പ്രശാന്ത്, അസിസ്റ്റന്റ് എക്സിക്യുട്ടീവ് എൻജിനിയർ നിധിൻ ലക്ഷ്മണൻ, അസിസ്റ്റന്റ് എൻജിനിയർ രേഷ്മ എന്നിവരുടെ നേതൃത്വത്തിലായിരുന്നു നടപടി. ഇരിട്ടി പാലത്തിന് സമീപം വർഷങ്ങൾക്കുമുമ്പ് നിർമിച്ച നടപ്പാതയും ഇരിപ്പിടവും കാടുകയറി നശിച്ച നിലയിലാണുള്ളത്. ഇവിടെയും ഇരിട്ടി പാലത്തിന് സമീപത്തും പാലത്തിന് മുകളിലുമുള്ള കാടുകൾ വെട്ടിത്തെളിക്കാൻ ബന്ധപ്പെട്ടവർക്ക് നിർദേശം നൽകിയതായി എക്സിക്യുട്ടീവ് എൻജിനിയർ ടി. പ്രശാന്ത് പറഞ്ഞു.
തലശേരി-വളവുപാറ അന്തർ സംസ്ഥാന പാതയുടെ നവീകരണത്തിന്റെ ഭാഗമായി റോഡിന്റെ അലൈൻമെന്റിൽ വലിയ മാറ്റം വരുത്തിയിരുന്നു. ഇതു പ്രകാരം വളവും തിരിവും കുറക്കുന്നതിന്ചിലയിടങ്ങളിൽ നേരത്തെ ഉണ്ടായിരുന്ന റോഡിന്റെ ഭാഗം ഒഴിവാക്കിയിരുന്നു. ഈ ഭാഗങ്ങളിലാണ് വലിയ തോതിൽ കൈയേറ്റങ്ങൾ നടക്കുന്നത്. ഇത്തരത്തിൽ കൈയേറി ഷെഡുകൾ നിർമിച്ചുള്ള വ്യാപാരശാലകൾ കേന്ദ്രീകരിച്ച് നിരോധിത ലഹരി വസ്തുക്കളുടെ വിൽപന നടക്കുന്നതായും പരാതിയുണ്ട്.
Tags : Action against encroachments Nattuvishesham DistrictNews