ചെറുപുഴ: ശ്രേയസ് കാസർഗോഡ് മേഖല ചെറുപുഴ യൂണിറ്റിന്റെയും കണ്ണൂർ ജില്ലാ ആശുപത്രി സഞ്ചരിക്കുന്ന നേത്രവിഭാഗത്തിന്റെയും സംയുക്താഭിമുഖ്യത്തിൽ സൗജന്യ നേത്രപരിശോധനയും തിമിര ശസ്ത്രക്രിയ നിർണയ ക്യാമ്പും സംഘടിപ്പിച്ചു. വാണിയംകുന്ന് യൂണിറ്റ് ഓഫീസിൽ നടന്ന ക്യാമ്പിൽ നൂറുകണക്കിനാളുകൾ പങ്കെടുത്തു.
ചെറുപുഴ പഞ്ചായത്ത് വൈസ് പ്രസിഡന്റ് സതീശൻ കാർത്തികപ്പള്ളി ക്യാമ്പ് ഉദ്ഘാടനം ചെയ്തു. യൂണിറ്റ് പ്രസിഡന്റ് ടി.ജെ. ഷാജി അധ്യക്ഷത വഹിച്ചു. ശ്രേയസ് കാസർഗോഡ് മേഖല പ്രോഗ്രാം ഓഫീസർ ഷാജി മാത്യു, കണ്ണൂർ ജില്ലാ ആശുപത്രി ഓഫ്താൽമിക് സർജൻ ഡോ. ഒ.ടി. രാജേഷ്, ജില്ലാ ഓഫ്താൽമിക് കോ-ഓർഡിനേറ്റർ ആർ.എസ്. പ്രസാദ്, ഒപ്റ്റോമെട്രിസ്റ്റ് ശുഭ സുനിൽ, ശ്രേയസ് യൂണിറ്റ് സിഡിഒ വിലാസിനി ചന്ദ്രൻ എന്നിവർ പ്രസംഗിച്ചു.