ക്രൈസ്റ്റ് നഗർ സെൻട്രൽ സ്കൂളിലെ ആർട്ട് ഡിപ്പാർട്ട്മെന്റിന്റെ ആഭിമുഖ്യത്തിൽ സംഘടിപ്പിച്ച "ടീ എൻഡ് ഷേഡ്സ്' ഏകദിന കലാക്യാമ്പിൽ പങ്കെടുത്ത വിദ്യാർഥികൾ ചിത്ര
തിരുവനന്തപുരം: കലയും സംഗീതവും പ്രകൃതിയും സർഗാത്മകതയും സമന്വയിപ്പിച്ച് ക്രൈസ്റ്റ് നഗർ സെൻട്രൽ സ് കൂളിലെ ആർട്ട് ഡിപ്പാർട്ട്മെന്റിന്റെ ആഭിമുഖ്യത്തിൽ "ടീ എൻഡ് ഷേഡ്സ്' എന്ന പേരിൽ ഏകദിന കലാക്യാമ്പ് സംഘടിപ്പിച്ചു.
അഞ്ചാം ക്ലാസ് മുതൽ പതിനൊന്നാം ക്ലാസ് വരെയുള്ള വിദ്യാർഥികൾ ക്യാന്പിൽ പങ്കെടുത്തു. സ്വയം തയാറാക്കിയ കട്ടൻചായ ഉപയോഗിച്ച് ചിത്രങ്ങൾ വരച്ചതാണ് ക്യാമ്പിലെ ഏറ്റവും ശ്രദ്ധേയമായ സവിശേഷത. ഇതിനായി വിദ്യാർഥികൾ പരമ്പരാഗത രീതിയിൽ അടുപ്പുകൂട്ടി തീ കത്തിച്ചു കട്ടൻചായ തയാറാക്കി. ചിത്രരചനയ്ക്ക് പെയിന്റുകൾക്കു പകരം കട്ടൻചായയുടെ വിവിധ നിറഭേദങ്ങളാണ് ഉപയോഗിച്ചത്. പ്രകൃതിദത്തമായ ഈ മാധ്യമത്തിലൂടെ വ്യത്യസ്ത ചിത്രങ്ങൾ ഒരുക്കിയ വിദ്യാർഥികൾക്ക് കലയും പ്രകൃതിയും പാചകാനുഭവവും സമന്വയിപ്പിച്ച വേറിട്ടൊരു അനുഭവം സ്വന്തമാക്കാനായി.
ചിത്രകലയുടെ വിവിധ മേഖലകളിൽ വിദ്യാർഥികൾക്ക് പ്രായോഗിക പരിശീലനം നൽകുന്നതിനായി മ്യൂറൽ പെയിന്റിംഗ്, ഡൂഡിൽ ആർട്ട്, ലൈഫ് പെയിന്റിംഗ്, ഡിജിറ്റൽ ആർട്ട്, കാരിക്കേച്ചർ തുടങ്ങിയ വിഭാഗങ്ങളിൽ പ്രമുഖ കലാകാരന്മാർ ക്ലാസുകൾ നയിച്ചു. ഫൈൻ ആർട്സ് കോളജിൽ നിന്നുള്ള നാടൻപാട്ട് സംഘത്തിന്റെ സംഗീതാവതരണം ക്യാമ്പിന് കൂടുതൽ ഉണർവേകി. ചിത്രകലയും സംഗീതവും പരമ്പരാഗത കലാപ്രവർത്തനങ്ങളും ഒത്തുചേർന്ന ക്യാമ്പ് വിദ്യാർഥികൾക്ക് പഠനത്തിനപ്പുറമുള്ള സർഗാത്മക അനുഭവവേദിയായി മാറി. അവധിദിനം മൊബൈൽ ഫോണുകളിൽ ചെലവഴിക്കുന്നതിനുപകരം പ്രകൃതിയോടിണങ്ങി പുതിയ കാര്യങ്ങൾ പഠിക്കാനും സ്വന്തം കഴിവുകൾ തിരിച്ചറിയാനും പരീക്ഷണങ്ങളിലൂടെ സർഗാത്മകത വളർത്താനും ക്യാമ്പ് കുട്ടികൾക്ക് അവസരമൊരുക്കി.
സ്കൂൾ പ്രിൻസിപ്പൽ റവ. ഫാ. സിറിയക്ക് കാനായിൽ സിഎം ഐ ആവശ്യമായ മാർഗനിർദേശങ്ങളും പിന്തുണയും നൽകി. ആർട്ട് അധ്യാപകരായ എ. ഷഫീഖ്, വി. പൂർണിമ എന്നിവർ ക്യാമ്പിന് നേതൃത്വം നൽകി. അധ്യാപകരുടെയും അനധ്യാപക ജീവനക്കാരുടെയും കൂട്ടായ സഹകരണത്തോടെ ക്യാമ്പ് വിജയകരമായി സമാപിച്ചു.
Tags : colors of nature District News Local News Creating wonder