ജനവാസ മേഖലകളെ പരിസ്ഥിതിലോല പട്ടികയിൽ നിന്ന് ഒഴിവാക്കണമെന്നാവശ്യപ്പെട്ട് കെ.യു. ജനീഷ് കുമാർ എംഎൽഎ മന്ത്രി സണ്ണി ജോസഫിനു നിവേദനം നൽകിയപ്പോൾ.
പത്തനംതിട്ട: കേന്ദ്ര സർക്കാർ പുറത്തിറക്കിയ പരിസ്ഥിതി ലോല മേഖലകളുടെ കരട് വിജ്ഞാപനവുമായി ബന്ധപ്പെട്ട് ജനങ്ങൾക്കിടയിൽ നിലനിൽക്കുന്ന ആശങ്കകൾ പരിഹരിക്കണമെന്ന് കെ.യു. ജനീഷ് കുമാർ എംഎൽഎ. സംസ്ഥാന പരിസ്ഥിതി മന്ത്രി സണ്ണി ജോസഫ്, പരിസ്ഥിതി വകുപ്പ് സെക്രട്ടറി എം.ജി. രാജമാണിക്യം എന്നിവരെ എംഎൽഎയും മലയോര മേഖലയിലെ തദ്ദേശ സ്ഥാപന ജനപ്രതിനിധികളും സന്ദർശിച്ചു നിവേദനം നൽകി.
ജനവാസ മേഖലകളെ ഒഴിവാക്കിക്കൊണ്ട്, കഴിഞ്ഞ ഗവൺമെന്റ് നൽകിയ പ്രൊപ്പോസൽ പ്രകാരം നടപടികളുമായി മുന്നോട്ട് പോകണമെന്നാണ് പ്രധാനമായും ആവശ്യപ്പെട്ടതെന്ന് ജനീഷ് കുമാർ പറഞ്ഞു. തിങ്ങിനിറഞ്ഞ ജനവാസമുള്ള പ്രദേശങ്ങൾ ഈ പരിസ്ഥിതി ലോല പട്ടികയിൽ അന്തിമമായി ഉൾപ്പെടുത്തിയാൽ, അവിടങ്ങളിലെ ജനങ്ങളുടെ സാധാരണ ജീവിതവും താമസം ഉൾപ്പെടെ അസാധ്യമായി മാറും.
കരട് വിജ്ഞാപനത്തിനെതിരേ ജനങ്ങളെ അണിനിരത്തിക്കൊണ്ടുള്ള ശക്തമായ പ്രതിഷേധങ്ങളും അതോടൊപ്പം നിയമപരമായ നടപടികളും ഒന്നിച്ച് മുന്നോട്ട് കൊണ്ടുപോകേണ്ടതുണ്ടെന്നും എംഎൽഎ അഭിപ്രായപ്പെട്ടു. മലയോര ജനതയുടെ നിലനില്പും ജീവനോപാധികളും സംരക്ഷിക്കാൻ സംസ്ഥാന സർക്കാരിന്റെ ഭാഗത്തുനിന്ന് ശക്തമായ ഇടപെടലുകൾ അടിയന്തരമായി ഉണ്ടാകേണ്ടതുണ്ടതെന്നും എംഎൽഎ ആവശ്യപ്പെട്ടു.
Tags : District News Nattuvishesham Ecologically Sensitive Area