പൊൻകുന്നം ബസ് സ്റ്റാൻഡിലെ ശൗചാലയം അടച്ചിട്ട നിലയിൽ.
പൊൻകുന്നം: അറ്റകുറ്റപ്പണികൾക്കായി രണ്ടുദിവസത്തേക്കെന്ന് പറഞ്ഞ് അടച്ചിട്ട പൊൻകുന്നം പ്രൈവറ്റ് ബസ് സ്റ്റാൻഡിലെ കംഫർട്ട് സ്റ്റേഷൻ ദിവസങ്ങൾ പിന്നിട്ടിട്ടും തുറന്നില്ല. ചിറക്കടവ് പഞ്ചായത്തിന്റെ സ്വകാര്യ ബസ് സ്റ്റാൻഡിൽ കംഫർട്ട് സ്റ്റേഷൻ 14, 15 തീയതികളിൽ അടച്ചിടുമെന്ന് കാണിച്ച് ചിറക്കടവ് പഞ്ചായത്ത് നോട്ടീസ് പതിച്ചാണ് പൂട്ടിയത്.
എരുമേലി, പമ്പ എന്നിവിടങ്ങളിലേക്ക് പോകുന്നതിനായി നൂറുകണക്കിന് അയ്യപ്പഭക്തരാണ് ദിവസേന പൊൻകുന്നം ബസ് സ്റ്റാൻഡിൽ എത്തിച്ചേരുന്നത്. ഇതോടൊപ്പം നിത്യേന യാത്ര ചെയ്യുന്ന നൂറുകണക്കിന് സ്കൂൾ, കോളജ് വിദ്യാർഥികളും സ്ത്രീകളും ഉൾപ്പടെയുള്ള പൊതുജനങ്ങളും ആശ്രയിക്കുന്ന ഏക ശൗചാലയമാണിത്.
തീർഥാടകരുടെയും പൊതുജനങ്ങളുടെയും ദുരിതം കണക്കിലെടുത്ത് ശൗചാലയം എത്രയും വേഗം തുറന്നുപ്രവർത്തിക്കാൻ അടിയന്തര നടപടി സ്വീകരിക്കണമെന്നാണ് യാത്രക്കാരുടെയും വ്യാപാരികളുടെയും ശക്തമായ ആവശ്യം.
Tags : omfort station at Ponkunnam Nattuvishesham DistrictNews