ചക്കിട്ടപാറ: പേരാമ്പ്ര മണ്ഡലത്തിൽ നിന്ന് വിജയിച്ച യുഡിഎഫ് സ്ഥാനാർഥി ഫാത്തിമ തഹ്ലിയ വോട്ടർമാർക്ക് നന്ദി പറഞ്ഞ് ചക്കിട്ടപാറ പഞ്ചായത്തിൽ ഇന്നലെ പര്യടനം നടത്തി.
മലയോര മേഖലയായ ചക്കിട്ടപാറ പഞ്ചായത്തിലെ ജനങ്ങൾ നേരിടുന്ന പ്രശ്നങ്ങൾ പരിഹരിക്കുന്നതിൽ ഒപ്പമുണ്ടാകുമെന്ന് അവർ പറഞ്ഞു. വയനാട് ബദൽ റോഡ്, പ്ലാന്റേഷൻ കോർപറേഷന്റെ പേരാമ്പ്ര എസ്റ്റേറ്റിൽ തൊഴിലാളികളുടെ ദുരിതം, കർഷകർ നേരിടുന്ന വന്യമൃഗശല്യം എന്നിവക്ക് പരിഹാരം കാണുന്നതിന് പ്രഥമ പരിഗണന നൽകുമെന്നും തഹ്ലിയ കൂട്ടിച്ചേർത്തു. കൂവപ്പൊയിലിൽ ആരംഭിച്ച് പന്നിക്കോട്ടൂർ, ചെമ്പനോട, കുറത്തിപ്പാറ, പൂഴിത്തോട്, മുതുകാട്, ചെങ്കോട്ടക്കൊല്ലി, അണ്ണക്കൊട്ടൻ ചാൽ, പിള്ളപ്പെരുവണ്ണ, മുക്കവല, താന്നിയോട്, ചക്കിട്ടപാറ, നരിനട, പള്ളിക്കുന്ന്, ചെമ്പ്ര കേന്ദ്രങ്ങളിലൂടെ സഞ്ചരിച്ച് മുക്കള്ളിൽ സമാപിച്ചു.
യുഡിഎഫ് പഞ്ചായത്ത് ചെയർമാൻ ജോർജ് മുക്കള്ളിൽ, കൺവീനർ ആവള ഹമീദ്, നേതാക്കളായ മൂസ കോത്തംബ്ര, പി.ടി. അഷ്റഫ്, മോളി തോമസ്, ജിതേഷ് മുതുകാട്, രാജീവ് തോമസ്, ജെയിംസ് മാത്യു, ജിൻസി മനോജ്, ബിന്ദു ബാലകൃഷ്ണൻ തുടങ്ങിയവർ പര്യടന പരിപാടിക്ക് നേതൃത്വം നൽകി.