അടൂർ: പൈപ്പിട്ട ശേഷം റോഡ് പഴയതുപോലെ നന്നാക്കാത്തതു കാരണം അപകടക്കുഴികൾ. ഏനാത്ത് - ഏഴംകുളം റോഡിന്റെ വശങ്ങളിലാണ് ആളെ വീഴ്ത്തും കുഴികൾ. മാസങ്ങൾക്ക് മുന്പ് പണികൾക്കു ശേഷം മണ്ണും മെറ്റലുമിട്ട് കുറെ ഉറപ്പിച്ചു പോയതാണ്.
പക്ഷേ ആഴ്ചകൾക്കുള്ളിൽ വീണ്ടും നടത്തിയ പൈപ്പിന്റെ പണികളാണ് ഇപ്പോൾ കുഴികളായിരിക്കുന്നത്. പ്രധാന റോഡിൽനിന്ന് ഉപറോഡുകളിലേക്ക് തിരിയുന്നിടത്താണ് അപകടക്കുഴികൾ കൂടുതലും ഉള്ളത്. തട്ടാരുപടി ജംഗ്ഷനിൽനിന്നു കിഴക്കുപുറത്തേക്ക് തിരിയുന്ന രണ്ട് ഉപറോഡുകളിലും അപകടക്കുഴികൾ ഉണ്ട്. ഇരുചക്ര വാഹന യാത്രക്കാരാണ് ഈ കുഴികൾ കാരണം കൂടുതൽ കഷ്ടപ്പെടുന്നത്.
പൈപ്പ് പണിക്കുശേഷം റോഡ് വശങ്ങൾ പഴയതുപോലെ നന്നാക്കാൻ സാധിച്ചിട്ടില്ലെന്നാണ് നാട്ടുകാർ പറയുന്നത്. അപകടകരമായികിടക്കുന്ന കുഴികളെങ്കിലും പെട്ടെന്ന് അടയ്ക്കണമെന്നാണ് നാട്ടുകാരുടെ ആവശ്യം.